Datasets:
File size: 236,751 Bytes
7b03a83 |
1 |
ⴰⴷⴷⴰⵢ ⵢⴰⵡⴹ ⵓⵏⴱⴷⵓ, ⵓⵔⴰⵖⵏⵜ ⵜⵎⵥⵉⵏ, ⴽⵔⵎⵏ ⵉⴱⴰⵡⵏ ⴳ ⵉⴳⵔⴰⵏ, ⵍⵍⴰ ⵏⴽⴽⵔⵏ ⵎⵉⴷⴷⵏ, ⵍⵍⴰ ⵙⵙⵓⵊⴰⴷⵏ ⵉ ⵓⵎⵡⵔ. ⵡⵏⵏⴰ ⵎⵉ ⵜⵙⵙⵓⵊⴷ ⵜⵎⵟⵟⵓⴹⵜ ⵏⵏⵙ ⵜⴰⴱⴰⵏⵜⴰ, ⵡⵏⵏⴰ ⵎⵉ ⵓⵔ ⵜⵜ ⵜⵙⵙⵓⵊⵉⴷ, ⵍⵍⴰ ⵜⵜ ⵉⴷ ⵉⵙⵙⴰⵖ, ⵏⵜⵜⴰⵜ ⴷ ⵉⵎⵓⵔⴰⵏ. ⵍⵍⴰ ⵉⵜⵜⵉⵍⵉ ⴱⴰⴱ ⵏ ⵜⵢⵓⴳⴰ, ⵍⵍⴰ ⵉⵙⵖⴰ ⵙⵏⴰⵜ ⵅⴷ ⵛⵕⴰⴹⵜ ⵏ ⵛⵛⴱⴰⴽ, ⵅⴷ ⵍⵍⴰ ⵜⵏⵜ ⵉⵄⴷⴷⵍ ⵙ ⵓⴼⵓⵙ ⵏⵏⵙ, ⵢⵉⵍⵉ ⵓⵅⵎⵎⴰⵙ, ⵍⵍⴰ ⵉⴹⴱⴱⵕ ⵉ ⵜⵉⵏⵏⵙ. ⵢⵓⵜ ⵏ ⵜⴷⴳⴳⵯⴰⵜ ⵍⵍⴰ ⴷ ⵉⵇⵇⴰⵔ ⴱⴰⴱ ⵏ ⵜⵉⵢⵓⴳⴰ ⵉ ⵡⴰⵔⵔⴰⵡ ⵏⵏⵙ ⵏⵉtⵜⵏⵉ ⴷ ⵓⴼⵍⵍⴰⵃ, ⵢⵉⵏⵉ ⴰⵙⵏ: « ⵉⵡⴰ ⵥⵥⴰⵍⵍⴰⵜ ⵅⴼ ⵏⵏⴱⵉ, ⴰⵙⴽⴽⴰ ⴰⴷ ⵏⴱⴷⵓ ⴳ ⴰⵎⵡⵔ, ⵢⴰⵜ ⵉⵔⵉⵢⵣⵏ, ⵀⴰ ⵜⵜ ⵉⵏⵏ ⵅⴰⵙ ⵏⵓⴽⵏⵉ ⴳ ⵏⵙⵓⵍ ⵓⵔ ⵏⵙⵀⵉⵍ »; ⴰⵙⴽⴽⴰ ⵏⵏⵙ ⵍⵍⴰ ⴱⴷⴷⵓⵏ ⴳ ⵓⵎⵡⵔ ⵏ ⵉⴱⴰⵡⵏ ⵖⵉⵔⵙ ⵡⵉⵏ ⵜⵎⵥⵉⵏ, ⵄⴰⴷ ⵖⵉⵔⵙ ⵡⵉⵏ ⵉⵔⴷⵏ, ⵉⴷⵖ ⵉⵔⴷⵏ ⵓⵔ ⴷ ⵓⴳⴳⵯⵏ ⵛⴰ ⵣⵉⴽ. ⴰⴷⴷⴰⵢ ⵄⴷⴷⵓⵏⵜ ⵛⵛⴱⴰⴽ ⴳ ⵉⴳⵔⴰⵏ, ⵍⵍⴰ ⵉⵜⵜⵄⴰⵢⴰⴷ ⵢⵓⵏ ⵓⴼⵍⵍⴰⵃ ⵖⵔⵙ ⴰⵏⵇⵇⵍ ⵏⵏⵙⵏⵜ; ⴰⴷⴷⴰⵢ ⵛⵎⵎⵍⵏ ⵎⴷⴷⵏ ⵙⴳ ⵢⵉⴳⵔⴰⵏ, ⴰⵍⵉⵏⵜ ⵜⴰⴼⴼⵉⵡⵉⵏ ⴳ ⵉⵏⵓⵔⴰⵔ, ⵍⵍⴰ ⴱⴷⴷⵓⵏ ⴰⵔⵡⴰ ⵏ ⵉⵎⵏⴷⵉ; ⵍⵍⴰ ⵙⵙⵡⴰⵏ ⴰⵕⵕⵃⴱⵉ ⵏⵏⵙⵏⵜ, ⵄⴰⴷ ⴰⴷ ⴳⴳⴰⵔⵏ ⵉⵎⵏⴷⵉ ⵙ ⴰⵎⵎⴰⵙ; ⴽⵓⵍ ⵜⵙⵔⵡⴰⵜⵏ ⵏⵣⵣⵏⵏ ⵉ ⵜⵙⵔⴼⵉⵏ ⴳ ⵍⵎⵔⵓⵙ; ( 4 ) ⴷⴼⴼⵉⵔ ⵏ ⵓⵔⵡⴰ, ⵍⵍⴰ ⴱⵏⵏⵉⵏ ⴰⵍⵉⵎ, ⴱⴱⵉⵏ ⴷ ⴰⵣⴳⴳⵯⴰⵔ, ⴼⵔⵉⵏ ⵉ ⵕⵕⵃⴱⵜ, ⵎⵃⴰⵙⴰⴱⵏ, ⴰⵙⵉⵏ ⵍⴼⴰⵜⵃⴰ, ⵎⵚⴰⴼⴰⴹⵏ, ⵉⵏⵉⵏ: « ⵉⵡⴰ ⵍⵄⵇⴱⴰ ⵙ ⵉⵎⴰⵍ, ⴰ ⵍⵊⵡⴰⴷ ⵕⴱⴱⵉ ⴰⴷ ⵉⴳ ⵍⴱⴰⵕⴰⴽⴰ! » ⵀⴰⵛ ⵜⵓⴽⵙⴰ ⵏ ⴹⴹⵕⴰ ⵜⵉⵡⵡⴹ; ⴷⴼⴼⵉⵔ ⴰⵙ ⵓⵔ ⵜⵇⵇⵉⵎ ⵍⵅⴷⵎⵜ; ⵍⵍⴰ ⵜⵖⵉⵎⴰⵏ ⵎⴷⴷⵏ ⴰⴷ ⵙⵡⵓⵏⴼⴰⵏ ⵛⵡⵉ ⵉⵖⵙⴰⵏ ⵏⵏⵙⵏ: ⵍⵍⴰ ⵉⵜⵜⵀⵡⵡⴰⴷ ⵓⵔⵢⴰⵣ ⵖⵔ ⴼⴰⵙ ⵅⴷ ⵉⴷⴷⵓ ⵖⵔ ⵙⵙⵓⵇ ⴰⴷ ⵉⵏⴼⵇ ⵉ ⴰⵢⵜ ⵓⵅⴰⵎ: ⴽⵓⵍ ⵢⵉⵡⵏ ⵎⴰ ⵙ ⴷ ⵉⵙⵙⴰⵖ ⵉⴷⵖ ⴳ ⵍⵅⵔⵉⴼ ⴰⵢⵏⵏⴰ ⵄⴷⴷⴰⵏⵜ ⵜⵎⵖⵔⵉⵡⵉⵏ. ⵙ ⵡⴰⵙⵙ ⵉⵜⵔⵔⴰⵙⵏ, ⵍⵍⴰ ⵜⵅⵎⵎⴰⵔⵏ ⵜⴰⴽⵓⵔⵜ, ⵙ ⵢⵉⴹ ⵍⵍⴰ ⵜⴷⴷⵓⵏ ⵖⵔ ⵜⵎⵖⵔⵉⵡⵉⵏ, ⵓⵔ ⴷⴰ ⵜⵜⴰⵊⵊⴰⵏ ⵜⵏⵏⴰ ⴳ ⵓⵔ ⵃⴹⵉⵕⵏ, ⵀⴰ ⵜⵏ ⵛⴰ, ⵀⴰ ⵜⵏ ⵛⴰ! ⵀⴰ ⵜⵏ ⵖⵔ ⵜⵎⵖⵔⴰ ⵏ ⴰⵢⵜ ⴼⵍⴰⵏ, ⵀⴰ ⵜⵏ ⵖⵔ ⵍⵎⵓⵙⵎ ⵏ ⵙⵉⴷⵉ ⵍⵃⵙⵏ, ⵀⴰ ⵜⵏ ⵖⵔ ⵍⵍⴰⵎⵎⴰ ⵖⵉⵏⵏ, ⵀⴰ ⵜⵏ ⵖⵔ ⵍⵍⴰⵎⵎⴰ ⴰⴷ ⵓⵙⵙⴰⵏ ⴰⵏⵏ ⴰⴳ ⵉⵜⵙⵓⵍⴰ ⴱⵏⴰⴷⵎ ⵉⵅⴼ ⵏⵏⵙ, ⴰⴳ ⵏⵜⵙⵡⵡⴰⵇ, ⴰⴳ ⵏⵍⵙⵙ ⵉⵄⴱⴰⵏⵏ ⵏⵏⴰ ⵚⴼⴰⵏⵉⵏ, ⴰⴳ ⵏⵜⴷⴷⵓ ⵖⵔ ⴼⴰⵙ ⴷ ⵎⵓⵍⴰⵢ ⵄⵇⵓⴱ; ⴳ ⵍⵅⵔⵉⴼ ⴰⴳ ⵏⵜⵜⴰⵡⵍ ⵉ ⵓⵜⵔⵔⴰⵙ ⵉⵙ ⵉⵙⵓⵍⴰ ⵢⵉⵍⵉ ⵙ ⵎⵉ. ⴰⴷⴷⴰⵢ ⴷ ⴰⵡⴹⵏ ⵉⵏⵓⵥⴰⵕ, ⵍⵍⴰ ⵄⴷⴷⵍⵏ ⵎⴷⴷⵏ ⵜⵉⵛⵜⵃⵉⵢⵉⵏ ⵏⵏⵙⵏ, ⴳⵏ ⵜⴰⵎⴰⵍⴰⵃⵜ, ⴹⴱⴱⵕⵏ ⴳ ⵉⵎⴰⵙⵙⵏ ⵉ ⵜⵃⵔⵔⴰⵜ, ⵉⵏⵓⵏ ⵜⵉⵖⵏⴰⵛⵉⵏ ... ⵀⴰ ⵜⵜ ⵜⵔⵡⴰ! ⵡⵏⵏⴰ ⵉⵅⴷⴷⵎⵏ ⴳ ⵡⴰⵙⵙ, ⵍⵍⴰ ⵉⵅⴷⴷⵎ, ⵡⵏⵏⴰ ⵉⴼⵍⵍⵃⵏ, ⵍⵍⴰ ⵉⴱⴷⴷⵓ ⵜⴰⵃⵔⵔⴰⵜ; ⴽⵓⵍ ⵛⴰ ⴷ ⵎⴰⴷ ⵉⴽⵔⵔⵣ: ⵉⴱⴰⵡⵏ, ⴰⵍⵃⵉⵎⵣ, ⵜⵉⵎⵥⵉⵏ, ⵉⵔⴷⵏ ... ⴱⴰⴱ ⵍⵎⴰⵍ ⵍⵍⴰ ⵖⵉⴼⵙ ⵜⵜⴽⴽ ⵜⵎⴰⵔⴰ ⴳ ⵉⵇⵔⴰⴼⵏ ⵏⵏⴰ ⴷ ⵉⵏⵓⵥⴰⵕ ⴷ ⵉⵎⵖⴰⴱⵏ; ⵍⵍⴰ ⵉⴱⵏⵏⵓ ⵉⵏⵓⵍⴰⵏ ⴷ ⵉⵄⵔⵉⵛⵏ, ⵉⵙⵙⵏⵙ ⴳ ⴰⴼⵔⴰⵏ, ⵉⵄⴰⵕⴹ ⵖⵔ ⵍⵅⵍⴰ ⵉ ⵓⵎⴽⵙⴰ. ⴰⴷⴷⴰⵢ ⵜⵣⵔⵉ ⵍⵓⵇⵜ ⵏ ⵜⵉⵢⵢⴳⵉⵡⵉⵏ, ⵍⵍⴰ ⵉⵜⵜⵛⵖⴰⵍ ⴱⵏⴰⴷⵎ ⴳ ⵡⵓⵔⵜⴰⵏ; ⵍⵍⴰ ⵉⵖⵕⵕⵚ ⴰⵔ ⵉⵜⵜⵏⵇⵇⴰⵛ, ⴰⵔ ⵉⵜⵜⵣⴱⴰⵕ; ⴷⴼⴼⵉⵔ ⵏ ⵓⵢⴰ, ⵍⵍⴰ ⴷ ⵉⵜⵜⴰⵡⴹ ⵓⴼⵔⴰⵏ ⴳ ⵉⴳⵔⴰⵏ; ⵍⵍⴰ ⵉⵜⴷⴷⵓ ⴱⴰⴱ ⵏ ⵜⵢⵓⴳⴰ ⴷ ⵓⴼⵍⵍⴰⵃ ⴷ ⴰⵢⵜ ⵓⵅⴰⵎ, ⵍⵍⴰ ⵜⴼⵔⵔⴰⵏ ⵇⴰⵃ ⵏⵏⵙⵏ; ⴰⴷⴷⴰⵢ ⴷ ⴰⵡⴹⵏⵜ ⵜⴼⵙⴰ, ⵍⵍⴰ ⵉⵜⵇⴰⴱⴰⵍ ⴱⵓ ⵍⵎⴰⵍ ⵓⵍⵍⵉ ⵏⵏⵙ ⴷ ⵉⵣⴳⴰⵔⵏ, ⵍⵍⴰ ⵉⵜⵜⵢⴰⵡⴰⵏ ⴰⵖⵖⵓ ⴷ ⵡⵓⴷⵉ ⴷ ⵜⴰⴹⵓⴹⵜ. ⴰⴷⴷⴰ ⵓⵔ ⵢⴰⴼ ⴱⵏⴰⴷⵎ ⵎⴰ ⵖⴰ ⵉⴳ, ⵍⵍⴰ ⵊⵎⵓⵄⵏ ⵉⵜⵔⵔⴰⵙⵏ ⵢⵓⵏ ⵏ ⵚⵚⴱⴰⵃ, ⴷⴷⵓⵏ ⵖⵔ ⵍⵖⴰⴱⵜ ⵅⴷ ⵖⵔ ⵍⵅⵍⴰ ⴰⴷ ⵚⵉⵢⵢⴹⵏ ⵙ ⵉⵖⵣⵣⴰⵍⵏ ⴷ ⵡⵓⵚⴽⴰⵢⵏ ⵎⴰⵛⴰ ⴷⵖⵢⴰ ⵀⴰⴷ ⴰⵙⴳⴳⵯⴰⵙ ⵉⴹⵓⵕ ⴷ, ⵇⵎⵎⵔⵏⵜ ⵜⵎⵥⵉⵏ, ⵓⵔⵉⵖⵏⵜ, ⵢⴰⵡⴹ ⵓⵏⴱⴷⵓ. ⵉⵡⴰ ⵀⴰ ⵜⴰⵃⴰⵊⵉⵜ ⵏⵏⵅ ⵜⵇⴹⴰ ⵡⴰⵍⴰ ⵇⴹⵓⵏ ⵢⵉⵔⴷⵏ ⴷ ⵜⵎⵥⵉⵏ ⵡⴰⵍⴰ ⵏⵛⵛ ⵜ ⴷ ⴰⵎⵙⵙⴰⵙ. ⴰⴷⴷⴰⵢ ⵢⴰⵡⴹ ⵓⵏⴱⴷⵓ, ⴰⴷ ⵜⵄⴷⴷⵓ ⵍⵓⵅⴷⵏⵜ ⵍⴰ ⴳ ⵎⴷⴷⵏ ⵡⴰⵍⴰ ⴳ ⵜⵄⵢⵢⴰⵍⵉⵏ; ⵃⵔⴰ ⴰⴷ ⵢⴰⵍⵉ ⵢⵉⵜⵔⵉ, ⵍⵍⴰ ⵜⴽⴽⵔ ⴰⴷ ⵜⵃⵍⵙ ⵉ ⵓⵖⵢⵢⵓⵍ ⵏⵏⵙ, ⵜⵉⵢⵔ ⵖⵉⴼⵙ ⵉⵢⴷⴷⵉⴷⵏ, ⵜⴷⴷⵓ ⴰⴷ ⵜⴰⴳⵯⵎ ⴰⵎⴰⵏ ⵇⴱⵍ ⴰⴷ ⵉⵄⴷⴷⵓ ⴱⵏⴰⴷⵎ ⴷ ⵍⵎⴰⵍ ⴳ ⵡⵓⵏⴰ; ⵍⵍⴰ ⴷ ⵜⵜⵄⵢⴰⴷ, ⵍⵍⴰ ⵜⵃⵔ ⵉ ⵜⵖⵢⵢⵓⵍⵜ, ⵜⴰⵡⵡⴹ ⴷ, ⵜⴳⴳ ⴰⵔⵛⵜⵓ, ⵜⵛⵟⵟⴱ ⵜⵉⴳⵎⵎⵉ ⴷ ⵍⴱⵢⵓⵜ, ⵜⵙⵙⵏⵓ ⵉⵎⴽⵍⵉ, ⵜⴰⵡⵉ ⵜ ⵖⵔⵙ ⵉⴳⵔ ⴱⴰⵛ ⴰⴷ ⴷ ⵜⴰⵙⵉ ⵉⵎⵏⵙⵉ ⴰⴷ ⵜⵏ ⵜⴷⴷⵣ. ⴰⴷⴷⴰⵢ ⵏⵏ ⵜⴰⵡⴹ ⵙ ⵉⴼⵍⵍⴰⵃⵏ, ⵍⵍⴰ ⵜⵍⵇⵇⴰⴹ ⵛⵡⵉ ⴳ ⵉⴳⵔ ⵎⵉⵄⴰⴷ ⴰⵔ ⴷ ⵜⵉⵏⵉ: « ⵍⵊⵀⴷ ⴰⵢ ⴰⴷ », ⵜⵄⴰⵢⴷ ⵙ ⴰⵅⴰⵎ ⴷⵖⵉⵢⴰ, ⴰⴷ ⵜⴷⴷⵣ ⵉⵎⵏⴷⵉ, ⵜⵄⴷⵍ ⵜⵏ, ⵜⴳⴳ ⴰⵍⵍⴰⵙ ⴷ ⵉⵎⵏⵙⵉ; ⵎⵛ ⵉⵙⵓⵍ ⵍⵃⴰⵍ, ⵍⵍⴰ ⵜⴷⴷⵣ ⵉⵣⴷⵎ, ⵜⵍⵍⵎ ⵜ ⴱⴰⵛ ⴰⴷ ⵜ ⵜⴳ ⵉ ⵉⵙⵓⵇⵇⴰⵏ ⴷ ⴰⵛⵛⴱⴰⴽ. ⵇⴱⵍ ⴰⴷ ⵢⵉⵡⵜ ⵢⵉⴹ, ⵍⵍⴰ ⵜⴼⴼⵖ ⴰⴷ ⵜⴰⵡⵉ ⵉⵖⵍⵏ ⵅⴷⴷ ⵉⵣⴷⵎ ⵅⴷⴷ ⵉⴽⵛⵛⵓⴹⵏ ⵙ ⵎⵉ ⵖⴰ ⵜⵙⵙⵏⵓ; ⴰⴷⴷⴰⵢ ⵜⵡⵡⵜ ⵜⴷⵓⴳⴳⵯⴰⵜ, ⵍⵍⴰ ⵜⵜⵉⵍⵉ ⴷ ⵜⵓⵥⵢⴰ ⵏ ⵡⵓⵍⵍⵉ ⴷ ⵜⴼⵓⵏⴰⵙⵉⵏ. ⴷⴼⴼⵉⵔ ⵏ ⵉⵎⵏⵙⵉ ⵓⵔ ⴷⴰ ⵜⴳⴳⴰⵏ ⵎⵉⵄⴰⴷ ⴰⵔ ⴷ ⵜⵊⵎⵄ ⵜⵉⵢⵓⵏⵉ ⵏⵏⵙ. ⵡⴰⵍⴰⵢⵏⵏⵉ ⵃⵔⴰ ⴰⴷ ⵉⵏⴰⵚⴼ ⵢⵉⴹ, ⵜⵏⵏⴰ ⵓⵔ ⵢⵓⴼⵉⵏ ⵎⴰⴷ ⴰⵙ ⴷ ⵉⵥⵥⴰⴹⵏ ⵣⵉ ⵜⵙⵉⵔⵜ, ⵉⵜⵜⵅ ⴱⵄⴷⵏⵜ ⴰⵖ ⵜⵙⵉⵔⴰ, ⵍⵍⴰ ⵜⵏⴽⴽⵔ ⴰⴷ ⵜⵥⴹ ⵣⵉⴽ ⴳ ⵜⴰⵚⵏⴹⵉ ⵏ ⵍⵃⴰⵍ. ⴳ ⵓⵏⴱⴷⵓ ⴰⴷ ⵜⵛⵜⵀⴰⴷ ⴰⴷ ⵜⵙⵙⴼⵍⵉⴷⴷ ⵉ ⵉⵀⵍⵍⵉⵍⵏ ⵏⵏⵙ ⴰⵎⵎⴰⵙ ⵏ ⵢⵉⴹ. ⴳ ⵍⵓⵇⵜ ⵏ ⵓⵏⴱⴷⵓ ⵓⵔ ⴷⴰ ⵜⵜⵙⵓⵍⴰ ⵜⵎⵟⵟⵓⴹⵜ ⴰⵥⵟⵟⴰ ⵡⴰⵍⴰ ⴽⵔⴰ ⵉⴹⵏⵉⵏ; ⵎⴰⵛⴰ ⴳ ⵍⵅⵔⵉⴼ ⴷ ⵍⵓⵇⵜ ⵏ ⵉⵏⵓⵥⴰⵕ ⴷ ⵜⴼⵙⴰ, ⵍⵍⴰ ⵜⵅⴷⴷⵎ ⵜⴰⴹⵓⴹⵜ, ⵜⴳⵔ ⵉⵥⴹⵡⴰⵏ, ⴰⵎⴰ ⵜⴰⵖⵕⴰⵕⵜ ⴰⵎⴰ ⵜⴰⵡⵚⴰⴹⵜ, ⵉⵃⵏⴱⵍ, ⵜⴰⵎⵉⵥⴰⵕⵜ, ⵜⴰⵥⵕⴱⵉⵜ, ⵜⴰⵇⴱⴱⵓⵜ ⵉ ⵓⵎⴽⵙⴰ, ⴽⵓⵍ ⵢⵓⵜ ⴷ ⵎⴰⵎⵎⵉ ⵜⵙⵙⵏ ⴷ ⵎⴰⴷ ⵜⵜⴳⴳ. ⴰⴷⴷⴰⵢ ⴰⵡⴹⵏ ⵉⵚⵎⵎⵉⴹⵏ, ⵍⵍⴰ ⵜⵜⵉⵍⵉ ⵜⵎⵟⵟⵓⴹⵜ ⵏⵏⴰ ⵉⵃⵕⵛⵏ ⵍⵍⴰ ⵜⴽⴽⵙ ⴰⵖⵎⵎⵓⵙ, ⵍⵍⴰ ⵢⵓⵊⴷ ⴰⵙ, ⵢⵓⵏ ⵡⴰⵙⵙ ⵍⵍⴰ ⵜⵜⵎⵎⵄⵍⴰⵎⵏⵜ ⵜⵄⵢⵢⴰⵍⵉⵏ, ⴷⴰ ⴷⴷⵓⵏⵜ ⵖⵔ ⵍⵖⴰⴱⵜ ⴰⴷ ⵣⴷⵎⵏⵜ ⵉⴽⵛⵛⵓⴹⵏ; ⵍⵍⴰ ⵜⴽⴽⵔⵏⵜ ⵣⵉⴽ ⴳ ⵉⵖⵢⵢⴰⵍ, ⴽⵍⵏⵜ ⵏⵏ, ⵍⵍⴰ ⵣⴷⴷⵎⵏⵜ ⵎⵉⵄⴰⴷ ⴰⵔ ⴷ ⵉⵛⵡⵡⵔ ⵡⴰⵙⵙ, ⵄⴰⴷ ⴰⴷ ⵜⵜⵄⴰⵢⴰⴷⵏⵜ, ⴽⵓⵍ ⵢⵓⵜ ⵙ ⵉⵙⵔⵉ ⴷ ⵜⵄⵡⴰⵍⵉⵜ ⵎⵇⵇⴰⵔ ⵉⴱⵄⴷ ⵡⴰⵏⵙⴰ ⵏ ⵓⵣⴷⴰⵎ, ⵍⵍⴰ ⵜⵜⴰⵎⵔⵏⵜ ⴱⴰⵛ ⴰⴷ ⵄⴰⵢⴷⵏⵜ ⵇⴱⵍ ⴰⴷ ⵉⴷⴷⵓ ⵍⵃⴰⵍ ⵃⵎⴰ ⴰⴷ ⴷⴷⵓⵏⵜ ⵙ ⴰⵎⴰⵏ. ⵙ ⵍⵎⵕⵕⴰⵜ ⵍⵍⴰ ⵜⴷⴷⵓⵏⵜ ⴰⴷ ⵃⵛⵛⵏⵜ ⵉⵣⴷⵎ; ⵏⵉⵜⵜⵏⵜⵉ ⴰⴷ ⵉⵜⵃⵏⵏⴰⵛⵏ ⵜⵉⵔⴼⴼⴰⴷⵉⵏ ⴷ ⵍⴱⵢⵓⵜ ⵙ ⵓⴱⵢⵢⴰⴹ. ⴳ ⵍⵓⵇⵜ ⵏ ⵍⵅⵔⵉⴼ ⴰⴳ ⵜⵜⵙⵓⵍⴰ ⵜⵎⵟⵟⵓⴹⵜ ⵉⵅⴼ ⵏⵏⵙ, ⴰⴳ ⵜⵅⴷⴷⵎ ⵜⴰⴹⵓⴹⵜ, ⴰⴳ ⵜⵕⴱⴱⴰ ⵉⴼⵓⵍⵍⵓⵙⵏ, ⴰⴳ ⵜⵜⵀⵓⵡⵡⴰⴷ ⵖⵔ ⴼⴰⵙ ⴰⴷ ⵜⵙⵖ ⵉⵄⴱⴰⵏⵏ ⴷ ⵎⴰⴷ ⴰⵙ ⵉⵏⵏⴰ ⵉⵅⴼ ⵏⵏⵙ, ⵜⵢ ⴷ ⵏⵏⵇⵇⵕⵜ, ⵜⵙⵙⴰⵔⴰ ⵛⵡⵉ; ⵏⵜⵜⴰⵜ ⴰⴷ ⵉⵙⵙⵉⵔⵉⴷⵏ ⵉⵄⴱⴰⵏⵏ ⵉ ⵡⴰⵔⵔⴰⵡ ⵏⵏⵙ, ⴰⴷ ⴰⵙⵏ ⵉⵎⵛⵛⴹⵏ, ⴰⴷ ⵜⵏ ⵉⵜⵜⵙⵄⵓⵎⵏ; ( 19 ) ⴰⴷⴷⴰⵢ ⵜⵎⵢⵢⵍ ⵜⴰⴼⵓⴽⵜ ⵍⵍⴰ ⴷ ⵜⵜⴰⵙⵉ ⴰⵟⵟⴰⵚ ⵏ ⵡⴰⵎⴰⵏ, ⵜⵄⵓⵎ, ⵜⵎⵛⴹ ⴰⴷⵍⴰⵍ ⵏⵏⵙ ..... ⵍⵃⵏⵏⴰ ⴷ ⵏⵏⵡⴰⵕ, ⵜⴳ ⵜⴰⵥⵓⵍⵜ ⴷ ⵍⵎⵙⵡⴰⴽ, ⵜⴱⴷⴷⵍ ⵉⵖⴱⴰⵏⵏ ⵏⵏⵙ ⵙ ⵡⵉⵏⵏⴰ ⵚⴼⴰⵏⵉⵏ. ⴳ ⵍⵓⵇⵜ ⵏ ⵜⴼⵙⴰ, ⵜⴰⴷⴳⴳⵯⴰⵜ, ⵍⵍⴰ ⵜⵜⵛⵖⵉⵍ ..... ⴳ ⵜⵓⵥⵢⴰ ⵏ ⵍⵎⴰⵍ ⴷ ⵓⵃⵏⴷⵉⵔ ⴷ ⵓⵙⵏⴷⵉ ⵏ ⵓⵖⵖⵓ; ⵎⵛ ⵓⵔ ⵜⴳⵉ ...., ⵍⵍⴰ ⵜⵜⴻⵜⵜ ⵜⵉⵖⵓⵏⵉ; ⵀⴰ ⵜⵓⵥⵢⴰ, ⵀⴰ ⵉⵎⵏⵙⵉ ..... ⴰⵙⵏⴷⵉ, ⵀⴰ ⵜⵉⵖⵓⵏⵉ ⵏ ⵍⵎⴰⵍ, ⵀⴰ ⵜⵙⵍⵎⵢⴰ, ⵀⴰ! ⴰⴷⴷⴰⵢ ⵉⵄⴷⴷⵓ ⵍⵎⴰⵍ, ⵉⴷⵔⵓⵙ ⵍⵀⴷⵉ, ⵍⵍⴰ ⵉⵜⵜⴼⴼⵖ ⴱⴰⴱ ⵏ ⵓⵅⴰⵎ ⵙ ⵍⵄⵣⵉⴱ ⵙ ⵓⵅⴰⵎ; ⵡⵏⵏⴰ ⵎⵉ ⵜⴳⴰ ⵎⵃⵕⵓⵛⵜ, ⵍⵍⴰ ⴰⵙ ⵜⵥⵟⵟ ⴰⵅⴰⵎ, ⵓⵔ ⵉⵡⵍⵍⴰⵊ ⴰⴷ ⵜ ⵉⴷ ⵉⵙⵖ ⵣⵉ ⵙⵙⵓⵇ. ⵜⴰⵇⴱⵉⵍⵜ ⵏ ⴰⵢⵜ ⵙⴰⴷⴷⵏ ⵜⴰⵇⴱⵉⵍⵜ ⵏ ⴰⵢⵜ ⵙⴰⴷⴷⵏ ⵓⵔ ⵜⵎⵇⵇⵓⵕ ⵓⵔ ⵜⵎⵥⵥⵉⵢ; ⵎⴰⵛⵛ ⵍⵍⴰ ⴰⵙ ⵜⵜⵉⵏⵉⵏ ⵎⴷⴷⵏ ⵜⵎⵥⵥⵉⵢ; ⵏⵜⵜⴰⵜ, ⵎⵛ ⵜⴷⴷⵉⵜ ⴰⴷ ⵜⴰⵏⵏⴰⵢⴷ, ⴰⵢⵏⵏⴰ ⴳⵉⵙ ⵉⵍⵍⴰⵏ ⵣⵉ ⵍⵇⵇⵓⵎ, ⵓⵔ ⵢⴰⴷ ⵉⵍⵍⵉ! ⵄⵛⵔⵉⵏ ⵄⴰⵎ ⴰⵢ ⴰⴷ, ⵍⵍⴰⵏ ⵍⵃⴰⵕⴰⵟ ⵏⵏⴰ ⵓⵔ ⵉⵜⵜⵓⵙⴽⵉⵏⵏ ⵛⴰ ⵇⵇⴰⵃ, ⴰⵎⵎ ⵢⵓⵏ ⵡⴰⵏⵙⴰ ⵍⵍⴰ ⴰⵙ ⵜⵜⵉⵏⵉⵏ ⵖⵎⵕⴰ; ⴰⵙⵙ ⴰⴷ ⵉⵄⴷⴷⴰ ⴱⵏⴰⴷⵎ, ⵛⵛ ⵉⵢⵉ ⴰⴷ ⵓⵔ ⴽ ⵛⵛⵖ! ⴽⴽⵔⵏ ⵎⴷⴷⵏ, ⴰⵍⵍⵉⴳ ⵢⵓⵡⵉ ⵓⵕⵓⵎⵉ ⵜⴰⵎⴰⵣⵉⵔⵜ ⴱⴹⴰⵏ ⵜⵉⵏ ⵖⵎⵕⴰ ⵅⴼ ⵉⵖⵚⴰⵏ; ⴰⵙⵙ ⴰⴷ ⵔⴰⵢⴱ ⵖⵔ ⵖⵎⵕⴰ, ⴰⴷ ⵜⵜ ⵉⵏⵏ ⵜⴰⴼⴷ ⵍⵍⴰ ⵜⵄⵎⵎⵕ ⵙ ⵉⵖⵔⵎⴰⵏ ⴷ ⵉⵅⴰⵎⵏ. ⵜⴰⵎⴰⵣⵉⵔⵜ ⵏ ⴰⵢⵜ ⵙⴰⴷⴷⵏ ⵜⵥⵉⵍ ⴱⵣⵣⴰⴼ; ⵙ ⵓⵢⵏⵏⴰ ⴰⴷ ⵔⴰⵏ ⴰⵢⵜ ⵡⴰⵕⴰⵢⵏ ⴰⴷ ⴰⵖ ⵙⴳⵉⵙ ⵙⵙⵓⴼⵖⵏ ⴳ ⵍⵄⴰⵀⴷ ⵏ ⵍⵄⴷⴰⵡⵜ. ⵍⵍⴰ ⵃⴷⴷⵏ ⴰⵖ ⴷ ⴰⵢⵜ ⵡⴰⵕⴰⵢⵏ ⴷ ⴰⵢⵜ ⵙⵖⵕⵓⵛⵛⵏ ⴷ ⴱⵏⵢⴰⵣⵖⴰ ⵙⴳ ⵍⵇⴱⵍⵜ; ⵓⵎⴰ ⵙⴳ ⵍⵖⵔⴱ ⵍⵍⴰ ⴱⴹⴰⵏ ⴰⵖ ⵓⵍⴰⴷ ⵍⵃⴰⵊ ⴷ ⴼⴰⵙ; ⴳ ⵓⴽⴼⴼⴰⵙ, ⴰⴷⴷⴰⵢ ⵜⴹⵕⵕⵜ ⵉⵅⴼ ⵖⵔ ⵍⵇⴱⵍⵜ, ⵍⵍⴰ ⵏⵀⵕⵏ ⴰⵖ ⴷ ⴰⵢⵜ ⵢⵓⵙⵉ; ⵍⵍⴰ ⵉⴱⴹⴰ ⴰⵖ ⴷⵉⵙⵏ ⵡⴰⵙⵉⴼ ⵏ ⵙⴱⵓ; ⴳ ⵜⵥⵍⵎⴰⴹⵜ ⵍⵍⴰⵏ ⵍⵃⵢⴰⵢⵏⴰ. ⵡⴰⵀⵡⵡⴰ ⴰⵢⵜ ⵡⴰⵕⴰⵢⵏ ⴷ ⵉⵄⴷⴰⵡⵏ ⵏⵏⵖ ⴰⴷ ⴳⴰⵏ; ⵍⵍⴰ ⴷ ⵜⵜⵃⴰⵔⴰⴽⵏ ⵏⵉⵜⵜⵏⵉ ⴷ ⴰⵢⵜ ⵙⵖⵔⵓⵛⵛⵏ ⴷ ⵉⵖⵣⵔⴰⵏⵏ ⴷ ⵍⵃⵢⴰⵢⵏⴰ. ⵏⴽⴽⵯⵏⵉ ⴷⵉⵖ ⵓⵔ ⴷⴰ ⵏⵏ ⵉⵜⵜⵖⵉⵎⴰ ⴰⴳⵯⴷ ⵢⵓⵏ; ⵙ ⵍⵎⵕⵕⴰⵜ ⵍⵍⴰ ⴷ ⵏⵇⵇⴰⵔ ⵉ ⴰⵢⵜ ⵢⵓⵙⵉ: ⵀⴰ ⵛⴳⴳ ⵎⵛ ⵜⵙⴰⵍⵜ, ⴰⴷ ⴰⴽ ⵄⴰⵡⴷⵏ ⴳ ⵍⵃⵔⴽⵜ ⵏ ⵍⵇⴰⵢⴷ ⵄⵓⵎⴰⵕ ⵓⵢⵓⵙⵉ ⵏⵏⴰ ⴷ ⵉⴱⴱⵉⵏ ⵉⵅⴼⴰⵡⵏ ⵉ ⴰⵢⵜ ⵡⴰⵕⴰⵢⵏ. ⵡⴰⵍⴰⵢⵏⵏⵉ ⴰⵙⵙ ⴰⴷ ⵏⴰⵖⵓⵍ ⵏⴳⴰ ⴷⵉⵙⵏ ⵉⵎⴷⴷⵓⴽⴽⵯⴰⵍ, ⵍⵍⴰ ⵏⵜⵙⵡⵡⴰⵇ ⵙⵙⵓⵇ ⵏⵏⵙⵏ, ⴰⵔ ⵜⵙⵡⵡⴰⵇⵏ ⵡⵉⵏⵏⵖ. ⵉⵙⴳⴳⵯⴰⵙⵏ ⴰⴷ ⵍⵍⴰ ⵜⵜⵎⵢⵉⵙⵉⵏⵏ ⴰⵢⵜ ⵢⵓⵙⵉ ⴷ ⴰⵢⵜ ⵙⴰⴷⴷⵏ, ⵓⵔ ⵉⴷⴷ ⴰⵎ ⵄⵍⴰⵡⵍ; ⵍⵍⴰ ⴷ ⵜⵙⵡⵡⴰⵇⵏ, ⴰⵔ ⴷ ⵜⴷⴷⵓⵏ ⵉⵜⵔⵔⴰⵙⵏ ⵏⵏⵙⵏ ⵖⵔ ⵜⵎⵖⵔⵉⵡⵉⵏ ⵏⵏⵖ ⴷ ⵍⵓⵇⵜ ⵏ ⴱⵓⵊⵍⵓⴷ ⴳ ⵍⵄⵉⴷ ⴰⵎⵇⵇⵕⴰⵏ; ⵍⵍⴰ ⵜⵙⴼⵕⵕⴰⵊⵏ ⴷⴷⵓⵏⵉⵜ, ⵉⴷⵅ ⴷ ⵉⵏⵛⵛⴰⴷⵏ ⴰⴷ ⴳⴰⵏ; ⴰⴷⴷⴰⵢ ⵎⵢⴰⵎⴰⵥⵏ ⴷ ⴰⵢⵜ ⵙⴰⴷⴷⵏ, ⵍⵍⴰ ⵜⵜⵖⵉⵎⴰⵏ ⵙ ⵍⵎⵕⵕⴰⵜ ⴰⵔ ⵢⵓⵎⴰⵢⵏ ⵍⵍⴰ ⵟⵟⵉⵥⵉⵏ ⵙ ⵉⵣⵍⴰⵏ. ⵓⵎⴰ ⴱⵏ ⵢⴰⵣⵖⴰ ⵎⵖⴰⵔ ⴰⵖ ⵇⵕⵕⴱⵏ, ⵎⵖⴰⵔ ⴷ ⵜⴷⴷⵓⵏ ⵖⵔ ⵙⵙⵓⵇ ⵏⵏⵖ, ⴰⵔ ⵏⵜⵜⴷⴷⵓ ⵖⵔ ⵡⵉⵏⵏⵙⵏ, ⵉⵙⴳⴳⵯⴰⵙⵏ ⴰⴷ, ⵓⵔ ⵜⴽⴽⵉ ⴽⵔⴰ ⵏ ⵜⵉⴷⴷⵓⴽⵍⴰ ⴳⵔⴰⵖ. ⵍⵃⵢⴰⵢⵏⴰ ⴷ ⵡⵉⵏⵏⴰ ⵓⵔ ⴷⴰ ⵏⵜⵜⵅⵓⵍⵓⴹ ⴱⴰⵀⵔⴰ ⵎⵛ ⴳⵉⵙⵏ ⵏⵙⵖⴰ ⴷⴷⵍⵍⴰⵃ ⴷ ⵓⴼⵜⵜⵉⵅ ⵅⴷⴷ ⵙⵙⵍⵍⴰⵜ ⴷ ⵜⵉⵙⵏⵜ; ⵡⴰⵀⵡⴰ ⵜⵜⵓⵖ ⵜⵏ ⵊⵀⴷⵏ ⴰⴷ ⵜⵜⵄⴰⵡⴰⴷⵏ, ⴰⵙⵙ ⴰⴷ ⴹⵄⴼⵏ! ⵓⵍⴰⴷ ⵍⵃⴰⵊ ⵄⵎⵕⵓ ⵓⵔ ⵚⵢⵢⵉⴼⵏ, ⵓⵔ ⴷ ⵙⵙⵏ ⵎⴰ ⵖⴰ ⵢⵉⵙⵉⵏ ⵃⴷⴷ; ⴱⵄⴷⵏ ⴰⵖ, ⴰⵀⴰ ⴹⵕⵕⵏ ⵉⵅⴼ ⵏⵏⵙⵏ ⵖⵔ ⴼⴰⵙ. ⵍⵅⵚⴰⵕⵜ ⵏ ⵜⵎⴰⵣⵉⵔⵜ ⵏⵏⵖ ⴷ ⴰⵎⴰⵏ ⵏⵏⴰ ⴳⵉⵙ ⵉⴷⵔⵓⵙⵏ; ⵖⴰⵙ ⴰⵛⴰⵍ ⵏ ⵜⵃⵕⵕⴰⵜ! ⵓⵔ ⴳⵉⵙ ⵍⴰ ⴰⵙⵉⴼ ⵍⴰ ⴰⵖⴱⴰⵍⵓ, ⵖⴰⵙ ⵢⵓⵜ ⵜⵖⴱⴰⵍⵓⵜ ⴳ ⵄⵉⵏ ⵙⵙⴱⵉⵜ ⴷ ⵄⵉⵏ ⴼⵍⵍⴰⵊ; ⵎⴰⵛ ⵓⵔ ⴽⴼⵉⵏⵜ ⵛⴰ ⵜⵖⴱⵓⵍⴰ ⵏⵏⴰ. ⵍⵍⴰ ⵏⵙⵙⵡⴰ ⴰⵔ ⵏⵜⵜⴰⵢⵎ ⵙⴳ ⵓⵏⴰ; ⵜⴰⵎⵎⴰⵔⴰ ⵜⴰⵎⵇⵇⵕⴰⵏⵜ ⴰⴷ ⵖⵉⴼⵏⵖ ⵉⵜⴽⴽⵏ ⴳ ⵓⵏⴱⴷⵓ, ⵉⵜⵖ ⵍⵍⴰ ⵜⵜⵖⴰⵔⴰⵏ ⵡⴰⵎⴰⵏ, ⴰⵀⴰ ⴱⵄⴷⵏ ⴰⵖ, ⵎⵃⵉⵜ ⵉⵅⴰⵎⵏ ⵍⵍⴰ ⵜⵜⵉⵍⵉⵏ ⴳ ⵜⵇⵍⵉⵄⵉⵏ ⵙⴳ ⵡⴰⵀⵡⵡⴰ, ⵙⴳ ⵍⵄⴷⴰⵡⵜ; ⴰⵎⴰⵏ, ⵍⵍⴰ ⵜⵜⵉⵍⵉⵏ ⴳ ⵜⵉⵔⵔⵙⵜ ⵅⴷ ⵜⴰⵍⴰⵜⵉⵏ. ⴰⵙⵙ ⴰⴷ ⵍⵍⴰ ⵉⴽⴽⴰ ⵓⴱⵔⵉⴷ ⵏ ⵟⵟⵓⵎⵓⴱⵉⵍ ⵊⴰⵊ ⵏ ⵜⵇⴱⵉⵍⵜ, ⵜⵜⵓⵅ ⴰⴳⴳⵯⴷ ⵓⴱⵔⵉⴷ ⵏ ⵍⵎⴰⵛⵉⵏⴰ ⵍⵍⴰ ⵉⵖⴷⵓ ⴰⵖ. ⵉⴱⵏⴰ ⴰⵖ ⵍⵎⵅⵣⵏ ⵙⵏⴰⵜ ⵏ ⵙⵙⴽⵡⵉⵍⴰⵜ, ⵍⵍⴰ ⴳⵉⵙⵏⵜ ⵜⵜⵇⵔⴰⵏ ⵍⵡⴰⵛⵓⵏ. ⴳ ⵙⵙⵓⵇ ⵏⵏⵖ ⵉⵍⵍⴰ ⵍⴱⵉⵔⵓ ⵏ ⵍⵇⵇⴰⵢⴷ; ⵢⵉⵍⵉ ⵢⵓⵏ ⵏ ⵚⵚⴱⵉⵜⴰⵕ ⵎⴰⵏⵉ ⵉⵜⵜⵉⴽⴽ ⵓⴹⴱⵉⴱ ⴰⵙⴰⴼⴰⵔ ⵉ ⵉⵏⵎⵕⴰⴹ. ⴳ ⵜⵇⴱⵉⵍⵜ ⵏⵏⵖ ⵍⵇⵇⴰⵢⴷ ⵏⵜⵜⴰⵏ ⴰⴷ ⵉⵃⴽⴽⵎⵏ, ⴰⴷ ⵉⴳⴰⵏ ⴰⵎⵇⵇⵕⴰⵏ; ⵡⴰⵍⴰⵢⵏⵏⵉ ⵍⵍⴰ ⵉⴳⴳⴰ ⵉⵎⵖⴰⵔⵏ ⴷⴷⴰⵡ ⵏⵏⵙ; ⵣⵎⴰⵏ ⵄⴷⴷⴰⵏ ⵉⵎⵖⴰⵔⵏ ⵖⵓⵕⵏⵖ, ⴳ ⵍⵃⴽⴰⵎ ⵏ ⵓⵣⵔⴼ; ⵓⵎⴰ ⴰⵙⵙ ⴰⴷ ⵓⵔ ⵇⵇⵉⵎⵏ ⵅⴰⵙ ⵙⵉⵏ; ⴷⴷⴰⵡ ⵏ ⵉⵎⵖⴰⵔⵏ ⵍⵍⴰⵏ ⵉⴷ ⵊⵊⴰⵔⵉ ⴷ ⵉⵎⵅⵣⵏⵉⵢⵏ. ⵍⴱⵉⵔⵓ ⵏⵏⵅ ⴰⵅⴰⵜⴰⵔ ⵓⵔ ⵉⵇⵇⵉⵎ ⴰⵎⵎⴰⵙ ⵏ ⵜⵇⵇⴱⵉⵍⵜ, ⵉⵄⴰⵢⴷ ⵖⵔ ⴼⴰⵙ; ⵉⴱⵄⴷ ⴰⵖ ⵛⵉⴳⴰⵏ; ⵍⵍⴰ ⴷ ⵉⵜⴷⴷⵓ ⵍⵇⵇⴰⵢⴷ ⴷ ⵍⵃⴰⴽⵎ ⵙⴳ ⵍⵜⵏⴰⵢⵏ ⵖⵔ ⵍⵜⵏⴰⵢⵏ, ⵍⵍⴰ ⵃⴽⴽⵎⵏ ⴰⵙⵙ ⵏ ⵙⵙⵓⵇ. ⴳ ⵡⴰⵙⵙ ⵏ ⵍⵎⵊⵍⵉⵙ ⵅⴷⴷ ⴰⴷⴷⴰⵢ ⵢⵉⵍⵉ ⵛⴰ ⵏ ⵓⵊⵎⵎⵓⵄ ⴰⵎⵇⵇⵕⴰⵏ, ⵍⵍⴰ ⵜⴷⴷⵓⵏ ⵉⵎⵖⴰⵔⵏ ⴰⴷ ⵃⴰⴹⵕⵏ ⵖⵓⵔ ⵍⵇⵇⴰⵢⴷ ⴷ ⵉⵕⵓⵎⵉⵢⵏ, ⴰⴷ ⵎⴹⴰⴽⴰⵕⵏ ⵃⵎⴰ ⴰⴷ ⴷ ⴰⵡⵉⵏ ⵍⵓⵅⴱⴰⵕ; ⵍⵍⴰ ⵖⵓⵔⵙⵏ ⵜⵜⵃⴰⴹⴰⵕⵏ ⴰⴽⴷ ⵉⵎⵇⵇⵕⴰⵏⵏ ⵏ ⵜⵇⴱⵉⵍⵜ; ⴰⴷⴷⴰⵢ ⴰⴷ ⵄⴰⵢⴷⵏ ⵙⴳ ⵍⴱⵉⵔⵓ, ⵍⵍⴰ ⴷ ⵜⵜⴰⴼⴰⵏ ⵉⴷ ⵊⵊⴰⵔⵉ ⵍⵍⴰ ⵊⵎⵄⵏ ⴳ ⵓⵅⴰⵎ ⵏ ⵓⵎⵖⴰⵔ, ⵍⵍⴰ ⵜ ⵜⵜⵓⵡⵓⵏⵓⵢⵏ ⴱⴰⵔ ⴰⴷ ⴷ ⵢⴰⵡⵉ ⵛⴰ ⵏ ⵍⵅⴱⴰⵕ. ⴰⴷⴷⴰ ⵓⵔ ⵃⴹⵉⵕⵏ ⵉⴷ ⵊⵊⴰⵔⵉ, ⵍⵍⴰ ⵉⵚⵚⴰⴼⴰⴹ ⵓⵎⵖⴰⵔ ⵉⵎⵅⵣⵏⵉⵢⵏ ⵏⵏⵙ ⴰⴷ ⵚⵚⵉⵡⴹⵏ ⴰⵡⴰⵍ ⵉ ⵎⴷⴷⵏ ⵅⴷⴷ ⵉ ⵊⵊⴰⵔⵉ. ⴰⴷⴷⴰⵢ ⵜⵉⵍⵉ ⵛⴰ ⵏ ⴷⴷⵄⵓⵜ ⵅⴼ ⵃⴷⴷ, ⵍⵍⴰ ⵖⵉⵔⵙ ⵉⵟⵟⵕⵡⵡⵃ ⵓⵎⵅⵣⵏⵉ ⴰⴷ ⴰⵙ ⵉⵄⵍⵎ ⵖⵔ ⵍⵎⵊⵍⵉⵙ; ⵍⵍⴰ ⵖⵓⵔⵙ ⵉⵜⵎⵉⵏⵙⵉⵡ, ⵉⴼⴹⵕ ⵖⵓⵔⵙ, ⵢⴰⵎⵥ ⴳⵉⵙ ⵚⵚⵅⵕⵜ ⵏⵏⵙ ⵛⵛⵉⵍ ⵏⵏⵙ. ⵍⵍⴰⵏⵜ ⵜⵉⵥⵉⵜⵉⵏ ⴷ ⴷⴷⵄⴰⵡⵉ ⵏⵏⴰ ⵓⵔ ⴷⴰ ⵉⵟⵟⴰⵡⴹⵏ ⵖⵔ ⵍⵇⵇⴰⵢⵓⴷ ⵡⴰⵍⴰ ⵙ ⵓⵎⵖⴰⵔ, ⵍⵍⴰ ⵜⵏⵜ ⵉⵜⵜⴼⵔⵓ ⵛⴰ ⵏ ⵛⵛⵔⵉⴼ ⴰⵅⴰⵜⴰⵔ ⵏⵏⴰ ⵙⴳ ⵜⵃⵛⵛⴰⵎⵏ ⴰⵢⵜ ⵜⵇⵇⴱⵉⵍⵜ, ⵏⵏⴰ ⵖⵓⵔ ⵜⵍⵍⴰ ⵍⴱⴰⵕⴰⴽⴰ; ⵍⵍⴰ ⴷ ⵉⵇⵇⴰⵔ ⵉ ⵉⵎⵅⴰⵚⴰⵎⵏ, ⵢⵉⵏⵉ ⴰⵙⵏ: ( 34 ) « ⵕⴱⴱⵉ ⴰⴷ ⴽⵯⵏ ( ⵉⴷ ) ⵉⵀⴷⵓ; ⴰⵡⴰⵍ ⴰⴷ, ⵓⵔ ⴷⵉⵙ ⵛⴰ ⵏ ⵚⵚⵍⴰⵃ, ⴷⵖⵉ ⵓⵍⴰ ⵎⴰ ⵅⴼ ⵟⵟⴰⵡⴹⵏ ⵖⵔ ⵍⵎⵅⵣⵏ, ⴰⴷ ⴽⵯⵏ ⵉⵕⴱⴱⴰ; ⴰⵔⴰⵡ ⴰⴷ ⵏⵄⴷⵍ ⴰⵢ ⴰⴷ ⴳⵔⴰⵡⵏ, ⵏⵏⴹⵍ ⴰⵡⴰⵍ ⴰⴷ ». ⵍⵍⴰⵏ ⵛⵛⵕⴼⴰ ⵏⵏⴰ ⵚⵍⵃⵏⵉⵏ ⵡⴰⵀⵡⵡⴰ ⵎⵉⵄⴰⴷ ⴰⵔ ⵍⵕⵡⴰⵃ; ⴳ ⵜⵇⴱⵉⵍⵜ ⵏⵏⵖ ⵓⵔ ⴷ ⴰⵣⵔⴼ ⴰⴷ ⵉⵍⵍⴰⵏ ⵡⴰⵍⴰⵢⵏⵏⵉ ⵛⵛⵕⵄ ⴰⴷ ⵉⵃⴽⴽⵎⵏ. ⴳ ⵍⵃⵡⴰⵢⵊ ⵏ ⵍⴰⵚⵍ ⴷ ⵢⵉⵡⵍ ⴷ ⵍⵡⵔⵜ ⵓⵔ ⴷ ⵍⵇⵇⴰⵢⴷ ⴰⴷ ⵉⵃⴽⴽⵎⵏ, ⵡⴰⵍⴰⵢⵏⵏⵉ ⵍⵇⵇⴰⴹⵉ ⴰⴷ ⵢⵓⵟⵟⵓⵏ. ⴱⵕⵕⴰ ⵏ ⵍⵃⴽⴰⵎ ⵏ ⵍⵇⵇⴰⵢⴷ ⵍⵍⴰⵏⵜ ⵜⵣⵔⵉⴱⵉⵏ ⴰⵎⵎ ⵜⵉⵏ ⵕⵕⵎⴰ ⵙⵉⴷⵉ ⵄⵍⵉ ⴱⵏⵏⴰⵚⵕ, ⵜⵉⵏ ⵉⵄⵉⵙⴰⵡⵉⵢⵏ, ⵜⵉⵏ ⵉⵎⵏⴰⵢⵏ, ⵜⵉⵏ ... ⴰⴷⴷⴰⵢ ⵜⵎⵥⵉⵢ ⴷⴷⵄⵓⵜ, ⵍⵍⴰ ⵜ ⵢⵓⵟⵟⵓ ⵓⵎⵇⵇⵕⴰⵏ ⵏ ⵜⵣⵔⵉⴱⵜ, ⵛⵛⵉⵅ ⵏⵏⵙⵏ. ⴰⴷⴷⴰⵢ ⵢⵉⵍⵉ ⵛⴰ ⵏ ⵓⵎⴹⴰⴽⴰⵕ ⵅⴷⴷ ⵛⴰ ⵏ ⵟⵕⵥⵉ, ⵅⴷⴷ ⵛⴰ ⵏ ⵓⵎⵖⴰⵏⴰⵏ ⴳⵔ ⵛⴰ ⵏ ⵎⴷⴷⵏ, ⴳ ⵜⵖⵚⵜ, ⵍⵍⴰ ⵊⵎⵓⵄⵏ ⵉⵅⴰⵜⴰⵔⵏ ⵏ ⵜⵖⵚⵜ, ⴳⵏ ⵍⵀⵎⵎ ⵏⵏⵙⵏ ⵓⵜⵏ ⵕⵕⴰⵢ ⴳ ⵡⵉⵏⵏⴰ ⵉⴹⵏⵉⵏ. ⵜⴰⵎⵖⵔⴰ ⵡⴰⵀⵡⵡⴰ ⴰⵔⴳⴰⵣ ⴰⴷ ⵉⵜⵜⴰⵡⵍⵏ ⵉ ⵎⴻⵎⵎⵉⵙ ⵜⴰⵎⵟⵟⵉⴹⵜ ⵏⵏⴰ ⴰⵙ ⵉⵄⵊⴱⵏ ⵏⵜⵜⴰ; ⴰⵙⵙ ⴰⴷ ⵓⵔ ⵜⵇⵇⵉⵎ ⵍⵄⴰⴷⴰ ⴰⴷ; ⵍⵄⵉⵍ ⴰⴷ ⵉⵜⵜⵅⵟⴰⵕⵏ ⵜⴰⵔⴱⴰⵜ ⵏⵏⴰ ⴰⵙ ⵉⵏⵏⴰ ⵉⵅⴼ ⵏⵏⵙ; ⵍⵍⴰ ⵜⵜ ⵉⵜⵜⴰⵏⵏⴰⵢ ⴰⵎⴰ ⴳ ⵜⵎⵖⵔⴰ ⴰⵎⴰ ⴳ ⵡⴰⵎⴰⵏ, ⴰⵎⴰ ⵍⵍⴰ ⵉⵜⵜⵉⵍⵉ ⵍⵍⴰ ⵉⵙⴽⵏ ⵜⴰⵎⴰ ⵏⵏⵙ ⴳ ⵜⵇⵇⴱⵉⵍⵜ ⵅⴷⴷ ⴳ ⵍⵊⵎⴰⵄⵜ. ⴰⴷ ⴰⵙ ⵜⵄⵊⴱ ⵜⵎⵟⵟⵓⴹⵜ, ⵍⵍⴰ ⵉⵜⵙⴽⴽⴰⵔ ⵖⵔ ⵉⴱⴱⴰⵙ ⵢⵓⵏ ⵓⵔⵢⴰⵣ ⴱⵓ ⵍⵄⵇⵇⵍ ⵅⴷⴷ ⵢⵓⵜ ⵏ ⵜⵎⵟⵟⵓⴹⵜ ⵜⴰⵎⵇⵇⵕⴰⵏⵜ ⵅⴷⴷ ⵍⵍⴰ ⵉⵜⵜⴰⵣⵏ ⵓⵍⵜⵎⴰⵙ ⵖⵔ ⵎⴰⵙ; ⴰⴷ ⵢⴰⵡⴹ ⵡⴰⵡⴰⵍ ⵖⵔ ⵉⴱⴱⴰⵙ, ⵍⵍⴰ ⵉⵜⴽⴽⵔ, ⵎⵛ ⴰⵙ ⵉⵄⵊⴱ ⵍⵃⴰⵍ, ⵍⵍⴰ ⵉⵜⴷⴷⵓ ⵖⵔ ⵍⴰⵀⵍ ⵏ ⵜⵔⴱⴰⵜ ⴰⴷ ⴰⵙⵏ ⵉⵙⵙⵓⵜⵔ ⵜⴰⵎⵟⵟⵓⴹⵜ; ( 39 ) ⵎⵛ ⵉⴳⴳⵯⴷ ⵓⵔ ⴳⵉⵙ ⵜⵜⴳⴳⵏ ⵛⴰ, ⵅⴷⴷ ⵎⵛ ⵉⵔⴰ ⴰⴷ ⵙⵉⵙⵏ ⵉⵚⵚⵎⵖⵔ, ⵍⵍⴰ ⵖⵓⵔⵙ ⵉⵜⵜⴰⵡⵉ ⵢⵉⵜⵙ ⵏ ⵡⵡⵓⴷⵎⴰⵡⵏ ⵏⵏⴰ ⵥⵉⵍⵏⵉⵏ; ⵍⵍⴰ ⵜⵜⵕⵡⵡⴰⵃⵏ ⵖⵔ ⴰⵢⵜ ⵜⵎⵟⵟⵓⴹⵜ, ⵙⵙⵓⵜⵔⵏ ⴰⵙⵏ ⴹⵉⴼ ⵍⵍⴰⵀ, ⵢⵉⵏⵉⵏ ⴰⵙⵏ,: « ⵏⵇⵚⴹ ⴽⵯⵏ ⴰ ⴰⵅⵅⴰⵎ ⴰⵎⵇⵇⵕⴰⵏ; ⵍⵍⴰ ⴰⵙⵏ ⵜⵜⵉⵏⵉⵏ: « ⵎⵔⵃⴱⴰ! ⵎⵔⵃⴱⴰ ⵉⵙⵙⵓⵏ ⴷ ⵡⴰⴽⴰⵍ ⵏⵏⴰ ⴳ ⵜⵜⴷⴷⵓⵎ ». ⴰⴷⴷⴰⵢ ⵛⵛⵏ ⵉⵎⵏⵙⵉ, ⵍⵍⴰ ⵉⵜⵜⵙⴰⵡⴰⵍ ⵢⵓⵏ ⵏⵏⴰ ⵖⵓⵔ ⵉⵍⵍⴰ ⵍⵄⵇⵍ, ⵢⵉⵏⵉ ⴰⵙ ⵉ ⴱⴰⴱ ⵏ ⵓⵅⵅⴰⵎ: « ⵉⵡⴰ ⴼⵍⴰⵏ ⵉⵇⵚⴹ ⴽⵯⵏ ⵉⴷ, ⴰⴷ ⴰⵙ ⵜⴽⴼⵎ ⵜⴰⵎⵟⵟⵓⴹⵜ »; ⵎⵛ ⴰⵙ ⵉⵄⵊⴱ ⵍⵃⴰⵍ ⵉ ⵉⴱⴱⴰⵙ ⵏ ⵜⵔⴱⴰⵜ, ⵍⵍⴰ ⴰⵙⵏ ⵉⵜⵜⵉⵏⵉ: « ⵉⵡⴰ ⵏⴼⴰ ⴰⵡⵏ ⵎⵛ ⴰⵡⵏ ⵉⴼⴰ ⵕⴱⴱⵉ ». ⵡⴰⵀⵡⵡⴰ ⵍⵍⴰ ⵉⵜⵜⵉⴽⴽ ⵓⵔⵢⴰⵣ ⵢⵉⵍⵍⵉⵙ ⴱⵍⴰ ⵢⵉⵏⵉ ⴰⵙ ⵜⵜ; ⴱⵍⴰ ⵉⵛⴰⵡⵕ ⵜⵜ; ⴰⵙⵙ ⴰⴷ ⵍⵍⴰ ⵖⵉⴼⵙ ⵉⵜⵜⵔⴰⵔⴰ ⴰⵡⴰⵍ. ⴰⴷⴷⴰ ⴹⵕⵕⵏ ⴰⵡⴰⵍ ⵅⴼ ⵡⵏⵏⴰ ⵉⵙⵙⵓⵜⵔⵏ, ⵍⵍⴰ ⵉⵜⴷⴷⵓ ⴱⴰⵛ ⴰⴷ ⴷ ⵉⵄⴰⵢⴷ ⵙ ⵜⵎⵖⵔⵓⵙⵜ ⴰⴷ ⵉⵖⵔⵙ; ⵍⵍⴰ ⴷ ⵉⵜⵜⴰⵡⵉ ⵜⵎⵖⵔⵓⵙⵜ ⴷ ⵜⵄⵢⵢⴰⵍⵉⵏ ⴰⴷ ⵅⴷⵎⵏⵜ ⵟⵟⵄⴰⵎ; ⵜⴰⴷⴳⴳⵯⴰⵜ ⵍⵍⴰ ⴷ ⵜⵜⵕⵡⵡⴰⵃⵏ ⵎⴷⴷⵏ ⵉⵎⵇⵇⵕⴰⵏⵏ ⴱⴰⵛ ⴰⴷ ⴳⵏ ⵜⵜⴰⵎⴰⵏ ⵉ ⵜⵎⵟⵟⵓⴹⵜ. ⵉⴷⵔⵓⵙ ⵎⴰⵏⵉ ⵓⵔ ⴷⴰ ⴷ ⵜⵜⵎⵙⴰⵙⴰⵏ ⵅⴼ ⵜⵜⴰⵎⴰⵏ; ⴰⴷⴷⴰⵢ ⵎⵙⴰⵙⴰⵏ, ⵍⵍⴰ ⵜⵜⴰⵙⵉⵏ ⵍⴼⴰⵜⵃⴰ, ⴷⴷⵓⵏ ⴰⴱⵔⵉⴷ ⵏⵏⵙⵏ; ⵍⵍⴰ ⴷ ⵉⵜⵜⵄⴰⵢⴰⴷ ⵉⴱⴱⴰⵙ ⵏ ⵍⵄⵉⵍ, ⵉⴽⴼ ⵉⵎⵏⴷⵉ ⴰⴷ ⵥⴹⵏ, ⵉⴹⴱⴱⵕ ⵉ ⵍⵃⵡⴰⵢⵊ ⵏⵏⴰ ⵉⵅⵚⵚⵏ ⵉ ⵜⵎⵖⵔⴰ. ⵢⵉⵜⵙ ⵏ ⵡⵓⵙⵙⴰⵏ ⵇⴱⵍ ⵜⴰⵎⵖⵔⴰ, ⵍⵍⴰ ⴷ ⵊⵎⵓⵄⵏⵜ ⵜⵄⵢⵢⴰⵍⵉⵏ ⵏ ⵉⵖⵚⵚ ⵇⵇⴰⵃ ⴰⴷ ⵄⴷⵍⵏⵜ ⵉⵎⵏⴷⵉ ⵉ ⵢⵉⵥⵉⴹ; ⵍⵍⴰ ⵜⴻⵜⵜⵏⵜ ⵉⵎⴽⵍⵉ, ⵙⵓⵏⵜ ⴰⵜⵜⴰⵢ, ⵉⵏⵉⵏⵜ ⵉⵣⵍⴰⵏ, ⵙⵖⵓⵔⵜⵏⵜ; ⵍⵍⴰ ⴷ ⵊⵎⵓⵄⵏ ⵉⵜⵔⵔⴰⵙⵏ ⵢⵓⵜ ⵏ ⵜⴷⴳⴳⵯⴰⵜ ⵅⴼ ⵉⵙⵍⵉ; ⵍⵍⴰ ⴰⵙⵏ ⵉⵜⴳⴳ ⵉⵎⵏⵙⵉ, ⵇⵇⵉⵎⵏ ⵍⵍⴰ ⵜⵅⵓⵎⵎⴰⵕⵏ ⴳ ⵚⵚⵉⵏⵉⵢⴰ ⵙ ⵍⴼⵍⵓⵙ ⵎⵉⵄⴰⴷ ⴰⵔ ⴷ ⵉⵇⵔⵔⴱ ⵡⴰⵙⵙ. ⴰⴽⴷ ⵜⵉⵙⵍⵉⵜ ⵍⵍⴰ ⵜⵊⵎⵓⵄ ⵜⵉⵜⵔⵔⴰⵙⵉⵏ, ⵍⵍⴰ ⵖⵓⵔⵙ ⵙⵙⵏⵜ ⴰⵜⵜⴰⵢ ⵢⵓⵎⴰⵢⵏ ⵇⴱⵍ ⴰⴷ ⵜⵜ ⴰⵙⵉⵏ. ⴰⴷⴷⴰⵢ ⵜⵇⵔⵔⴱ ⵜⵎⵖⵔⴰ, ⵍⵍⴰ ⵉⵜⴷⴷⵓ ⵉⵙⵍⵉ ⵏⵜⵜⴰ ⴷ ⵍⵓⵣⵉⵔ ⵏⵏⵙ, ⵍⵍⴰ ⴷ ⵄⵕⵕⴷⵏ ⵉⵎⴷⴷⵓⴽⴽⵯⴰⵍ ⵏⵏⵙ; ⵍⵍⴰⵏ ⵡⵉⵏⵏⴰ ⴷ ⵉⵄⵕⵕⴹ ⵙ ⵜⵣⵍⴰⴼⵉⵏ, ⵢⵉⵍⵉⵏ ⵡⵉⵏⵏⴰ ⴷ ⵜⵜⴷⴷⵓⵏⵉⵏ ⴱⵍⴰ ⵜⴰⵣⵍⴰⴼⵜ. ⵉⵏⴱⴳⴰⵡⵏ ⴰⴷⴷⴰⵢ ⴷ ⴷⴷⵓⵏ ⵛⴰ ⵏ ⵉⵏⴱⴳⴰⵡⵏ, ⵍⵍⴰ ⵉⴽⵊⵊⵎ ⴱⴰⴱ ⵏ ⵓⵅⴰⵎ ⵍⵍⴰ ⵉⵄⵍⵍⵎ ⵉ ⵜⵎⵟⵟⵓⴹⵜ ⵏⵏⵙ, ⵍⵍⴰ ⴰⵙ ⵉⵜⵜⵉⵏⵉ: « ⵍⵍⴰⵏ ⴷⴰ ⵉⵏⴱⴳⴰⵡⵏ ⵖⵓⵔⵏⵏⵖ; ⵉⵡⴰ ⵀⵏⴰⵛⵉ ⵙⵙⵓ ⴰⵖ ⵍⴱⵉⵜ, ⵜⵉⴳⵜ ⴰⵖ ⵎⴰ ⵖⴰ ⵏⵛⵛ »; ⵍⵍⴰ ⵖⵉⵔⵙⵏ ⵉⵜⴼⴼⵖ ⵓⵔⵢⴰⵣ, ⵍⵍⴰ ⵖⵓⵔⵙⵏ ⵉⵜⵜⵖⵉⵎⴰ ⵎⵉⵄⴰⴷ ⴰⵔ ⴷ ⵢⵉⵙⵙⵉⵏ ⵉⵙ ⵜⵙⵙⴰ ⵍⴱⵉⵜ, ⵅⴷⴷ ⵎⵉⵄⴰⴷ ⴰⵔ ⴷ ⵖⵉⵔⵙ ⵜⴰⵣⵏ ⵜⵎⵟⵟⵓⴹⵜ ⵏⵏⵙ ⵛⴰ ⵏ ⵍⵄⵉⵍ ⴰⴷ ⴰⵙ ⵉⵄⵍⵎ. ⵍⵍⴰ ⴷ ⵉⴽⵊⵊⵎ ⵏⵜⵜⴰ ⴷ ⵉⵏⴱⵢⴰⵡⵏ, ⵍⵍⴰ ⵉⵜⵜⵉⵍⵉ ⵏⵜⵜⴰ ⴷ ⵉⵏⴱⴳⴰⵡⵏ, ⵏⵜⵜⴰ ⴰⴷ ⵉⴽⵊⵊⵎⵏ ⴷ ⴰⵎⵣⵡⴰⵔⵓ; ⴰⴷⴷⴰⵢ ⴽⵊⵎⵏ ⴳ ⵍⴱⵉⵜ, ⵍⵍⴰ ⴰⵙⵏ ⵉⵜⵜⵉⵏⵉ: « ⵇⵇⵉⵎⴰⵜ, ⵇⵇⵉⵎⴰⵜ, ⵎⵎⵔⵃⴱⴰ ⵏⵏⵓⵏ, ⴰⵅⴰⵎ ⵏⵏⵓⵏ ⴰⵢ ⴰⴷ »; ⵏⵜⵜⴰ ⵓⵔ ⴷⴰ ⵉⵜⵜⵖⵉⵎⴰ ⵛⴰ ⴳ ⵡⴰⵎⵎⴰⵙ, ⵍⵍⴰ ⵉⵜⵜⵖⵉⵎⴰ ⵉ ⵟⵟⵕⴼ; ⵍⵍⴰ ⵉⵜⵜⴷⴷⵓ ⵖⵔ ⵜⵎⵟⵟⵓⴹⵜ ⵏⵏⵙ, ⵍⵍⴰ ⴰⵙ ⵉⵜⵜⵉⵏⵉ ⵎⴰ ⵖⴰ ⵜⵙⵙⵏⵓⴷ: ⴰⵎⴰ ⵢⵓⵏ ⵓⵎⴹⵍⵉ ⵏ ⵍⵎⵍⵡⵉ. ⴰⵎⴰ ⵢⵓⵜ ⵏ ⵜⵃⵕⵕⴰⵛⵉⵜ ⴷ ⵡⵓⴷⵉ. ⵎⵛ ⵄⴷⴷⴰⵏ ⵎⴷⴷⵏ, ⵍⵍⴰ ⵜⵇⵇⴰⵕ ⵜⵎⵟⵟⵓⴹⵜ ⵉ ⵜⴰⴹⴹⵊⴰⵕⵜ ⵏⵏⵙ ⴰⴷ ⴰⵙ ⵜⵄⴰⵡⵏ; ⴷⵖⵢⴰ ⵍⵍⴰ ⵜⵄⴷⴷⵍ ⵚⵚⵉⵏⵉⵢⴰ, ⵜⴰⴽⴼ ⴷ ⵉ ⵎⴷⴷⵏ ⴰⴷ ⴳⵉⵏ ⴰⵜⵜⴰⵢ ⵅⴼ ⵓⵢⵏⵏⴰ ⵉⵜⵜⵓⵊⴰⴷ ⵓⵖⵔⵓⵎ. ⵍⵍⴰ ⵜⵜⵉⵍⵉ ⵛⴰ ⵏ ⵜⵔⴱⴰⵜⵜ ⵅⴷⴷ ⵛⴰ ⵏ ⵓⵔⴱⴰ ⵍⵍⴰ ⵉⵜⵜⵙⵅⵅⴰⵔ ⵅⴼ ⵎⴷⴷⵏ, ⵍⵍⴰ ⴰⵙⵏ ⵉⵜⵜⵉⴽⴽ ⵍⵃⵡⴰⵢⵊ, ⴰⵔ ⴰⵙⵏ ⵉⵜⵜⴰⵡⵉ ⵍⵎⵇⵇⵔⴰⵛ, ⴰⵔ ⴰⵙⵏ ⵉⵙⵙⵃⵎⵓ ⵍⴱⵔⵔⴰⴷ; ⵓⵔ ⴷⴰ ⵙⵙⴰⵏⵏ ⵎⴷⴷⵏ ⵙⵉⵏ ⵍⴱⵔⴰⵔⴷ ⵏ ⵡⴰⵜⴰⵢ ⵎⵉⵄⴰⴷ ⴰⵔ ⵜⵙⵙⵓⵊⴷ ⵜⵎⵟⵟⵓⴹⵜ ⵢⵓⵏ ⵉⵎⵅⴼⵉ ⵏ ⵍⵎⵍⵡⵉ; ⵍⵍⴰ ⴷ ⵉⵜⵜⴰⵡⵉ ⵍⵄⵉⵍ ⵅⴷⴷ ⵡⵏⵏⴰ ⵉⵜⵜⵙⵅⵅⴰⵔⵏ ⴰⵎⴰⵏ ⵏ ⵜⴰⵔⴷⴰ ⴷ ⵡⴰⵎⴰⵏ ⵏ ⵜⵉⵙⵙⵉ; ⵢⴰⵡⵉ ⴷ ⴰⵖⵔⵓⵎ ⵉ ⵎⴷⴷⵏ; ⴽⵓⵔ ⵜⴻⵜⵜⵏ, ⵉⵜⵜⵉⵏⵉ ⴰⵙⵏ ⴱⴰⴱ ⵏ ⵓⵅⴰⵎ: ( 49 ) « ⵛⵛⴰⵜ, ⴰⵡⵉ, ⵛⵛⴰⵜ, ⵎⴰⵜⵜⴰ ⵓⵜⵜⵛⵉ ⴰⴷ ⵏ ⵍⵎⵣⴰⵃ, ⵛⵛ, ⴰ ⴼⵍⴰⵏ, ⵜⵄⵚⵉⴷ ⵕⴱⴱⵉ ⵎⵛ ⵜⴼⵉⵢⵢⵛⴷ ». ⵎⵛ ⴳⴰⵏ ⵛⴰ ⵏ ⵉⵏⴱⵢⵉⵡⵏ ⵏⵏⴰ ⵥⵉⵍⵏⵉⵏ, ⵏⵏⴰ ⵄⵣⵣⴰⵏⵉⵏ, ⵍⵍⴰ ⵜⵏ ⵉⵜⵜⵃⵚⴰⵕ ⴱⴰⴱ ⵏ ⵓⵅⴰⵎ ⵍⵍⴰ ⵏⵙⵙⵏ, ⵉⵖⵔⵙ ⴰⵙⵏ ⵉ ⵢⵓⵏ ⵉⵅⴼ ⵏ ⵍⵎⴰⵍ, ⵉⵙⵙⵎⵖⵔ ⵉⵙⵙⵏ ⵇⴱⴰⵍⴰ. ⴰⵕⴰⵢⴱ ⵏ ⵚⵚⵡⴰⴱ ⴰⴷⴷⴰⵢ ⵢⴰⵡⴹ ⵍⵄⵉⴷ, ⵍⵍⴰ ⵊⵊⵎⵓⵄⵏ, ⵉⵎⵇⵇⵕⴰⵏⵏ ⵏ ⵜⵇⴱⵉⵍⵜ, ⵕⵥⵏ ⵍⴼⵍⵓⵙ; ⵉⵏⵉⵏ: « ⵉⵅⵚⵚⴰ ⴰⵖ ⴰⴷ ⵏⴷⴷⵓ ⴰⴷ ⵏⵕⴰⵢⴱ ⵅⴼ ⵍⵇⵇⴰⵢⴷ »; ⵍⵍⴰ ⵜⵜⴷⴷⵓⵏ ⵢⵓⵏ ⵡⴰⵙⵙ ⵅⴷⴷ ⵢⵓⵎⴰⵢⵏ ⴷⴼⴼⵉⵔ ⵏ ⵍⵄⵉⴷ ⴰⵡⴹⵏ ⵖⵔ ⵍⵇⵇⴰⵢⴷ, ⵉⵕⵃⵃⴱ ⴰⵙⵏ, ⵛⵛⴰⵏ, ⵙⵓⵏ, ⵙⵔⵙⵏ ⴰⵙ ⴰⵢⵏⵏⴰ ⵎⵉ ⵖⵉⵏ, ⵉⴼⵕⵃ ⵉⵙⵙⵏ, ⴷⴷⵓⵏ ⴷⴰⵜ ⴰⴱⵔⵉⴷ ⵏⵏⵙⵏ. ⴰⴷⴷⴰⵢ ⵓⵔ ⵖⵉⵔⵙ ⵉⴹⵀⵉⵕ ⵃⴷⴷ, ⵍⵍⴰ ⵉⵜⵜⵉⵏⵉ: « ⵓⵔ ⵉⵢⵉ ⵜⴳⵉ ⵜⴰⵇⴱⵉⵍⵜ ⵛⴰ », ⴷⴰ ⵉⵄⴰⵢⴷ ⴰⴷ ⵉⵅⵅⵓ ⵎⵉⵄⴰⴷ ⴰⵔ ⴷ ⵙⴳⵉⵙ ⵜⴳⴳⵯⴷⵏ ⵎⴷⴷⵏ, ⴰⵔ ⴷ ⵜⵜⵉⵏⵉⵏ: « ⴰ ⵡⴰⴷ ⵢⵓⴼⴰⵏ ⴰⴷ ⵉⵙⵖ ⵍⵅⴰⵟⵕ ⵏⵏⵙ ⴰⴳⴷ ⵙ ⵎⵉ! » ⵉⴷⴷ ⴰⵎⵖⴰⵔ, ⵍⵍⴰ ⵖⵉⵔⵙ ⵜⵜⵕⴰⵢⴰⴱⵏⵜ ⵜⵖⵙⴰⵜⵉⵏ ⴽⵓⵍ ⵢⵓⵜ ⵓⵃⴷⵏⵏⵙ; ( 52 ) ⵍⵍⴰ ⴰⵙ ⵜⵜⴰⵡⵉⵏ ⴰⵎⴰ ⵍⴼⵍⵓⵙ ⴰⵎⴰ ⵙⵙⵓⴽⴽⵯⵔ ⴰⵎⴰ ⵜⴰⵎⵖⵔⵓⵙⵜ ⴰⵎⴰ! ⵡⵏⵏⴰ ⵓⵔ ⵖⵉⵔⵙ ⵉⴷⴷⵉⵏ ⵏⵜⵜⴰ ⴷ ⵍⵇⵇⴰⵢⴷ ⵙⴳ ⵉⵎⵇⵇⵕⴰⵏⵏ, ⵍⵍⴰ ⵖⵉⴼⵙ ⵜⵜⵃⵜⴰⵍⵏ ⵎⵉⵄⴰⴷ ⴰⵔ ⴷ ⴰⵙ ⵜⵜ ⴰⴼⵏ, ⴷⴰ ⵓⵡⵜⵏ ⵜ ⴰⵔ ⴷ ⵉⵕⴰⵢⴱ! ⵓⵔ ⴷ ⵅⴰⵙ ⴳ ⵍⵄⵉⴷ ⴰⴷ ⵖⵉⵔⵙⵏ ⵜⵜⵕⴰⵢⴰⴱⵏ ⵎⴷⴷⵏ; ⵍⵍⴰ ⵖⵉⵔⵙⵏ ⵜⴷⴷⵓⵏ ⴰⴳⴳⵯⴷ ⴰⴷⴷⴰⵢ ⴷ ⴰⵡⴹⵏ ⵙⴳ ⵛⴰ ⵏ ⵙⵙⴼⵕ ⴰⵎⵇⵇⵕⴰⵏ, ⵅⴷⴷ ⴰⴷⴷⴰⵢ ⵖⵓⵔⵙⵏ ⵢⵉⵍⵉ ⵛⴰ ⵏ ⵍⴼⵕⵃ, ⵅⴷⴷ ⴰⴳⴳⵯⴷ ⴰⴷⴷⴰⵢ ⵜⵏ ⵢⴰⵖ ⵛⴰ; ⴽⵓⵔ ⴰⵙ ⵜⵜⵉⵏⵉⵏ: « ⵉⵡⴰ ⵕⴱⴱⵉ ⴰⴷ ⵢⴰⵏⵏⴰⵢ ⵜⴰⵎⵎⴰⵔⴰ ⵏⵏⴽ, ⵉⵛⴰⴼⴰ », ⵜⵜⵉⵏⵉⵏ ⴳⵔⴰⵙⵏ ⴷ ⵉⵅⴼ ⵏⵏⵙⵏ: ( 54 ) « ⵢⴰⴽ ⵕⴱⴱⵉ ⵓⵔ ⴰⴽ ⵉⵜⵜⵙⵀⴰⵍ ⴰⴷ ⵜⴽⴽⵔⵜ, ⴰ ⵉⵖⵙⴰⵏ ⵏ ⵊⴰⵀⵏⵏⴰⵎⴰ! ». ⵍⵍⴰ ⵉⵜⵜⵕⴰⵢⴰⴱ ⵓⵔⵢⴰⵣ ⴰⴽⴷ ⴳ ⵢⵓⵏ ⵓⵎⴷⴷⴰⴽⴽⵯⵍ ⵏⵏⵙ ⴰⵎⵇⵇⵕⴰⵏ, ⵎⴰⵛⴰ ⴰⵕⴰⵢⴱ ⵏⵏⴰ ⵍⵍⴰ ⵉⵜⵜⵉⵍⵉ ⴰⵎⵎ ⵛⴰ ⵏ ⵓⵎⵔⵡⴰⵙ, ⵓⵔ ⴷⴰ ⵉⵜⵜⵅⵏⵏⴰ ⵢⵓⵏ ⵎⵉⵄⴰⴷ ⴰⵔ ⴷ ⵜ ⵉⴹⵕⵏ. ⵢⵓⵏ ⵏⵏⴰ ⵓⵔ ⵖⵓⵔ ⵉⵍⵍⵉ ⵎⴰⴷ ⴰⵙ ⵉⵇⵇⴰⴱⵍⵏ ⵛⴰ, ⵍⵍⴰ ⵢⴰⴽⴽⴰ ⵍⵎⴰⵍ ⵏⵏⵙ ⵙ ⵕⵕⴱⵄ ⵉ ⵃⴷⴷ ⵢⴰⴹⵏⵉⵏ ⴰⴷ ⴰⵙ ⵜ ⵉⵇⵇⴰⴱⵍ; ⵍⵍⴰⵏ ⵎⴷⴷⵏ ⵏⵏⴰ ⵙⵖⴰⵏⵉⵏ ⵜⵉⵖⵓⵕⵢⵉⵏ ⵏ ⵡⵓⵍⵍⵉ ⴷ ⴽⴽⴰⴷⴰ ⵏ ⵉⵣⵣⴳⴰⵔⵏ ⵉ ⵎⴷⴷⵏ; ⴰⴷⴷⴰⵢ ⵢⴰⵡⴹ ⵓⵖⵖⵓ ⴷ ⵡⵓⴷⵉ, ⵍⵍⴰ ⴰⵙ ⴷ ⵜⵜⴰⵡⵉⵏ ⵍⵃⵇⵇ ⵏⵏⵙ; ⵍⵍⴰ ⴰⵙ ⵜⵜⵉⴽⴽⵉⵏ ⵍⵃⵙⴰⴱ ⵏ ⴽⵓⵍⵛⵉ. ⴰⴷⴷⴰⵢ ⵣⵔⵉⵏ ⵕⴱⵄⴰ ⵏ ⵉⵙⴳⴳⵯⴰⵙⵏ. ⵍⵍⴰ ⵉⵜⵜⵙⵖ ⵡⵏⵏⴰ ⵢⵓⵎⵥⵏ ⵙ ⵕⵕⴱⵄ ⵏ ⵕⵕⴱⵄ ⵏⵏⵙ; ⵎⵛ ⴰⵙ ⵉⴹⵀⵕ ⵉ ⴱⴰⴱ ⵏ ⵍⵎⴰⵍ, ⵍⵍⴰ ⴷ ⵉⵜⵜⴰⴳⴳⵯⴰ ⵖⵓⵔ ⵡⵏⵏⴰ ⵎⵉ ⵜ ⵉⴼⴽⴰ; ⵓⵔ ⴰⵙ ⵉⵄⵊⵉⴱ ⵍⵃⴰⵍ, ⵍⵍⴰ ⵜ ⵉⵜⵏⴷⵀ ⴰⴷ ⵜ ⵉⴼⴽ ⵉ ⵃⴷⴷ ⵢⴰⴹⵏⵉⵏ ⵏⵏⴰ ⴰⵙ ⵉⵍⵍⴰ ⵍⴰⵎⴰⵏ. ⴰⴷⴷⴰⵢ ⵢⵉⵔⵉ ⵢⵓⵏ ⴰⴷ ⵉⴼⴽ ⵉ ⵢⵓⵏ ⵍⵎⴰⵍ ⵙ ⵕⵕⴱⵄ, ⵍⵍⴰ ⵉⵜⵜⴰⵎⵥ ⵛⵛⵀⵓⴷ ⵅⴷⴷ ⵍⵍⴰ ⵜⴷⴷⵓⵏ ⵖⵔ ⵍⵄⴷⵓⵍ, ⵍⵍⴰ ⵜⵜⴰⵔⵓⵏ ⴰⵢⵏⵏⴰ ⴳⴰⵏ; ⵎⵛ ⵉⵏⴷⵎ ⴱⴰⴱ ⵏ ⵍⵎⴰⵍ ⵓⵔ ⵜ ⵉⵏⴼⵉⵄ: ⴰⵕⴱⴱⴰⵄ, ⵉⵍⵍⴰ ⵖⵓⵔⵙ ⵍⵃⵇⵇ ⵏⵏⴰ ⵙ ⵎⵉ ⵖⴰ ⵢⴰⵙⵉ ⵕⵕⴱⵄ ⵏⵏⵙ ⴰⴽⴷ ⵙⴳ ⵡⴰⵙⴽⴽⴰ ⵏⵏⵙ. ⵍⵍⴰⵏ ⵎⴷⴷⵏ ⵏⵏⴰ ⵜⴳⴳⵏⵉⵏ ⵍⵇⴰⵄⵉⴷⴰ ⵢⴰⴹⵏⵉ; ⵍⵍⴰ ⵉⵙⵙⴰⵖ ⵢⵓⵏ ⵍⵎⴰⵍ ⵙ ⵇⴷⴷⴰ ⵡⴰ ⵇⴷⴷⴰ; ⵉⴼⴽ ⵜ ⵉ ⵢⵓⵏ ⵢⴰⴹⵏⵉ ⴰⴷ ⵜ ⵉⵃⴹⵓ; ⴰⴷⴷⴰⵢ ⵣⵣⵏⵣⵏ, ⵍⵍⴰ ⵉⵜⵜⴰⵙⵉ ⴱⵓ ⵍⵎⴰⵍ ⴰⵢⵏⵏⴰ ⵉⵙⵙⵅⵙⵔ, ⴱⴹⵓⵏ ⴰⵢⵏⵏⴰ ⵉⵇⵇⵉⵎⵏ; ⵎⴰⵛⴰ ⵓⵔ ⴷⴰ ⵉⵜⵜⵖⵉⵎⴰ ⵛⴰ ⵇⵇⴱⴰⵍⴰ; ⵡⵏⵏⴰ ⵉⵃⵟⵟⵓⵏ ⵓⵔ ⴷⴰ ⵉⵙⵙⴹⵀⴰⵕ ⵛⴰ ⵉ ⴱⵓ ⵍⵎⴰⵍ. ⵉⴷⴷ ⵜⴰⴳⵯⵎⴰⵔⵜ, ⵍⵍⴰ ⵜⵜ ⵜⵜⵉⴽⴽⵉⵏ ⵎⴷⴷⵏ ⵙ ⵏⵏⵚⵚ. ⵜⵍⵍⴰ ⴰⵍⵜⵓ ⵍⵇⴰⵄⵉⴷⴰ ⵏ ⵜⵎⴰⵣⵉⵔⵜ; ⵍⵍⴰ ⵜⵜⵉⴽⴽⵉⵏ ⵎⴷⴷⵏ ⵙ ⵙⵙⵀⵎⴰ ⵅⴷⴷ ⵙ ⵜⵜⵓⵍⵓⵜ ⵅⴷⴷ ⵍⵍⴰ ⵜⵜ ⴽⵔⵔⵓⵏ ⵙ ⵍⴼⵍⵓⵙ. ⵍⵓⵣⵉⵄⵜ ⴰⴷⴷⴰⵢ ⵉⵔⵉⵏ ⵎⴷⴷⵏ ⴰⴷ ⵜⵜⵛⵏ ⴰⴽⵙⵓⵎ, ⴰⴷⴷⴰⵢ ⴳⵉⵙⵏ ⵢⵉⵍⵉ ⴼⴰⴷ ⵏ ⵓⴽⵙⵓⵎ, ⵍⵍⴰ ⵜ ⵉⴷ ⵜⵜⵡⵣⵣⴰⵄⵏ ⵣⵉ ⵙⵙⵓⵇ; ⴰⴷⴷⴰⵢ ⴳⵉⵙⵏ ⵢⵉⵍⵉ ⴼⴰⴷ ⵏⵏⵙ, ⵍⵍⴰ ⵙⵙⴰⵖⵏ ⵎⴰⵎⵉ ⵖⴰ ⵖⵔⵔⵙⵏ ⴳ ⵓⵅⵅⴰⵎ ⴱⵍⴰ ⴷⴷⵓⵏ ⵖⵔ ⵙⵙⵓⵇ; ⵎⵛ ⴷ ⵜⵜⵔⵙⵏ ⵛⴰ ⵏ ⵡⵓⴷⵎⴰⵡⵏ ⵅⴼ ⵜⵖⵚⵜ ⵅⴷⴷ ⴳ ⵙⵉⵏ ⵅⴷⴷ ⴽⵕⴰⴹ ⵏ ⵉⵅⴰⵎⵏ, ⵍⵍⴰ ⵜⴽⴽⵔⵏ ⵎⴷⴷⵏ, ⵍⵍⴰ ⵙⵙⴰⵖⵏ ⵖⵓⵔ ⵡⵏⵏⴰ ⵖⵓⵔ ⵉⵍⵍⴰ ⵍⵎⴰⵍ ⵢⵓⵏ ⵉⵅⴼ ⵏ ⵡⵓⵍⵍⵉ, ⴳⵏ ⴰⵙ ⵜⵜⴰⵎⴰⵏ, ⵖⵔⵙⵏ ⴰⵙ; ( 61 ) ⵍⵍⴰ ⴱⵟⵟⵓⵏ ⵜⴰⵎⵖⵔⵓⵙⵜ ⴳ ⵓⵢⵏⵏⴰ ⵙ ⵍⵍⴰⵏ; ⵢⵔⵏ ⵉⵍⴰⵏ ⴳ ⵍⵓⴳⵕⴰⵄⵉ, ⵙⵏⵉⵏ ⴰⴽⵙⵓⵎ ⴳ ⵉⵣⴰⴽⴰⵔⵏ ⵅⴷⴷ ⴰⵡⵉⵏ ⵜ ⴳ ⵉⵇⵛⵓⵛⵏ ⵙ ⴰⵅⵅⴰⵎ. ⵉⴷⴷ ⵜⴰⴹⵡⵡⴰⵕⵜ ⴷ ⵓⵀⵉⴹⵓⵕ ⴷ ⵢⵉⵅⴼ, ⵍⵍⴰ ⵜ ⴷⴷⵍⵍⴰⵍⵏ ⵅⴼ ⵡⵉⵏⵏⴰ ⵃⴰⴹⵕⵏⵉⵏ ⴽⵓⵍ ⵢⵓⵏ ⵍⵍⴰ ⵉⵜⵜⵣⴰⵢⴰⴷ ⵛⵡⵉ ⵎⵉⵄⴰⴷ ⴰⵔ ⴷ ⵜⵜⵔⵙ ⵍⵃⴰⵊⵜ ⵅⴼ ⵢⵓⵏ ⴷⵉⴳⵙⵏ, ⵢⴰⵡⵉ ⵜⵜ; ⵍⵍⴰ ⵜⴽⴽⵙⵏ ⵜⵜⴰⵎⴰⵏ ⵏ ⵜⴹⵡⵡⴰⵕⵜ ⴷ ⵢⵉⵅⴼ ⴷ ⵓⵀⵉⴹⵓⵕ ⵙⴳ ⵜⵜⴰⵎⴰⵏ ⵏ ⵜⵎⵖⵔⵓⵙⵜ, ⴱⴹⵓⵏ ⵍⴱⴰⵇⵉ ⵅⴼ ⵍⵓⴳⵕⴰⵄⵉ, ⴳⵏ ⵢⵓⵏ ⵓⵔⵢⴰⵣ ⴷ ⴹⴹⴰⵎⵏ ⵏ ⵍⴼⵍⵓⵙ, ⴳⵏ ⵜⵜⴰⵊⵉⵍ, ⵙⵉⵏ ⵏ ⵍⵙⵡⴰⵇ ⵅⴷⴷ ⴽⵕⴰⴹ, ⴷⴷⵓⵏ ⴰⴱⵔⵉⴷ ⵏⵏⵙⵏ. ⴰⴷⴷⴰⵢ ⵉⵎⵎⵜ ⴽⵔⴰ ⵏ ⵉⵅⴼ ⵏ ⵡⵓⵍⵍⵉ ⵉ ⵃⴷⴷ, ⵍⵍⴰ ⵉⵄⵍⵍⵎ ⵉ ⵍⴰⵀⵍ ⵏⵏⵙ ⵅⴷⴷ ⵉ ⵡⴰⴹⴹⵊⴰⵕⵏ, ⵊⵎⵄⵏ ⴰⴷ ⴰⵙ ⴳⵏ ⵜⵜⴰⵎⴰⵏ ⵎⵛ ⵉⵄⴷⵍ ⵓⴽⵙⵓⵎ ⵎⵛ ⵓⵔ ⵉⵎⵎⵓⵜ ⵙ ⵍⵎⵕⴹ; ⴰⵢⵏⵏⴰ ⴷ ⵍⵄⴰⴷⴰ ⴰⴷ ⵉⴳⴰ, ⴱⴰⵛ ⴰⴷ ⵄⴰⵡⵏⵏ ⴳ ⵍⵅⴷⴷⵉⵜ ⵉ ⵍⴰⵀⵍ ⵏⵏⵙⵏ. ⴰⴷⴷⴰⵢ ⴷ ⵉⵡⵣⵣⵄ ⵃⴷⴷ ⵙⴳ ⵙⵙⵓⵇ ⵅⴷⴷ ⵙⴳ ⵛⴰ ⵏ ⵡⴰⵏⵙⴰ, ⵍⵍⴰ ⵜⵜⴳⴳ ⵍⴰⵍ ⵏ ⵓⵅⵅⴰⵎ ⴰⴽⵙⵓⵎ ⵏⵏⴰ ⵉ ⵉⵎⵏⵙⵉ, ⴰⵎⴰ ⵍⵍⴰ ⵜⵜⴳⴳ ⵟⵟⵄⴰⵎ ⴰⵎⴰ ⵍⵍⴰ ⵜⵜⴳⴳ ⴰⵔⵛⵜⵓ; ⴰⴷ ⵜⴳ ⵟⵟⴰⵊⵉⵏ; ⴰⴷⴷⴰⵢ ⵉⵏⵓ ⵉⵎⵏⵙⵉ, ⵍⵍⴰ ⵜⵜⵉⵍⵉ ⵍⵍⴰ ⵜⵙⵙⵃⵎⴰ ⵍⵎⵓⵇⵔⴰⵛ, ⵍⵍⴰ ⵜⵄⴷⵍ ⵚⵚⵉⵏⵉⵢⴰ; ⵍⵍⴰ ⵜⵜⵉⵍⵉ ⵍⵃⴰⵍ ⵍⵍⴰ ⵉⵄⵊⴱⵏ ⵉ ⵍⵡⴰⵛⵓⵏ ⴷ ⴰⵢⵜ ⵓⵅⵅⴰⵎ ⵇⵇⴰⵃ. ⵍⵍⴰ ⵉⵜⵜⴷⴷⵓ ⵓⵔⵢⴰⵣ ⵍⵍⴰ ⴷ ⵉⵇⵇⴰⵔ ⵉ ⵡⴰⴹⴹⵊⵊⴰⵕ ⵏⵏⵙ ⵅⴷⴷ ⵉ ⵓⵎⴷⴷⴰⴽⴽⵯⵍ ⵅⴷⴷ ⵉ ⵢⵉⵎⵎⴰⵙ ⴰⴷ ⵖⵓⵕⵚ ⵉⵜⵛ ⵉⵎⵏⵙⵉ ⵏⵏⴰ ⵉⵥⵉⵍⵏ. ⵍⵇⴰⵄⵉⴷⴰ ⵖⵓⵔⵏⵏⵖ ⵓⵔ ⴷⴰ ⵜⵜⴽⵎⵎⴰⵍ ⵍⴼⵕⴰⵃⵉⵜ ⵎⵉⵄⴰⴷ ⴰⵔ ⴷ ⵢⵉⵍⵉ ⵛⴰ ⵏ ⵓⵎⵄⵕⴰⴹ ⵏⵏⴰ ⵖⴰ ⵖⵓⵔⵏⵖ ⵉⵛⵛⵏ. ⴳ ⵜⵎⴰⵣⵉⵔⵜ ⵏⵏⵖ ⵉⴷⵔⵓⵙ ⵎⴰⵏⵉ ⴳ ⵜⴻⵜⵜⵏ ⵎⴷⴷⵏ ⴰⴽⵙⵓⵎ, ⵉⵜⵅ ⵉⵖⵍⴰ; ⴰⵕⴰ ⴰⴷ ⵉⴽⴼⵓ ⵓⵔⵢⴰⵣ ⴰⴷ ⵉⵙⵙⵍⵙ ⵉⵙⵄⵉⵛ ⴰⵔⵔⴰⵡ ⵏⵏⵙ ⴰⴽⴽⵯ. ⵍⵍⴰⵏⵜ ⵜⵅⵅⴰⵎⵉⵏ ⵏⵏⴰ ⵓⵔ ⴷⴰ ⵜⵜⵏⵉⵏ ⴰⴽⵙⵓⵎ ⵣⵉ ⵍⵄⵉⴷ ⵖⵔ ⵍⵄⵉⴷ; ⵎⵛ ⵃⵣⵣⵎⵏⵜ, ⵍⵍⴰ ⵉⵖⵕⵕⵚ ⴱⴰⴱ ⵏ ⵓⵅⴰⵎ ⵉ ⵢⵓⵜ ⵏ ⵜⴼⵓⵍⵍⵓⵙⵜ. ⴰⴽⴷ ⵉⵅⴰⵎⵏ ⵉⵅⴰⵜⵔⵏ ⵏⵏⴰ ⵊⵊⵉⵡⵏⵏⵉⵏ, ⵓⵔ ⴷⴰ ⵜⴻⵜⵜⵏ ⵛⴰ ⴰⴽⵙⵓⵎ ⴷⵉⵎⴰ; ⵎⴰⵛⴰ ⵍⵍⴰ ⵖⵓⵔⵙⵏ ⵉⵜⵜⵉⵍⵉ ⵡⵓⴷⵉ ⴷ ⵣⵣⵉⵜ. ⴳ ⵍⵄⵉⴷ ⴰⵎⵇⵇⵕⴰⵏ ⵇⵇⴰⵃ ⴷⴷⵓⵏⵉⵜ ⵍⵍⴰ ⵜⵖⵔⵔⵙ ⵉ ⵜⵎⵖⵔⵓⵙⵜ, ⵡⵏⵏⴰ ⵉⵖⵉⵏ, ⵡⵏⵏⴰ ⵓⵔ ⵉⵖⵉⵏ, ⵅⴰⵙ ⵡⵏⵏⴰ ⵉⵙⵓⵍⵏ ⵓⵔ ⵢⵓⵡⵉⵍⵏ, ⵅⴷⴷ ⵜⴰⴷⴳⴰⵍⵜ ⵅⴷⴷ ⵜⴰⴼⵇⵇⵉⵔⵜ. ⵕⵎⴹⴰⵏ ⴳ ⵛⵀⵕ ⵏ ⵕⵎⴹⴰⵏ, ⵍⵍⴰ ⵟⵟⴰⵥⵓⵎⵏ ⵎⴷⴷⵏ ⵇⵇⴰⵃ ⴰⴳⵯⴷ ⵍⵡⴰⵛⵓⵏ ⵎⵛ ⵜⵏ ⵓⵊⵊⴰⵏ ⵍⴰⵀⵍ ⵏⵏⵙⵏ; ⵍⵍⴰ ⵉⵜⴽⴽⵔ ⴱⵏⴰⴷⵎ ⵇⴱⵍ ⵍⴼⵊⵔ, ⵍⵍⴰ ⵉⵜⵜⵚⵃⵃⴰⵕ: ⵡⵏⵏⴰ ⵖⵓⵔ ⵓⴷⵉ ⴷ ⵣⵣⵉⵜ, ⵍⵍⴰ ⵉⵜⵚⵃⵃⴰⵕ ⵙ ⵍⵎⵍⵡⵉ ⵅⴷⴷ ⴱⵓⵛⵉⵢⵢⴰⵔ ⴷ ⵡⴰⵜⵜⴰⵢ; ⵡⵏⵏⴰ ⵓⵔ ⵖⵓⵔ ⵛⴰ, ⵍⵍⴰ ⵉⵜⴻⵜⵜ ⵅⴰⵙ ⴰⵃⵕⵕⴰⵛⵉ ⴷ ⵡⴰⵜⵜⴰⵢ; ( 69 ) ⴰⴷⴷⴰⵢ ⴷ ⵉⵇⵕⵕⴱ ⵍⴼⵊⵔ, ⵍⵍⴰ ⵉⵜⵜⵙⵍⵉⵍⵉ ⵓⵔⵢⴰⵣ ⴰⵇⵇⵎⵓ ⵏⵏⵙ ⵙⴳ ⵏⵏⵄⵎⵜ, ⵢⵉⵏⵉ ⴳⵔⴰⵙ ⴷ ⵉⵅⴼ ⵏⵏⵙ;: « ⵉⵡⴰ ⴰⵙⴽⴽⴰ, ⴰⴷ ⴰⵥⵓⵎⵖ, ⵏⵛⴰⵄⵍⵍⴰⵀ »; ⵙⴳ ⵍⵍⵉ ⵓⵔ ⵉⵜⴻⵜⵜ ⵡⴰⵍⴰ ⴰⴷ ⵉⴽⴽⵎⵓ ⵡⴰⵍⴰ ⴰⴷ ⵉⵙⵓ ⵡⴰⵍⴰ ⴰⴷ ⵉⵅⵎⵎⴻⵎ ⴳ ⵛⵛⵀⴰⵡⵉ ⴰⴽⴽⵯ ⵎⵉ ⵜⵏⵜ ⵉⵍⴰⵏ, ⵡⴰⵍⴰ ⴳ ⵜⵎⵟⵟⵓⴹⵜ. ⵍⵍⴰ ⵉⴽⴽⴰⵍ, ⵍⵍⴰ ⵉⵅⴷⴷⵎ ⴰⵢⵏⵏⴰ ⵎⵉ ⵉⵖⵉ ⵎⵉⵄⴰⴷ ⴰⵔ ⴷ ⵉⵡⵡⵜ ⵍⵎⵖⵔⴱ, ⴰⵔ ⴷ ⵉⵙⵍ ⵉ ⵟⵟⴰⵍⴱ ⵢⵓⴷⴷⵏ; ⵍⵍⴰ ⵉⵟⵟⵥⴰⵍⵍⴰ, ⵄⴰⴷ ⴰⴷ ⵜⵜⴻⵜⵏ; ⵍⵍⴰ ⵜⵜⵉⵍⵉ ⵢⵓⵜ ⵜⵃⵔⵉⵔⵜ ⵏⵏⴰ ⵉⵥⵉⵍⵏ ⵍⵍⴰ ⵜⵏⵡⴰ, ⵢⵉⵍⵉ ⵓⵖⵔⵓⵎ ⵃⵔⴰ ⵉⴼⴼⵖ ⵙⴳ ⵓⴼⵕⵕⴰⵏ, ⵢⵉⵍⵉ ⵡⴰⵜⵜⴰⵢ; ⵍⵍⴰ ⵉⴼⵟⵟⵕ ⴱⵏⴰⴷⵎ, ⵄⴰⴷ ⴰⴷ ⵖⵉⴼⵙ ⵜⵜⵔⵓⵙ ⵕⵕⴰⵃⵜ, ⴰⴷ ⵜ ⵉⴷ ⵉⵜⵜⴰⵖⵓⵍ ⵕⵕⵓⵃ; ( 71 ) ⴳ ⵉⵎⵏⵙⵉ, ⵍⵍⴰ ⵉⵜⵜⴻⵜ ⴱⵏⴰⴷⵎ ⴰⵢⵏⵏⴰ ⵉⵍⵍⴰⵏ; ⵉⵇⵇⵉⵎ ⴰⵍⵜⵓ ⵎⵉⵄⴰⴷ ⴰⵔ ⴷ ⵜ ⵉⵙⴽⴽⵔ ⵟⵟⴰⵍⴱ ⵖⵔ ⵚⵚⵃⵓⵕ ⴰⴷⴷⴰⵢ ⵢⵓⴷⴷⵏ. ⵡⵉⵏⵏⴰ ⴱⵄⴷⵏⵉⵏ ⵎⴰⵏⵉ ⴳ ⵜⵍⵍⴰ ⵜⵎⵣⴳⵉⴷⴰ, ⵍⵍⴰ ⵖⵓⵔⵙⵏ ⵉⵜⵜⵉⵍⵉ ⵓⴼⵓⵍⵍⵓⵙ ⵅⴷⴷ ⵍⵎⴰⴳⴰⵏⴰ; ⵙ ⵍⵎⵕⵕⴰⵜ ⵍⵍⴰ ⵜⵏ ⵉⵖⴹⴹⵕ ⵓⵏⵓⴷⴷⵎ, ⵇⵇⵉⵎⵏ ⴱⵍⴰ ⴰⵚⵃⵃⵕ. ⴳ ⵍⵍⵢⴰⵍⵉ ⵏ ⵜⴼⵙⴰ ⵍⴰ ⵉⵜⵜⵉⵍⵉ ⵡⴰⵙⵙ ⵍⵍⴰ ⵉⴽⵟⵟⵉⵏ ⵇⴱⴰⵍⴰ ⵓⵔ ⴷⴰ ⵜⵜⴽⴽ ⵛⴰ ⵏ ⵜⵎⵎⴰⵔⴰ ⵅⴼ ⵓⵔⵢⴰⵣ; ⵉⴷⴷ ⴳ ⵓⵏⴱⴷⵓ ⵍⵍⴰ ⵉⵜⵜⵉⵍⵉ ⵡⴰⵙⵙ ⵉⵖⵣⵣⵉⴼ, ⵢⵉⵍⵉ ⵉⵔⵉⴼⵉ, ⵜⵉⵍⵉ ⵍⵃⵎⵓⵜ ⵏ ⵍⵃⴰⵍ. ⵡⵉⵏⵏⴰ ⵉⵎⴳⴳⵔⵏ ⴳ ⵍⵅⵍⴰ, ⵉⵍⵍⴰ ⴷⵉⵙⵏ ⵡⵏⵏⴰ ⵉⵖⵍⵍⴱ ⵍⵃⴰⵍ ⵍⵍⴰ ⵉⵙⵙ ⴰⵎⴰⵏ. ⵟⵟⴰⵍⴱ ⵟⵟⴰⵍⴱ ⵍⵍⴰ ⵜ ⵜⵜⵛⴰⵕⴰⴹⵏ ⵎⴷⴷⵏ ⴰⴷ ⵉⵙⵇⵇⵕⴰ ⵍⵡⴰⵛⵓⵏ, ⵢⵓⴷⴷⵏ, ⵉⵃⴷⴷⵜ ⵎⴷⴷⵏ ⵉⵜⵅ ⵏⵜⵜⴰ ⴰⴷ ⵉⵇⵇⵔⴰⵏ ⵎⴰⴷ ⵉⵏⵏⴰ ⵏⵏⴱⵉ, ⴰⴷ ⵉⵙⵙⵏ ⵎⴰⴷ ⵉⵍⵍⴰⵏ ⴳ ⵍⴽⵜⵓⴱ. ⵡⴰⵀⵡⵡⴰ ⵍⵍⴰ ⵉⵜⵜⵉⵍⵉ ⵍⵍⴰ ⵉⵙⴽⵏ ⴳ ⵢⵓⵜ ⵏ ⵜⵅⴰⵎⵜ ⴰⵍⵍⵉⴳ ⵙⵓⵍⵏ ⵎⴷⴷⵏ ⵓⵔ ⵖⵓⵔⵙⵏ ⵜⵉⵢⴷⴷⵔⵉⵏ; ⴰⵙⵙ ⴰⴷ ⵍⵍⴰ ⴱⵏⵏⵓⵏ ⵎⴷⴷⵏ ⵜⵉⵎⵣⴳⵉⴷⴰ, ⵍⵍⴰ ⴰⵙ ⵄⴷⴷⵍⵏ ⵍⴱⵏⵉ ⵃⵙⵏ ⵙⴳ ⵍⴱⵢⵓⵜ ⵏⵏⵙⵏ; ⴷⵉⴳⵙ ⴰⴳ ⵉⵜⵜⵙⴽⴰⵏ ⵟⵟⴰⵍⴱ. ⵍⵍⴰ ⵜ ⵜⵜⵛⴰⵕⴰⴹⵏ ⵎⴷⴷⵏ ⵙ ⵉⵎⵏⴷⵉ ⴳ ⵓⵙⴳⴳⵯⴰⵙ; ⵏⵜⵜⴰ ⴰⴷ ⵉⵜⵜⵓⴷⴷⴰⵏⵏ, ⴰⴷ ⵉⵜⵚⵇⵕⴰⵏ ⵍⵡⴰⵛⵓⵏ, ⴰⴷ ⵉⴳⵏⵏⵓⵏ ⵉⵄⴱⴰⵏⵏ, ⴰⴷ ⵉⵟⵟⵇⵇⵕⴰⵏ ⵅⴼ ⵡⵉⵏⵏⴰ ⵎⵎⵓⵜⵏⵉⵏ, ⴰⴷ ⵉⵙⵙⵉⵔⵉⴷⵏ ⵉⵎⵜⵜⵉⵏⵏ, ⴰⴷ ⵉⵜⵜⵥⴰⵍⵍⴰⵏ ⴷ ⵎⴷⴷⵏ, ⴰⴷ ⵉⵜⵜⴰⵔⵓⵏ ⵜⵉⴱⵔⴰⵜⵉⵏ, ⴰⵔ ⵜⵏⵜ ⵉⵜⵇⵇⵕⴰ, ⴰⴷ ⵉⵜⵃⴷⴷⴰⵜⵏ ⵎⴷⴷⵏ ⵀⴰ ⵎⴰⴷ ⵉⵏⵏⴰ ⵏⵏⴱⵉ, ⵀⴰ ⵎⴰⴷ ⵉⵏⵏⴰ ⵕⴱⴱⵉ. ⴽⵓⵍⵍ ⴰⵙⵙ ⵍⴰ ⵉⵜⵜⴻⵜ ⵖⵓⵔ ⵢⵓⵜ ⵏ ⵜⵅⴰⵎⵜ; ⵡⵏⵏⴰ ⵜ ⵉⵛⵜⵛⵏ ⴰⴷ ⴰⵙ ⵉⵜⵉⴽⵏ ⴰⵎⴰⵏ ⵏⵏⴰ ⵖⴰ ⵉⵙⵓ ⴷ ⵎⵉ ⵖⴰⵙ ⵉⵙⵙⵉⵔⴷ, ⴰⵔ ⵉⵜⵡⵟⵟⴰ. ⵍⵍⴰ ⵉⴽⴽⴰⵍ ⵍⵍⴰ ⵉⵜⵙⵇⵇⵔⴰ ⵍⵡⴰⵛⵓⵏ ⵏ ⵉⵖⵚⵚ, ⴽⵓⵍ ⵢⵓⵏ ⵙ ⵜⴰⵍⵍⵡⴰⵃⵜ ⵏⵏⵙ; ⵣⵉ ⵍⵅⵎⵉⵙ ⵖⵔ ⵍⵅⵎⵉⵙ, ⵍⵍⴰ ⴰⵙ ⴷ ⵜⵜⴰⵡⵉⵏ ⵍⵡⴰⵛⵓⵏ ⵜⵉⴳⵍⴰⵢ ⵅⴷⴷ ⵍⴼⵍⵓⵙ; ⴰⴷⴷⴰⵢ ⵉⵙⵙⵓⴼⵖ ⵢⵓⵏ ⴷⵉⴳⵙⵏ ⵙⵙⵍⴽⴰ, ⵍⵍⴰ ⴰⵙ ⵜⵎⵓⵏⵏ ⵍⵡⴰⵛⵓⵏ ⵍⵍⴰ ⵜⵜⴹⵓⵕⵏ ⴰⴷ ⵊⵎⵄⵏ ⵍⴼⵍⵓⵙ ⴷ ⵜⴳⵍⴰⵢ ⴷ ⵡⵓⴷⵉ; ⵍⵍⴰ ⵉⵜⴽⴽⵔ ⵉⴱⴱⴰⵙ ⵏ ⵡⵏⵏⴰ ⵉⵙⵙⵓⴼⵖⵏ, ⵍⵍⴰ ⵉⵜⴳⴳ ⵍⵅⵜⵎⴰ; ⵍⵍⴰ ⵉⵖⵔⵔⵙ ⵉ ⵜⵎⵖⵔⵓⵙⵜ, ⵉⴳ ⵟⵟⵄⴰⵎ, ⵉⵄⵕⴹ ⵉ ⵟⵟⵍⴱⴰ ⵏ ⵜⵇⴱⵉⵍⵜ ⴰⴷ ⵣⵔⵔⴷⵏ. ⵟⵟⴰⵍⴱ, ⵍⵍⴰ ⵉⵜⵜⵉⵍⵉ ⴷⵉⵎⴰ ⵍⵍⴰ ⵉⵏⵇⵇⴰ, ⵍⵍⴰ ⵉⵚⴼⴰ, ⵙ ⵢⵓⵏ ⵓⵇⴱⴱⵓ ⵏ ⴱⵓ ⵓⵖⵍⵎⵓⵙ ⴰⵏⵛⵜ. ⴰⵙⵙ ⵏ ⵍⵄⵉⴷ ⴰⵙⵙ ⵏⵏⴰ ⵇⴱⵍ ⵍⵄⵉⴷ ⵍⵍⴰ ⵜⵜⵉⵍⵉⵏ ⵎⴷⴷⵏ ⵍⵍⴰ ⴼⵕⵃⵏ, ⵍⵍⴰ ⵙⵙⵓⵊⴷⵏ ⵉ ⵍⵄⵉⴷ; ⵍⵍⴰ ⵜⴷⴷⵓⵏ ⵖⵔ ⵎⴰⵏⵉ ⴳ ⵍⵍⴰⵏ ⵡⴰⵎⴰⵏ, ⵍⵍⴰ ⵜⵜⵚⴱⴱⴰⵏ ⵉⵄⴱⴰⵏⵏ ⵏⵏⵙⵏ; ⵍⵍⴰ ⵜⵜⵉⵍⵉ ⵜⵙⵡⵉⵇⵜ ⵢⵓⵏ ⵡⴰⵙⵙ ⵅⴷⴷ ⵙⵉⵏ ⴷⴰⵜ ⵏ ⵍⵄⵉⴷ, ⴱⴰⵛ ⴰⴷ ⵏⴼⵇⵏ ⵎⴷⴷⵏ. ⵜⵉⵄⵢⵢⴰⵍⵉⵏ, ⵍⵍⴰ ⵜⵜⵉⵍⵉⵏⵜ ⵍⵍⴰ ⵥⴹⴰⵏⵜ ⴰⴳⴳⵯⵕⵏ, ⵍⵍⴰ ⵙⵙⵡⵊⴷⵏⵜ ⵙⵙⵎⵉⴷⴰ; ⵍⵍⴰ ⴷⴷⵣⵏⵜ ⵍⵃⵏⵏⴰ, ⵍⵍⴰ ⵙⵇⵇⵍⵏⵜ ⵍⵃⵡⴰⵢⵊ ⵏ ⵡⴰⵜⵜⴰⵢ. ⵜⴰⴷⴳⴳⵯⴰⵜ ⵏⵏⴰ ⴷⴰⵜ ⵏ ⵍⵄⵉⴷ, ⵓⵔ ⴷⴰ ⴳⴳⴰⵏⵏ ⵎⴷⴷⵏ ⵛⴰ ⵣⵉⴽ; ⵜⵉⵄⵢⵢⴰⵍⵉⵏ, ⵍⵍⴰ ⵜⴳⴳⵏⵜ ⵍⵃⵏⵏⴰ ⵉ ⵉⵅⴼ ⵏⵏⵙⵏⵜ; ⵖⵎⵏⵜ ⵉⴼⴰⵙⵙⵏ ⵉ ⵍⵡⴰⵛⵓⵏ; ⵎⴷⴷⵏ ⵍⵍⴰ ⵏⵙⵙⵏ ⵙⵙⵏ ⴰⵜⵜⴰⵢ, ⴰⵔ ⵊⵊⵎⵎⴰⵄⵏ. ⵚⵚⴱⴰⵃ ⵣⵉⴽ, ⵍⵍⴰ ⵜⴽⴽⵔ ⵍⴰⵍ ⵏ ⵓⵅⴰⵎ, ⵍⵍⴰ ⵜⵙⵙⵓⵊⴰⴷ ⵍⴼⴹⵓⵕ, ⵍⵍⴰ ⵜⵙⵙⵏⵡⴰ ⵢⵓⵏ ⵓⵎⴹⵍⵉ ⵏ ⵍⵎⵍⵡⵉ, ⵜⵄⴷⵍ ⵚⵚⵉⵏⵉⵢⴰ; ⵍⵡⴰⵛⵓⵏ ⴷ ⵎⴷⴷⵏ, ⵍⵍⴰ ⵜⴷⴷⵓⵏ ⵖⵔ ⵜⵎⵣⴳⵉⴷⴰ ⴰⴷ ⴳⵉⵙ ⵊⵎⵄⵏ ⵎⵉⵄⴰⴷ ⴰⵔ ⴷ ⴰⵙⵏ ⵉⴷⴷⵓ ⵍⴼⴹⵓⵕ. ⴰⴷⴷⴰⵢ ⴽⴽⵔⵏ ⵍⵡⴰⵛⵓⵏ ⵙⴳ ⵉⵏⵓⴷⴷⵎ, ⵍⵍⴰ ⵙⵙⵓⴷⵓⵎⵏ ⵉⵅⴼ ⵉ ⵍⴰⵀⵍ ⵏⵏⵙⵏ; ⴰⴳⴳⵯⴷ ⵎⴷⴷⵏ ⵉⵎⵇⵇⵕⴰⵏⵏ, ⵍⵍⴰ ⵜⵎⵙⵓⴷⵓⵎⵏ ⵉⵅⴼⴰⵡⵏ ⴰⴷⴷⴰⵢ ⵊⵎⵄⵏ, ⵍⵍⴰ ⵜⵜⵎⵙⵖⴼⴰⵕⵏ, ⴰⴳⴳⵯⴷ ⵡⵉⵏⵏⴰ ⵢⵉⵥⵉⵏ, ⵍⵍⴰ ⵜⵜⵎⵎⵚⵍⴰⵃⵏ. ⵍⵍⴰ ⴱⴷⴷⵓⵏ ⴰⴱⵄⴷⴰ ⵙ ⵓⴼⵕⵕⵇ ⵏ ⵜⴰⵣⴰⵔⵜ ⵅⴷⴷ ⵜⵉⵢⵏⵉ, ⵍⵍⴰ ⵜⵜⴳⴳⵏ ⵎⴷⴷⵏ ⴷ ⵙⵙⴰⴷⴰⵇⴰ; ⵖⵉⵔⵙ ⴰⵖⵔⵓⵎ ⴷ ⵡⴰⵜⵜⴰⵢ; ⴰⴷⴷⴰⵢ ⵛⵛⵏ ⵎⴷⴷⵏ, ⵍⵍⴰ ⵜⴽⴽⵔⵏ ⵍⵍⴰ ⵜⵜⵥⴰⵍⵍⴰⵏ ⵏⵉⵜⵜⵏⵉ ⴷ ⵟⵟⴰⵍⴱ; ⵎⵓⵏⵏ ⴷⵉⵙ ⵖⵔ ⵉⵚⵏⴹⴰⵍ ⴰⴷ ⵉⵇⵇⵔⴰ ⵅⴼ ⵡⵉⵏⵏⴰ ⵎⵎⵓⵜⵏⵉⵏ. ⴰⴷⴷⴰⵢ ⵢⴰⵡⴷ ⵉⵎⴽⵍⵉ, ⵍⵍⴰ ⵊⵊⵎⵓⵄⵏ ⴰⵢⵜ ⵉⵖⵚⵚ ⴳ ⵜⵎⵣⴳⵉⴷⴰ ⵅⴷⴷ ⵖⵓⵔ ⵢⵓⵏ ⵏⵏⴰ ⵖⵓⵔ ⵜⵍⵍⴰ ⵜⴰⴷⴷⴰⵔⵜ ⵏⵏⴰ ⵉⵎⵇⵇⵓⵕⵏ, ⵛⵛⵏ ⵖⵓⵔⵙ ⵉⵎⴽⵍⵉ; ⴽⵓⵍ ⵜⴰⵅⴰⵎⵜ, ⵍⵍⴰ ⴷ ⵜⵜⴰⵣⵏ ⵉⵎⴽⵍⵉ ⵏⵏⵙ: ⵀⴰ ⵍⵎⵍⵡⵉ, ⵀⴰ ⵃⵕⵟⵉⵟⴰ, ⵀⴰ ⵙⴽⵙⵓ, ⵀⴰ ⴰⴽⵙⵓⵎ, ⵡⵏⵏⴰ ⵖⵓⵔ ⵎⵉ ⵉⵍⵍⴰ. ⵉⴷⴷ ⵜⵉⵄⵢⵢⴰⵍⵉⵏ ⴷⵉⵖ, ⵍⵍⴰ ⵊⵊⵎⵓⵄⵏⵜ ⴰⴷⴷⴰⵢ ⵚⵚⵉⴼⴹⵏⵜ ⵉⵎⴽⵍⵉ ⵏ ⵎⴷⴷⵏ, ⵍⵍⴰ ⵜⴳⴳⵏⵜ ⴰⵜⵜⴰⵢ, ⵛⵛⵏⵜ ⵇⵇⴰⵃ ⴳ ⵢⵓⵏ ⵡⴰⵏⵙⴰ, ⵚⵏⵏⵄⵏⵜ. ⴰⴷⴷⴰⵢ ⵢⴰⴼ ⴷ ⵉⵎⴽⵍⵉ, ⵍⵍⴰ ⵊⵎⵓⵄⵏ ⵉⵜⵔⵔⴰⵙⵏ, ⵍⵍⴰ ⵜⵅⵓⵎⵎⴰⵕⵏ ⴰⵎⴰ ⵍⵉⵛⴰⵕⵜ, ⴰⵎⴰ ⵜⴰⴽⵓⵔⵜ, ⴰⵎⴰ ⵍⵍⴰ ⵜⴷⴷⵓⵏ ⴰⴷ ⵚⵢⵢⴹⵏ, ⴰⵎⴰ ⵍⵍⴰ ⵜⵜⵖⵉⵎⴰⵏ ⵍⵍⴰ ⵙⵙⵏ ⴰⵜⵜⴰⵢ; ⵉⵎⵇⵇⵕⴰⵏⵏ, ⵍⵍⴰ ⵜⵜⴹⴱⴱⴰⵕⵏ ⵉ ⵎⴰⵎⵉ ⵖⴰ ⵖⵔⵙⵏ; ⵜⴰⴷⴳⴳⵯⴰⵜ, ⵍⵍⴰ ⵉⵜⵜⵉⵍⵉ ⵓⴽⵙⵓⵎ, ⵜⵎⵖⵓⵕ ⵍⴼⵕⴰⵊⵜ, ⵍⵍⴰ ⴷ ⵜⵜⴷⴷⵓⵏ ⵉⵎⵄⵕⴰⴹ, ⴰⵡⴹⵏⵜ ⴷ ⵜⵛⵉⵔⵔⴰⵜⵉⵏ ⵎⵛ ⵡⵓⵍⵏⵜ, ⵏⵉⵜⵜⵏⵜⵉ ⴷ ⵉⵔⵉⵣⵏ ⵏⵏⵙⵏⵜ, ⵍⵍⴰ ⵉⵡⵉⵏⵜ ⴷ ⵚⵚⵡⴰⴱ ⴳ ⵓⴼⵓⵙ ⵏⵏⵙⵏⵜ ⴰⵎⴰ ⴰⵖⵔⵓⵎ ⴰⵎⴰ ⴰⴽⵙⵓⵎ ⴰⵎⴰ ⵚⵚⵓⴽⴽⵯⵕ. ⵙ ⵢⵉⴹ ⵍⵍⴰ ⵜⴳⴳⵏ ⵉⵜⵔⵔⴰⵙⵏ ⴰⵃⵉⴷⵓⵙ, ⵉⵅⵎⵎⵔ ⴱⵏⴰⴷⵎ, ⵉⵜⵜⵓ ⵛⵡⵉ ⵍⵀⵎⵎ ⴷ ⵎⴽⵕⴹ ⵓⵍ; ⴰⵙⴽⴽⴰ ⵏⵏⵙ ⴽⵓⵍ ⵢⵓⵏ ⵍⵍⴰ ⵉⵜⴷⴷⵓ ⵖⵔ ⵍⵀⵎⵎ ⵏⵏⵙ. ⴰⵙⵙ ⵏ ⵙⵙⵓⵇ ⴳ ⵡⴰⵙⵙ ⵏ ⵙⵙⵓⵇ ⵍⵍⴰ ⵉⵜⴽⴽⵔ ⵓⵔⵢⴰⵣ ⵣⵉⴽ ⵍⵍⴰ ⵉⴼⵟⵟⵕ ⵃⵔⴰ ⴰⴷ ⵉⴷⴷⵓ ⴰⴷ ⵉⵙⵡⵡⵇ; ⴰⵎⴰ ⵍⵍⴰ ⵉⵜⵜⴰⵡⵉ ⵉⵎⵏⴷⵉ, ⴰⴷ ⵜⵏ ⵉⵣⵣⵏⵣ, ⴰⵎⴰ ⵍⵎⴰⵍ, ⴰⵎⴰ ⵛⴰ ⵉⴹⵏⵉⵏ, ⴰⵎⴰ ⵍⵍⴰ ⵉⵜⴷⴷⵓ ⴰⴷ ⵉⵇⴹⵓ ⵃⴰⵊⴰ, ⵍⵍⴰ ⵉⵜⵜⴰⵡⵉ ⵖⵓⵔⵙ ⵍⴼⵍⵓⵙ ⴳ ⵜⴰⵇⵇⵕⴰⴱⵜ ⵏⵏⵙ. ⵇⴱⵍ ⴰⴷ ⵜⴰⵍⵉ ⵜⴰⴼⵓⴽⵜ, ⵍⵍⴰ ⵜⵜⵉⵍⵉⵏ ⵉⴱⵔⴷⴰⵏ, ⵍⵍⴰ ⵃⵎⵍⵏ ⵙ ⵉⵎⵙⵡⴰⵇ, ⵜⵉⵄⵢⵢⴰⵍⵉⵏ, ⵎⴷⴷⵏ, ⵍⵡⴰⵛⵓⵏ, ⵛⴰ ⵅⴼ ⵉⴹⴰⵕⵏ, ⵛⴰ ⵍⵍⴰ ⵉⵏⵉⵢ, ⵛⴰ ⵍⵍⴰ ⵉⵥⵥⵓⵖⵓⵕ, ⵛⴰ ⵍⵍⴰ ⵉⵜⵜⵏⴷⴰⵀ, ⵜⴰⵔⴱⵉⵄⵜ ⴷⴼⴼⵉⵔ ⵏ ⵜⵔⴱⵉⵄⵜ; ⴽⵓⵔ ⵜⴷⴷⵓⵏ ⵊⵊⵓⵎⵓⵄⵏ. ⴰⵙⵙ ⵏⵏⴰ ⵏ ⵙⵙⵓⵇ, ⵍⵍⴰ ⵉⵜⵜⵉⵍⵉ ⴱⵏⴰⴷⵎ, ⵍⵍⴰ ⵉⵚⴼⴰ, ⵍⵍⴰ ⵉⵙⵙⵉⵔⴷ ⵉⵄⴱⴰⵏⵏ ⵏⵏⵙ; ⵡⵏⵏⴰ ⵖⵓⵔ ⵉⵍⵍⴰ ⵍⵊⴷⵉⴷ, ⵍⵍⴰ ⵜ ⵉⵍⵙⵙ; ⵜⵉⵄⵢⵢⴰⵍⵉⵏ, ⵍⵍⴰ ⵜⵜⵚⵏⴰⵄⵏⵜ; ⵡⵏⵏⴰ ⵖⵓⵔ ⵉⵢⵢⵉⵙ, ⵍⵍⴰ ⴰⵙ ⵉⴳⴳⴰⵔ ⵜⴰⵔⵉⴽⵜ, ⵉⵏⵉⵢ ⵜ. ⴰⴷⴷⴰⵢ ⴰⵡⴹⵏ ⵎⴷⴷⵏ ⵖⵔ ⵙⵙⵓⵇ, ⵍⵍⴰ ⵙⴽⵛⴰⵎⵏ ⵍⴱⵀⴰⵢⵎ ⵉ ⵔⵔⵡⴰ, ⴷⴷⵓⵏ ⴰⴷ ⵙⵡⵡⵇⵏ. ⵜⵉⵄⵢⵢⴰⵍⵉⵏ ⵖⵓⵔⵏⵖ ⵓⵔ ⴷⴰ ⵜⵙⵡⵡⴰⵇⵏⵜ ⵛⴰ, ⵅⴰⵙ ⵜⵉⴼⵇⵇⵉⵔⵉⵏ ⵅⴷⴷ ⵜⵉⵊⵊⴰⵍ ⵜⵉⵎⵇⵇⵕⴰⵏⵉⵏ; ⵉⴷⴷ ⵜⵉⵜⵔⵔⴰⵙⵉⵏ ⵅⴷⴷ ⵜⵉⵏⵏⴰ ⵢⵓⵡⵍⵏⵉⵏ, ⵍⵍⴰ ⵜⵖⵉⵎⴰⵏⵜ ⴱⵕⵕⴰ ⵎⵉⵄⴰⴷ ⴰⵔ ⴷ ⴰⵙⵏⵜ ⴷ ⵉⵇⴹⵓ ⵃⴷⴷ ⴰⵢⵏⵏⴰ ⵔⴰⵏⵜ. ⴳ ⵙⵙⵓⵇ ⵏⵏⵖ, ⵍⵍⴰ ⴱⵏⵏⵓⵏ ⵉⵄⵟⵟⴰⵕⵏ ⵉⵇⵉⴹⴰⵏ: ⵀⴰ ⵡⵉⵏ ⵍⴽⵜⵜⴰⵏ, ⵀⴰ ⵡⵉⵏ ⵡⴰⵜⵜⴰⵢ ⴷ ⵚⵚⵓⴽⴽⵯⵕ, ⵀⴰ ⵎⴰⵏⵉ ⵜⵏⵣⵣ ⵜⴰⴹⵓⴹⵜ, ⵀⴰ ⴰⵏⵙⴰ ⵏ ⵍⵎⴰⵍ, ⵀⴰ ⵡⵉⵏ ⵉⵎⵏⴷⵉ, ⵀⴰ ⵎⴰⵏⵉ ⴳ ⵜⴻⵜⵜⵏ ⵎⴷⴷⵏ, ⵀⴰ ⵍⴳⵓⵔⵏⴰ, ⵀⴰ ⵕⵕⵃⴱⵜ. ⴰⵎⵎⴰⵙ ⵏ ⵡⴰⵙⵙ, ⴽⵓⵍⵛⵉ ⵉⵜⵜⵎⵉⵎⵓⴹ, ⵍⴽⵓⵜⵔⴰ ⴳ ⵓⵏⴱⴷⵓ ⵅⴷⴷ ⴰⴷⴷⴰⵢ ⵉⵃⵎⵓ ⵉⵚⴼⵓ ⵍⵃⴰⵍ. ⵜⵉⵄⵢⵢⴰⵍⵉⵏ ⵍⵍⴰ ⵙⵙⴰⵖⵏⵜ ⵍⵃⵏⵏⴰ ⴷ ⵏⵏⵡⴰⵕ ⴷ ⵎⴰⴷ ⴰⵙⵏⵜ ⵉⵄⵊⴱⵏ, ⴰⴷⴷⴰⵢ ⵣⵣⵏⵣⵏⵜ ⵉⴼⵓⵍⵍⵓⵙⵏ ⴷ ⵜⴳⵍⴰⵢ; ⵎⴷⴷⵏ ⵛⴰ ⵉⵜⵜⵄⵎⵎⴰⵕ ⵍⵅⵓⴹⵕⴰ, ⵛⴰ ⵉⵜⵜⵏⴼⴰⵇ, ⵛⴰ ⵉⵣⵣⵏⵣⴰ ⵡⵍⵍⵉ ⵅⴷⴷ ⵜⴰⴹⵓⴹⵜ; ⴳ ⵍⴳⵓⵔⵏⴰ ⴱⵏⴰⴷⵎ ⵅⴰⵙ ⵉⵙ ⵉⵜⵜⵎⵎⵃⴰⵢ ⴳ ⵓⴽⵙⵓⵎ ⵏⵏⴰ ⵉⵥⵉⵍⵏ ⴰⵎ ⵍⵊⵏⵓⵏ; ⴳ ⵟⵟⵕⴼ ⵏ ⵙⵙⵓⵇ ⵜⵍⵍⴰ ⵕⵕⵃⴱⵜ ⵏ ⵉⵎⵏⴷⵉ, ⵛⴰ ⵉⵣⵣⵏⵣⴰ, ⵛⴰ ⵉⵜⵜⴽⴰⵍ; ( 92 ) ⵍⵍⴰⵏ ⵡⵉⵏⵏⴰ ⵣⵣⵏⵣⴰⵏⵉⵏ ⵙ ⵍⵎⵓⴷⴷ, ⵢⵉⵍⵉⵏ ⵡⵉⵏⵏⴰ ⵣⵣⵏⵣⴰⵏⵉⵏ ⵙ ⵍⵎⵉⵣⴰⵏ; ⵍⵍⴰ ⴷ ⵜⵜⴷⴷⵓⵏⵜ ⵍⴽⴰⵎⵢⵓⵏⴰⵜ ⵙⴳ ⴼⴰⵙ, ⵍⵍⴰ ⵜⵜⵄⵎⵎⴰⵕⵏⵜ ⵉⵎⵏⴷⵉ. ⴳ ⵍⴱⴰⴱ ⵏ ⵙⵙⵓⵇ ⵉⵍⵍⴰ ⵚⵚⴱⵉⵟⴰⵕ ⵎⴰⵏⵉ ⴳ ⵉⵜⵜⵉⴽⴽ ⵓⴹⴱⵉⴱ ⴷⴷⵡⴰ; ⵍⵍⴰ ⵉⵜⵜⵉⵍⵉ ⴱⵏⴰⴷⵎ ⵍⴽⵓⵟⵕⴰ ⵏ ⵜⵉⵄⵢⵢⴰⵍⵉⵏ, ⵍⵍⴰ ⵉⵚⴰⴼⴼⴰ, ⵍⵍⴰ ⵉⵜⵜⵓⵏⵓⵢ ⵜⴰⵡⴰⵍⴰ ⵏⵏⵙ. ⵓⵎⴰ ⵟⵟⵕⴼ ⵏ ⵍⴱⵉⵔⵓ, ⴰⴷ ⵜⵉⵏⵉⴷ ⵙⵙⵓⵇ ⵢⴰⴹⵏⵉⵏ ⴰⵢⵏⵏⴰ: ⵎⴷⴷⵏ, ⴳ ⵓⵢⵏⵏⴰ ⵖⴰ ⵙⵡⵡⴰⵇⵏ, ⵇⴹⵓⵏ ⵃⴰⵊⴰ, ⵎⴼⵓⴽⴽⵓⵏ ⴳⵔⴰⵙⵏ ⵙ ⵓⵢⵏⵏⴰ ⵉⵥⵉⵍⵏ, ⴰⴷ ⴽⴽⴰⵜⵏ ⴰⵇⵉⴹⵓⵏ, ⵍⵍⴰ ⵜⵜⵓⵏⵏⵓⵢⵏ ⵍⵇⴰⵢⴷ ⴰⴷ ⵖⵉⵔⵙ ⵎⴷⴰⵄⵏ ⴱⴰⵛ ⴰⴷ ⵜⵏ ⵢⴰⵎⵥ, ⴰⴷ ⵜⵏ ⵉⵕⴱⴱⴰ, ⵉⵛⵛⵉⵜⵏ. ⴰⴷⴷⴰⵢ ⵉⵣⵔⵉ ⵕⵎⴹⴰⵏ, ⴰⵙⵙ ⵏ ⵍⵄⵉⴷ ⵚⵚⴱⴰⵃ ⵣⵉⴽ, ⵍⵍⴰ ⵉⵜⴽⴽⵔ ⴱⴰⴱ ⵏ ⵓⵅⴰⵎ ⵇⴱⵍ ⴰⴷ ⵜⵜⵛⵏ ⵎⴷⴷⵏ ⵍⴼⴹⵓⵕ, ⵍⵍⴰ ⵉⵜⴽⴽⵙ ⵍⴼⴹⵕⴰⵜ; ⴽⵓⵍ ⵢⵓⵏ ⵙⴳⴳ ⴰⵢⵜ ⵓⵅⴰⵎ ⵍⵍⴰ ⴰⵙ ⵉⵜⴽⴽⵙ ⵙⵏⴰⵜ ⵅⴷⴷ ⴽⵕⴰⴹⵜ ⵏ ⵍⴳⴰⵎⵉⵍⴰⵜ ⵏ ⵉⵎⵏⴷⵉ; ⵍⵍⴰ ⵉⵜⴽⴽⵙ ⵙⴳ ⴽⵓⵍ ⵎⴰ ⵙⴳ ⵜⵜⵛⴰⵏ ⴰⵢⵜ ⵓⵅⴰⵎ ⴰⵙⴳⴳⵯⴰⵙ: ⵙⴳ ⵉⵔⴷⵏ, ⵙⴳ ⵜⵉⵎⵥⵉⵏ, ⵙⴳ ⵉⴱⴰⵡⵏ, ⵙⴳ ⵍⵃⵉⵎⵚ, ⵄⵍⴰ ⵃⴰⵍ ⵍⵍⴰ ⵉⵜⴽⴽⵙ ⴰⴳⴷ ⵙⴳ ⵜⵉⵙⵏⵜ; ( 95 ) ⵍⵍⴰⵏⵜ ⵢⵉⵜⵙ ⵏ ⵜⴰⵟⵟⴰⵚⵉⵏ ⵍⵍⴰ ⵜⵏⵜ ⵉⴷ ⵜⵜⴰⵡⵉⵏ ⵍⵃⵊⵊⴰⵊ, ⵉⵙⵙⵏⵜ ⴰⵙ ⵎⵉ ⵜⵜⵄⴱⴰⵕⵏ; ⵍⴼⴹⵕⴰⵜ ⵏⵏⴰ ⵍⵍⴰ ⵜⵏⵜ ⵜⵉⴽⴽⵉⵏ ⵉ ⵉⵎⵙⵓⵜⵔⵏ ⵅⴷⴷ ⵉ ⵜⵉⴳⴳⴰⵍ ⵅⴷⴷ ⵉ ⵜⴼⵇⵇⵉⵔⵉⵏ; ⵡⵏⵏⴰ ⵓⵔ ⵖⵓⵔ ⵍⵍⵉⵏ ⵉⵎⵏⴷⵉ, ⵎⵛ ⴷⴰ ⵉⵅⴷⴷⵎ ⵙ ⵍⴼⵍⵓⵙ ⵍⵍⴰ ⵉⵜⴽⴽⵙ ⵍⵇⴹⵕ ⵏ ⵓⵢⵏⵏⴰ ⵏ ⵍⴼⵍⵓⵙ; ⵓⵔ ⴷⴰ ⵉⵜⵜⵃⵍⵍⴰ ⵕⵎⴹⴰⵏ ⵏⵏⴰ ⴳ ⴰⵥⵓⵎⵏ ⵎⴷⴷⵏ ⵎⵉⵄⴰⴷ ⴰⵔ ⴷ ⵉⴽⴽⵙ ⵍⵡⴰⵊⵉⴱⴰⵜ ⴰⴷ. ⴰⴷⴷⴰⵢ ⵢⴰⵡⴹ ⵓⵏⴱⴷⵓ, ⵉⵚⵉⵢⵢⴼ ⵓⵔⵢⴰⵣ, ⵍⵍⴰ ⵉⵜⵜⵄⴱⴰⵕ ⵍⴱⴰⵕⴰⴽⴰ ⵏⵏⵙ, ⵢⴰⵙⵉ ⵙⴳⵉⵙ ⵍⵄⵛⵓⵕ, ⵉⴼⵔⵔⵇ ⵜ ⵅⴼ ⵉⵎⵥⵍⴰⴹ; ⵡⵏⵏⴰ ⵓⵔ ⵜ ⵉⵢⵢⵉⵏ, ⵓⵔ ⴷ ⵛⴰ ⵏ ⵓⵏⵙⵍⵎ ⴰⵃⵇⵉⵇⵉ ⴰⴷ ⵉⴳⴰ; ⵉⵅⵚⵚ ⴰⵔⵢⴰⵣ ⵓⵔ ⵉⵙⵙⵓⴼⵓⵖ ⵉⵎⵏⴷⵉ ⵣⵉ ⵕⵕⵃⴱⵜ ⵎⵉⵄⴰⴷ ⴰⵔ ⴷ ⵉⴽⴽⵙ ⵍⵄⵛⵓⵕ. ⴰⵎⵛⵉⵙ ⴰⴳⴷ ⵉ ⵍⵎⴰⵍ; ⵉⵅⵚⵚ ⵓⵔⵢⴰⵣ ⴰⴷ ⵉⵙⴷⴷⵇ ⴽⵓⵍ ⵓⵙⴳⴳⵯⴰⵙ, ⴰⴷ ⵉⵣⴽⴽⴰ ⵍⵎⴰⵍ. ⴰⴷⴷⴰⵢ ⴷ ⴷⴷⵓⵏ ⵉⵎⵙⵓⵜⵔⵏ ⵖⵔ ⵕⵕⵃⴰⴱⵉ ⵅⴷⴷ ⵖⵔ ⵉⵖⵔⵎⴰⵏ, ⵍⵍⴰ ⵙⵙⵓⵜⵓⵔⵏ ⵡⵉⵏ ⵕⴱⴱⵉ, ⵍⵍⴰ ⵜⵜⵉⵏⵉⵏ: « ⵛⴰⵜ ⴰⵖ ⵡⵉⵏ ⵕⴱⴱⵉ, ⵛⴰⵜ ⴰⵖ ⵍⵄⵛⵓⵕ, ⴰ ⴰⵅⴰⵎ ⴰⵎⵇⵇⵕⴰⵏ ». ⴳ ⵍⵓⵇⵜ ⵏⵏⴰ ⴰⴷ ⵜⵜⵄⴷⴷⵓⵏ ⵉⵎⵙⵓⵜⵔⵏ, ⴰⴷ ⵜⵜⵄⴷⴷⵓⵏ ⵛⵛⵕⴼⴰ ⵏⵏⴰ ⵜⵜⵏⵏⴹⵏⵉⵏ. ⵎⴰⵛⴰ ⴷⵖⵉⵢⴰ ⵍⵍⴰ ⵜⵣⵔⵔⵉ ⵍⵓⵇⵜ ⵏⵏⴰ, ⴽⵊⵎⵏ ⵉⵎⵏⴷⵉ ⵖⵔ ⴷⴰⵅⵍ, ⵉⵇⵇⵏ ⵖⵉⴼⵙⵏ ⴱⴰⴱ ⵏ ⵓⵅⴰⵎ, ⵢⴰⵖⵓⵍ ⴽⵓⵍⵛⵉ ⵉⵄⵣⵣ. ⴰⵙⴰⴼⵔ ⵢⵓⵏ ⵡⴰⵙⵙ ⵏⴷⴷⴰ ⵏⴽⴽ ⴷ ⵄⵣⵉⵣⵉ ⵖⵔ ⴼⴰⵙ. ⵉⴽⴽⵔ ⵄⵣⵉⵣⵉ ⴳ ⵡⴰⵎⵎⴰⵙ ⵏ ⵢⵉⴹ, ⵉⵛⴰ ⵍⵄⵍⴼ ⵉ ⵜⵙⵔⴷⵓⵏⵜ, ⵉⵛⴰ ⴰⵙ ⵕⴱⵄⴰ ⵏ ⵍⴳⴰⵎⵉⵍⴰⵜ ⵏ ⵜⵎⵥⵉⵏ; ⴳ ⵓⵢⵏⵏⴰ ⴳ ⵜⵄⵍⵍⴼ, ⵏⵄⴰⵎⵎⵕ ⵉⵔⴷⵏ ⴳ ⵜⵖⵕⴰⵕⵜ ⴰⴷ ⵜⵏ ⵏⴰⵡⵉ ⴰⴷ ⵜⵏ ⵏⵣⵣⵏⵣ ⴳ ⴼⴰⵙ; ⵜⴽⴽⵔ ⵢⵎⵎⴰ, ⵜⵙⵙⵏⵓ ⴰⵖ ⴰⵖⵔⵓⵎ, ⴷⴰ ⵏⴷⴷⵓ ⵙ ⵢⵉⴹ, ⵓⵔ ⴰⵖ ⴷ ⵢⵓⵍⵉ ⵉⵜⵔⵉ ⵏ ⵍⴼⵊⵔ ⵎⵉⵄⴰⴷ ⴰⵍⵍⵉⴳ ⵏⵕⴰⵢⴱ ⵖⵔ ⵙⴱⵓ, ⵏⵀⵡⵡⴷ ⵖⵔ ⴼⴰⵙ; ( 100 ) ⵏⵓⵎⵔ ⴳ ⵜⵉⴽⵍⵉ ⵇⴱⴰⵍⴰ ⴳ ⵟⴰⵚⵏⴹⵉ ⵏ ⵍⵃⴰⵍ ⵇⴱⵍ ⴰⴷ ⵜⵃⵎⵓ ⵜⴰⴼⵓⴽⵜ, ⴳ ⵍⵓⵇⵜ ⵏ ⵓⵏⴱⴷⵓ: ⴽⵓⵍ ⵏⵜⵜⴷⴷⵓ, ⵏⵜⵎⵎⵙⵡⵓⵏⴼⴰ ⵏⴽⴽ ⴷ ⵄⵣⵉⵣⵉ, ⵎⵕⵕⴰ ⵍⵍⴰ ⵉⵜⵏⵓⵢ, ⵎⵕⵕⴰ ⵍⴰ ⵜⵜⵏⵓⵢⵖ; ⵓⵔ ⴰⵖ ⴷ ⵢⵓⵍⵉ ⵡⴰⵙⵙ ⵎⵉⵄⴰⴷ ⴰⵍⵍⵉⴳ ⵏⵃⴰⵣⵎ ⴼⴰⵙ; ⵏⴽⴽⵯⵏⵉ ⵏⵓⵡⵡⴹ ⵢⵓⵜ ⵏ ⵜⴰⵙⵉⴼⵜ, ⴷⴰ ⵏⵙⵔⵙ ⵙⴳ ⵜⵙⵔⴷⵓⵏⵜ ⴰⴷ ⵜⵙⵡⵓⵏⴼⴰ ⴷ ⵉⵡⴰ ⴰⴷ ⵜⵙⵓ; ( 101 ) ⵉⵡⴰ ⵏⴼⴹⵕ, ⵏⵙⵙⵉⵔⴷ, ⵏⵙⵡⴰ, ⵏⵙⵡⵓⵏⴼⴰ, ⵓⴽⴰⵏ ⴷⴰ ⵏⴽⴽⵔ ⴰⴷ ⵏⴷⴷⵓ; ⴰⵍⵍⵉⴳ ⵏⵔⴰ ⴰⴷ ⵏⴰⵙⵉ, ⵏⵖⵔⴰ ⵉ ⵢⵓⵏ ⵓⵎⵙⴱⵔⵉⴷ, ⵢⵓⵙⵉ ⴷⵉⴷⵏⵖ ⴳ ⵜⵙⵔⴷⵓⵏⵜ; ⴽⵓⵔ ⵏⵜⵇⵕⵕⴰⴱ ⵖⵔ ⴼⴰⵙ, ⵏⵊⵊⵎⵓⵄ ⴷ ⵉⵎⵙⵓⵡⴰⵇ ⴷ ⵉⵎⵙⴰⴼⵔⵏ ⴷ ⵟⵟⵓⵎⵓⴱⵉⵍⴰⵜ; ⵉⵄⴷⴷⴰ ⵍⵖⴰⵛⵉ; ⵜⴰⵎⴰ ⵏ ⵜⵎⴷⵉⵏⵜ ⵄⴷⴷⴰⵏ ⵉⴱⵃⵉⵔⵏ ⴷ ⵡⵓⵔⵜⴰⵏ; ( 102 ) ⵍⵍⴰⵏ ⵉⴱⵃⵃⴰⵔⵉⵢⵏ, ⵅⴰⵙ ⵉⵙ ⵜⵜⴰⵙⵉⵏ ⵍⵅⵓⴹⵕⴰ ⵖⵔ ⴼⴰⵙ ⴳ ⵉⵙⵔⴷⴰⵏ ⴷ ⵉⵖⵯⵢⵢⴰⵍ ⴳ ⵙⵙⵍⵓⵍ ⴷ ⵛⵛⵓⵔⵉⵢⴰ; ⴰⵎⴰⵏ ⴽⵓⵍⵛⵉ ⵉⵜⵜⴰⵣⵣⴰⵍⵏ ⴳ ⵜⵔⴳⴳⵡⵉⵏ, ⵜⵓⵢⵢⴰ, ⵉⵊⴹⴰⴹ; ⴽⵓⵍ ⵍⵎⵕⵜ ⴷⴰ ⵜⵣⵓⵡⵡⴼ ⵖⵉⴼⵏⵖ ⵢⵓⵜ ⵏ ⵟⵟⵓⵎⵓⴱⵉⵍ, ⵍⵍⴰ ⵜⵅⵍⵍⵄ ⵜⵙⵔⴷⵓⵏⵜ ⵎⵉⵄⴰⴷ ⴰⵔ ⴷ ⵜⴼⴼⵖ ⵙⴳ ⵓⴱⵔⵉⴷ, ⵢⵓⵜ ⵏ ⵍⵎⵕⵕⵜ ⴰⵍⵍⵉⴳ ⵜⴷⴷⴰ ⴰⴷ ⵉⵢⵉ ⵜⵔⴷⵍ. ⵏⴽⴽⵯⵏⵉ ⵏⵇⵔⵔⴱ ⵢⵓⵜ ⵏ ⵍⴰⴳⴰⵕ, ⴷⴰ ⵏⴰⵏⵏⴰⵢ ⴰⴽⴽⵯ ⵢⵓⵜ ⵏ ⵍⵎⴰⵛⵉⵏⴰ ⵍⵍⴰ ⵜⴷⴷⴰ ⴷ, ⵍⵍⴰ ⵜⵜⵚⴼⴼⴰⵕ, ⵍⵍⴰ ⵢⵓⵍⵉⵢ ⵙⴳⵉⵙ ⴷⴷⵓⵅⵅⴰⵏ; ⵏⴽⴽⵯⵏⵉ ⵖⵔ ⵍⵇⵏⴹⵕⵜ, ⵏⵜⵜⴰⵜ ⵖⵉⵔⵙ, ⵏⵔⵙ ⵙⴳ ⵜⵙⵔⴷⵓⵏⵜ ⴱⴰⵔ ⴰⴷ ⵜⵅⵍⵄ, ⵏⵃⵛⵎ ⵜⵜ ⵙⴳ ⵜⵡⵔⵢⵉⵜⵜ ⵎⵉⵄⴰⴷ ⴰⵍⵍⵉⴳ ⵜⵣⵔⵉ ⵍⵎⴰⵛⵉⵏⴰ ⵙ ⵔⵔⵀⵉⵣ ⵏⵏⵙ; ( 104 ) ⴳ ⵓⴱⵔⵉⴷ ⵍⵍⴰ ⵏⵊⵊⵎⵓⵄ ⴷ ⴽⴽⴰⴷⴰ ⵉⴼⴰⵙⵉⵢⵏ, ⵍⵍⴰ ⴷⴷⴰⵏ ⴷ ⵖⵔ ⵙⵉⴷⵉ ⵃⵕⴰⵥⵎ ⴰⴷ ⵄⵓⵎⵏ ⴷ ⵉⵡⴰ ⴰⴷ ⴱⵔⵔⴷⵏ ⵜⴰⵚⵏⴹⵉ ⵉⴳ ⵉⵃⵎⴰ ⵍⵃⴰⵍ ⴳ ⴼⴰⵙ; ⵛⴰ ⵍⵍⴰ ⵉⴷⴷⴰ ⴷ ⴳ ⵉⴹⴰⵕⵏ, ⵛⴰ ⴳ ⴱⴰⵛⴽⵍⵉⵟ, ⵛⴰ ⴳ ⵍⴽⵉⵕⴰⵏ, ⵛⴰ ⴳ ⵟⵟⴰⴽⵚⵉⵢⴰⵜ. ⵜⵉⵡⵉⵣⵉ ⵜⵍⵍⴰ ⵜⵡⵉⵣⵉ ⵏ ⵜⵃⵕⵕⴰⵜ, ⵜⵉⵍⵉ ⵜⵉⵏ ⵓⵎⵡⵔ; ⵜⵉⵏ ⵓⵎⵡⵔ, ⵍⵍⴰ ⵜⵜⵄⴷⴷⵓⵏⵜ ⵙⴳ ⵜⵉⵏ ⵜⵃⵕⵕⴰⵜ; ⵍⵍⴰ ⵜⴳⴳⵏ ⵎⴷⴷⵏ ⵜⵉⵡⵉⵣⵉ ⵉ ⵢⵓⵏ ⵓⵔⵢⴰⵣ ⵏⵏⴰ ⵜ ⵉⵙⵜⴰⵀⵍⵏ, ⵏⵏⴰ ⴷⵉⴳⵙⵏ ⵉⵢⵢⴰⵏ ⵍⵅⵉⵔ, ⵉ ⵢⵓⵏ ⵓⵎⵇⵇⵕⴰⵏ ⵏ ⵜⵇⴱⵉⵍⵜ ⵅⴷⴷ ⵉ ⵍⵇⵇⴰⵢⴷ ⵅⴷⴷ ⵉ ⵓⵎⵖⴰⵕ ⵅⴷⴷ ⵢⵓⵏ ⵏ ⵛⵛⵔⵉⴼ; ⵍⵍⴰ ⵜⴳⴳⵏ ⵎⴷⴷⵏ ⵜⵉⵡⵉⵣⵉ ⵉ ⵢⵓⵏ ⵓⵔⵢⴰⵣ ⵏⵏⴰ ⴰⵙⵏ ⵉⵕⴹⵍⵏ ⵢⵓⵜ ⵏ ⵜⵙⵔⴰⴼⵜ ⵏ ⵉⵎⵏⴷⵉ, ⵅⴷⴷ ⵉ ⵢⵓⵏ ⵏ ⵛⵛⵔⵉⴼ ⴰⴷ ⴰⵙⵏ ⵉⵛⴼ ⴷⴷⵄⵓⵜ ⵏ ⵍⵅⵉⵔ; ⵉⴷⴷ ⵍⵎⵅⵣⵏ ⵍⵍⴰ ⴳⵉⵙ ⵜⵜⵃⵛⵛⴰⵎⵏ. ⵍⵍⴰ ⵉⵜⴷⴷⵓ ⵢⵓⵏ ⵓⵎⵏⴰⵢ, ⵍⵍⴰ ⵉⵟⵏⵏⴹ ⴳ ⵉⵅⴰⵎⵏ ⵙ ⵢⵉⴹ, ⵍⵍⴰ ⵉⵄⵍⵍⵎ ⵉ ⵎⴷⴷⵏ ⵖⵔ ⵜⵡⵉⵣⵉ; ⴰⵙⴽⴽⴰ ⵏⵏⵙ ⵚⵚⴱⴰⵃ ⵣⵉⴽ ⵍⵍⴰ ⴷ ⵜⵜⴼⴼⵓ ⵉⴼⵍⵍⴰⵃⵏ ⴳ ⵉⴳⵔ ⵏⵏⴰ ⵖⵔ ⴰⵙⵏ ⵉⵄⵍⵎ ⴱⵓ ⵜⵡⵉⵣⵉ; ⵍⵍⴰ ⴱⴷⴷⵓⵏ ⴳ ⵉⴳⵔ ⴽⵓⵍ ⵜⵉⵖⵚⵜ ⴳ ⵟⵟⵕⴼ, ⵍⵍⴰ ⵜⵎⵄⴰⵏⴰⴷⵏ ⵎⴰⵏⵉ ⵡⵉⵏⵏⴰ ⵖⴰ ⵎⵢⵔⵔⵉⵏ ⵇⴱⴰⵍⴰ; ⵍⵍⴰ ⵜⵜⵖⵉⵎⴰⵏ ⵎⴷⴷⵏ ⵍⵍⴰ ⵟⵟⵉⵥⵉⵏ ⵙ ⵉⵣⵍⴰⵏ ⴰⵔ ⵜⵎⵄⴰⵢⴰⵔⵏ: ( 107 ) ⴷⵖⵉⵢⴰ ⵍⵍⴰ ⵜⵜⴰⵏⵏⴰⵢⵜ ⵉⴳⵔ ⵉⵙⵙⴰ ⵙ ⵛⵛⴱⴰⴽ ⵏ ⵉⵎⵏⴷⵉ; ⵉⴼⵍⵍⴰⵃⵏ ⵏ ⴱⵓ ⵜⵡⵉⵣⵉ ⵍⵍⴰ ⵜⵜⵉⵍⵉⵏ ⴷ ⵓⵊⵎⴰⵄ ⵏ ⵉⵖⴰⵍⵍⵏ ⵍⵍⴰ ⵜⴳⴳⵏ ⵛⵛⴱⴰⴽ; ⵉⴷⴷ ⴱⵓ ⵜⵡⵉⵣⵉ, ⵏⵜⵜⴰ, ⵍⵍⴰ ⵉⵜⵜⵉⵍⵉ ⴷ ⵉⵎⴽⵍⵉ; ⵍⵍⴰ ⵉⵖⵕⵕⵚ ⵉ ⵢⵓⵏ ⵉⵅⴼ ⵏ ⵍⵎⴰⵍ ⵉⵙⵙⵓⵊⴷ ⴰⴽⵙⵓⵎ ⵉ ⵡⴰⵍⵍⴰⵙ; ⵓⵎⴰ ⵉⵎⴽⵍⵉ, ⵍⵍⴰ ⵙⵙⵏⵡⴰⵏⵜ ⵜⵄⵢⵢⴰⵍⵉⵏ ⴽⴽⴰⴷⴰ ⵏ ⵓⵖⵔⵓⵎ, ⵙⵙⴼⵙⵉⵏⵜ ⵇⴱⴰⵍⴰ ⵏ ⵡⵓⴷⵉ; ( 108 ) ⵓⵔ ⴷⴰ ⴷ ⵟⵟⴰⵡⴹ ⵍⵓⵇⵜ ⵏ ⵉⵎⵙⵍⵉ ⵎⵉⵄⴰⴷ ⴰⵔ ⴷ ⵏⴰⵚⴼⵏ ⵎⴷⴷⵏ ⵉⴳⵔ ⵙ ⵓⵎⵡⵔ; ⵍⵍⴰ ⴷ ⵉⵜⵜⴰⵡⵉ ⴱⵓ ⵜⵡⵉⵣⵉ ⵉⵎⴽⵍⵉ, ⵇⵇⵉⵎⵏ ⵎⴷⴷⵏ ⴰⴷ ⵛⵛⵏ; ⵍⵍⴰ ⵉⵜⵜⵉⵍⵉ ⵍⵅⵉⵔ ⵉⵄⴷⴷⴰ: ⵓⴷⵉ, ⴰⵖⵔⵓⵎ, ⵉⵎⵚⴼⵉ, ⴰⵎⴰⵏ ⵇⴱⴰⵍⴰ; ⴰⴷⴷⴰⵢ ⵛⵛⵏ ⵎⴷⴷⵏ, ⵍⵍⴰ ⵜⵜⵉⵏⵉⵏ: « ⵉⵡⴰ ⵥⵥⴰⵍⵍⴰⵜ ⵅⴼ ⵏⵏⴱⵉ », ⴷⴰ ⴽⴽⵔⵏ ⴰⵍⵜⵓ ⵎⵉⵄⴰⴷ ⴰⵔ ⴷ ⵉⵣⵔⵉ ⴹⴹⵀⵓⵕ; ⴷⴰ ⴼⴼⵖⵏ ⵉⴳⵔ ⴰⴷ ⴷⴷⵓⵏ ⴰⴱⵔⵉⴷ ⵏⵏⵙⵏ; ( 109 ) ⵍⵍⴰ ⵜⵏ ⵉⵜⵜⵏⵀⴰⵕ ⴱⴰⴱ ⵏ ⵜⵡⵉⵣⵉ, ⵍⵍⴰ ⵜⵏ ⵉⵜⵜⴰⵡⵉ ⵙ ⵓⵅⴰⵎ ⵏⵏⵙ ⴰⴷ ⵛⵛⵏ ⴰⵍⵍⴰⵙ; ⵍⵍⴰ ⵉⵜⵜⵉⵍⵉ, ⵍⵍⴰ ⵉⵙⵡⵊⴷ ⴰⵙⵏ ⴰⴽⵙⵓⵎ ⴷ ⵡⴰⵜⵜⴰⵢ; ⵍⵍⴰ ⵜⴻⵜⵜⵏ ⴰⵔ ⴷ ⴽⵔⵔⵄⵏ, ⵄⴰⴷ ⴰⴷ ⵜⴷⴷⵓⵏ; ⴰⵙⵙ ⵏⵏⴰ ⴰⵎ ⵜⴰⵎⵖⵕⴰ ⵖⵓⵔ ⴱⵓ ⵜⵡⵉⵣⵉ; ⵍⵍⴰ ⵜⵜⵉⵍⵉⵏⵜ ⵜⵄⵢⵢⴰⵍⵉⵏ ⵛⴰ ⵉⵜⵜⴰⵢⵎ ⴰⵎⴰⵏ, ⵛⴰ ⵉⵅⴷⴷⵎ ⵟⵟⵄⴰⵎ, ⵛⴰ ⵉⵜⵇⴰⴱⴰⵍ ⵍⵎⵎⴰⵄⵏ ⵏ ⵓⴽⵙⵓⵎ, ⵛⴰ ⵉⵙⵙⵏⵡⴰ ⴰⵖⵔⵓⵎ ⴳ ⵓⴼⵕⵕⴰⵏ; ⵍⵍⴰ ⵖⵉⴼⵙ ⵜⵜⴼⴼⵖ ⵜⵡⵉⵣⵉ ⵏⵏⴰ ⵙ ⴽⴰⴷⴰ ⵅⴼ ⴱⵓ ⵜⵡⵉⵣⵉ; ⵎⴰⵛⴰ ⵍⵍⴰ ⵉⵜⴳⴳⵯⴷ ⵙⴳ ⵍⵄⴰⴼⵉⵜ ⵅⴷⴷ ⵙⴳ ⵜⵉⵢⵏⵓⵜ ⵅⴷⴷ; ⵍⵍⴰ ⵉⵜⵜⴱⵟⴰⵕ ⴰⴷ ⵉⵊⵎⵄ ⵉⵎⵏⴷⵉ ⵏⵏⵙ ⵙⴳ ⵍⵎⵓⴷⵉⵢⵜ. ⴰⴳⵯⴷ ⵛⵛⵔⵉⴼ ⵍⵍⴰ ⵉⵙⵜⵜⵛⴰ ⵎⴷⴷⵏ; ⴰⴷⴷⴰⵢ ⵉⵔⵉⵏ ⴰⴷ ⴷⴷⵓⵏ ⵍⵍⴰ ⴰⵙⵏ ⵉⵜⵜⵉⴽⴽ ⴷⴷⵄⵓⵜ ⵏ ⵍⵅⵉⵔ; ⵍⵍⴰⵏ ⵡⵉⵏⵏⴰ ⴷ ⵉⵜⵜⴰⵡⵉⵏ ⵉⵙⵙⵏ ⴰⴳⵯⴷ ⵜⵉⵇⵛⵔⵉⵏ ⵏ ⵓⵖⵔⵓⵎ ⴷ ⵍⴱⴰⵕⴰⴽⴰ ⵙⴳ ⵜⵡⵉⵣⵉ ⵏ ⵛⵛⵔⵉⴼ. ⵍⵍⴰⵏ ⵎⴷⴷⵏ ⵏⵏⴰ ⴽⵔⵔⵣⵏⵉⵏ ⵇⴱⴰⵍⴰ; ⴰⴷⴷⴰⵢ ⵢⴰⵡⴹ ⵄⵓⵏⵇ ⵍⵄⴰⵎ ⵍⵍⴰ ⵜⵜⵉⵍⵉⵏ ⵎⴷⴷⵏ ⵍⵍⴰ ⵙⵅⵚⵚⵏ ⵙⴳ ⵉⵎⵏⴷⵉ, ⵍⵍⴰ ⴰⵙⵏ ⵕⵟⵟⵍⵏ ⵜⴰⵙⵔⴰⴼⵜ ⵅⴷⴷ ⵙⵏⴰⵜ, ⵖⵔⵙ ⵓⵏⴱⴷⵓ ⵍⵍⴰ ⵜⵏⵜ ⵜⵄⵎⵎⴰⵕⵏ; ⵎⴰⵛⴰ ⵍⵍⴰ ⵉⵙⵙⵏ ⵉⵜⴳⴳ ⴱⵓ ⵜⵙⵔⴰⴼⵜ ⴰⴷ ⴰⵙ ⵎⴳⵔⵏ ⵢⵓⵏ ⵅⴷⴷ ⵙⵉⵏ ⵏ ⵡⵓⵙⵙⴰⵏ. ⴰⵔⵡⴰ ⴰⴷⴷⴰⵢ ⴽⵎⵎⵍⵏ ⵎⴷⴷⵏ ⴰⵎⵡⵔ ⴷ ⵓⵏⵇⵇⵍ, ⵍⵍⴰ ⴱⴷⴷⵓⵏ ⴰⵔⵡⴰ ⵏ ⵟⵎⵥⵉⵏ ⴷ ⴰⵎⵣⵡⴰⵔⵓ ⵉⵜⵜⵅ ⵍⵍⴰ ⵜⵜⵉⵍⵉⵏⵜ ⵍⵍⴰ ⴽⵔⵎⵏⵜ ⵇⴱⴰⵍⴰ; ⵙⴳⵉⵙ ⵍⵍⴰ ⵜⵜⵉⵙⵀⵉⵍⵏⵜ ⵉ ⵓⵔⵡⴰ; ⵙⴳⵉⵙ ⵍⵍⴰ ⵄⵍⵍⴼⵏⵜ ⵍⴱⵀⴰⵢⵎ, ⵢⵉⵍⵉ ⵓⴽⵔⵢⴰⵙ. ⵚⵚⴱⴰⵃ ⵍⵍⴰ ⴷ ⴳⴳⴰⵔⵏ ⵉⴼⵍⵍⴰⵃⵏ ⵉⵎⵏⴷⵉ ⵙ ⵡⴰⵎⵎⴰⵙ ⵏ ⵓⵏⵔⴰⵔ ⵙⴳ ⵜⴰⴼⴼⴰ ⴱⴰⵛ ⴰⴷ ⵃⵎⵓⵏ ⵖⵔ ⵜⴰⴼⵓⴽⵜ; ⴳ ⵓⵢⵏⵏⴰ ⴷ ⵙⵙⵏⵜ ⵍⴱⵀⴰⵢⵎ ⵙⴳ ⵡⵓⵏⴰ, ⵜⵜⵛⵏ ⵉⴼⵍⵍⴰⵃⵏ ⵉⵎⴽⵍⵉ, ⵍⵍⴰ ⵜⵜⵉⵍⵉⵏ ⵉⵎⵏⴷⵉ ⴽⵔⵎⵏ; ⵍⵍⴰ ⵜⵇⵇⵏⵏ ⵍⴱⵀⴰⵢⵎ, ⴷⴰ ⴱⴷⴷⵓⵏ ⵓⵏⵓⴹ ⵎⵉⵄⴰⴷ ⴰⵔ ⴷ ⵜⵏⵓ ⵜⴼⵕⵕⴰⵛⵜ ⵏ ⵡⴰⴼⵍⵍⴰ, ⴷⴰ ⴳⵍⵍⴱⵏ ⴰⵔⵡⴰ ⴱⴰⵛ ⴰⴷ ⵉⵏⵖⴷ; ⴰⴷⴷⴰⵢ ⵜⵏⵓ ⴷⴷⵔⵙⵜ, ⵍⵍⴰ ⵙⵙⵓⴼⵓⵖⵏ ⵍⴱⵀⴰⵢⵎ ⴰⴷ ⴷⴷⵓⵏⵜ ⴰⴷ ⵜ ⵙⵙⵓⵏⵜ, ⴱⴷⵓⵏ ⴰⵣⵓⵣⵣⵔ, ⵎⵛ ⵉⵍⵍⴰ ⵓⵣⵡⵓ ⵅⴷⴷ ⵍⵍⴰ ⵜⵡⵓⵏⵓⵢⵏ ⵜⴰⴷⴳⴳⵯⴰⵜ ⴰⴷ ⵢⵉⵍⵉ ⵓⵖⵔⴱⵉ; ( 114 ) ⴰⴷⴷⴰⵢ ⵉⴼⴼⵖ ⵡⴰⵍⵉⵎ ⵜⵉⵔⵔⵛⵜ, ⵍⵍⴰ ⴽⴽⴰⵜⵏ ⴰⵛⵟⵟⴰⴱ ⵃⵔⴰ ⴰⴷ ⴽⴽⵙⵏ ⴰⴽⵔⵢⴰⵙ; ⵎⵛ ⵄⴷⴷⴰⵏⵜ ⵜⵉⵔⵔⴰⵛ ⵏ ⵉⵎⵏⴷⵉ ⴳ ⵓⵏⵔⴰⵔ, ⵍⵍⴰ ⵉⵜⴽⴽⵔ ⴱⴰⴱ ⵏ ⵓⵅⴰⵎ, ⵍⵍⴰ ⵉⵜⵜⵄⴱⴰⵕ; ⵍⵍⴰ ⵉⵜⵜⵉⵍⵉ ⵍⵍⴰ ⵉⵙⵙⵓⵊⴷ ⵙⵙⵍⵍⴰⵜ ⴷ ⵜⵙⵔⴼⵉⵏ; ⵍⵍⴰ ⵉⵜⵡⵓⵏⵓⵢ ⴰⵔ ⴷ ⵉⵡⵡⵜ ⵢⵉⴹ, ⵜⴰⵍⵉ ⴷ ⵜⵣⵉⵔⵉ; ⵄⴰⴷ ⴰⴷ ⵉⴱⴷⴷⵓ ⵍⵄⴱⴰⵕ ⵏ ⵉⵎⵏⴷⵉ; ⴽⵓⵔ ⵉⵜⵄⴱⴰⵕ, ⵜⵜⴰⵙⵉⵏ ⵉⴼⵍⵍⴰⵃⵏ ⵖⵔ ⵊⴰⵊ ⵏ ⵍⴱⵢⵓⵜ ⴰⴷ ⵅⵣⵏⵏ ⴳ ⵙⵙⵍⵍⴰⵜ ⵅⴷⴷ ⵍⵍⴰ ⵜⵜⴰⵡⵉⵏ ⵖⵔ ⵍⵎⵔⵓⵙ ⴰⴷ ⵅⵣⵏⵏ ⴳ ⵜⵙⵔⴼⵉⵏ; ( 115 ) ⴰⴷⴷⴰⵢ ⵉⵜⵜⵄⴱⴰⵕ ⵢⵓⵏ, ⵓⵔ ⴷⴰ ⵉⵜⵜⵙⴰⵡⴰⵍ ⵃⴷⴷ; ⵉⴼⵍⵍⴰⵃⵏ ⵍⵍⴰ ⵜⵜⵉⵍⵉⵏ ⵍⵍⴰ ⴽⴽⵙⵏ ⵚⵚⴱⴰⵢⵟ ⵏⵏⵙⵏ, ⵍⵍⴰ ⵜⴷⴷⵓⵏ ⵙ ⵍⵃⴼⴰ ⴱⴰⵛ ⵓⵔ ⵜⵜⴰⴽⵍⵏ ⵅⴼ ⵉⵎⵏⴷⵉ; ⴰⴷⴷⴰⵢ ⵉⵄⴱⵕ ⴱⴰⴱ ⵏ ⵜⵢⵓⵢⵢⴰ ⵉ ⵉⵅⴼ ⵏⵏⵙ, ⵄⴰⴷ ⴰⴷ ⵉⵜⵜⵄⴱⴰⵕ ⵉ ⵓⴼⵍⵍⴰⵃ; ⵍⵍⴰ ⴰⵙ ⵉⵜⵜⵉⴽⴽ ⴰⵙⵔⴷⵓⵏ ⴷ ⵜⵖⵕⴰⵕⵜ, ⵍⵍⴰ ⵉⵚⵚⴰⵡⴰⴹ ⵉⵎⵏⴷⵉ ⵏⵏⵙ ⵙ ⵓⵅⴰⵎ. ⴰⴷⴷⴰⵢ ⴽⵎⵎⵍⵏ ⵎⴷⴷⵏ ⴰⵔⵡⴰ ⵏ ⵢⵉⵔⴷⵏ, ⵍⵍⴰ ⵊⵊⵎⵓⵄⵏ ⵜⵉⵔⵔⴰⵛ, ⴷⴰ ⴰⵍⵙⵏ ⴰⵙⵏⵜ ⴰⵔⵡⴰ ⴱⴰⵛ ⴰⴷ ⵉⵏⵖⴷ ⵓⴽⵔⵢⴰⵙ ⵏⵏⴰ ⵉⵇⵇⵉⵎⵏ; ⴰⵔⵡⴰ ⵏⵏⴰ ⵍⵍⴰ ⴰⵙ ⵜⵜⵉⵏⵉⵏ ⴰⵖⵢⵢⵣ; ⵍⵍⴰ ⵜⵖⵢⵢⴰⵣⵏ ⵎⴷⴷⵏ ⵙ ⵢⵉⴹ ⵅⴷⴷ ⵚⵚⴱⴰⵃ ⵣⵉⴽⴽ: ⵍⵍⴰ ⵜⴽⴽⵔⵏⵜ ⵜⵄⵢⵢⴰⵍⵉⵏ, ⵍⵍⴰ ⵖⵔⵔⵙⵏⵜ ⵉ ⵢⵓⵏ ⵓⴼⵓⵍⵍⵓⵙ, ⵍⵍⴰ ⵖⵉⴼⵙ ⵜⵜⴳⴳⵏⵜ ⵟⵟⵄⴰⵎ ⵉ ⵉⴼⵍⵍⴰⵃⵏ; ( 117 ) ⵓⴽⴰⵏ ⴰⵡⵉⵏⵜ ⵜⴰⵣⵍⴰⴼⵜ ⵏ ⵟⵟⵄⴰⵎ ⵏⵏⴰ ⵙ ⵓⵏⵔⴰⵔ ⵉ ⵉⴼⵍⵍⴰⵃⵏ; ⴰⴷⴷⴰⵢ ⵜⵜⵛⵏ ⵍⵍⴰ ⵜⴽⴽⵔⵏ, ⵍⵍⴰ ⵜⵜⵄⴰⵎⵎⴰⵕⵏ ⵜⴰⵣⵍⴰⴼⵜ ⵏⵏⴰ ⵙ ⵢⵉⵔⴷⵏ ⵉ ⵍⴰⵍ ⵏ ⵓⵅⴰⵎ; ⴰⴷⴷⴰⵢ ⵜⴻⵜⵜⵏ ⵢⵉⵜⵙ ⵉⴼⵍⵍⴰⵃⵏ ⵜⵖⵢⵉⵣⴰ, ⵍⵍⴰ ⴷ ⵇⵇⴰⵕⵏ ⵉ ⵉⴼⵍⵍⴰⵃⵏ ⵢⴰⴹⵏⵉⵏ ⴰⴹⴹⵊⴰⵕⵏ ⵏⵏⵙⵏ, ⵍⵍⴰ ⵖⵉⴼⵙⵏ ⵄⵕⵕⴹⵏ. ⴰⴷⴷⴰⵢ ⴽⵎⵎⵍⵏ ⵎⴷⴷⵏ ⴰⵔⵡⴰ, ⵇⴱⵍ ⴰⴷ ⴱⴷⵓⵏ ⵜⵏⵇⵇⴰⵍⵏ ⵉⵎⵏⴷⵉ ⵙ ⵓⵅⴰⵎ ⵅⴷⴷ ⵖⵔ ⵍⵎⵔⵙ, ⵍⵍⴰ ⴱⴷⴷⵓⵏ ⵙ ⵍⵎⵓⴷⴷ ⵏ ⵙⵉⴷⵉ ⴱⵍⵄⴱⴱⴰⵙ: ⵍⵎⵓⴷⴷ ⴰⵎⵣⵡⴰⵔⵓ; ⵍⵍⴰ ⵜ ⵜⵜⵉⴽⴽⵏ ⵉⴼⵍⵍⴰⵃⵏ ⵉ ⵉⵎⵙⵓⵜⵔⵏ ⵅⴷⴷ ⵍⵍⴰ ⵜ ⵣⵣⵏⵣⴰⵏ ⵍⵍⴰ ⵉⵙⵙ ⵜⵜⵙⵡⵡⴰⵇⵏ. ⵜⴰⵃⵔⵔⴰⵜ ⴰⴷⴷⴰⵢ ⵜⵇⵔⵔⴱ ⵜⴰⵃⵔⵔⴰⵜ ⴳ ⴽⵟⵓⴱⵕ ⵍⵍⴰ ⵉⴽⴽⴰⵜ ⵓⵏⵥⴰⵕ ⵎⵉⵄⴰⴷ ⴰⵔ ⴷ ⵉⵔⵡⵓ ⵡⴰⴽⴰⵍ; ⵍⵍⴰ ⵜⵜⵉⵍⵉⵏ ⵎⴷⴷⵏ, ⵍⵍⴰ ⵓⵎⵥⵏ ⵉⴼⵍⵍⴰⵃⵏ ⵏⵏⵙⵏ; ⴰⴼⵍⵍⴰⵃ ⴰⴷ ⵉⵜⵏⵇⵇⴰⵍⵏ ⵍⵓⵖⴱⴰⵕ ⵙ ⵉⴳⵔⴰⵏ; ⵍⵍⴰ ⵉⵏⴰⵏ ⵜⵉⵖⵏⴰⵛⵉⵏ, ⵍⵍⴰ ⵍⵍⵎⵏ ⵜⵉⵡⵔⵢⴰ ⴷ ⵜⴽⵯⵎⴰⵎⵉⵏ; ⵍⵍⴰ ⵄⴷⴷⵍⵏ ⵜⵉⵄⵍⵍⴰⴼⵉⵏ; ⵡⵏⵏⴰ ⵖⵓⵔ ⵜⵍⵍⴰ ⵜⵡⵔⵙⴰ, ⵍⵍⴰ ⵜ ⵉⴷ ⵉⵄⴷⴷⵍ ⵖⵓⵔ ⵓⵎⵣⵉⵍ, ⵡⵏⵏⴰ ⵓⵔ ⵖⵓⵔ ⵜⵍⵍⵉ, ⵍⵍⴰ ⵜⵜ ⵉⴷ ⵉⵙⵙⴰⵖ, ⵏⵜⵜⴰⵜ ⴷ ⴱⵓⴼⵏⵛⵍ; ⵍⵍⴰ ⵜⵜⴹⴱⴱⴰⵕⵏ ⴳ ⵉⵎⴰⵙⵙⵏ ⴰⵎⴰ ⵍⵍⴰ ⵜⵏ ⵉⴷ ⵜⵜⴱⴱⵉⵏ ⵙⴳ ⵍⵖⴰⴱⵜ, ⴰⵎⴰ ⵍⵍⴰ ⵜⵏ ⵉⴷ ⵙⵙⴰⵖⵏ ⵙⴳ ⵙⵙⵓⵇ; ( 120 ) ⴰⴷⴷⴰⵢ ⴹⴱⴱⵕⵏ ⴳ ⵉⴽⵛⵛⵓⴹⵏ, ⵍⵍⴰ ⴷ ⵜⵜⴰⵡⵉⵏ ⵍⵎⵄⵍⵍⵎ ⵏⵏⴰ ⵖⴰ ⵜⵏ ⵉⵄⴷⴷⵍⵏ; ⵍⴰ ⵜⵏ ⵉⵏⵊⵊⵕ, ⵉⵔⴽⴽⴱ ⵜⵏ; ⴰⴷⴷⴰⵢ ⵡⵊⴷⵏ, ⵍⴰ ⵜⵏ ⵉⵜⵇⵇⵏ ⵓⵔⵢⴰⵣ ⵖⵔ ⵍⴱⵀⴰⵢⵎ, ⴰⵎⴰ ⵙ ⵉⵙⵔⴷⴰⵏ, ⴰⵎⴰ ⵙ ⵉⵖⵢⵢⴰⵍ, ⴰⵎⴰ ⵙ ⵉⵣⵢⴰⵔⵏ; ⵍⵍⴰ ⵉⵜⵜⵏⴷⴰⵀ ⴰⴷ ⵉⵄⵍⵍⵎ ⵢⵉⵜⵙ ⵏ ⵍⵅⴹⵓⴹ ⴱⴰⵛ ⴰⴷ ⵢⴰⵏⵏⴰⵢ ⵎⴰⴷ ⴷⵉⵙ ⵙⵔⵔⵃⵏ ⵎⴰⴷ ⵍⴰ. ⴳ ⵍⵄⴰⴷⴰ, ⴰⴷⴷⴰⵢ ⵉⵏⴷⵀ ⵓⵔⵢⴰⵣ ⵜⴰⵢⵓⵢⵢⴰ, ⴰⴷ ⵉⵊⵕⵕⴱ ⵉⵎⴰⵙⵙⵏ, ⵍⵍⴰ ⵉⵜⵜⴰⵡⵉ ⵖⵓⵔⵙ ⵢⵓⵜ ⵏ ⵜⵓⵖⵔⵉⴼⵜ ⵏ ⵓⵖⵔⵓⵎ ⴷ ⵢⵓⵜ ⵏ ⵜⴰⵕⵕⵎⵎⴰⵏⵜ, ⵍⵍⴰ ⵜⵏⵜ ⵢⵓⵟⵟⵓ ⵅⴼ ⵉⵎⴰⵙⵙⵏ ⵉ ⵍⵡⴰⵛⵓⵏ. ⴰⴷⴷⴰⵢ ⵉⴱⴷⵓ ⵓⴼⵍⵍⴰⵃ ⵜⴰⵃⵔⵔⴰⵜ, ⵍⵍⴰ ⵉⵜⵜⵄⵍⵍⴰⵎ ⵢⵓⵜ ⵏ ⵜⵏⴹⵉⵕⵜ ⴱⴰⵛ ⴰⴷ ⵜⵜ ⵉⵣⵔⵄ ⵙ ⵉⵎⵏⴷⵉ; ⵍⵍⴰ ⵖⵓⵔⵙ ⵉⵜⵜⴰⵡⵉ ⵚⵚⴱⴰⵃ ⵣⵣⵔⵔⵉⵄⵜ ⴰⴷⴷⴰⵢ ⵉⴷⴷⵓ; ⴰⴷⴷⴰⵢ ⵉⵔⴽⴽⴱ ⵓⴼⵍⵍⴰⵃ ⵜⴰⵡⵔⵙⴰ ⴳ ⵉⵎⴰⵙⵙⵏ, ⵍⵍⴰ ⵉⵜⵜⵥⴰⵍⵍⴰ ⵅⴼ ⵏⵏⴱⵉ, ⵉⵏⵄⵍ ⵛⵛⵉⵟⴰⵏ, ⵄⴰⴷ ⴰⴷ ⵉⵜⵜⵏⴷⴰⵀ. ⵍⵍⴰ ⵉⵜⵜⵎⵓⵏ ⴱⴰⴱ ⵏ ⵜⵢⵓⵢⵢⴰ ⴷ ⵓⴼⵍⵍⴰⵃ ⵙ ⵉⴳⵔ ⴱⴰⵛ ⴰⴷ ⴰⵙ ⵉⵄⵛⵛⴱ ⵉⵣⵔⵄ ⴰⵙ. ⴰⴷⴷⴰⵢ ⵜⴳⵍⵍⴱ ⵜⴰⴼⵓⴽⵜ, ⵍⵍⴰ ⵉⵕⵥⵥⵎ ⵓⵔⵢⴰⵣ ⵉ ⵍⴱⵀⴰⵢⵎ, ⵍⵍⴰ ⵜⵏⵜ ⵉⵜⵜⴰⵡⵉ ⴰⴷ ⵙⵓⵏⵜ, ⵉⵕⵡⵡⵃ ⴷ ⵙ ⵓⵅⴰⵎ, ⵜⴰⴷⴳⴳⵯⴰⵜ ⵍⵍⴰ ⴰⵙⵏⵜ ⵉⵜⵜⵉⴽⴽ ⵇⴱⴰⵍⴰ ⵏ ⵡⴰⵍⵉⵎ ⴷ ⵜⵎⵥⵉⵏ ⴱⴰⵛ ⴰⴷ ⵉⵖⵉⵢⵏⵜ ⴰⴷ ⴽⵔⵣⵏⵜ ⴰⵙⴽⴽⴰ; ⵚⵚⴱⴰⵃ ⵣⵉⴽ ⵍⵍⴰ ⵉⵜⴽⴽⵔ ⵓⴼⵍⵍⴰⵃ, ⵍⵍⴰ ⵉⵄⵍⵍⴼ ⴰⵍⵜⵓ ⵜⴰⵢⵓⵢⵢⴰ, ⵉⵄⵎⵎⵕ ⵣⵣⵔⵔⵉⵄⵜ, ⵉⴷⴷⵓ. ⴳ ⵍⵓⵇⵜ ⵏ ⵜⵃⵔⵔⴰⵜ, ⵓⵔ ⴷⴰ ⵜⵎⵏⵏⴰⴽⵏ ⵎⴷⴷⵏ ⴰⴳⵯⴷ ⵢⵓⵏ ⵡⴰⵙⵙ ⵉⵜⵜⵅ ⵜⴰⵃⵔⵔⴰⵜ ⵜⴰⵎⵏⵣⵓⵜ ⴷⵉⵎⴰ ⵍⵍⴰ ⴷ ⵜⵜⴰⵙⴰ, ⵍⵍⴰ ⵜⵜⴰⴼⴰⵏ ⵉⵎⵏⴷⵉ ⵉⵎⵏⵣⴰ ⵉⵎⵓⵥⴰⵥ. ⴰⵏⴰⵡⵍ ⵏ ⵜⴰⴹⵓⴹⵜ ⴰⴷⴷⴰⵢ ⵜⵉⵔⵉ ⵜⵎⵟⵟⵓⴹⵜ ⴰⴷ ⵜⴳⵔ ⵛⴰ ⵏ ⵓⵥⵟⵟⴰ, ⵍⵍⴰ ⵜⴹⴱⴱⴰⵕ ⵉ ⵜⴰⴹⵓⴹⵜ; ⵎⵛ ⵖⵓⵔⵙⵏ ⵓⵍⵍⵉ, ⵍⵍⴰ ⵜⵏⵜ ⵉⵍⵍⴰⵙ ⵓⵔⵢⴰⵣ ⵏⵏⵙ, ⵉⴼⴽ ⴰⵙ ⴰⴷ ⵜⵅⴷⵎ; ⵎⵛ ⵓⵔ ⵖⵓⵔⵙⵏ ⵛⴰ, ⵍⵍⴰ ⴷ ⵉⵙⵙⴰⵖ ⵙⴳ ⵙⵙⵓⵇ ⴰⵢⵏⵏⴰ ⵖⴰⵙ ⵉⴽⴼⵓⵏ, ⵢⵓⵏ ⵅⴷⴷ ⵙⵉⵏ ⵉⵍⵉⵙⵏ; ⵍⵍⴰ ⵜⴽⴽⵔ ⵜⵎⵟⵟⵓⴹⵜ, ⵍⵍⴰ ⵜⴼⵙⵙⵓ ⵜⴰⴹⵓⴹⵜ ⵏⵏⴰ, ⵍⵍⴰ ⵜⵄⵣⵣⵍ ⵜⴰⴹⵓⴹⵜ ⵏⵏⴰ ⵉⵥⵉⵍⵏ ⵙⴳ ⵜⵏⵏⴰ ⵓⵔ ⵉⵄⴷⵉⵍⵏ, ⵜⴰⵡⵉ ⵜⵜ ⵙ ⵡⴰⵎⴰⵏ, ⵙ ⵡⴰⵙⵉⴼ ⵅⴷⴷ ⵙ ⵓⵏⴰ ⴰⴷ ⵜⵜ ⵉⴷ ⵜⵙⵙⵉⵔⴷ; ( 126 ) ⵍⵍⴰ ⵖⵓⵔⵙ ⵜⵜⴰⵡⵉ ⵜⵉⵖⵉⵖⵛⵜ ⴷ ⵚⵚⴰⴱⵕⴰ ⴷ ⵢⵓⵜ ⵏ ⵜⵅⴱⴱⴰⵟⵜ, ⵍⵍⴰ ⵉⵙⵙⵏⵜ ⵜⵙⵙⵉⵔⵉⴷ; ⴰⴷⴷⴰⵢ ⵜⵣⵡⵓ ⵜⴰⴹⵓⴹⵜ ⵏⵏⴰ, ⵍⵍⴰ ⴷ ⵜⵇⵇⴰⵕ ⵉ ⵉⵙⵜ ⵍⴰⵀⵍ ⵏⵏⵙ ⴰⴷ ⴰⵙ ⵄⴰⵡⵏⵏⵜ; ⵍⵍⴰ ⴼⵙⵙⵓⵏⵜ ⵜⴰⴹⵓⴹⵜ, ⵥⵍⵉⵏⵜ ⵜⵜ ⴱⴰⵛ ⴰⴷ ⵣⵉⵢⵙ ⵜⵜⵓⵜⵜⵉ ⵍⵖⴱⵕⵜ ⴷ ⵍⵓⵙⵅ, ⴱⴷⵓⵏⵜ ⴰⵇⵔⵛⵍ; ⵛⴰ ⵉⵎⵛⵛⴹ, ⵛⴰ ⵉⵜⵇⵔⵛⴰⵍ, ⵛⴰ ⵉⵜⵍⵍⵎ ⴳ ⵉⵥⴹⵉⵢⴰⵏ ⴰⵔⴰⴼ ⵅⴷⴷ ⵅⵕⵕⵉ ⵅⴷⴷ ⵓⵙⵜⵓ. ⴰⴷⴷⴰⵢ ⵢⵓⵊⴷ ⴽⵓⵍⵛⵉ, ⵍⵍⴰ ⵜⴹⴱⴱⴰⵕ ⵍⴰⵍ ⵏ ⵓⵅⴰⵎ ⵉ ⵜⵖⵓⵎⵉ, ⴰⴷ ⵜⵖⵎ ⵉⴼⵉⵍⴰⵏ ( ⵡⴰⵍⴰⵢⵏⵏⵉ ⵓⵔ ⴷⴰ ⵉⵖⵎⵎ ⵅⴷⴷ ⴰⴷⴷⴰⵢ ⵜⵉⵍⵉ ⵛⴰ ⵏ ⵜⴰⵢⵎⴰⵔⵜ ⵃⵔⴰ ⵜⵓⵔⵓ ⴳ ⵓⵅⴰⵎ ⵅⴷⴷ ⵖⵓⵔ ⵡⴰⴹⴹⵊⴰⵕⵏ ⵉⵜⵅ ⵍⵍⴰ ⵉⵜⴼⴼⵖ, ⵍⵍⴰ ⵉⵜⴳⴳⵯⴷ ⴱⵏⴰⴷⵎ ⴱⴰⵔ ⴰⴷ ⵉⵎⵎⵜ ⵓⵢⵏⵏⴰ ⵉⵍⵓⵍⵏ. ⴷⴼⴼⵉⵔ ⵓⵢⵏⵏⴰ, ⵍⵍⴰ ⵜⵇⵇⴰⵔ ⵍⴰⵍ ⵏ ⵓⵅⴰⵎ ⵉ ⵜⴰⴹⴹⵊⴰⵕⵉⵏ ⵏⵏⵙ ⴰⴷ ⴰⵙ ⵄⴰⵡⵏⵏⵜ ⴳ ⵜⵡⵡⵔⵉ ⵏ ⵓⵥⵟⵟⴰ ( ⵎⴰⵛⴰ ⵓⵔ ⴷⴰ ⵉⴳⴳⴰⵔ ⵃⴷⴷ ⴰⵥⵟⵟⴰ ⴷⴰⵜ ⵏ ⵓⵅⴰⵎ ⵏ ⵃⴷⴷ ⵉⵜⵅ ⵍⵍⴰ ⵉⵜⴼⴼⵖ ); ⵍⵍⴰ ⵜⴷⴷⵣⵏⵜ ⴽⵕⴰⴹⵜ ⵏ ⵜⴰⵡⵡⵓⵙⵉⵏ ⴳ ⵡⴰⴽⴰⵍ, ⴽⵓⵍ ⵢⵓⵜ ⵙⴳ ⵜⵄⵢⵢⴰⵍⵉⵏ ⵍⵍⴰ ⵜⵜⵖⵉⵎⴰ ⴳ ⵟⵟⵕⴼ, ⵜⵉⵍⵉ ⵜⵉⵙⵙ ⴽⵕⴰⴹⵜ, ⵍⵍⴰ ⵜⵜⵣⴰⵣⵣⴰⵍ ⵖⵉⴼⵙⵏⵜ ⴰⵔⴰⴼ ⵅⴷⴷ ⵓⵙⵜⵓ; ⴰⴷⴷⴰⵢ ⵙⵏⵉⵏⵜ ⴰⵔⴰⴼ ⵏⵏⴰ, ⵍⵍⴰ ⵜ ⵜⴹⵕⵕⴰⵏⵜ ⴳ ⵉⴼⴳⴳⴰⵢⵏ, ⴷⴰ ⵜⴱⴷⵓ ⵜⵎⵟⵟⵓⴹⵜ ⴰⵥⵟⵟⴰ ⵏⵏⵙ; ⴰⵎⴰ ⵍⵍⴰ ⵜⵜⴳⴳ ⵅⴰⵙ ⵉⵖⵊⴷⵏ, ⴰⵎⴰ ⵍⵍⴰ ⵜⵜⵕⵇⵇⴰⵎ. ⵍⵄⵉⴷ ⴰⵎⵇⵇⵕⴰⵏ ⵍⵄⵉⴷ ⴰⵎⵇⵇⵕⴰⵏ ⵍⵍⴰ ⴷ ⵉⵜⵜⴰⵙⴰ ⵛⵀⵕⴰⵢⵏ ⴷ ⵄⵛⵕ ⵉⵢⵢⴰⵎ ⴷⴼⴼⵉⵔ ⵏ ⵍⵄⵉⴷ ⵏ ⵕⵎⴹⴰⵏ; ⵛⵀⵕ ⵇⴱⵍ ⵍⵄⵉⴷ ⵍⵍⴰ ⴷⵉⴳⵙ ⵜⵜⵅⵎⵎⴰⵎⵏ ⵎⴷⴷⵏ; ⴽⵓⵍ ⵜⴰⵅⴰⵎⵜ ⵍⵍⴰ ⵜⵙⵙⵓⵊⴰⴷ ⵜⴰⵎⵖⵔⵓⵙⵜ ⵏⵏⵙ; ⵡⵏⵏⴰ ⵖⵓⵔ ⵉⵍⵍⴰ ⵍⵎⴰⵍ, ⵍⵍⴰ ⵉⵜⵜⵄⵍⵍⴰⵎ ⴰⵢⵏⵏⴰ ⵙ ⵎⵉ ⵖⴰ ⵉⵄⵢⵢⴷ, ⴰⵎⴰ ⵍⵍⴰ ⵜ ⵉⵜⵜⴰⵎⵥ, ⵍⵍⴰ ⵜ ⵉⵄⵍⵍⴼ, ⴰⵎⴰ ⵍⵍⴰ ⵉⵜⵜⵅⵟⴰⵕ ⵢⵓⵏ ⵉⵅⴼ ⵏ ⵡⵓⵍⵍⵉ ⵏⵏⴰ ⵉⵇⵡⴰⵏ; ( 131 ) ⵡⵉⵏⵏⴰ ⴷ ⵉⵙⵙⴰⵖⵏ ⵍⵄⵉⴷ ⵏⵏⵙⵏ ⵙⴳ ⵙⵙⵓⵇ, ⵍⵍⴰ ⵜ ⵟⵟⴰⵎⵥⵏ ⴳ ⵓⵅⴰⵎ, ⵍⵍⴰ ⵜ ⵃⵟⵟⵓⵏ ⴰⴷ ⵉⵚⵃⵓ ⵙ ⵍⵄⵍⴼ ⵅⴷⴷ ⵍⵍⴰ ⴰⵙ ⵕⵥⵥⵎⵏ ⴰⴷ ⵉⵎⵓⵏ ⴷ ⵡⵓⵍⵍⵉ ⴰⵔ ⴰⵙⵙ ⵏ ⵍⵄⵉⴷ; ⵡⵏⵏⴰ ⵉⵖⵉⵢⵏ ⵉ ⵓⵃⵓⵍⵉ, ⵡⵏⵏⴰ ⵉⵖⵉⵢⵏ ⵉ ⵉⵖⵊⴷ, ⴰⴳⵯⴷ ⵢⵓⵏ ⵏⵏⴰ ⵉⵜⵜⵖⵉⵎⴰⵏ ⴱⵍⴰ ⵛⴰ. ⴰⵙⵙ ⵏ ⵍⵄⵉⴷ, ⵍⵍⴰ ⴼⵟⵟⵕⵏ ⵎⴷⴷⵏ ⵚⵚⴱⴰⵃ ⴰⵎ ⵍⵄⵢⵓⴷ ⵢⴰⴹⵏⵉⵏ; ⵙⴳ ⵍⵍⵉ ⵍⵍⴰ ⵛⵛⵡⵓⵏ ⵍⴰⵎⵎⵡⴰⵙ ⴰⵔ ⵄⴷⴷⵍⵏ ⵍⵇⵟⴰⵢⴱ ⵏ ⵓⴽⴰⵏⵉⴼ; ⴰⴷⴷⴰⵢ ⵢⴰⵡⴹ ⵡⴰⵎⵎⴰⵙ ⵏ ⵡⴰⵙⵙ, ⵍⵍⴰ ⴷ ⵜⵜⴹⵕⵕⴰⵏ ⵉⵎⴽⵙⴰⵡⵏ ⵙ ⴹⴹⵃⴰ ⵙ ⵉⵅⴰⵎⵏ; ⵍⵍⴰ ⵟⵟⴰⵎⵥⵏ ⵎⴷⴷⵏ ⵜⵉⵎⵖⵔⴰⵙ, ⵖⵔⵏ ⵉ ⵟⵟⴰⵍⴱ; ⵍⵍⴰ ⵉⵜⵜⴽⴽ ⴳ ⴽⵓⵍ ⴰⵅⴰⵎ; ⵍⵍⴰ ⵖⵓⵔⵙ ⵉⵜⵜⵉⵍⵉ ⵢⵓⵏ ⵓⵙⴰⵔⵉ ⴰⵏⵛⵜ, ⵍⵍⴰ ⵉⵜⴱⴱⵉ ⵣⵣⵡⴰⵏ; ( 133 ) ⵃⵔⴰ ⴰⴷ ⴰⵎⵥⵏ ⵎⴷⴷⵏ ⵜⴰⵎⵖⵔⵓⵙⵜ, ⵓⵔ ⴷ ⴰⵙ ⵜⵜⴳⴳⵏ ⴰⵡⵏⵓⵍ ⴱⴰⵛ ⵓⵔ ⵜⵜⴽⵓⵏⵙⵓⵔ ⵉⵜⵅ ⵓⵔ ⵉⵄⴷⵉⵍ ⵎⵛ ⵜⴽⴽⵯⵏⵙⵔ, ⵍⵍⴰ ⴰⵙ ⵉⵜⵜⵄⵎⵎⴰⵕ ⵟⵟⴰⵍⴱ ⴰⵇⵎⵓ ⵙ ⵍⵄⵍⴼ, ⵉⴼ ⴰⵙ ⴰⴷ ⵜⵙⵓ, ⴱⴰⵛ ⴰⴷ ⵖⵉⴼⵙ ⵜⵄⵇⵇⵍ ⴳ ⵍⵊⵏⵏⵜ; ( 134 ) ⵍⵍⴰ ⵖⵉⴼⵙ ⵉⵜⵜⵙⴰⴽⴽⴰ ⵅⴰⵙ ⵢⵓⵏ ⵓⵙⵉⴽⴽ ⴷⴰ ⵉⵕⵥⵎ ⴰⵙ ⴷⵖⵉⵢⴰ ⴱⴰⵛ ⴰⴷ ⵜⴽⴽⵔ; ⵡⵏⵏⴰ ⵎⵉ ⵉⴽⴽⵔ ⵍⵄⵉⴷ ⵏⵏⵙ ⴰⴷ ⵉⴱⴷⴷ, ⵅⴷⴷ ⴰⴷ ⵉⴷⴷⵓ, ⴷ ⵍⴼⴰⵍ ⵏⵏⴰ ⵉⵥⵉⵍⵏ ⴰⵢⵏⵏⴰ; ⵍⵍⴰ ⵉⵜⵜⵉⵍⵉ ⵢⵓⵏ ⵏ ⵍⵄⵉⵍ, ⵍⵍⴰ ⵉⵜⵜⵎⵓⵏ ⴷ ⵟⵟⴰⵍⴱ, ⵍⵍⴰ ⴰⵙ ⵜⵜⵉⴽⴽⵉⵏ ⵎⴷⴷⵏ ⵜⵉⴳⵍⴰⵢ ⵅⴷⴷ ⵍⴼⵍⵓⵙ. ⴰⴷⴷⴰⵢ ⵜⵜⴰⵣⵣⴰⵍⵏ ⵉⴷⴰⵎⵎⵏ ⵙⴳ ⵜⵎⵖⵔⵓⵙⵜ, ⵍⵍⴰ ⵜⵜⵄⵎⵎⴰⵕⵏⵜ ⵜⵄⵢⵢⴰⵍⵉⵏ ⵢⵓⵜ ⵏ ⵜⵎⴹⵍⵉⵜ ⴱⴰⵛ, ⴰⴷⴷⴰⵢ ⵃⴽⴽⵏ, ⴰⴷ ⵏⵏⴰⵢⵏⵜ ⵛⵃⴰⵍ ⵏ ⵜⵙⵔⴼⵉⵏ ⴰⴳ ⴰⵔ ⵅⵣⵏⵏ ⴰⵙⴳⴳⵯⴰⵙ ⵏⵏⴰ; ⴰⴷⴷⴰⵢ ⴰⵣⵣⵍⵏ ⵉⴷⴰⵎⵎⵏ ⴳ ⵡⴰⴽⴰⵍ, ⵍⵍⴰ ⵖⵉⴼⵙⵏ ⵜⵜⴰⴽⵯⵍⵏ ⵍⵡⴰⵛⵓⵏ ⴱⴰⵛ ⵓⵔ ⵜⵏ ⵉⵜⵜⴰⵖ ⵓⵢⵏⵏⴰ ⵉⵅⵅⴰⵏ, ⴱⴰⵛ ⵓⵔ ⵜⵏ ⴽⴽⴰⵜⵏ ⵍⵊⵏⵓⵏ; ⵓⵎⴰ ⵡⵉⵏⵏⴰ ⵎⵉ ⴼⴼⵉⵇⵙⵏ ⵉⵡⵔⵣⴰⵏ, ⵍⵍⴰ ⵖⵉⵔⵙⵏ ⵎⵔⵔⵉⵏ ⵉⵡⵔⵣⴰⵏ ⴱⴰⵛ ⴰⴷ ⴰⵙⵏ ⵊⵊⵉⵏ. ⴷⵖⵢⴰ ⵍⵍⴰ ⵉⵜⵜⴰⵣⵓ ⵓⵔⵢⴰⵣ ⵜⴰⵎⵖⵔⵓⵙⵜ ⵏⵏⵙ ⵎⴰⵃⴷⴷ ⵜⵃⵎⴰ; ⵃⵔⴰ ⴰⴷ ⴰⵙ ⵉⵙⵙⵏⵙⵔ ⴰⵀⵉⴹⵓⵕ, ⵍⵍⴰ ⴷ ⵖⵉⴼⵙ ⵊⵊⵎⵓⵄⵏ ⴰⵢⵜ ⵓⵅⴰⵎ ⴱⴰⵛ ⴰⴷ ⴰⵏⵏⴰⵢⵏ ⵎⴰⴷ ⵉⵙ ⵉⵚⵃⴰ ⵍⵄⵉⴷ ⵎⴰⴷ ⵍⴰ; ⴰⴷⴷⴰⵢ ⵉⴱⵄⵊ ⵜⴰⵎⵅⵙⵓⵢⵜ, ⵍⵍⴰ ⴷ ⵉⵜⴽⴽⵙ ⴰⵙⵍⵙⵓ, ⵍⵍⴰ ⵜ ⵉⴼⵙⵙⵔ ⴳ ⵉⵅⴼ ⵏ ⵢⵓⵏ ⵏ ⵍⵄⵉⵍ ⴰⴷ ⵉⵣⵡⵓ; ⴷⵖⵢⴰ ⵜⴰⵎⵟⵟⵓⴹⵜ ⵍⵍⴰ ⵜⵊⵎⵓⵄ ⴰⵀⵉⴹⵓⵕ ⴷ ⵉⵅⴼ ⴷ ⵉⴹⴰⵕⵏ ⴷ ⵉⵚⵕⵎⴰⵏ ⴷ ⵓⵄⴷⴷⵉⵙ; ⵍⵍⴰ ⵜⴳⴳ ⵢⵓⵏ ⵓⵃⵎⴰⵊⵊⵓ ⵏ ⵍⵄⴰⴼⵉⵜ, ⵍⵍⴰ ⵖⵉⵔⵙ ⵜⵣⵣⵍⵓⴼ ⵉⵅⴼ ⴷ ⵉⴹⴰⵕⵏ; ( 137 ) ⵍⵍⴰ ⵉⵜⵜⴰⴳⵯⵍ ⵓⵔⵢⴰⵣ ⵜⴰⵎⵅⵙⵓⵢⵜ, ⴷⴰ ⵉⴱⴱⵉ ⵓⵍ ⴷ ⵜⴰⵙⴰ ⴰⴷ ⴳⵏ ⴰⵢⵜ ⵓⵅⴰⵎ ⵜⵓⵜⵍⵉⵡⵉⵏ ⵙ ⵓⵙⵍⵙⵓ; ⵍⵍⴰⵏ ⵡⵉⵏⵏⴰ ⴱⴷⴷⵓⵏⵉⵏ ⴳ ⵜⵎⵅⵙⵉⵡⵜ ⵏⵏⵙⵏ ⵙⴳ ⵡⴰⵙⵙ ⴰⵎⵣⵡⴰⵔⵓ, ⵢⵉⵍⵉⵏ ⵡⵉⵏⵏⴰ ⵜⴻⵜⵜⵏⵉⵏ ⵅⴰⵙ ⵜⴰⴹⵡⵡⴰⵕⵜ ⴰⵙⵙ ⴰⵎⵣⵡⴰⵔⵓ, ⵢⵉⵍⵉⵏ ⵡⵉⵏⵏⴰ ⴱⴷⴷⵓⵏⵉⵏ ⵙⴳ ⵜⵎⴳⴳⵕⴹⵜ ⵅⴷⴷ ⵙⴳ ⵓⴹⴰⵕ ⵅⴷⴷ ⴰⴳⴳⵯⴷ ⵙⴳ ⵜⴰⴷⴰⵡⵜ, ⴽⵓⵍ ⵢⵓⵏ ⵙ ⵍⵄⴰⴷⴰ ⵏⵏⵙ. ⴽⵓⵍ ⵉⵎⴽⵍⵉ, ⴽⵓⵍ ⵉⵎⵏⵙⵉ ⵍⵍⴰ ⵉⵜⵜⵉⵍⵉ ⵓⴽⵙⵓⵎ ⴷ ⵓⴽⴰⵏⵉⴼ ⴰⵔ ⴷ ⵉⵡⵡⵜ ⴳ ⵉⵅⴼ; ⴰⴷⴷⴰⵢ ⵉⵄⴷⴷⵓ ⵓⴽⵙⵓⵎ, ⵍⵍⴰ ⵜ ⵜⵜⵇⴷⴷⴰⴷⵏ ⵎⴷⴷⵏ, ⴳⵏ ⴰⵙ ⵍⵄⵛⵓⴱ ⴷ ⵜⵉⵙⵏⵜ, ⴳⵏ ⵜ ⴰⴷ ⵉⵇⵇⴰⵔ ⵖⵔ ⵜⴰⴼⵓⴽⵜ; ⴳ ⵍⵓⵇⵜ ⵏⵏⴰ ⵍⵍⴰ ⵉⵜⵄⴷⴷⵓ ⵓⵄⵕⴰⴹ, ⵉⵄⴷⴷⵓ ⵍⵅⵉⵔ; ⴳ ⵍⵄⴰⴷⴰ, ⵍⵍⴰ ⵉⵜⵜⴰⵡⵉ ⵍⵄⵉⵍ ⵜⴰⵖⵕⵓⴹⵜ ⵏ ⵓⴽⵙⵓⵎ ⵉ ⵏⴰⵏⵏⴰⵙ ⵏⵏⴰ ⴰⵙ ⵉⴱⴱⵉⵏ ⵜⵉⵎⵉⴹⵜ. ⵉⴼⴳⴳⴰⵢⵏ ⴷ ⵓⵥⵟⵟⴰ ⴽⵓⵍ ⵜⴰⵅⵅⴰⵎⵜ ⵍⵍⴰ ⵖⵓⵔⵙ ⵜⵜⴰⴼⴰⴷ ⵉⴼⴳⴳⴰⵢⵏ ⵅⴼ ⵎⵉ ⵜⴳⴳⴰⵔ ⵜⵎⵟⵟⵓⴹⵜ ⴰⵥⵟⵟⴰ; ⵜⵏⵏⴰ ⵓⵔ ⵖⵓⵔ ⵍⵍⵉⵏ ⵉⴼⴳⴳⴰⵢⵏ, ⵍⵍⴰ ⵜⵏ ⵉⴷ ⵜⵙⵙⵓⵜⵓⵔ. ⴰⴷⴷⴰⵢ ⵜⵉⵔⵉ ⵜⵎⵟⵟⵓⴹⵜ ⴰⴷ ⵜⴳⵔ ⵢⵓⵏ ⵓⵙⵍⵀⴰⵎ ⵅⴷⴷ ⵜⴰⵇⴱⴱⵓⵜ ⵅⴷⴷ ⴰⵖⵎⵎⵓⵙ, ⵍⵍⴰ ⵜⵉⵍⵉ ⴰⴱⵄⴷⴰ ⵍⵍⴰ ⵜⵙⵙⵓⵊⴷ ⵉⴼⵉⵍⴰⵏ: ⵓⵖⵎⴰⵏ ⵅⴷⴷ ⵅⵔⵔⵉ ⴷ ⵡⵓⵙⵜⵓ ⵅⴷⴷ ⴰⵔⴰⴼ; ⴰⵙⵙ ⵏⵏⴰ ⴳ ⵜⵔⴰ ⴰⴷ ⵜⴳⵔ ⴰⵥⵟⵟⴰ, ⵍⵍⴰ ⵜⵇⵇⴰⵕ ⵉ ⵉⵙⵜ ⵍⴰⵀⵍ ⵏⵏⵙ ⴰⴷ ⴰⵙ ⵄⴰⵡⵏⵜ; ⵍⵍⴰ ⵜⵅⵟⴰⵕ ⵢⵓⵏ ⵏ ⵡⴰⵙⵙ ⵏⵏⴰ ⴳ ⵜⵍⵍⴰ ⵜⴰⴼⵓⴽⵜ ⴱⴰⵛ ⴰⴷ ⵜⴳⵔ ⴱⵕⵕⴰ; ⵍⵍⴰ ⵜⴷⴷⵣ ⴽⵕⴰⴹⵜ ⵏ ⵜⴰⵡⵡⵓⵙⵉⵏ ⴳ ⵡⴰⴽⴰⵍ, ⵍⵍⴰ ⵎⵙⴱⵄⴰⴷⵏⵜ; ( 141 ) ⵍⵍⴰ ⵜⵜⵖⵉⵎⴰⵏⵜ ⵙⵏⴰⵜ ⵏ ⵜⵄⵢⵢⴰⵍⵉⵏ, ⴽⵓⵍ ⵢⵓⵜ ⴳ ⵟⵟⵕⴼ ⴱⴰⵛ ⴰⴷ ⵜ ⵙⵏⵉⵏⵜ ⴰⵔⴰⴼ ⵅⴷⴷ ⵓⵙⵜⵓ ⵏⵏⴰ ⵜⵣⴰⵣⵣⴰⵍ ⵜⵎⵟⵟⵓⴹⵜ ⵜⵉⵙⵙ ⴽⵕⴰⴹⵜ; ⵍⵍⴰ ⴱⴷⴷⵓⵏⵜ ⴰⴱⵄⴷⴰ ⵙ ⵢⵓⵏ ⵉⴼⵉⵍⵉ ⴰⵣⵓⵔⴰⵔ ⵏⵏⴰ ⵉⵚⵍⴰⵃⵏ ⵉ ⵓⵥⵡⵕ; ⴰⴷⴷⴰⵢ ⴽⵎⵎⵍⵏⵜ ⴰⵣⵉⵣⵣⵍ, ⵍⵍⴰ ⵜⴹⵕⵕⴰⵏⵜ ⴽⵓⵍⵛⵉ ⴳ ⵉⴼⴳⴳⴰⵢⵏ; ⵍⵍⴰ ⵉⵜⵜⵉⵍⵉ ⵓⴼⴳⴳⴰⵢ ⵍⵍⴰ ⵉⵏⵏⵓⵇⵇⴱ ⴳ ⵢⵓⵏ ⵏ ⵟⵟⵕⴼ; ( 142 ) ⵍⵍⴰ ⵜ ⵜⵜⴰⵎⵥⵏⵜ ⵜⵄⵢⵢⴰⵍⵉⵏ ⵍⵍⴰ ⴳⵏⵏⵓⵏⵜ ⵉⴼⵉⵍⴰⵏ ⵏ ⵓⵥⵟⵟⴰ ⵖⵔ ⵜⵏⵓⵇⵇⵉⴱⵉⵏ ⵏⵏⴰ ⵏ ⵓⴼⴳⴳⴰⵢ; ⵉⴷⴷ ⵟⵟⵕⴼ ⵢⴰⴹⵏⵉⵏ ⵏ ⵓⵥⵟⵟⴰ, ⵍⵍⴰ ⴷⵉⴳⵙ ⵙⵙⴽⵊⴰⵎⵏⵜ ⵢⵓⵜ ⵏ ⵜⴰⵖⵓⴷⴰ, ⴳⵏⵜ ⵖⵉⴼⵙ ⵢⵓⵜ ⵏ ⵜⴰⵖⵓⴷⴰ ⵜⵉⵙⵙ ⵙⵏⴰⵜ, ⴷⴰ ⴰⴹⵓⵏⵜ ⴰⵥⵟⵟⴰ ⴳ ⵜⵖⴷⵡⵉⵏ; ⵉⵏⴳⵔ ⵏ ⵜⵖⴷⵡⵉⵏ ⴷ ⵓⴼⴳⴳⴰⵢ ⵍⵍⴰ ⵉⵜⵜⵉⵍⵉ ⵓⴳⵟⵟⵓⵎ, ⵍⵍⴰ ⵉⵇⵇⵏ ⵙ ⵉⴼⵉⵍⴰⵏ ⵏ ⵓⵥⵟⵟⴰ ⵙ ⵢⵓⵏ ⵏ ⵉⴼⵉⵍⵉ ⴰⵣⵓⵔⴰⵔ ⴰⴱⵕⴱⴰⵛ ⵉⵙⵎ ⵏⵏⵙ ⴰⵙⵏⵍⵉ; ( 143 ) ⵍⵍⴰ ⵉⵜⵜⵉⵍⵉ ⵢⵓⵏ ⵏ ⵓⵖⴰⵏⵉⵎ ⴷⴷⴰⵡ ⵏ ⵓⴳⵟⵟⵓⵎ, ⵢⵉⵍⵉ ⵢⵓⵏ ⵏⵏⵉⴳ ⵏⵏⵙ; ⵡⵏⵏⴰ ⵏⵏⵉⴳ ⵏⵏⵙ ⵇⵇⴰⵃ ⵓⵔ ⴷⴰ ⵜ ⵜⵜⵃⵔⵔⴰⴽ ⵜⵎⵟⵟⵓⴹⵜ, ⵉⴷⴷ ⵡⵉⵏ ⵡⴰⴷⴷⴰ ⵍⵍⴰ ⵜ ⵜⵙⵙⴰⵍⴰⵢ ⴰⵔ ⵜ ⵜⵙⵀⵡⵡⴰⴷ ⴽⵓⵍ ⵎⴰⵏⵉ ⴳ ⵜⵜⵙⵉⴽⴽ ⵉⴼⵉⵍⵉ ⵏ ⵅⵔⵔⵉ. ⵉⴷⴷ ⵜⵉⵎⵏⴹⵡⵉⵏ ⵍⵍⴰ ⵜⵜⵉⵍⵉⵏ ⴽⵓⵍ ⵢⵓⵜ ⴳ ⵟⵟⵕⴼ; ⵏⵉⵜⵜⵏⵜⵉ ⴰⴷ ⵉⵜⵜⴰⵙⵉⵏ ⴰⵥⵟⵟⴰ; ⵍⵍⴰ ⵜⵜⵉⵍⵉⵏⵜ ⵍⵍⴰ ⵇⵇⵏⵏⵜ ⵙ ⵉⵊⴱⴱⵓⴷⵏ ⵖⵔ ⵍⵃⵉⴹ, ⵢⵉⵍⵉⵏⵜ ⵍⵍⴰ ⵔⴽⴽⵯⵊⵏⵜ ⴳ ⵡⴰⴽⴰⵍ; ⴰⴼⴳⴳⴰⵢ ⵍⵍⴰ ⵉⵜⵜⵉⵍⵉ ⵍⵍⴰ ⵉⴽⵊⵊⵎ ⴳ ⵜⵎⵏⴹⵡⵉⵏ ⵙⴳⴳ ⵡⴰⴷⴷⴰ, ⵜⵉⵖⴷⵡⵉⵏ ⵍⵍⴰ ⵜⵜⵉⵍⵉⵏⵜ ⵍⵍⴰ ⵇⵇⵏⵏⵜ ⵖⵉⵔⵙⵏⵜ ⵙⴳⴳ ⵡⴰⴼⵍⵍⴰ, ⵙ ⵉⵙⵓⴹⴰⴼ; ⵉⴷⴷ ⴰⵙⵏⵍⵉ ⵍⵍⴰ ⵉⵜⵜⵉⵍⵉ ⴰⴳⴳⵯⴷ ⵏⵜⵜⴰ ⵍⵍⴰ ⵉⵇⵇⵏ ⵖⵔ ⵜⵎⵏⴹⵓⵜ; ⴱⴰⵛ ⴰⴷ ⵢⵉⵍⵉ ⵓⵥⵟⵟⴰ ⵍⵍⴰ ⵉⵣⵢⵢⵕ, ⵍⵍⴰ ⵜ ⵜⵜⵇⵇⵏ ⵜⵎⵟⵟⵓⴹⵜ ⵖⵔ ⵜⵎⵏⴹⵡⵉⵏ. ⴰⴷⴷⴰⵢ ⵜⴰⴷⵔ ⵜⵎⵟⵟⵓⴹⵜ, ⵍⵍⴰ ⵜ ⵜⵜⴰⵙⵙⴰ ⵎⵙⵇⵇⵎ ⴱⴰⵛ ⵓⵔ ⵉⵜⵜⵓⵍⵍⵡⴰ, ⵄⴰⴷ ⴰⴷ ⵜⵜⵖⵉⵎⴰ ⴰⴷ ⵜⵥⴹ; ⵍⵍⴰ ⴷ ⵜⵜⴰⵙⵉ ⵉⴼⴰⵙⵙⵏ ⵏ ⵡⵓⵍⵎⴰⵏ ⴷ ⵜⵚⴽⴽⴰ, ⴷⴰ ⵜⴱⴷⵓ; ⴰⴷⴷⴰⵢ ⵉⴷⴷⵓ ⵍⵃⴰⵍ, ⵍⵍⴰ ⵜⵜⴰⵙⵉ ⴰⵥⵟⵟⴰ ⴱⴰⵛ ⴰⴷ ⵜⴳ ⵛⵛⵖⵍ ⵢⴰⴹⵏⵉⵏ; ⴰⴷⴷⴰⵢ ⵜⴳⵔ ⵜⵎⵟⵟⵓⴹⵜ ⵛⴰ ⵏ ⵓⵥⵟⵟⴰ, ⵍⵍⴰ ⵜ ⵜⵜⴳⴳ ⴷ ⵍⵀⵎⵎ ⵏⵏⵙ ⴰⵔ ⵜ ⵜⴽⴽⵙ; ⵎⵛ ⴰⵙ ⵉⵏⵏⵉⵢⵣⴰ, ⵓⵔ ⴷⴰ ⴰⵙ ⵉⵜⵜⵉⵄⵊⵉⴱ ⵍⵃⴰⵍ ⵉⵜⵜⵅ ⵃⵛⵓⵎⴰ. ⴰⴷⴷⴰⵢ ⵜⴽⵎⵎⵍ, ⵍⵍⴰ ⴰⵙ ⵜⵖⵕⵕⵚ ⵙ ⵍⵎⵓⵙ: ⵍⵍⴰ ⵖⵉⴼⵙ ⵜⵙⴰⴽⴽⴰ ⵍⵎⵓⵙ ⴰⵔ ⵜⵜⵉⵏⵉ ⵛⴰ ⵏ ⵉⵡⴰⵍⵉⵡⵏ, ⵄⴰⴷ ⴰⴷ ⵜⵜⴱⴱⵉ ⵉⵖⵕⵉⵚⵏ. ⵖⵓⵔⵏⵖ ⵓⵔ ⴷⴰ ⵥⵟⵟⵏ ⵎⴷⴷⵏ ⴰⵥⵟⵟⴰ ⵅⴰⵙ ⵜⵉⵄⵢⵢⴰⵍⵉⵏ; ⵉⴷⴷ ⵉⵢⵉⵜⵜⵙ ⵏ ⵜⵎⵉⵣⴰⵔ, ⵍⵍⴰⵏ ⵎⴷⴷⵏ ⵏⵏⴰ ⵎⵉ ⵉⵢⵢⴰ ⵓⵥⵟⵟⴰ ⵛⵛⵖⵍ ⵏⵏⵙⵏ. ⴰⵃⵏⴷⵉⵔ ⴰⵃⵏⴷⵉⵔ ⵡⵉⵏ ⵜⵎⵟⵟⵓⴹⵜ ⴰⴷ ⵉⴳⴰ; ⴽⵓⵍ ⴰⵎⵎⴰⵙ ⵏ ⵡⴰⵙⵙ, ⴽⵓⵍ ⵜⴰⴷⴳⴳⵯⴰⵜ ⵍⵍⴰ ⵜⴷⴷⵓ ⵙ ⴰⵏⵙⴰ ⵏ ⵓⵙⵏⵡⵉ ⴰⴷ ⵜⵃⵏⴷⵔ, ⴰⴷ ⵜⵙⵙⵏⵓ ⵉⵎⴽⵍⵉ ⵅⴷⴷ ⵉⵎⵏⵙⵉ; ⵍⵍⴰ ⴷ ⵜⵜⴰⵙⵉ ⵜⵉⵅⵕⴹⵉⵏ ⵏ ⵓⴳⴳⵯⵔⵏ ⴷ ⵉⵎⵉⴷⴰⵏ ⴷ ⵜⵣⵍⴰⴼⵜ ⴷ ⵓⵖⵏⵊⴰ ⴷ ⵜⴰⴳⵔⴰ ⵏ ⵡⴰⵎⴰⵏ; ( 148 ) ⵎⵛ ⵜⵔⴰ ⴰⴷ ⵜⵅⴷⵎ ⵟⵟⵄⴰⵎ ( ⵙⴽⵙⵓ ), ⵍⵍⴰ ⵜⵜⵅⵡⵡⴰⴹ ⴰⴳⴳⵯⵔⵏ ⵊⴰⵊ ⵏ ⵜⵣⵍⴰⴼⵜ, ⴷⴰ ⴹⴹⵕⵏ ⵜ ⴳ ⵓⵎⵉⴷⵓⵏ, ⵓⴽⴰⵏ ⴷⴰ ⵜⵇⵇⵉⵎ ⵍⵍⴰ ⴷ ⵜⵎⵔⵔⵉ ⵙ ⴷⴷⵉⵃⴰⵍ ⵏ ⵉⴼⴰⵙⵙⵏ, ⴰⵔ ⵜⵜⵣⴰⵢⴰⴷ ⵙ ⵍⵎⵕⵕⴰⵜ ⴰⵎⵏⵖⵓⴷ ⴱⴰⵛ ⴰⴷ ⵉⴽⵓⵔ ⵓⵔⵛⵜⵓ ⴷⵖⵢⴰ, ⵓⴽⴰⵏ ⴷⴰ ⵜⵣⵡⴷ ⵜ ⵙ ⵓⵎⵉⴷⵓⵏ ⵃⵔⴰ ⴰⴷ ⵜⵄⵣⵍ ⵟⵟⵄⴰⵎ ⵓⵙⴷⵉⴷ ⵙⴳ ⵓⵣⵓⵔⴰⵔ. ⵍⵍⴰ ⵜⵜⵉⵍⵉ ⵍⵍⴰ ⵜⵔⴽⴽⴱ ⵍⵎⴰⵄⵓⵏ ⵙ ⵡⴰⵙⴽⵙⵓ ⴳ ⵉⵏⴽⴰⵏ ⴳ ⵡⴰⵍⵎⵙⵙⵉ, ⵍⵍⴰ ⵜⴳⴰ ⴰⴽⵙⵓⵎ ⵅⴷⴷ ⵛⴰ ⵉⴹⵏⵉⵏ ⴰⴷ ⵉⵏⵓ; ⴰⴷⴷⴰⵢ ⵜⵅⴷⵎ ⵟⵟⵄⴰⵎ, ⵍⵍⴰ ⵜ ⵉⴳⴳⴰⵔ ⴳ ⵡⴰⵙⴽⵙⵓ ⴰⴷ ⵢⴰⵍⵉ ⵖⵔ ⵍⴼⵡⴰⵕ; ⵍⵍⴰ ⵜⵜⵉⵍⵉ ⵍⵍⴰ ⵜⵇⵇⵏ ⵉⵏⴳⵔ ⵏ ⵍⵎⴰⵄⵓⵏ ⴷ ⵡⴰⵙⴽⵙⵓ ⵙ ⵉⵎⵙⵍ ⴱⴰⵛ ⵓⵔ ⵉⵜⴼⴼⵖ ⵍⴼⵡⴰⵕ; ⴰⴷⴷⴰⵢ ⵉⵏⵓ ⵟⵟⵄⴰⵎ, ⵍⵍⴰ ⵜ ⵉⴷ ⵜⵜⴽⴽⵙ ⵜⵎⵟⵟⵓⴹⵜ ⵊⴰⵊ ⵏ ⵜⵣⵍⴰⴼⵜ ⵙ ⵓⵖⵏⵊⴰ ⴱⴰⵛ ⴰⴷ ⴰⵙ ⵜⴰⵍⵙ: ( 150 ) ⵍⵍⴰ ⵜ ⵜⵜⵅⵡⵡⴰⴹ ⴰⴷ ⵉⴼⵔⵓⵔⵉ, ⵜⵕⵓⵛⵛⴰ ⵜ ⵙ ⵡⴰⵎⴰⵏ ⴱⴰⵛ ⴰⴷ ⵢⵉⵍⵡⵉⵖ, ⴷⴰ ⴹⴹⵕⵏ ⵜ ⴰⵍⵜⵓ ⵊⴰⵊ ⵏ ⵡⴰⵙⴽⵙⵓ ⴰⴷ ⵢⴰⵍⵉ, ⴰⵔ ⴰⵙ ⵜⵜⵣⴰⵢⴰⴷ ⵙ ⵍⵎⵕⵕⴰⵜ ⴰⵎⴰⵏ ⴱⴰⵛ ⴰⴷ ⵉⵙⵓ, ⴰⴷ ⵢⵉⵍⵡⵉⵖ ⵓⵔ ⵉⵜⵜⵉⵃⵕⵉⵛ. ⴰⴷⴷⴰⵢ ⵉⵏⵓ ⵟⵟⵄⴰⵎ, ⵍⵍⴰ ⵜ ⵜⴽⴽⵙ, ⵜⴳⵉ ⵜ ⵊⴰⵊ ⵏ ⵓⵎⵉⴷⵓⵏ ⴰⴷ ⵜ ⵜⵅⵡⵡⴹ, ⴹⴹⵕⵏ ⵜ ⵊⴰⵊ ⵏ ⵜⵣⵍⴰⴼⵜ ⴰⴷ ⵜ ⵜⵙⵙⵓ ⵙ ⵉⵎⵔⵖⴰⵏ. ⵉⴷⴷ ⴰⵙⵏⵡⵉ ⵏ ⵓⵖⵔⵓⵎ, ⵎⵛ ⵜⵔⴰ ⴰⴷ ⵜⴳ ⵓⵎⵎⵜⵉⵏ, ⵍⵍⴰ ⵜⵜⴳⴳⵯ ⵙ ⵜⵏⵜⵓⵏⵜ, ⵜⴰⵊⵊ ⴰⵔⵛⵜⵓ ⴰⴷ ⵉⵎⵎⵜⵏ; ⴰⴷⴷⴰⵢ ⵉⵎⵎⵜⵏ, ⵍⵍⴰ ⵜ ⵜⵙⵙⵏⵡⴰ ⴳ ⵡⴰⴼⴰⵏ ⵅⴷⴷ ⴳ ⵓⴼⵕⵕⴰⵏ; ⴰⵖⵔⵓⵎ ⵏⵏⴰ ⵉⵏⵡⴰⵏ ⴳ ⵓⴼⵕⵕⴰⵏ, ⵍⵍⴰ ⵉⵜⵜⵉⵍⵉ ⵍⵍⴰ ⵉⴹⵍⵍⵄ, ⵄⴰⴷ ⴰⴷ ⵜⴳⴳⴰⵔ ⵊⴰⵊ ⵏ ⵓⴼⵕⵕⴰⵏ; ⴰⵖⵔⵓⵎ ⵏⵏⴰ ⵉⵏⵡⴰⵏ ⴳ ⵡⴰⴼⴰⵏ ⵎⵛ ⵓⵔ ⵉⵎⵎⵜⵉⵏ ⴷ ⵍⵃⵕⵕⴰⵛⵉ ( ⵓⵃⵕⵉⵛ ), ⵎⵛ ⵉⵎⵎⵜⵏ ⴷ ⵍⵎⴹⵍⵓⵄ ( ⵓⵎⵎⵜⵉⵏ ). ⴰⵖⵖⵓ ⴳ ⵜⴼⵙⴰ, ⴰⴷⴷⴰⵢ ⴰⵔⵡⵏⵜ ⵡⵓⵍⵍⵉ, ⵍⵍⴰ ⵉⵜⵜⵄⴷⴷⵓ ⵓⵖⵖⵓ. ⴰⵙⵙ ⵏⵏⴰ ⴰⵎⵣⵡⴰⵔⵓ ⵏⵏⴰ ⴳ ⵜⵓⵔⵓ ⵜⵉⵅⵙⵉ, ⵍⵍⴰ ⵉⵜⵜⴳⴳ ⵓⵎⴽⵙⴰ ⴰⴷⵖⵙ, ⵉⵜⵥⵥⵉⴳ ⵜⵉⵅⵙⵉ ⵅⴷⴷ ⵜⴰⵖⵖⴰⴹⵜ, ⵉⵙⵙⵃⵎⵓ ⴰⵖⵖⵓ ⵏⵏⴰ ⵎⵉⵄⴰⴷ ⴰⵔ ⴷ ⵉⵃⴽⴽ, ⴰⵔ ⴷ ⵢⴰⵖⵓⵍ ⴷ ⴰⴷⵖⵙ; ⴰⴷⴷⴰⵢ ⵜⴰⵔⵓ ⵜⴼⵓⵏⴰⵙⵜ, ⵍⵍⴰ ⵜⵜⵉⵍⵉ ⵍⵍⴰ ⵜⵃⵢⵢⵏ, ⵍⵍⴰ ⵜ ⵜⵜⵥⵥⵉⴳ ⵍⴰⵍ ⵏ ⵓⵅⴰⵎ, ⵜⴳ ⴰⴷⵖⵙ ⵉ ⴰⵢⵜ ⵓⵅⴰⵎ ⵇⵇⴰⵃ. ⵡⵏⵏⴰ ⵖⵓⵔ ⵄⴷⴷⴰⵏⵜ ⵡⵓⵍⵍⵉ, ⵍⵍⴰ ⵉⵄⵣⵣⵍ ⵉⴽⵔⵡⴰⵏ ⵚⵚⴱⴰⵃ, ⵉⴽⵙ ⵜⵏ ⵓⵃⴷ ⵏⵏⵙⵏ ⵎⵉⵄⴰⴷ ⵜⴰⴷⴳⴳⵯⴰⵜ; ⴰⴷⴷⴰⵢ ⴷ ⵕⵡⵡⵃⵏⵜ ⵡⵓⵍⵍⵉ, ⵍⵍⴰ ⵃⵢⵢⵏⵏⵜ, ⵍⵍⴰ ⵜⵏⵜ ⵜⵜⵥⵥⴳⵏⵜ ⵜⵄⵢⵢⴰⵍⵉⵏ, ⴷⴰ ⵕⵥⵎⵏⵜ ⴷ ⵉ ⵉⴽⵔⵡⴰⵏ ⵙⴳ ⵜⵣⵔⵉⴱⵜ. ⵜⴰⴷⴳⴳⵯⴰⵜ, ⵎⵛ ⵜⵉⵢⴰ ⵜⵎⵟⵟⵓⴹⵜ ⵟⵟⵄⴰⵎ ( ⵜⵉⵙⵙⵉ ) ⵉ ⵉⵎⵏⵙⵉ, ⵍⵍⴰ ⵜⵜⴳⴳ ⵉⵎⵔⵖⴰⵏ ⵙⴳ ⵓⵖⵖⵓ ⴰⴽⵯⴼⴼⴰ; ⴰⵖⵖⵓ ⵢⴰⴹⵏⵉⵏ, ⵍⵍⴰ ⵜ ⵜⵜⴳⴳ ⴳ ⵜⵅⴰⴱⵉⵜ ⴰⴷ ⵉⵙⵍⵉ; ⵍⵍⴰ ⵜⵜⵇⵇⵏ ⵜⴰⵅⴱⵉⵜ ⵏⵏⴰ ⵙ ⵉⵛⵔⵡⵉⴹⵏ, ⵜⴳ ⵜⵜ ⴳ ⵡⴰⵏⵙⴰ ⵏⵏⴰ ⵉⵃⵎⴰⵏ ⴱⴰⵛ ⴰⴷ ⵉⵙⵍⵉ ⵓⵖⵖⵓ; ⵎⵛ ⵉⵚⵎⵎⵉⴹ ⵍⵃⴰⵍ, ⵍⵍⴰ ⵜⵙⵙⵔⵖⴰ ⵜⴰⵅⴰⴱⵉⵜ ⵖⵔⵙ ⴰⵍⵎⵙⵙⵉ; ( 165 ) ⴰⴷⴷⴰⵢ ⵉⵙⵍⵉ ⵓⵖⵖⵓ, ⵍⵍⴰ ⵜⵜⵉⵍⵉ ⵜⴼⵔⵉⵔⵜ ⵍⵍⴰ ⵜⵓⵍⵉ ⵙ ⴰⵇⵎⵓ, ⴰⴼⵍⵍⴰ ⵏ ⵢⵉⴽⴽⵉⵍ; ⵍⵍⴰ ⵜⴹⵕⵕⴰ ⵜⵎⵟⵟⵓⴹⵜ ⴰⵖⵖⵓ ⵊⴰⵊ ⵏ ⵜⴽⵛⵛⵓⵍⵜ, ⵜⵔⴽⴽⴱ ⵜ ⴳ ⵉⵙⵙⵏⴷⴰ, ⵜⵇⵇⵉⵎ ⵍⵍⴰ ⵜⵙⵙⵏⴷⵓ ⵎⵉⵄⴰⴷ ⴰⵔ ⴷ ⵉⵄⵣⵍ ⵡⵓⴷⵉ; ⵍⵍⴰ ⴷ ⵜⵜⴽⴽⵙ ⵓⴷⵉ ⵏⵏⴰ ⵙ ⵜⵍⵇⵇⵉⵎⵉⵏ, ⵜⴳⵉ ⵜ ⵊⴰⵊ ⵏ ⵜⵇⵚⵕⵉⵜ; ⵉⴷⴷ ⴰⵖⵖⵓ ⴳ ⴰⵏⴷⴷⵓ, ⵍⵍⴰ ⵙⵔⵙ ⵜⵜⴳⴳ ⴰⵃⵍⵍⴰⴱ ⵉ ⵎⴷⴷⵏ; ⵎⵛ ⵉⵄⴷⴷⴰ, ⵍⵍⴰ ⵜ ⵜⵜⵉⴽⴽ ⵉ ⵡⴰⴹⴹⵊⴰⵕⵏ, ⵅⴷⴷ ⵜⴳⵉ ⵙⵔⵙ ⵜⴰⴽⵍⵉⵍⵜ: ⵍⵍⴰ ⵜ ⵜⵙⵙⵃⵎⵓ ⵎⵉⵄⴰⴷ ⴰⵔ ⴷ ⵄⵣⵍⵏ ⵡⴰⵎⴰⵏ ⵙⴳ ⵓⵖⵖⵓ. ⵡⵏⵏⴰ ⵉⵔⴰⵏ ⵍⵊⴱⵏ, ⵍⵍⴰ ⵉⵜⵜⵃⴽⴽⴰ ⴰⵖⵖⵓ ⴰⴽⵯⴼⴼⴰ ⵙ ⵍⵃⴽⴽ ⵏ ⵜⴰⵣⴰⵔⵜ ⵅⴷⴷ ⵡⵉⵏ ⵍⵇⵇⵓⵇ ⵅⴷⴷ ⵡⵉⵏ ⵡⵓⵛⵛⵏ ⵅⴷⴷ ⵓⵡⵜⵓⵍ; ⵍⵍⴰ ⵉⵜⵜⵄⵎⵎⴰⵕ ⵓⵎⴽⵙⴰ ⵜⴰⴽⵛⵛⵓⵍⵜ ⵏⵏⵙ, ⵉⴳⴳ ⴷⵉⵙ ⵍⵃⴽⴽ, ⵉⴳⴳⵓⵏⵉ ⴰⵔ ⴷ ⵄⵣⵍⵏ ⵡⴰⵎⴰⵏ ⵙⴳ ⵍⵊⴱⵏ; ⵇⴱⵍ ⴰⴷ ⵉⵙⵓ ⵉⵎⵔⵖⴰⵏ, ⵍⵍⴰ ⵉⵜⵣⵍⵍⴰⵄ ⵛⵡⵉ ⵙⵔⵙⵏ; ⵍⵍⴰ ⵉⵜⵜⵉⵏⵉ: « ⵀⴰ ⵡⵉⵏ ⵕⴱⴱⵉ! ». ⵉⴷⴷ ⵓⴷⵉ, ⵉⵍⵍⴰ ⵡⵓⴷⵉ ⴰⵎⵙⵙⴰⵙ ( ⵣⵣⴱⴷⴰ ), ⵢⵉⵍⵉ ⵡⵓⴷⵉ ⵏⵏⴰ ⵎⵉ ⵜⴻⵜⵜⵢⵉⴳⴳ ⵜⵉⵙⵏⵜ; ⵡⵏⵏⴰ ⵉⵇⴷⵎⵏ, ⵍⵍⴰ ⵉⵜⵜⵉⵍⵉ ⵍⵍⴰ ⵉⵃⵕⵏ; ⵓⴷⵉ ⵏ ⵃⵃⴰⵕⵕⵓ ⵛⵛⵏⵄⵜ ⴰⴷ ⵉⴳⴰ ⵖⵓⵔ ⵡⵏⵏⴰ ⵜ ⵉⵍⴰⵏ. ⴰⴷⴷⴰⵢ ⵉⵄⴷⴷⵓ ⵡⵓⴷⵉ, ⵍⵍⴰ ⵜ ⵜⵎⵍⵍⴰⵃ ⵜⵎⵟⵟⵓⴹⵜ, ⵜⴳⵉ ⵜ ⵊⴰⵊ ⵏ ⵜⵅⴰⴱⵉⵜ; ⵡⵏⵏⴰ ⵖⵓⵔ ⵄⴷⴷⴰⵏⵜ ⵜⵅⵓⴱⴰⵢ ⵏ ⵡⵓⴷⵉ, ⵍⵍⴰ ⵜⵏⵜ ⵉⵅⵣⵣⵏ ⴷⴷⴰⵡ ⵏ ⵡⴰⴽⴰⵍ; ⵎⵛ ⵓⵔ ⵖⵉⵔⵙ ⵉⵜⵜⵡⵇⵇⴼ, ⵍⵍⴰ ⴷⵉⵙ ⵉⵜⵜⵖⵉⵎⴰ ⵎⵉⵄⴰⴷ ⴰⵔ ⴷ ⵉⵃⵕⵕ, ⴰⵔ ⴷ ⵉⵣⵡⵉⵖ. ⵜⵍⵍⴰ ⵍⵎⵕⵜ ⵏⵏⴰ ⴳ ⵎⵉ ⵉⵅⵚⵚⵕ ⵓⵖⵖⵓ, ⵓⵔ ⴷⴰ ⵉⵜⵜⴳⴳ ⵛⴰ ⵏ ⵓⴷⵉ ⵇⴱⴰⵍⴰ; ⵙ ⵍⵎⵔⵔⴰⵜ ⵓⵔ ⴷⴰ ⵉⵜⴽⴽⵙ ⵡⴰⵍⵓ; ⵍⵍⴰ ⵉⵜⴷⴷⵓ ⴱⴰⴱ ⵏ ⵓⵅⴰⵎ ⵖⵔ ⵟⵟⴰⵍⴱ, ⵍⵍⴰ ⴰⵙ ⴷ ⵉⵜⵜⴰⵔⵓ ⵍⵃⵔⵣ, ⵍⵍⴰ ⵜ ⵜⵜⴳⴳ ⵍⴰⵍ ⵏ ⵓⵅⴰⵎ ⵊⴰⵊ ⵏ ⵢⵓⵜ ⵏ ⵜⵖⴰⵏⵉⵎⵜ, ⵜⵇⵇⵏ ⵖⵉⴼⵙ, ⵜⴳⵔ ⵜ ⵊⴰⵊ ⵏ ⵜⴽⵛⵛⵓⵍⵜ ⵅⴷⴷ ⵜⴰⴳⵍ ⵜ ⵖⵉⵔⵙ; ⵍⵍⴰⵏ ⴰⴳⴳⵯⴷ ⵍⴱⴰⵅⵓⵕ: ⵍⵍⴰ ⵜⴱⵅⵅⴰⵕ ⵉ ⵜⴽⵛⵛⵓⵍⵜ ⵙ ⵢⵓⵜ ⵏ ⵜⵓⵢⵢⴰ; ( 170 ) ⵍⵍⴰⵏⵜ ⵜⵄⴰⵢⵢⴰⵍⵉⵏ ⵜⵉⴼⵇⵇⵉⵔⵉⵏ ⵏⵏⴰ ⵉⵜⴳⴳⵏ ⵉⵃⵔⵢⴰⵏ ⵉ ⵓⵖⵖⵓ ⵏⵏⵙⵏⵜ ⴷ ⵡⵉⵏ ⵡⴰⴹⴹⵊⴰⵕⵏ: ⵡⵉⵏ ⵡⴰⴹⴹⵊⴰⵕⵏ, ⵓⵔ ⴷⴰ ⵉⵜⴽⴽⵙ ⵛⴰ ⵇⵇⴰⵃ; ⵓⴷⵉ ⵍⵍⴰ ⵉⵜⵜⴰⵖⵓⵍ ⵖⵔ ⵡⵉⵏⵏⵙⵏⵜ; ⵍⵍⴰⵏⵜ ⵜⵄⵢⵢⴰⵍⵉⵏ ⵏⵏⴰ ⴷ ⵉⵜⵜⴰⵙⵉⵏ ⵉⴱⵔⵔⵓⵢⵏ ⵙⴳ ⵜⴳⵯⵎⵎⴰ ⵏ ⵎⴷⴷⵏ, ⴳⵔⵏ ⵜⵏ ⴳ ⵜⴳⵎⵎⵉ ⵏⵏⵙⵏⵜ; ⵢⵓⵏ ⵡⴰⵙⵙ ⴳ ⵜⵅⴰⵏⵜ ⵏⵏⵖ ⵜⵄⴰⵢⴷ ⵜ ⵜⴽⵛⵛⵓⵍⵜ ⵏ ⵓⵖⵖⵓ ⵇⵇⴰⵃ ⴷ ⵓⴷⵉ, ⵉⵇⵇⵉⵎ ⵟⵟⵄⴰⵎ ⵓⵔ ⵢⵓⴼⵉ ⵙ ⵎⵉ ⵉⵃⵍⴱ. ⴰⴷⴷⴰⵢ ⵙⵙⵓⵜⵔⵏ ⵎⴷⴷⵏ ⴰⵖⵖⵓ, ⵍⵍⴰ ⴷ ⵜⴹⵕⵕⴰⵏ ⴰⵇⵛⵓⵛ ⵏⵏⴰ ⴳ ⵜ ⵓⵡⵉⵏ, ⵍⵍⴰ ⵉⵄⵎⵎⵔ ⵙ ⵜⵓⵢⵢⴰ; ⵎⵛ ⵜⵔⴰ ⵢⵓⵜ ⵏ ⵜⵎⵟⵟⵓⴹⵜ ⴰⵖⵖⵓ, ⵍⵍⴰ ⴷ ⵜⵜⴰⵡⵉ ⵉⵣⴰⴽⴰⵔⵏ ⵉ ⵍⴰⵍ ⵏ ⵓⵅⴰⵎ ⴱⴰⵛ ⴰⴷ ⵜⴰⴼ ⵙ ⵎⵉ ⵖⴰ ⵜⵇⵇⵏ ⵍⵎⴰⵍ. ⵍⵎⵓⵜ ⴰⴷⴷⴰⵢ ⵉⵎⵕⴹ ⵅⴷⴷ, ⴰⵎⴰ ⵍⵍⴰ ⵉⵜⴷⴷⵓ ⵙ ⵓⴹⴱⵉⴱ ⵖⵔ ⵙⵙⴱⵉⵟⴰⵕ, ⴰⵎⴰ ⵍⵍⴰ ⵉⵜⵜⵖⵉⵎⴰ ⴳ ⵜⵅⴰⵏⵜ ⵏⵏⵙ ⴰⵔ ⴷ ⵖⵉⴼⵙ ⵉⵄⴼⵓ ⵕⴱⴱⵉ ⵅⴷⴷ ⴰⴷ ⵉⵎⵎⵜ. ⴰⴷⴷⴰ ⵉⵎⵕⴹ ⴱⵣⵣⴰⴼ, ⵍⵍⴰ ⴷ ⵇⵇⴰⵕⵏ ⵉ ⵟⵟⴰⵍⴱ, ⵍⵍⴰ ⵖⵉⴼⵙ ⵉⵜⵜⵇⵇⵕⴰ: ⵍⵍⴰ ⴰⵙ ⵉⵜⵜⵙⵔⵓⵙ ⴰⴼⵓⵙ ⴳ ⵉⵅⴼ, ⵉⵇⵇⵉⵎ ⵍⵍⴰ ⵖⵉⴼⵙ ⵉⵜⵜⵄⵣⵣⴰⵎ; ⴰⴷⴷⴰⵢ ⵉⴽⵎⵎⵍ ⵍⵇⵓⵕⴰⵏ, ⵍⵍⴰ ⴰⵙ ⵉⵜⵜⴰⵔⵓ ⵢⵓⵏ ⵏ ⵍⵃⵔⵣ ⴰⴷ ⵜ ⵢⴰⴳⵍ ⴷ ⵢⵓⵏ ⴰⴷ ⵜ ⵎⵙⵃⵏ ⴳ ⵡⴰⵎⴰⵏ ⴷ ⵉⵡⴰ ⴰⴷ ⴰⵙ ⴷⵀⵏⵏ ⵙⵔⵙ ⵉⵖⵙⴰⵏ ⵏⵏⵙ; ⴰⴷⴷⴰⵢ ⴰⵙ ⵢⴰⵙⵉ ⵟⵟⴰⵍⴱ ⵍⵅⵟⵟ, ⴷⵉⵎⴰ ⵍⵍⴰ ⴰⵙ ⵉⵜⵜⵉⵏⵉ ⵍⵍⴰⵏ ⴷⵉⵙ ⵍⴰⵔⵢⴰⵃ, ⴷⵉⵎⴰ ⴷ ⵍⵊⵏⵓⵏ ⴰⴷ ⴳⵉⵙ, ⵉⵜⵜⵡⵓⵜ ⵙⴳ ⵣⵣⵓⴱⵉⵜ ⵅⴷⴷ ⵙⴳ ⵡⴰⵏⵓ, ⵅⴷⴷ ⵙⴳ ⵡⴰⵍⵓⴹ ⵅⴷⴷ ⵙⴳ ⵛⴰ ⵏ ⵍⵡⵃⵛ ⵏⵏⴰ ⵎⵉ ⵉⵃⴰⴹⵕ ⴳ ⵍⵎⵓⵜ ⵏⵏⵙ; ( 174 ) ⵍⵍⴰ ⵉⵜⵜⴰⵔⵓ ⵟⵟⴰⵍⴱ ⵢⵓⵏ ⵏ ⵍⵃⵔⵣ ⴰⴷ ⵜ ⵏⴹⵍⵏ ⵎⴰⵏⵉ ⴳ ⵜⵜⵎⵢⴰⴱⴱⴰⵢⵏ ⵉⴱⵔⴷⴰⵏ; ⴰⵎⴰ ⵍⵍⴰ ⴰⵙⵏ ⵉⵜⵜⵉⵏⵉ: « ⵖⵕⵚⴰⵜ ⵉ ⵓⴼⵓⵍⵍⵓⵙ ⴰⴱⵅⵅⴰⵏ, ⴰⵎⴰ ⵉ ⵓⴼⵓⵍⵍⵓⵙ ⴰⵣⴳⴳⵯⴰⵖ ⵏⵏⴰ ⴳ ⵓⵔ ⵜⵍⵍⵉ ⵜⵎⵍⵍⵉ, ⴳ ⵛⴰ ⵏ ⵓⵎⵕⴰⴱⴹ ⴰⴷ ⵙⵔⵙ ⴳⵏ ⵙⵙⴰⴷⴰⵇⴰ. ⴰⴷⴷⴰⵢ ⵉⴷⵀⵛ ⵓⵏⵎⵕⴰⴹ ⵍⵍⴰ ⴷ ⵇⵇⴰⵔⵏ ⴰⵍⵜⵓ ⵉ ⵟⵟⴰⵍⴱ, ⵍⵍⴰ ⵖⵉⴼⵙ ⵉⵜⵜⵇⵇⵔⴰ, ⴰⵔ ⴰⵙ ⵉⵜⵜⵙⵓⴷⴷⵓⵎ ⴰⵎⴰⵏ ⵙ ⵜⵍⵍⵣⴷⵉⵜ ⵎⵉⵄⴰⴷ ⴰⵔ ⴷ ⵢⴰⵡⵉ ⴱⴰⴱ ⵏ ⵍⵎⴰⵏⵜ ⵍⵎⴰⵏⵜ ⵏⵏⵙ; ⵎⵛ ⵢⵓⴳⴳⴹ ⵓⵏⵎⵕⴰⴹ, ⵍⵍⴰ ⵉⵜⵜⵛⵀⴰⴷ ⴳ ⵉⵅⴼ ⵏⵏⵙ ⵙ ⵊⵊⵀⴷ, ⵅⴷⴷ ⵎⵛ ⵓⵔ ⵉⵖⵉⵢ, ⵍⵍⴰ ⵉⵜⵀⵣⵣⴰ ⴰⴹⴰⴹ ⵏⵏⵙ ( ⵛⵛⴰⵀⴷ ); ⵎⵛ ⵓⵔ ⵢⵓⴳⴳⵉⴹ, ⵍⵍⴰ ⴰⵙ ⵉⵜⵛⵀⴰⴷ ⵟⵟⴰⵍⴱ ⵅⴷⴷ ⴰⵢⵜ ⵓⵅⴰⵎ. ⴰⴷⴷⴰⵢ ⵉⵎⵎⵜ, ⵍⵍⴰ ⵜⴷⴷⵓⵏ ⵎⴷⴷⵏ, ⵍⵍⴰ ⴰⵙ ⵇⵇⴰⵣⵏ ⵜⵉⵏⴹⵍⵜ ⴳ ⵉⵙⵏⴹⴰⵍ, ⵃⵔⴰ ⴰⴷ ⵉⵎⵎⵜ; ⵃⵔⴰ ⴰⴷ ⵉⵎⵎⵜ ⵍⵍⴰ ⵜⵜⴰⵎⵕⵏ ⴱⴰⵛ ⴰⴷ ⵜ ⵏⴹⵍⵏ; ⵃⵔⴰ ⴰⴷ ⵉⵎⵎⵜ, ⴷⴰ ⴽⴽⵔⵏ ⵉⵖⵓⵢⵢⴰ ⴳ ⵓⵅⴰⵎ, ⵍⵍⴰ ⵜⵜⵖⵉⵎⴰⵏⵜ ⵜⵄⵢⵢⴰⵍⵉⵏ, ⵍⵍⴰ ⴽⴽⴰⵜⵏⵜ ⴰⵢⵏⵏⴰ ⵓⵔ ⵉⵄⴷⵉⵍⵏ, ⴰⵔ ⵜⵙⵖⵓⵢⵢⵓⵏⵜ: ⵛⴰ ⵉⴽⴽⴰⵜ ⴰⴳⴳⴰⵢⵏ, ⵛⴰ ⵉⵅⴷⴷⵎ ⵟⵟⵄⴰⵎ ⵉ ⵉⵎⵄⵣⵣⴰⵏ. ⵍⵍⴰ ⴷ ⵜⵜⴷⴷⵓⵏ ⵟⵟⵍⴱⴰ, ⵍⵍⴰ ⵜ ⵙⵙⵉⵔⵉⴷⵏ, ⴽⴽⵙⵏ ⴰⵙ ⴰⵣⵣⴰⵔ, ⴽⵯⴼⵏⵏ ⵜ, ⴷⴰ ⴰⵙⵉⵏ ⵜ ⵎⴷⴷⵏ ⴳ ⵉⵙⴱⴷⵔ, ⴷⴰ ⴰⵡⵉⵏ ⵜ ⵙ ⵍⴰ ⵉⵍⴰⵀⴰ ⵉⵍⵍⴰ ⵍⵍⴰⵀ ⵙ ⵉⵚⵏⴹⴰⵍ; ⵍⵍⴰ ⵜⵜⵉⵍⵉ ⵜⵏⴹⵍⵜ ⵅⴰⵙ ⵛⴱⵔ ⴰⴷ ⴳⵉⵙ ⴳ ⵜⵉⵔⵓⵜ; ⵍⵍⴰ ⴰⵙ ⵜⵜⴰⴷⵔⵏ, ⴷⴰ ⵄⴰⵢⴷⵏ ⴷ ⴰⴱⵔⵉⴷ ⵏⵏⵙⵏ. ⵍⵍⴰ ⴷ ⵜⵜⴷⴷⵓⵏ ⵉⵎⵄⵣⵣⴰⵏ, ⵍⵍⴰ ⵜⵄⵣⵣⴰⵏ ⴰⵢⵜ ⵓⵅⴰⵎ, ⵍⵍⴰ ⴰⵙⵏ ⵜⵜⵉⵏⵉⵏ: ⵉⵡⴰ ⵕⴱⴱⵉ ⴰⴷ ⴰⵡⵏ ⵉⵕⵥⵇ ⵚⵚⴱⵕ, ⵉⵅⵍⴼ ⴰⵡⵏ, ⵕⴱⴱⵉ ⴰⴷ ⵉⵔⵃⵎ ⴼⵍⴰⵏ! »; ⵍⵍⴰ ⵜⵜⵖⵉⵎⴰⵏ ⵎⴷⴷⵏ, ⵍⵍⴰ ⵜⴻⵜⵜⵏ ⵄⴰⴷ ⴰⴷ ⵜⵜⴷⴷⵓⵏ. ⵍⵍⴰ ⵜⵜⵉⵍⵉⵏⵜ ⵜⵄⵢⵢⴰⵍⵉⵏ, ⵍⵍⴰ ⵓⵜⵏⵜ ⴰⴳⴳⴰⵢⵏ ⴰⵔ ⴷ ⴰⵙⵏⵜ ⵣⴷⵉⵏ; ⵍⵍⴰ ⵃⵣⵣⵏⵏⵜ ⵛⵀⵕ ⵅⴷⴷ ⵛⵀⵕⴰⵢⵏ ⵅⴷⴷ ⴽⵜⵔ; ⴰⵙⵙ ⴰⴷ ⵓⵔ ⵉⵇⵇⵉⵎ ⵍⵃⵣⵏ ⴷ ⵜⵉⵢⵜⵉ ⵏ ⵡⴰⴳⴳⴰⵢⵏ, ⴳⴰⵏ ⵛⵛⵏⵄⵜ; ⵍⵍⴰⵏ ⵎⴷⴷⵏ ⵏⵏⴰ ⵓⵔ ⴷⴰ ⵉⵜⵜⴰⵊⵊⴰⵏ ⵜⵉⵄⵢⵢⴰⵍⵉⵏ ⵍⴰ ⴰⴷ ⵓⵜⵏⵜ ⴰⵢⵏⵏⴰ ⵓⵔ ⵉⵄⴷⵉⵍⵏ ⵍⵍⴰ ⴰⴷ ⵜ ⵙⵖⵓⵢⵢⵏⵜ. ⴰⴷⴷⴰⵢ ⵜⵣⵔⵉ ⵜⵍⵜ ⵉⵢⵢⴰⵎ, ⵍⵍⴰ ⵜⴷⴷⵓ ⵜⵎⵟⵟⵓⴹⵜ ⵏ ⵓⵔⵢⴰⵣ ⵅⴷⴷ ⵎⴰⵙ, ⵍⵍⴰ ⵜⵜⵙⴷⴷⴰⵇ ⵛⴰ ⴳ ⵜⵏⴹⵍⵜ ⵏⵏⵙ; ⵎⵛ ⵜⵊⵊⵔⵏ ⵍⴰⵀⵍ ⵏⵏⵙ, ⵍⵍⴰ ⴰⵙ ⵜⴳⴳⵏ ⵉⵎⵏⵙⵉ ⵜⵍⵜ ⵛⵀⵓⵕ ⴷⴼⴼⵉⵔ ⵏ ⵍⵎⵓⵜ ⵏⵏⵙ; ⵍⵍⴰ ⴷ ⵇⵇⴰⵔⵏ ⵉ ⵟⵟⵍⴱⴰ ⵏ ⵜⵇⵇⴱⵉⵍⵜ ⵇⵇⴰⵃ, ⵍⵍⴰ ⵜⵣⵔⴰⴷⵏ, ⵇⵇⵔⴰⵏ ⵖⵉⴼⵙ; ⴰⴷⴷⴰⵢ ⵉⵔⵉⵏ ⴰⴷ ⴷⴷⵓⵏ, ⵍⵍⴰ ⴰⵙⵏ ⵉⵜⵜⵉⴽⴽ ⴱⴰⴱ ⵏ ⵓⵅⴰⵎ ⵍⴼⵍⵓⵙ ⴷ ⵜⴰⴹⵓⴹⵜ ⴷ ⵉⵎⵏⴷⵉ; ⴰⴷⴷⴰⵢ ⵉⵍⴰⵍ ⵛⴰ ⵏ ⵍⵄⵉⵍ ⵅⴷⴷ ⵛⴰ ⵏ ⵜⵔⴱⴰⵜ, ⵍⵍⴰ ⵜ ⵜⵜⵙⵎⵎⴰⵏ ⵖⵔ ⵡⵏⵏⴰ ⵉⵎⵎⵓⵜⵏ. ⵉⵎⵏⴰⵢⵏ ⵙⴳ ⵡⴰⵀⵡⵡⴰ ⵛⵛⵏⵄⵜ ⴰⴷ ⵉⴳⴰ ⵉⵢⵢⵉⵙ ⵡⵏⵏⴰ ⵖⵓⵔ ⵉⵍⵍⴰ; ⴰⵍⵍⵉⴳ ⵜⵍⵍⴰ ⵍⵄⴷⴰⵡⵜ, ⵡⵏⵏⴰ ⵉⵍⵍⴰⵏ ⴷ ⴰⵎⵏⴰⵢ, ⴷⴷⵉⵎⴰ ⵓⵔ ⵉⴳⴳⵯⵉⴷ ⴰⴷ ⵜ ⵉⴷ ⵍⴰⵃⵉⵏ ⵉⵄⴷⴰⵡⵏ ⵅⴷⴷ ⴰⴷ ⵜ ⴰⵎⵥⵏ ⵉⵜⵔⵔⴰⵙⵏ ⵙ ⴰⴼⵓⵙ; ⴰⵙⵙ ⴰⴷ ⵡⵏⵏⴰ ⵖⵓⵔ ⵉⵍⵍⴰ ⵓⵢⵏⵏⴰ ⵏⵏⵙ, ⵍⵍⴰ ⵉⵙⵙⴰⵖ ⵉⵢⵢⵉⵙ ⵅⴷⴷ ⵍⵍⴰ ⵖⵉⴼⵙ ⵜ ⵉⴳⴳⴰⵔ ⵍⵎⵅⵣⵏ ⴰⴷ ⵜ ⵉⵙⵖ ⵛⵛⵉⵍ ⴰⵙ. ⵉⵍⵍⴰ ⵡⵏⵏⴰ ⵎⵉ ⵜ ⵜⵜⴰⵔⵓ ⵜⴰⴳⵎⴰⵔⵜ ⵏⵏⵙ ⵅⴷⴷ ⵍⵍⴰ ⵜ ⵉⵙⵙⴰⵖ ⴷ ⵉⵊⴷⵄ, ⵍⵍⴰ ⵜ ⵉⵜⵜⵕⴱⴱⴰ ⴳ ⵓⴼⵓⵙ ⵏⵏⵙ. ⵜⵍⵍⴰ ⵜⵅⴰⵏⵜ ⵏⵏⴰ ⵎⵉ ⵉⵜⵙⴷⴰⵇ ⵓⵣⵉⵣⴰ, ⵅⴷⴷ ⵓⵃⵎⴰⵎⵉ ⵅⴷⴷ ⵓⵡⵔⴰⵙ. ⴰⵙⵙ ⴰⴷ ⵉⵡⵄⵔ ⵉⵢⵢⵉⵙ, ⵡⵏⵏⴰ ⵉⵔⴰⵏ ⴰⴷ ⵜ ⵉⴽⵙⴱ, ⵉⵅⵚⵚ ⴰⵙ ⵍⵄⵍⴼ ⵙ ⵢⵉⴹ ⴷ ⵡⴰⵙⵙ, ⴷ ⵍⵀⵏⴰ, ⵓⵔ ⵉⵜⵜⵄⴰⴱ; ⵜⵅⵚⵚ ⴰⵙ ⵜⴰⵔⵉⴽⵜ ⵏⵏⴰ ⵉⵥⵉⵍⵏ ⴷ ⵓⵍⴳⴰⵎⵓ ⵏⵏⴰ ⵉⵥⵉⵍⵏ; ⵡⵏⵏⴰ ⵖⵓⵔ ⵉⵍⵍⴰ ⵙ ⵎⵉ, ⵍⵍⴰ ⵉⵙⵙⴰⵖ ⵙⵙⵏⴰⵃ ⴷ ⵔⵔⴽⴰⴱⴰⵜ ⵏⵏⴰ ⵏⵇⵇⵛⵏⵉⵏ ⵙ ⵏⵏⵇⵇⵕⵜ ⴷ ⴱⵓ ⵃⴱⴱⴰ ⴷ ⵍⴽⵙⵡⴰ ⵏ ⵓⵎⵏⴰⵢ; ⵜⵜⵓⵅ ⵎⴷⴷⵏ ⵍⵍⴰ ⵜⵜⴳⴳⵏ ⵜⵉⴽⵉⴽⵔⵜ ⵉ ⵉⵢⵢⵉⵙ ⴷ ⵜⴰⴽⴽⵙⵜ ⵎⵎ ⵉⴽⵔⵓⵔⵏ, ⵖⵎⵏ ⴰⵙ ⴰⵊⵍⴰⵍ ⵙ ⵍⵃⵏⵏⴰ; ⵍⵍⴰ ⵉⵜⵜⵉⵍⵉ ⵓⵄⴷⵉⵍ ⴷ ⵡⵉⵏ ⵜⴰⴹⵓⴹⵜ, ⵢⵉⵍⵉ ⵚⵚⵎⴰⴹ ⵍⵍⴰ ⵉⵔⵇⵇⵎ ⵙ ⵍⵃⵔⵉⵔ ⴷ ⵎⵓⵣⵓⵏ. ⵍⵇⵡⴰⵎ ⵏ ⵉⵢⵢⵉⵙ ⴰⵎⵎ ⵡⵉⵏ ⵜⵅⴰⵏⵜ; ⴳ ⵜⴼⵙⴰ ⵍⵍⴰ ⵉⵜⵜⴻⵜⵜ ⵜⴰⴱⵓⴱⴰⵍⵜ; ⴳ ⵍⵓⵇⵜ ⵉⴹⵏⵉⵏ ⵅⴰⵙ ⵜⵉⵇⵓⵕⴰⵕⵉⵏ; ⴱⴰⴱ ⵏⵏⵙ ⵍⵍⴰ ⵖⵓⵔⵙ ⵜⵜⵉⵍⵉ ⵍⴽⵙⵡⴰ ⵏ ⵉⵢⵢⵉⵙ ⵓⵃⴷ ⵏⵏⵙ: ⴰⵊⵍⵍⴰⴱ, ⵜⴰⴼⴰⵕⴰⵊⵉⵜ, ⵙⵙⵔⵡⴰⵍ, ⵜⴰⵇⴱⴱⵓⵜ ⵅⴷⴷ ⴰⵃⴰⴽ, ⴰⵙⵍⵀⴰⵎ ⴰⵎⵍⵍⴰⵍ ⵅⴷⴷ ⴰⴱⵔⵔⴽⴰⵏ, ⵕⵕⵥⵜ, ⵍⴱⵍⵖⵜ ⵅⴷⴷ ⵜⵜⵎⴰⵢ, ⵜⴰⵇⵇⵔⴰⴱⵜ, ⵍⵅⵓⵏⵊⴰⵕ. ⵓⵔ ⴷⴰ ⵉⵜⵜⵏⵓⵢ ⵓⵔⵢⴰⵣ ⵉⵢⵢⵉⵙ ⵅⴰⵙ ⴰⴷⴷⴰ ⵢⵉⵔⵉ ⴰⴷ ⵉⴷⴷⵓ ⴰⴷ ⵉⵖⴰⵕ ⵖⵓⵔ ⵉⵎⵏⴰⵢⵏ; ⵓⵎⴰ ⵓⵙⵙⴰⵏ ⵢⴰⴹⵏⵉⵏ, ⵍⵍⴰ ⵉⵜⵜⵉⵍⵉ ⵉⵢⵢⵉⵙ ⴷⵉⵎⴰ ⵍⵍⴰ ⵉⵇⵇⵏ ⵓⵃⴷ ⵏⵏⵙ; ⵛⵛⵏⵄⵜ ⴰⴷⴷⴰ ⵢⵉⵍⵉ ⵍⵍⴰ ⵉⵇⵇⵏ ⴷⴰⵜ ⵏ ⵓⵅⴰⵎ, ⵍⵍⴰ ⵉⵜⵙⵏⵃⵉⵃⵉⵔ, ⵍⵍⴰ ⵉⴼⵜⵃ ⵜⴰⵔⵡⴰ, ⵍⵍⴰ ⵉⴼⴼⵖ ⵉⵅⴼ ⵏⵏⵙ ⵙ ⵜⵎⵥⵉⵏ; ⵡⵏⵏⴰ ⵉⵔⴰⵏ ⴰⴷ ⴰⵙ ⵉⵚⵃⵓ ⵉⵢⵢⵉⵙ, ⵍⵍⴰ ⴰⵙ ⵉⵙⵙⵡⴰ ⵓⴷⵉ ⴷ ⵜⵉⴳⵍⴰⵢ ⴷ ⵍⵃⵍⴱⴰ ⴷ ⵍⴱⵚⵍ; ( 186 ) ⵍⵍⴰ ⵜ ⵉⵜⵇⵇⵏ ⵢⵉⵜⵙ ⵏ ⵡⵓⵙⵙⴰⵏ ⵖⵔ ⴷⴰⵅⵍ ⵇⵇⴰⵃ ⵓⵔ ⵉⵜⴼⴼⵖ, ⵓⵔ ⴰⵙ ⵉⵜⵙⴽⵔⵔⴰⵄ ⴰⵎⴰⵏ; ⵡⵉⵙ ⵜⵍⵜ ⵉⵢⵢⴰⵎ ⵄⴰⴷ ⴰⴷ ⵜ ⵉⵙⵙⵡⴰ, ⵉⵙⵙⵓⴼⵖ ⵜ ⴰⴷ ⵜ ⵉⵡⵡⵜ ⵓⵣⵡⵓ. ⵍⵍⴰ ⵜⵜⵉⵍⵉⵏ ⵉⵎⵏⴰⵢⵏ ⵏ ⵜⵇⵇⴱⵉⵍⵜ, ⵍⵍⴰ ⵊⵎⵄⵏ, ⵍⵍⴰ ⴳⴰⵏ ⵜⴰⵣⵔⵉⴱⵜ ⴰⵎⵎ ⵕⵕⵎⴰ ⵅⴷⴷ ⵉⵄⵉⵙⴰⵡⵉⵢⵏ; ⵍⵍⴰ ⵉⵜⵜⵉⵍⵉ ⵛⵛⵉⵅ ⵏⵏⵙⵏ, ⵢⵉⵍⵉ ⵍⵎⵙⵢⵢⵃ; ⴰⴷⴷⴰⵢ ⵜⵉⵍⵉ ⵛⴰ ⵏ ⵜⵉⵥⵉⵜ ⴳⵔ ⵙⵉⵏ ⵏ ⵉⵎⵏⴰⵢⵏ, ⵛⵛⵉⵅ ⴰⴷ ⵢⵓⵟⵟⵓⵏ ⵖⵉⴼⵙⵏ; ⵡⵏⵏⴰ ⴳ ⵉⵍⵍⴰ ⵍⵃⵇⵇ, ⵍⵍⴰ ⵉⵙⵙⵏⵙⴰ ⵉⵎⵏⴰⵢⵏ ⵇⵇⴰⵃ; ⴰⴷⴷⴰⵢ ⵜⵉⵍⵉ ⵛⴰ ⵏ ⵍⵍⴰⵎⵎⴰ ⵅⴷⴷ ⵛⴰ ⵏ ⵜⵎⵖⵔⴰ, ⵍⵍⴰ ⵜⵜⵓⵄⵕⴰⴹⵏ ⵉⵎⵏⴰⵢⵏ, ⴷⴷⵓⵏ ⴰⴷ ⵖⴰⵔⵏ; ⵍⵍⴰ ⵜⴳⴳⵏ ⵚⵚⴼⴼ, ⵢⵉⵍⵉ ⵛⵛⵉⵅ ⴳ ⵡⴰⵎⵎⴰⵙ ⵍⵍⴰ ⵉⵜⵜⵏⴱⴱⴰⵀ; ( 188 ) ⵍⵍⴰ ⵉⵜⵜⵉⵍⵉ ⵍⵎⵙⵢⵢⵃ, ⵏⵜⵜⴰ ⴰⴷ ⴰⵙⵏ ⵉⵜⵄⵎⵎⴰⵕⵏ ⵉⴷ ⴱⵓ ⵃⴱⴱⴰ ⵙ ⵍⴱⴰⵕⵓⴹ; ⴰⴷⴷⴰⵢ ⵉⵄⵎⵎⵕ ⵍⵎⴷⴼⵄ, ⵍⵍⴰ ⵜ ⵜⵜⴰⴼⵙⵏ ⵙ ⵍⵎⴷⴽⴽ, ⴳⵏ ⴰⵇⵇⵡⴰⵡⵛ, ⵙⵙⵉⵍⵉⵏ ⴰⵍⵖⵎ; ⴰⴷⴷⴰⵢ ⴷ ⴽⴽⵔⵏ, ⵡⵏⵏⴰ ⵉⵙⵙⵅⵙⵔⵏ ⵚⵚⵕⴱⵜ ⵅⴷⴷ ⴰⴷ ⵉⵙⵙⵓⴼⵖ ⵇⴱⵍ ⵡⵉⵏⵏⴰ ⵉⴹⵏⵉ ⵍⵍⴰ ⵉⵜⵜⵉⴽⴽ ⵍⵃⵇⵇ. ⵍⵍⴰⵏ ⵎⴷⴷⵏ ⵏⵏⴰ ⵉⵜⴱⴷⴷⴰⵏ ⵅⴼ ⵉⵢⵢⵉⵙ ⵏⵜⵜⴰ ⵍⵍⴰ ⵉⵜⵜⵖⴰⵕ; ⵢⵉⵍⵉⵏ ⵡⵉⵏⵏⴰ ⵉⵜⴽⴽⵏ ⴷⴷⴰⵡ ⵏ ⵜⴰⵔⵉⴽⵜ; ⵢⵉⵍⵉⵏ ⵡⵉⵏⵏⴰ ⵉⵜⴷⴷⵓⵏ ⴰⴼⵍⵍⴰ ⵏ ⵚⵚⵕⴱⵜ, ⵏⵜⵜⴰⵜ ⵍⵍⴰ ⵜⵜⵖⴰⵕ: ⴽⵓⵍ ⵢⵓⵏ ⴷ ⵎⴰⴷ ⴰⵙ ⵉⵛⴰ ⵎⵓⵍⴰⵢ ⴱⵓⵛⵜⵜⴰ, ⵛⴰⵢ ⵍⵍⴰⵀ ⴰ ⵙⵉⵢⴰⴷⵏⴰ. ⵜⴰⵖⵓⵕⴰⵕⵜ ⵍⵍⴰⵏ ⵉⵙⴳⴳⵯⴰⵙⵏ ⵏⵏⴰ ⴳ ⵎⵉ ⵓⵔ ⴷⴰ ⵉⴽⴽⴰⵜ ⵓⵏⵥⴰⵕ ⵙⵉⵢⵢⴰⵏ, ⴰⵎⴰ ⵓⵔ ⴷⴰ ⵉⴽⴽⴰⵜ ⵛⴰ ⵇⴱⵍ ⵜⴰⵃⵔⵔⴰⵜ, ⵓⵔ ⴷⴰ ⴽⵔⵔⵣⵏ ⵎⴷⴷⵏ ⵛⴰ ⵣⵉⴽ ⵎⵉⵄⴰⴷ ⴰⵔ ⴷ ⵜⵔⵡⵓ, ⴰⵎⴰ ⵍⵍⴰ ⵉⵜⵜⵅⵚⵚⴰ ⴳ ⵜⴼⵙⴰ, ⵍⵍⴰ ⵜⵜⵖⴰⵔⴰⵏ ⵉⵎⵏⴷⵉ ⴳ ⵉⴳⵔⴰⵏ; ( 191 ) ⴳ ⵣⵣⵎⴰⵏ ⵏⵏⴰ, ⵍⵍⴰ ⵜⵜⵖⵍⵓⵏ ⵉⵎⵏⴷⵉ ⵇⴱⴰⵍⴰ, ⵍⵍⴰ ⵜⵜⴳⵯⴷⵏ ⵎⴷⴷⵏ ⵓⵔ ⵜⵜⵉⵍⵉ ⵚⵚⴰⴱⵜ, ⵓⵔ ⴷⴰ ⵣⵣⵏⵣⴰⵏ ⵛⴰ ⵉⵎⵏⴷⵉ ⵏⵏⵙⵏ; ⵡⵏⵏⴰ ⵖⵓⵔ ⵍⵎⴰⵍ, ⵍⵍⴰ ⵜ ⵉⵣⵣⵏⵣⴰ, ⵍⵍⴰ ⵉⵜⵜⴽⴰⵍ; ⵡⵏⵏⴰ ⵖⵓⵔ ⵍⵍⴰⵏⵜ ⵍⴼⵍⵓⵙ, ⵍⵍⴰ ⵜⵏⵜ ⵉⴹⴹⵕⵕⴰ ⴷ ⵉⵎⵏⴷⵉ; ⵎⴰⵛⴰ ⵃⵔⴰ ⴰⴷ ⵜⵔⵡⵓ, ⴷⴰ ⵉⵄⴰⵢⴷ ⵜⵜⴰⵎⴰⵏ ⵙ ⴰⵏⵙⴰ ⵏⵏⵙ. ⴰⴷⴷⴰⵢ ⵉⵅⵚⵚ ⵓⵏⵥⴰⵕ, ⵍⵍⴰ ⵉⵜⴳⴳⵯⴷ ⴱⵏⴰⴷⵎ ⵙⴳ ⵍⴰⵥ; ⵍⵡⴰⵛⵓⵏ ⵍⵍⴰ ⵜⵜⴳⴳⵏ ⵜⵍⵖⵏⵊⴰ, ⴷⴰ ⴷⴷⵓⵏ ⵍⵍⴰ ⵜⵙⵙⴰⵔⴰⵏ ⴳ ⵉⵅⴰⵎⵏ, ⴰⵔ ⵜⵜⵉⵏⵉⵏ: « ⴰ ⵜⵍⵖⵏⵊⴰ, ⴰⵙⵉ ⵓⵔⴰⵡⵏ ⵏⵏⵎ ⵙ ⵉⴳⵏⵏⴰ, ⵖⵔ ⵉ ⵕⴱⴱⵉ ⴰⵏⵥⴰⵕ ⴰⴷ ⵜⴽⴽⵔ ⵜⵓⴳⴳⴰ! »; ⴽⵓⵍ ⴰⵅⴰⵎ, ⵍⵍⴰ ⴰⵙⵏ ⵉⵜⵜⵉⴽⴽ ⴰⵎⴰ ⵉⵎⵏⴷⵉ ⴰⵎⴰ ⴰⴳⴳⵯⵔⵏ; ⵍⵍⴰ ⴷ ⵟⵟⵄⵎⵎⴰⵕ ⵍⴰⵍ ⵏ ⵓⵅⴰⵎ ⵢⵓⵏ ⵡⴰⵟⵟⴰⵚ ⵏ ⵡⴰⵎⴰⵏ, ⴷⴰ ⵜⵣⵍⵍⵄ ⵜ ⵅⴼ ⴰⵢⵜ ⵜⵍⵖⵏⵊⴰ ( ⴱⴰⵛ ⴰⴷ ⵜⴳ ⵍⴼⴰⵍⵍ ); ( 193 ) ⵜⴰⴷⴳⴳⵯⴰⵜ ⵍⵍⴰ ⵊⵊⵎⵓⵄⵏ ⵍⵡⴰⵛⵓⵏ ⴳ ⵢⵓⵏ ⵓⵎⵕⴰⴱⴹ, ⵅⴷⵎⵏ ⵟⵟⵄⴰⵎ, ⵅⵓⵎⵎⵕⵏ, ⵜⵜⵛⵏ, ⵙⵙⵓⵜⵔⵏ ⵉ ⵕⴱⴱⵉ ⴰⵏⵥⴰⵕ ». ⵉⴷⴷ ⵎⴷⴷⵏ ⵉⵎⵇⵇⵕⴰⵏⵏ, ⵍⵍⴰ ⵊⵊⵎⵓⵄⵏ ⴳ ⵜⵎⵣⴳⵉⴷⴰ ⵖⵓⵔ ⵟⵟⴰⵍⴱ, ⴷⴰ ⴷⴷⵓⵏ ⴰⴷ ⵙⵙⴰⵔⴰⵏ ⴳ ⵜⵇⴱⵉⵍⵜ ⴰⵔ ⵙⵙⵓⵜⵓⵔⵏ ⴰⵏⵥⴰⵕ, ⴰⵔ ⵜⵜⵉⵏⵉⵏ: ⵎⵓⵍⴰⵏⴰ ⵏⵙⵄⴰⵡ ⵕⵉⴹⴰⴽ ⵡⴰ ⵄⵍⴰ ⴱⴰⴱⴽ ⵡⴰⵇⵉⴼⵓⵏ ...; ⴰⴷⴷⴰⵢ ⴷ ⵕⵡⵡⵃⵏ, ⵍⵍⴰ ⵉⵙⵙⵏ ⴷ ⵉⵜⵜⵕⵡⵡⴰⵃ ⵓⵏⵥⴰⵕ. ⵍⵍⴰⵏ ⴰⵍⵜⵓ ⵕⵕⵎⴰ, ⵍⵍⴰ ⵜⴳⴳⵏ ⵍⵍⴰⵎⵎⴰ; ⵍⵍⴰ ⵉⵜⵜⵉⵍⵉ ⵍⵎⵇⴷⴷⵏ ⵏⵏⵙⵏ, ⵍⵍⴰ ⵙⵙⵉⵢⵍⵏ ⴰⵙ ⵉⵙⵔⵉⵔⵏ ⵉⴱⵓⵖⵍⴰⵍⵏ, ⵍⵍⴰ ⴳⴰⵏ ⴰⵙ ⵜⵉⵡⵉⵏⴰⵙ ⵏ ⵓⴹⴼⵉⵕ, ⵍⵍⴰ ⵜ ⵣⵣⵓⵖⵓⵕⵏ ⴰⵎⵎ ⵍⴱⵀⵉⵎⵜ, ⵍⵍⴰ ⵜⴽⴽⵏ ⵙⴳ ⵜⵅⴰⵏⵜ ⵖⵔ ⵜⵅⴰⵏⵜ, ⵍⵍⴰ ⴰⵙⵏ ⵜⵜⵉⴽⴽⵉⵏⵜ ⵜⵄⵢⵢⴰⵍⵉⵏ ⵉⵎⵏⴷⵉ; ⵢⵓⵜ ⵏ ⵜⴷⵓⴳⴳⵯⴰⵜ, ⵍⵍⴰ ⵊⵊⵎⵓⵄⵏ ⴳ ⵢⵓⵏ ⵓⵎⵕⴰⴱⴹ, ⴷⴰ ⴳⵏ ⵍⵍⴰⵎⴰ; ( 195 ) ⵍⵍⴰⵏ ⵜⵜⵉⵍⵉⵏ ⵍⵍⴰ ⵙⵙⵖⴰⵏ ⵢⵓⵏ ⵉⵅⴼ ⵏ ⵍⵎⴰⵍ, ⵍⵍⴰ ⵊⵎⵄⵏ ⴰⴳⴳⵯⵔⵏ; ⵍⵍⴰ ⵖⵔⵔⵙⵏ ⵉ ⵜⵎⵖⵔⵓⵙⵜ ⵏⵏⴰ, ⴱⴹⵓⵏ ⵜⵜ ⵅⴼ ⵍⵇⵙⴰⵎ, ⴷⴰ ⴰⵣⵏⵏ ⴽⵓⵍ ⵍⵇⵙⵏⵜ ⵉ ⵢⵓⵏ ⵓⵅⴰⵎ ⴰⵎⵇⵇⵕⴰⵏ ⴰⴷ ⵉⵅⴷⵎ ⵜⴰⵣⵍⴰⴼⵜ ⵏ ⵟⵟⵄⴰⵎ ⵙ ⵓⵎⵕⴰⴱⴹ ⵎⴰⵏⵉ ⴳ ⵜⵜⵉⵍⵉⵏ ⵎⴷⴷⵏ ⵍⵍⴰ ⵊⵎⵄⵏ ⵜⴰⴷⴳⴳⵯⴰⵜ; ⵇⴱⵍ ⴰⴷ ⵛⵛⵏ, ⵍⵍⴰ ⵜⵜⵉⵍⵉⵏ ⵕⵕⵎⴰ ⵍⵍⴰ ⴳⴰⵏ ⵜⴰⵣⵔⵉⴱⵜ, ⵍⵍⴰ ⵜⵜⴷⵄⵓⵏ ⵙ ⵓⵢⵏⵏⴰ ⵉⵥⵉⵍⵏ; ⵍⵍⴰ ⴰⵙ ⵉⵜⵜⵉⵏⵉ ⵍⵎⵇⵇⴷⴷⵎ: ( 196 ) « ⵀⴰ ⵙⵙⵓⵇⵇ ⵉⵄⵎⵎⵔ, ⵡⵏⵏⴰ ⵉⵔⴰⵏ ⵍⵃⴰⵊⵜ ⵏⵏⵙ, ⴰⴷ ⴷ ⵉⴷⴷⵓ, ⵛⴰ ⵉⵍⵍⴰⵀ ⴰ ⵙⵉⴷⵉ ⵄⵍⵉ ⴱⵏⵏⴰⵚⵕ! » ⵍⵍⴰ ⵜⵜⵉⵍⵉⵏ ⵎⴷⴷⵏ ⵍⵍⴰ ⴹⵓⵕⵏ ⴰⵙⵏ, ⴽⵓⵍ ⵎⴰⵏⵉ ⵉⴷⵄⴰ ⵕⵕⴰⵎⵉ ⵙ ⵛⴰ ⵅⴷⴷ ⵙ ⵃⴷⴷ ⵍⵍⴰ ⵖⵉⴼⵙ ⴹⴹⵕⵕⴰⵏ ⵇⵇⴰⵃ ⵏⵏⵙⵏ: « ⴰⵎⵉⵏ! » ⴰⴷⴷⴰⵢ ⴽⵎⵎⵍⵏ ⵕⵕⵎⴰ ⵍⵍⴰ ⵜⴳⴳⵏ ⵎⴷⴷⵏ ⵜⵉⵎⵔⴰⵙ, ⵛⵛⵏ ⵟⵟⵄⴰⵎ, ⴷⴷⵓⵏ ⴰⴱⵔⵉⴷ ⵏⵏⵙⵏ. ⵍⵃⴽⴰⵎ ⵇⴱⵍ ⴼⵔⴰⵏⵙⵉⵙ ⵇⴱⵍ ⴼⵔⴰⵏⵙⵉⵙ, ⵎⴰⴷ ⵉⵃⴽⴽⴰⵎⵏ ⴳ ⴰⵢⵜ ⵙⴰⴷⴷⵏ? ⵍⵍⴰ ⵉⵃⴽⴽⵎ ⵍⵇⵇⴰⵢⴷ ⴷ ⵉⵎⵖⴰⵔⵏ ⴷ ⵉⵎⴰⵙⴰⵢⵏ; ⵍⵇⵇⴰⵢⴷ ⵍⵍⴰ ⵉⵃⴽⴽⵎ ⵙⴳ ⵡⴰⴼⵍⵍⴰ, ⴰⵢⵏⵏⴰ ⵉⵄⴷⴷⴰⵏ ⵙ ⴷⴷⵔⵄ ⵏⵏⵙ, ⵙ ⵍⴰⵀⵍ ⵏⵏⵙ; ⵎⴰⵛⴰ ⵉⵍⵍⴰ ⵖⵓⵔⵙ ⵡⴰⵡⴰⵍ, ⵙⴳⵉⵙ ⵖⵔⵙ ⴰⵢⵍⵍⵉⴷ; ( 198 ) ⵜⵏⵏⴰ ⵉⵍⵍⴰⵏ ⴳ ⵍⵎⵚⵍⵉⵃⴰ ⵏ ⵍⵎⵅⵣⵏ, ⵏⵜⵜⴰⵏ ⴰⴷ ⵜⵜ ⵉⵜⴳⴳⵏ, ⴰⵔ ⵜⵜ ⵉⵜⵏⴼⴼⴰⴷ ⴳ ⵜⵇⴱⵉⵍⵜ; ⴳⵔⴰⵙ ⴷ ⵜⵇⴱⵉⵍⵜ ⵍⵍⴰⵏ ⵉⵎⵖⴰⵔⵏ, ⴽⵓⵍ ⵢⵓⵏ ⴳ ⵍⵊⵎⴰⵄⵜ ⵏⵏⵙ, ⴰⵢⵏⵏⴰ ⴰⵙⵏ ⵉⵏⵏⴰ ⵍⵇⴰⵢⴷ, ⵍⵍⴰ ⵜ ⵜⴳⴳⵏ; ⴳⵔ ⵉⵎⵖⴰⵔⵏ ⴷ ⵍⵊⵎⴰⵄⵜ, ⵍⵍⴰⵏ ⵉⵎⴰⵙⴰⵢⵏ, ⵣⵄⵎⴰ ⵡⵉⵏⵏⴰ ⴹⵎⵏⵏⵉⵏ ⴰⵢⵜ ⵍⵊⵎⴰⵄⵜ. ⵍⵇⵇⴰⵢⴷ ⴰⵢⵍⵍⵉⴷ ⴰⴷ ⵜ ⵉⵜⴳⴳⵏ; ⴰⴷⴷⴰ ⵜⵉⵍⵉ ⵛⴰ ⵏ ⵍⵃⵔⴽⵜ, ⵍⵍⴰ ⵉⵜⵜⵄⵢⵢⴰⵏ ⵢⵓⵏ ⵏⵏⴰ ⵉⵥⵉⵍⵏ ⴳ ⵍⴱⴰⵕⵓⴹ, ⵉⴳⴳ ⵜⴰⵅⴰⵏⵜ ⵜⴰⵎⵇⵕⴰⵏⵜ ⴰⵔ ⵖⵉⵔⵙ ⵙⵙⴼⵍⵉⴷⵏ ⵍⴰⵀⵍ ⵏⵏⵙ; ⴷⴼⴼⵉⵔ ⵏ ⵍⵃⵔⴽⵜ ⵍⵍⴰ ⵜ ⵉⵜⵜⴳⴳ ⵓⵢⵍⵍⵉⴷ ⴷ ⵍⵇⵇⴰⵢⴷ, ⵉⴽⵍⵍⴼ ⵜ ⵙ ⵜⵇⴱⵉⵍⵜ ⵏⵏⵙ; ⴰⵎⵖⴰⵔ, ⴰⴷⴷⴰ ⵢⵉⵔⵉ ⵍⵇⵇⴰⵢⴷ ⴰⴷ ⵉⴳⴳ ⴰⵎⵖⴰⵔ ⴳ ⵢⵓⵜ ⵏ ⵍⵊⵎⴰⵄⵜ, ⵍⵍⴰ ⵉⴷⵊⵎⵓⵄ ⵉⵎⵇⵇⵕⴰⵏⵏ ⵏ ⵍⵊⵎⴰⵄⵜ, ⵢⵉⵏⵉ ⴰⵙⵏ: ( 200 ) « ⵏⵔⴰ ⴰⴷ ⵏⵉⴳ ⴰⵎⵖⴰⵔ, ⵎⵛⴰⵡⴰⵕⴰⵜ ⴼ ⴼⵍⴰⵏ, ⵏⵜⵜⴰⵏ ⴰⴷ ⵉⴳⴰⵏ ⵜⴰⵅⴰⵏⵜ ⵜⴰⵎⵇⵇⵕⴰⵏⵜ ». ⴰⵎⵖⴰⵔ ⵏⵏⴰ, ⵍⵍⴰ ⴰⵙⵏ ⵉⵜⵜⵉⵏⵉ: « ⵔⵉⵖ ⵉⵎⴰⵙⴰⵢⵏ ⵏⵏⴰ ⴳ ⵔⴰⴷ ⵉⵢⵉ ⴷ ⵉⵅⴷⵎⵏ »; ⴽⵓⵍ ⵜⵉⵖⵚⵜ, ⵍⵍⴰ ⵜⵜⵄⵢⵢⴰⵏ ⵢⵓⵏ ⵓⵎⴰⵙⴰⵢ, ⵏⵜⵜⴰⵏ ⴰⴷ ⵉⴹⵎⵎⵏⵏ ⵍⴰⵀⵍ ⵏⵏⵙ ⵉ ⴽⵓⵍ ⵎⴰⴷ ⵉⵔⴰ ⵍⵎⵅⵣⵏ ⴰⴷ ⵜ ⵉⴳⴳ. ⵀⴰ ⵙⵉⵏ ⵎⴷⴰⵄⴰⵏ, ⵎⴰ ⵖⵔ ⵜⴷⴷⵓⵏ? ⵍⵍⴰ ⵜⴽⴽⵔⵏ, ⴷⴷⵓⵏ ⴽⵓⵍ ⵢⵓⵏ ⵙ ⵓⵎⴰⵙⴰⵢ ⵏⵏⵙ ⵖⵔⵙ ⴰⵏⵃⴽⴰⵎ; ⴰⵏⵃⴽⴰⵎ ⵏⵏⴰ ⴷ ⵢⵓⵏ ⵓⵔⵢⴰⵣ ⵉⵙⵙⵏⵏ ⴰⴷ ⵉⴳⴳ ⴰⴱⵔⵉⴷ, ⵏⵏⴰ ⵉⵜⵜⴼⵀⴰⵎⵏ; ⵍⵍⴰ ⵖⵉⵔⵙ ⵜⵜⴷⴷⵓⵏ, ⵉⴱⴹⵓ ⵖⵉⴼⵙⵏ ⵙ ⵓⵢⵏⵏⴰ ⵙ ⵉⵙⵙⴼⵀⵎ ⵕⴱⴱⵉ; ⵎⵛ ⵉⵙ ⵎⵎⵓⵜⵏ, ⵍⵍⴰ ⵜⵜⵏⴼⴼⴰⴷⵏ ⴰⵢⵏⵏⴰ ⵉⵏⵏⴰ; ⵉⵙ ⵓⵔ ⵙⵔⵙ ⵎⵎⵓⵜⵏ, ⵍⵍⴰ ⵜⴷⴷⵓⵏ ⵖⵔ ⵢⵓⵏ ⵢⴰⴹⵏⵉⵏ; ⵎⵛ ⵉⵙⵙ ⵎⵎⵓⵜⵏ, ⵍⵍⴰ ⵜⵜⴰⵙⵉⵏ ⵉⵎⴰⵙⴰⵢⵏ ⴰⴷ ⵏⴼⴼⴷⵏ ⵍⵃⴽⴰⵎ. ⵎⵛ ⵓⵔ ⵎⵎⵓⵜⵏ ⵙ ⵡⵉⵙ ⴽⵕⴰⴹ, ⵏⵜⵜⴰⵏ ⴰⴷ ⵉⵏⵇⵇⵏ ⴷⴷⵄⵓⵜ, ⵓⵔ ⵉⵇⵇⵉⵎ ⵛⴰ ⵏ ⵃⴷⴷ ⴰⴷ ⵉⵕⴼⴹ ⵍⵃⴽⴰⵎ ⵏⵏⴰ; ⵎⵛ ⵓⵔ ⵉⵔⵉ ⵃⴷⴷ ⴰⴷ ⵉⵇⴱⵍ ⴰⵢⵏⵏⴰ ⵙ ⵉⵃⴽⵎ ⵡⵉⵙ ⴽⵕⴰⴹ, ⵍⵍⴰ ⵜⵜⵊⵎⵓⵄ ⵍⵊⵎⴰⵄⵜ ⵅⴼ ⵡⵏⵏⴰ ⴳ ⵉⵍⵍⴰ ⵍⵃⵇⵇ ⵍⵍⴰ ⵜ ⵜⵜⴻⵜⵜ, ⵜⵣⵣⵏⵣ ⴰⵙ ⴰⵢⵏⵏⴰ ⵉⵍⴰ; ⵍⵇⵇⴰⵢⴷ, ⵡⵏⵏⴰ ⵉⵔⵡⵍⵏ, ⴰⴷ ⵉⴼⴼⵖ ⵜⴰⵎⴰⵣⵉⵔⵜ, ⵎⵛ ⵉⵏⵖⴰ ⵅⴷⴷ ⵉⵄⵓⵥⵥⴰ ⵉ ⵍⴰⴷⵏ ⵏ ⵍⵇⵇⴰⵢⴷ, ⵍⵍⴰ ⵖⵉⴼⵙ ⵉⵜⵜⵃⵜⴰⵍ, ⵢⴰⵎⵥ ⵜ, ⵢⴰⵡⵉ ⵜ ⵖⵔⵙ ⴰⵢⵍⵍⵉⴷ, ⵉⵇⵇⵉⵎ ⴳ ⵍⵃⴱⵙ ⴰⵔ ⴷ ⵉⴼⵔⵓ ⵅⴷⴷ ⴰⴷ ⵉⵇⵇⵉⵎ ⴳ ⵍⵃⴱⵙ ⴰⵔ ⴷ ⵉⵔⵛⵓ. ⵍⵇⴰⴹⵉ, ⴰⴷⴷⴰ ⵢⴰⵎⵕ ⵍⵇⴰⵢⴷ ⵙ ⵛⴰ ⵏ ⵍⵎⵍⴽ ⵅⴷⴷ ⵛⴰ ⵏ ⵍⵡⵕⴼ, ⵍⵍⴰ ⵜ ⵉⵜⵜⴰⵔⵓ ⵍⵇⴰⴹⵉ, ⵢⴰⵎⵥ ⴱⴰⴱ ⵏ ⴷⴷⵄⵓⵜ ⵍⴽⴰⴹ ⵏⵏⵙ; ⵍⵇⴰⴹⵉ ⵏ ⵣⵎⴰⵏ ⴷ ⵢⵓⵏ ⵏ ⵍⴼⵇⵉⵀ ⴰⵎⵇⵇⵕⴰⵏ, ⵍⵍⴰ ⵉⵜⵜⵛⵀⴰⴷ ⴰⵢⵏⵏⴰ ⵙ ⵏⵏⴰⵏ ⵛⵛⵀⵓⴷ ⵅⴷⴷ ⵍⵇⵇⴰⵢⴷ. ⵍⵃⴽⴰⵎ ⵏ ⵣⵎⴰⵏ ⵓⵔ ⵉⵙⵃⵉ ⵛⴰ, ⵡⵏⵏⴰ ⵓⵔ ⵉⵎⵎⵓⵜⵏ ⵙ ⵍⵃⴽⴰⵎ, ⵍⵍⴰ ⵉⵔⴳⴳⵯⵍ ⵅⴰⵙ ⵖⵔ ⵜⵇⴱⵉⵍⵜ ⵢⴰⴹⵏⵉⵏ; ⵍⵃⴽⴰⵎ, ⵓⵔ ⵜ ⵉⴳⴳⵉⵏ ⵅⴰⵙ ⵍⵇⵓⵕⵟⴰⵚ; ⵕⵕⵚⵓⵎⴰ ⴷ ⵍⴽⵍⴰⵢⵜ. ⴰⵎⵖⴰⵔ ⵏ ⵜⵓⵢⵢⴰ ⵍⵍⴰⵏⵜ ⵜⵇⵇⴱⵉⵍⵉⵏ ⵏⵏⴰ ⵖⵓⵔ ⵉⵄⴷⴷⴰ ⵍⴽⵙⴱ ⵉⵜⵅ ⵓⵔ ⵖⵓⵔⵙⵏⵜ ⵜⵍⵍⵉ ⵜⵎⴰⵣⵉⵔⵜ ⵏ ⵜⵃⵔⵔⴰⵜ; ⵍⵍⴰⵏ ⵉⵙⴳⴳⵯⴰⵙⵏ ⵏⵏⴰ ⴳ ⵜⵜⵉⴷⵔⵓⵙ ⵜⵓⴳⴳⴰ, ⴰⴷⴷⴰ ⵓⵔ ⵉⵡⵡⵜ ⵓⵏⵥⴰⵕ ⵇⴱⴰⵍⴰ; ⵍⵍⴰ ⵜⴽⴽⵔⵏ ⵉⴽⵙⵙⴰⴱⵏ, ⵍⵍⴰ ⵜⵜⵅⵓⵡⵏ ⵜⴰⵎⴰⵣⵉⵔⵜ ⵏⵏⵙⵏ, ⴷⴷⵓⵏ ⵖⵔ ⵢⵓⵜ ⵢⴰⴹⵏⵉⵏ ⵏⵏⴰ ⴳ ⵉⵄⴷⴷⴰ ⵍⵀⴷⵉ. ⴰⴷⴷⴰⵢ ⵉⵔⵉⵏ ⴰⴷ ⴷⴷⵓⵏ ⵙ ⵓⵣⴷⴷⵓⵖ, ⵇⴱⵍ ⴰⴷ ⵕⵃⵍⵏ, ⵍⵍⴰ ⵜⵎⵛⴰⵡⴰⵕⵏ ⵎⴰ ⵖⴰ ⴳⵏ ⴷ ⴰⵎⵖⴰⵕ; ⵍⵍⴰ ⵜⵅⵟⴰⵕⵏ ⴼⵍⴰⵏ, ⵢⵉⵏⵉⵏ: « ⵓⵔ ⴰⵅ ⵉⵜⵍⵉⵇⵏ ⵅⴰⵙ ⴰⵔⵢⴰⵣ ⵉⵏⵏ », ⴷⴰ ⴷⴷⵓⵏ ⵖⵉⵔⵙ, ⵉⵏⵉⵏ ⴰⵙ: « ⴰ ⴼⵍⴰⵏ, ⵏⴽⴽⵏⵉ ⵏⵔⴰ ⴰⴷ ⴽ ⵏⴳ ⴷ ⴰⵎⵖⴰⵔ ⵖⵉⴼⵏⵖ, ⵉⵡⴰ ⵎⴰⴷ ⴰⴽ ⵉⴹⵀⵕⵏ? »; ⵍⵍⴰ ⴰⵙⵏ ⵉⵜⵜⵉⵏⵉ ⵏⵜⵜⴰ: « ⴰⵡⴷⴷⵉ, ⵏⴽⴽ ⵓⵔ ⵜⵜⵉⴳⵉⵅ ⵉ ⵓⵢⴰ, ⵓⵔ ⵙⵙⵉⵏⵖ ⵎⴰ ⵖⴰ ⴳⵖ, ⵢⵓⴼ ⵎⵛ ⵓⵔ ⴽⵍⵍⵉⴼⵖ ⵙ ⵓⵢⵏⵏⴰ ⵓⵔ ⵙⵙⵉⵏⵖ ». ⵍⵍⴰ ⴰⵙ ⵜⵜⵉⵏⵉⵏ ⵏⵉⵜⵜⵏⵉ: « ⵍⴰ, ⵍⴰ, ⵓⵔ ⵏⵜⴳⴳ ⵅⴰⵙ ⵛⴳⴳ », ⴷⴰ ⵉⵏⵉⵏ ⴰⵙ: « ⴰⴷ ⴽ ⵉⴳⴳ ⵕⴱⴱⵉ ⵖⵉⴼⵏⵖ ⴷ ⴰⵏⴱⴰⵕⴽ », ⵓⴽⴰⵏ ⴱⴱⵉⵏ ⵜⵓⴳⴳⴰ ⵙⴳ ⵡⴰⴽⴰⵍ, ⴷⴰ ⴳⵔⵏⵜ ⵖⵉⴼⵙ. ⴰⵎⵖⴰⵔ ⵏⵏⴰ ⴷ ⵢⵓⵏ ⵓⵔⵢⴰⵣ ⴰⵎⵇⵇⵕⴰⵏ ⵏⵏⴰ ⵉⵍⵍⴰⵏ ⵙ ⵍⵄⵇⵇⵍ ⵏⵏⵙ, ⵏⵏⴰ ⵜⵡⵇⵇⴰⵕⵏ ⵎⴷⴷⵏ, ⴰⵔ ⵙⴳⵉⵙ ⵜⵜⴳⴳⵏ ⴳ ⵛⵛⵉⴱ ⵏⵏⵙ ⴷ ⵚⵚⴼⴰ ⴷ ⵜⵜⴰⵡⵉⵍ ⵏⵏⴰ ⵜⵜⴳⴳ. ⵏⵜⵜⴰⵏ ⴰⴷ ⵉⴽⴽⴰⵜⵏ ⵕⵕⴰⵢ, ⴰⴷ ⵉⵃⴽⴽⵎⵏ ⴳ ⵉⴽⵙⵙⴰⴱⵏ, ⵏⵜⵜⴰⵏ ⴰⴷ ⵜⵛⴰⵡⴰⵕⵏ ⵎⴷⴷⵏ, ⵎⵉⵄⴰⴷ ⴰⵔ ⴷ ⵄⴰⵢⴷⵏ ⵖⵔ ⵜⵎⴰⵣⵉⵔⵜ ⵏⵏⵙⵏ ⵀ ⵍⵓⵇⵜ ⵏ ⵜⵓⴳⴳⴰ. ⴰⵙⵙ ⴰⴷ ⴰⵎⵖⴰⵔ ⵏ ⵜⵓⴳⴳⴰ ⵍⴱⵉⵔⵓ ⵏ ⵍⵎⵅⵣⵏ ⴰⴷ ⵜ ⵉⵜⴳⴳⵏ; ⴰⴷⴷⴰⵢ ⴷ ⵄⴰⵢⴷⵏ ⵉⴽⵙⵙⴰⴱⵏ, ⵍⵍⴰ ⵉⵜⵅⴱⴱⴰⵕ ⵍⴱⵉⵔⵓ ⵙ ⴽⵓⵍ ⵎⴰⴷ ⵥⵕⵕⴰⵏ ⵇⵇⴰⵃ! ⵍⵎⵄⵍⵍⵎⵉⵏ ⵉⵍⵍⴰ ⵓⵏⵊⵊⴰⵕ, ⵢⵉⵍⵉ ⵓⵟⵕⵕⴰⴼ, ⵢⵉⵍⵉ ⵓⵎⵣⵉⵍ, ⵢⵉⵍⵉ ⵓⵃⵊⵊⴰⵎ, ⵢⵉⵍⵉ ... ⴳ ⵍⵓⵇⵜ ⵏ ⵜⵃⵔⵔⴰⵜ ⵍⵍⴰ ⵜⵜⵉⵍⵉ ⵍⵅⴷⵏⵜ ⵇⴱⴰⵍⴰ ⵅⴼ ⵓⵎⵣⵉⵍ, ⵍⵍⴰ ⵉⵜⴷⴷⵓ ⵍⵍⴰ ⵉⵜⵙⵙⴰⵔⴰ ⴳ ⵍⵇⴱⵉⵍⵜ, ⵍⵍⴰ ⵉⵜⵜⴰⵡⵉ ⵖⵓⵔⵙ ⴰⵇⵉⴹⵓⵏ ⴷ ⵜⵃⴰⵏⵓⵜ ⴷ ⵍⵃⵡⴰⵢⵊ ⵏⵏⵙ ⵇⵇⴰⵃ; ⵍⵍⴰ ⵉⵜⵜⵔⵓⵙ ⴱⵕⵕⴰ ⵏ ⵛⴰ ⵏ ⵓⵅⵅⴰⵎ ⵢⵓⵜ ⵏ ⵜⴷⴳⴳⵯⴰⵜ; ( 209 ) ⵍⵍⴰ ⴰⵙ ⴷ ⵜⵜⴰⵡⵉⵏ ⵎⴷⴷⵏ ⵜⵉⵡⵔⵙⵉⵡⵉⵏ ⴷ ⵉⴷ ⴱⵓ ⴼⵏⵛⵍ ⴷ ⵉⴳⵍⵣⵣⴰⵎ ⴷ ⵉⵎⵓⵔⴰⵏ ⴰⴷ ⵜⵏ ⵉⵛⵛⵡⵓ ⵅⴷⴷ ⴰⴷ ⵜⵏ ⵉⵄⴷⵍ ⵎⵛ ⵕⵕⵥⵏ; ⵍⵍⴰⵏ ⵡⵉⵏⵏ ⴰⵙ ⴷ ⵉⵜⵜⴰⵡⵉⵏ ⵓⵣⵣⴰⵍ ⴰⴷ ⴰⵙⵏ ⵙⴳⵉⵙ ⵉⵄⴷⵍ ⴰⵢⵏⵏⴰ ⵔⴰⵏ, ⴰⵎⴰ ⵜⴰⵡⵔⵙⴰ ⴰⵎⴰ ⵜⴰⵚⵇⵇⵓⵕⵜ ⴰⵎⴰ ... ⴰⵎⵣⵉⵍ, ⵍⵍⴰ ⵉⵅⴷⴷⵎ ⴰⵢⵏⵏⴰ ⵉⵄⴷⴷⴰⵏ ⵅⴰⵙ ⵙ ⵢⵉⴹ ⵖⵔ ⵜⴷⴳⴳⵯⴰⵜ; ⵍⵍⴰ ⵉⵜⵜⵔⴽⴽⴰⴱ ⵜⴰⵃⴰⵏⵓⵜ, ⵉⵖⵣ ⴰⵍⵎⵙⵙⵉ ⵏⵏⴰ ⴳ ⵎⵉ ⵉⵜⵜⴳⴳ ⵍⵄⴰⴼⵉⵜ ⵙ ⵍⴼⵃⵎ, ⵉⴱⴷⵓ ⵍⵅⴷⵎⵜ; ⵍⵍⴰ ⵉⵙⵙⵃⵎⵓ ⴰⵎⵚⵎⴰⵕ ⴰⵔ ⴷ ⵢⴰⵖⵓⵍ ⴷ ⴰⵎⵍⵍⴰⵍ, ⴷⴰ ⵢⴰⵙⵉ ⵜ ⵉⴷ ⵙ ⵍⵍⵇⵇⴰⴹ, ⴷⴰ ⵢⴰⵎⵔ ⴰⵙ ⵙ ⵍⵎⵟⵉⵕⵇⴰ, ⵍⵍⴰ ⴷⵉⴳⵙ ⵉⵜⵜⴷⴷⵣ ⵏⵜⵜⴰ ⵙⴳ ⵍⵊⵉⵀⵜ, ⵎⴻⵎⵎⵉⵙ ⵙⴳ ⵍⵊⵉⵀⵜ ⵎⵉⵄⴰⴷ ⴰⵔ ⴷ ⵉⵚⵎⵉⴹ, ⴷⴰ ⴹⵕⵕⵏ ⵜ ⴰⵍⵜⵓ ⴰⴷ ⵉⵃⵎⵓ. ⵍⵍⴰ ⵜⵜⵉⵍⵉⵏ ⵍⵡⴰⵛⵓⵏ, ⵍⵍⴰ ⵓⵜⵏ ⴷ ⵔⵔⵉⴼ ⵍⵍⴰ ⵢⴰⵏ ⴷ ⴰⴽⴱⴱⴰⴱ ⵎⵖⴰⵔ ⵜⵏ ⵜⵥⵥⵄⵏ ⵎⴷⴷⵏ ⵉⵎⵇⵇⵕⴰⵏⵏ, ⴱⴰⵛ ⴰⴷ ⴰⵏⵏⴰⵢⵏ ⵎⵉⵙⵎ ⴰⴷ ⵉⵜⵜⴳⴳ ⵓⵎⵣⵉⵍ, ⴷ ⵉⵡⴰ ⴰⴷ ⴰⵏⵏⴰⵢⵏ ⵉⴼⵟⵟⵓⵊⵏ; ⵉⴼⵟⵟⵓⵊⵏ ⴰⴷ ⴰⴼⵔⵓⵏ, ⵏⵉⵜⵜⵏⵉ ⴰⴷ ⵜ ⵙⵖⵓⵢⵢⵏ, ⴷⴰ ⴰⴷ ⵏⵇⵇⵣⵏ ⵙ ⵍⵅⵓⴼ ⴷ ⵍⴼⵕⴰⵃⵉⵜ. ⵉⵍⵍⴰ ⵓⵎⵣⵉⵍ ⵏⵏⴰ ⵉⵜⵜⵖⵉⵎⴰⵏ ⴳ ⵜⵅⴰⵏⵜ ⵏⵏⵙ ⵎⵉⵄⴰⴷ ⴰⵔ ⴷ ⵖⵉⵔⵙ ⴷⴷⵓⵏ ⵎⴷⴷⵏ ⴰⵔ ⵖⵉⵔⵙ; ⴳ ⵜⵇⴱⵉⵍⵜ ⵏⵏⵖ ⵓⵔ ⵉⵍⵍⵉⵏ ⵅⴰⵙ ⵢⵓⵏ ⵓⵎⵣⵉⵍ; ⵡⵏⵏⴰ ⴰⴽ ⵉⵏⵏⴰⵏ: « ⴷⴷⵉⵖ ⵙ ⴰⵎⵣⵉⵍ », ⵍⵍⴰ ⵜⵜⵉⵙⵉⵏⵜ ⵎⴰⴷ ⵉⵎⵙ ⵏⵜⵜⴰ ⵓⵎⵣⵉⵍ ⵏⵏⴰ. ⵉⴷⴷ ⴰⵟⵕⵕⴰⴼ, ⵏⵜⵜⴰ, ⵍⵍⴰ ⵉⴽⴽⴰⵜ ⴰⵇⵉⴹⵓⵏ ⴳ ⵡⴰⵎⵎⴰⵙ ⵏ ⵉⵅⴰⵎⵏ, ⵍⵍⴰ ⵉⵜⵜⵖⵉⵎⴰ ⵜⵍⵜ ⵉⵢⵢⴰⵎ ⵅⴷⴷ ⵕⴱⵄⴰ, ⵎⵉⵄⴰⴷ ⴰⵔ ⴷ ⵓⵔ ⵜⵇⵇⵉⵎ ⵍⵅⴷⵎⵜ; ⵍⵍⴰ ⵖⵓⵔⵙ ⵉⵜⵜⵉⵍⵉ ⵍⴱⵔⵉⵇ ⵏⵏⴰ ⴳ ⵉⵜⵜⴳⴳ ⴰⵜⵜⴰⵢ, ⵜⵉⵍⵉ ⵖⵓⵔⵙ ⵍⴰⵏⴱⴰ ⵏⵏⴰ ⴳ ⵉⵜⵜⵛⵄⵄⴰⵍ ⵜⴰⴷⴳⴳⵯⴰⵜ; ⵍⵍⴰ ⴰⵙ ⴷ ⵜⵜⴰⵡⵉⵏ ⵎⴷⴷⵏ ⴰⵖⵔⵓⵎ ⴷ ⵎⴰⴷ ⵉⵜⵜⵛⴰ ⵢⴰⴹⵏⵉⵏ. ⵍⵍⴰ ⵜⵟⵕⵕⴰⴼ ⵚⵚⴱⴱⴰⵢⵜ, ⵍⵍⴰ ⵜⵏⵜ ⵉⵜⵙⵏⵓⵢ ⵙ ⵍⵇⵇⵉⵏⴱ ⵅⴷⴷ ⵙ ⵙⵙⵉⵔ ⵅⴷⴷ ⵍⵍⴰ ⵜⵏⵜ ⵉⵜⵚⵎⵎⴰⵕ ⵙ ⵉⵎⵚⵎⴰⵕⵏ. ⵍⵍⴰ ⵖⵓⵔⵙ ⵉⵜⵜⵉⵍⵉ ⴷⴷⴱⵖ ⵏⵏⴰ ⵉⵥⵉⵍⵏ ⴳ ⵍⴱⵍⴰⵖⵉ ⵜⵉⵍⵉ ⵖⵓⵔⵙ ⵜⵖⵔⵓⵙⵜ ⵏⵏⴰ ⵙⴳ ⵉⵜⴱⴱⵉ ⴰⵔⴽⵙⵏ, ⵉⵟⵕⵕⴼ ⵚⵚⴱⴱⴰⵢⵜ ⴷ ⵜⵉⴱⵓⵍⴰⵢ. ⵉⴷⴷ ⴰⵃⵊⵊⴰⵎ, ⵏⵜⵜⴰ, ⵓⵔ ⴷⴰ ⵖⵓⵔⵙ ⵜⵄⴷⴷⵓ ⵍⵅⴷⵏⵜ ⵎⵉⵄⴰⴷ ⴰⵔ ⴰⵏⴱⴷⵓ ⴰⴷⴷⴰⵢ ⵉⵃⵎⵓ ⵍⵃⴰⵍ; ⵍⵍⴰ ⵉⵅⴷⴷⵎ ⴳ ⵙⵙⵓⵇ ⴰⵔ ⵉⵜⵏⵏⴹ ⴳ ⵉⵅⴰⵎⵏ. ⵍⵍⴰ ⵉⵜⴽⴽⵙ ⴰⵣⵣⴰⵔ ⴰⵔ ⵉⵃⵊⵊⵎ ⵉ ⵎⴷⴷⵏ; ⴰⴷⴷⴰⵢ ⵢⵉⵔⵉ ⴰⴷ ⵉⵃⵊⵊⵎ ⵉ ⵃⴷⴷ, ⵍⵍⴰ ⴰⵙ ⵉⵜⴽⴽⵙ ⴰⵣⵣⴰⵔ ⵙⴳ ⵍⵃⵊⵊⴰⵎⵉⵢⴰ, ⵉⵛⵕⴹ ⴰⵙ ⵙ ⵍⵎⵓⵙ, ⵉⵔⴽⴽⴱ ⴰⵙ ⵍⵇⵓⵕⴰⵕⵉⵢⴰⵜ; ⴽⵓⵍ ⵍⵎⵕⵜ ⴷⴰ ⵉⵙⵙⵓⵎⵎ ⵜⵏⵜ, ⴰⵔ ⴰⵙ ⵉⴷⵍⵍⴰⴽ ⵉⵅⴼ, ⴰⵔ ⴰⵙ ⵉⵊⴱⴱⴷ ⵉⵎⵊⵊⴰⵏ; ⴰⴷⴷⴰⵢ ⵄⵎⵎⵕⵏⵜ ⵍⵇⵓⵕⴰⵕⵉⵢⴰⵜ, ⵍⵍⴰ ⵜⵏⵜ ⵉⴷ ⵉⵜⵇⵍⵍⴰⵄ, ⵉⵙⵙⵏⴷ ⵉⴷⴰⵎⵎⵏ ⵏⵏⴰ ⴷⵉⵙⵏⵜ, ⵢⵉⵏⵉ ⴰⵙ: « ⵛⵓⴼ ⴳ ⴹⴹⴰⵕⴰⵕ ⵛⵓⴼ! »; ⴰⴷⴷⴰ ⵓⵔ ⵇⵇⵉⵎⵏ ⵉⴷⴰⵎⵎⵏ, ⵍⵍⴰ ⵜⵄⵎⵎⴰⵕⵏ ⴷⵖⵉⵢⴰ ⵍⵇⵓⵕⴰⵕⵉⵢⴰⵜ, ⵍⵍⴰ ⵜⵏⵜ ⵉⵜⴽⴽⵙ ⵓⵃⵊⵊⴰⵎ, ⴷⴰ ⵉⵎⵔⵉ ⵉⴼⴰⵙⵙⵏ ⵏⵏⵙ ⴰⵔ ⴷ ⵃⵎⵓⵏ, ⵓⴽⴰⵏ ⵉⵙⵔⵙ ⴰⵙ ⵜⵏ ⴳ ⵡⴰⵏⵙⴰ ⵏ ⵊⵊⵕⵃ, ⴷⴰ ⵢⵉⵏⵉ ⴰⵙ ⵡⵏⵏⴰ ⵢⴹⵏⵉ: « ⴰⵍⵍⴰⵀ ⵎⴰⵜⵜⴰ ⵕⵕⵃⵏⵜ ⴰⴷ! » ⵍⵍⴰⵏ ⵉⵃⵊⵊⴰⵎⵏ ⵏⵏⴰ ⵉⵅⴷⴷⵎⵏ ⵉ ⵍⵡⴰⵛⵓⵏ; ⵉⵍⵍⴰ ⵓⵃⵊⵊⴰⵎ ⵏⵏⴰ ⵎⵉ ⵉⵥⵉⵍ ⵓⴼⵓⵙ ⵏⵏⵙ, ⴷⵖⵢⴰ ⵍⵍⴰ ⵉⵜⵊⵊⵉ ⵍⵄⵉⵍ, ⵢⵉⵍⵉ ⵢⵓⵏ ⵏⵏⴰ ⵎⵉ ⵓⵔ ⵉⵥⵉⵍ, ⵍⵍⴰ ⵉⵜⵜⵅⵢⵢⴰⵍ ⵊⵊⵕⵃ ⴳ ⵓⵔⴱⴰ. ⴰⵃⵊⵊⴰⵎ, ⵍⵍⴰ ⵉⵜⵜⵉⵍⵉⵏ ⴷⵉⵎⴰ ⵍⵍⴰ ⵉⵏⵏⵛⵕⵃ, ⵍⵍⴰ ⵉⵚⵡⵡⴱ; ⴰⴷⴷⴰⵢ ⵜⵉⵍⵉ ⵛⴰ ⵏ ⵜⵎⵖⵔⴰ ⵏⵜⵜⴰ ⴰⴷ ⴷ ⵉⵜⵜⴰⵡⵉⵏ ⵎⴷⴷⵏ ⵍⵍⴰ ⴰⵙⵏ ⵉⵜⵜⵚⵅⵅⴰⵕ, ⴳ ⵜⵏⴷⵉⵏⵜ. ⵍⵍⴰⵏⵜ ⵜⵅⴰⵎⵉⵏ ⵏⵏⴰ ⵖⵓⵔ ⵎⵉ ⵉⵍⵍⴰ ⵓⵃⵊⵊⴰⵎ ⵏⵏⵙⵏⵜ; ⵍⵍⴰ ⵉⵃⵊⵊⵎ ⴰⵔ ⵉⵜⴽⴽⵙ ⴰⵣⵣⴰⵔ ⵉ ⴰⵢⵜ ⵓⵅⴰⵎ ⵇⵇⴰⵃ, ⵓⵔ ⴷⴰ ⵜ ⵜⵜⵅⵍⵍⴰⵚⵏ ⵎⵉⵄⴰⴷ ⴰⵏⴱⴷⵓ. ⴰⵃⵊⵊⴰⵎ, ⵍⵍⴰ ⵖⵓⵔⵙ ⵜⵜⵉⵍⵉⵏ ⵍⴰⵎⵎⵡⴰⵙ ⵏ ⵡⴰⵣⵣⴰⵔ ⴷ ⵍⵎⵉⵍⵇ ⴷ ⵜⵃⵣⵣⴰⵏⵜ ⵏⵏⴰ ⵖⵔ ⵜⵏ ⵉⵛⵛⵡⵓ; ⵍⵍⴰ ⵖⵓⵔⵙ ⵜⵜⵉⵍⵉ ⵜⵎⵔⵉⵜ ⴷ ⵜⵓⵣⵍⵉⵏ ⵏⵏⴰ ⵙ ⵉⵜⵜⵇⵙⵙⴰⵙ ⵉⵏⵥⴰⴹⵏ, ⵉⵇⵡⵡⵕ ⵜⴰⵎⴰⵔⵜ ⴷ ⵛⵛⵡⴰⵔⴱ; ⵍⵍⴰ ⵖⵓⵔⵙ ⵉⵜⵜⵉⵍⵉ ⵎⴰ ⵡⵕⴹ, ⵢⵉⵍⵉ ⵖⵓⵔⵙ ⵛⴰ ⵏ ⴷⴷⵡⴰ. ⴰⴷⴷⴰⵢ ⵢⵉⵔⵉ ⵓⵔⵢⴰⵣ ⴰⴷ ⵉⴽⴽⵙ ⴰⵣⵣⴰⵔ, ⵍⵍⴰ ⵉⵜⵜⴰⵎⵙ ⵉⵅⴼ ⵏⵏⵙ ⵙ ⵡⴰⵎⴰⵏ ⴷ ⵚⵚⴰⴱⵓⵏ ⵎⵉⵄⴰⴷ ⴰⵔ ⴷ ⵉⵍⵡⵉⵖ, ⴰⵔ ⴷ ⵉⵕⵟⴱ, ⵄⴰⴷ ⴰⴷ ⵉⴱⴷⵓ ⵓⵃⵊⵊⴰⵎ ⵍⵍⴰ ⴰⵙ ⵉⵜⴽⴽⵙ ⴰⵣⵣⴰⵔ; ⵎⵛ ⵉⵛⵡⴰ ⵍⵎⵓⵙ, ⴷⵖⵢⴰ ⵍⵍⴰ ⴰⵙ ⵉⵙⵙⵏⵙⴰⵔ, ⵎⵛ ⵉⵃⴼⴰ, ⵍⵍⴰ ⵖⵉⴼⵙ ⵉⵜⵜⵙⴰⴽⴽⴰ ⵜⴰⵎⴰⵔⴰ, ⵉⵊⵕⵃ ⵜ; ( 220 ) ⴰⴷⴷⴰ ⵉⴱⴷⴷ ⵍⵎⵓⵙ, ⴰⵎⴰ ⵍⵍⴰ ⵜ ⵉⵛⵛⵡⵓ ⵖⵔ ⵍⵎⵉⵍⵇ, ⴰⵎⴰ ⵖⵔ ⵜⵃⵣⵣⴰⵏⵜ, ⴰⵎⴰ ⵍⵍⴰ ⵜ ⵉⴽⴽⴰⵜ ⵙ ⵉⵖⵉⵍ ⵏⵏⵙ. ⵍⵄⵉⵍ ⴰⵎⵥⵥⵢⴰⵏ, ⵍⵍⴰ ⴰⵙ ⵉⵜⵜⴰⵊⵊⴰ ⵜⴰⵄⵕⴼⴰⵜ ⴷ ⵜⵎⵣⵓⵔⵜ; ⵜⴰⵎⵣⵓⵔⵜ, ⵍⵍⴰ ⴰⵙ ⵜ ⵜⵎⵛⵛⴹ ⵎⴰⵢⵙ, ⴰⵔ ⴰⵙ ⵜⵜⴰⴳⵯⵍ ⵜⵉⵖⵍⴰⵍⵉⵏ ⴷ ⵡⴰⵇⵇⴰⵢⵏ, ⴰⵔ ⴰⵙ ⵜ ⵜⴻⵜⵜⵍ ⴳ ⴽⵕⴰⴹ ⵅⴷⴷ ⵕⴱⵄⴰ, ⵜⵙⵙⴽⵎⵎⵍ ⴰⵙ ⵙ ⵉⴼⵉⵍⵉ ⴰⴱⵅⵅⴰⵏ ⴱⴰⵛ ⴰⴷ ⵜⵉⵖⵣⵉⴼ; ( 221 ) ⵜⴰⵔⴱⴰⵜ, ⵓⵔ ⴷ ⴰⵙ ⵜⵜⴽⴽⵙⵏ ⵎⴷⴷⵏ ⴰⵣⵣⴰⵔ ⵏ ⵉⵅⴼ ⵇⵇⴰⵃ, ⵅⴰⵙ ⴳ ⵜⵃⵊⵊⵎⵓⵜ ⴷ ⵏⵏⵡⴰⴹⵕ; ⵍⵍⴰⵏ ⵎⴷⴷⵏ ⵏⵏⴰ ⵓⵔ ⴷ ⴰⵙ ⵉⵜⵜⴰⵊⵊⴰⵏ ⵅⴰⵙ ⵜⴰⵡⵏⵣⴰ ⴷ ⵜⴱⵉⵛⵛⵡⵉⵏ; ⵜⵉⴱⵉⵛⵛⵡⵉⵏ, ⵍⵍⴰ ⴰⵙ ⵜⵏⵜ ⵜⵜⴻⵜⵜⵍ ⵎⴰⵢⵙ; ⵉⴷⴷ ⵜⴰⵡⵏⵣⴰ, ⵍⵍⴰ ⴰⵙ ⵜ ⵉⵇⵜⵙⵙⴰⵙ ⵉⴱⴱⴰⵙ ⵅⴷⴷ ⴰⵃⵊⵊⴰⵎ ⵙ ⵍⵎⵓⵙ ⴷ ⵜⵓⵣⵍⵉⵏ. ⵜⴰⵎⵟⵟⵓⴹⵜ ⴰⴷⴷⴰⵢ ⵜⵉⵔⵉ ⴰⴷ ⵜⵙⵏⵏⵄ, ⵍⵍⴰ ⵜⵍⵙⵙ ⵉⵄⴱⴰⵏⵏ ⵏⵏⴰ ⵥⵉⵍⵏⵉⵏ; ⵍⵍⴰ ⵖⵓⵔⵙ ⵉⵜⵜⵉⵍⵉ ⵢⵓⵏ ⵓⵊⵍⵍⴰⴱ ⵙⴳ ⵡⴰⴷⴷⴰ, ⴰⵎⴰ ⴷ ⴰⵣⴳⴳⵯⴰⵖ ⴰⵎⴰ ⴷ ⴰⵡⵔⴰⵖ, ⴰⵎⴰ ...; ⵙⴳ ⵡⴰⴼⵍⵍⴰ ⵍⵍⴰ ⵜⵍⵙⵙ ⵍⵇⴼⴹⴰⵏ ⵅⴷⴷ ⵢⵓⵜ ⵏ ⵍⴼⵓⵇⵉⵢⵢⴰ ⵏⵏⴰ ⵉⵥⵉⵍⵏ; ⵍⴼⵓⵇⵉⵢⵢⴰ ⵏⵏⴰ ⵍⵍⴰ ⵜⵜⵉⵍⵉ ⵙⴳⵉⵙ ⵓⵙⴷⵉ ⵏⵏⴰ ⵉⵟⵕⵥⵏ ⵙ ⵍⵃⵔⵉⵔ; ( 223 ) ⵍⵍⴰⵏⵜ ⵜⵄⵢⵢⴰⵍⵉⵏ ⵏⵏⴰ ⵉⵍⵙⵙⵏ ⵍⴼⵓⵇⵉⵢⵢⴰ ⵏⵏⵉⴳ ⵏ ⵍⵇⴼⴹⴰⵏ, ⵙⴳ ⵡⴰⴼⵍⵍⴰ ⵍⵍⴰ ⵜⵍⵙⵙ ⵍⵉⵥⴰⵕ, ⵢⵓⵏ ⵍⵉⵥⴰⵕ ⵓⵙⴷⵉⴷ; ⵍⵍⴰ ⵖⵓⵔⵙ ⵜⵜⵉⵍⵉ ⵢⵓⵜ ⵏ ⵜⵛⴷⴷⴰⴷⵜ ⵏⵏⴰ ⵉⵎⵇⵇⵓⵕⵏ ⵏⵏⴰ ⴷ ⵉⵖⵎⵎⵙⵏ ⴳ ⵓⵃⵣⵣⴰⵎ; ⵍⵍⴰ ⵜⵜⵃⵣⵣⴰⵎ ⴳ ⵓⵢⵏⵏⴰ ⵇⵇⴰⵃ ⵙ ⵢⵓⵏ ⵏ ⵍⵃⵣⴰⵎ ⵅⴷⴷ ⵙ ⵢⵓⵏ ⵓⵃⵣⵣⴰⵎ ⵏ ⵜⴰⴹⵓⴹⵜ ⵅⴷⴷ ⵙ ⵢⵓⵜ ⵏ ⵜⵃⵣⵣⴰⵏⵜ ⵏ ⵍⵃⵔⵉⵔ. ⵍⵉⵥⴰⵕ, ⵍⵍⴰ ⴰⵙ ⵜⵜⴳⴳ ⴰⵖⵎⴰⵙⵏ ⵅⴷⴷ ⵍⵍⴰ ⵜ ⵜⵜⴰⵎⵥ ⵙ ⵚⵚⵏⵏⴰⵕⴰⵜ ⵅⴷⴷ ⵙ ⵜⵙⵔⵡⴰⵍ. ⴰⵙⵙ ⴰⴷ ⵇⵇⴰⵃ ⵜⵉⵄⵢⵢⴰⵍⵉⵏ ⵍⵍⴰ ⵜⴳⴳⵏⵜ ⵙⵙⵔⵡⴰⵍ; ⵚⵚⴱⴱⴰⵢⵜ ⵜⵉⵚⴼⵕⴰⵡⵉⵢⵉⵏ ⵓⵔ ⵇⵇⵉⵎⵏⵜ ⴳⴰⵏⵜ ⵍⵃⴰⵊⵜ, ⵓⵔ ⴷⴰ ⵜⵏⵜ ⵉⵜⵇⵇⵏⵏ ⵅⴰⵙ ⵜⵉⵄⵢⵢⴰⵍⵉⵏ ⵜⵉⵎⵇⵇⵕⴰⵏⵉⵏ!. ⵉⴷⴷ ⵜⵉⵜⵔⵔⴰⵙⵉⵏ ⵅⴷⴷ ⵜⵉⵄⵢⵢⴰⵍⵉⵏ ⵜⵉⵎⵥⵥⵢⴰⵏⵉⵏ, ⵓⵔ ⴷⴰ ⵜⵇⵇⵏⵏⵜ ⵅⴰⵙ ⵚⵚⴱⴱⴰⵢⵜ ⵜⵉⵎⵄⵍⵍⴰ, ⴰⵎⴰ ⵜⵉⵎⵍⵍⴰⵍⵉⵏ ⴰⵎⴰ ⵛⵛⵔⴱⵉⵍ, ⴰⵎⴰ ⵍⵎⵡⴱⴱⵕ; ⵖⵓⵔⵏⵖ ⵓⵔ ⴷⴰ ⵜⴳⴳⵏⵜ ⵜⵄⵢⵢⴰⵍⵉⵏ ⵜⴰⵔⵖⵉⵡⵉⵏ; ⵉⴷⴷ ⵖⵓⵔ ⵉⵎⴰⵣⵉⵖⵏ ⵢⴰⴹⵏⵉⵏ ⵜⴰⵔⵖⵉⵡⵉⵏ ⵏ ⵜⴰⴹⵓⴹⵜ ⵜⵉⵎⵔⵇⵇⵎⵉⵏ ⵍⵄⵏⴰⵢⵜ ⴰⴷ ⴳⴰⵏⵜ. ⵉⴷⴷ ⵉⵅⴼ ⴽⵓⵍ ⵜⴰⵇⴱⵉⵍⵜ ⴷ ⵎⴰⴷ ⵜⵍⴰⵙⵙⴰ; ⵉⵍⵍⴰ ⵓⴽⵏⴱⵓⵛ ⵜⵉⵍⵉ ⵜⵙⴱⵏⵉⵜ, ⵜⵉⵍⵉ ⵜⴽⵏⴱⵓⵛⵜ; ⵍⵍⴰ ⵜⵜⴰⵙⵙⴰ ⵜⵎⵟⵟⵓⴹⵜ ⵍⵃⵎⴰⵍⴰ ⵅⴷⴷ ⵜⴰⵙⴼⵉⴼⵜ ⴳ ⴽⵓⵍⵛⵉ; ⵍⵍⴰⵏⵜ ⵜⵄⵢⵢⴰⵍⵉⵏ ⵏⵏⴰ ⵖⵓⵔ ⵉⵜⵜⵉⵍⵉ ⵓⵊⵕⵎⵓⵏ, ⵍⵍⴰⵏⵜ ⵜⵉⵏⵏⴰ ⵎⴰ ⵉⵜⵜⵉⵍⵉⵏ ⵍⵍⴰ ⵍⵓⵙⵙⴰⵏⵜ ⵅⴰⵙ ⵛⴰ ⵏⵏⴰ ⵉⴼⵙⵙⵓⵙⵏ, ⵢⵉⵍⵉⵏⵜ ⵜⵉⵏⵏⴰ ⵖⵓⵔ ⵉⵍⵍⴰ ⵢⵓⵏ ⵓⵇⵓⴼⴼⵓ ⴰⵏⵛⵜ; ⵍⵍⴰ ⵖⵓⵔⵙⵏⵜ ⵜⵜⵉⵍⵉⵏ ⵉⵎⵣⵓⵔⵏ ⵙ ⵉⴽⵔⵓⵔⵏ ⵉⵖⵣⵣⴰⴼⵏ ⵉⵣⵓⵔⴰⵔⵏ. ⵍⵍⴰⵏⵜ ⵜⵄⵢⵢⴰⵍⵉⵏ ⵏⵏⴰ ⵖⵓⵔ ⵍⵍⴰⵏ ⵡⴰⴷⴷⴱⵍⵉⵊⵏ ⴷ ⵜⴰⵏⵏⴱⴰⵍⵉⵏ ⴷ ⵜⵍⵅⵓⵜⴰⵎ ⴷ ⵉⵅⵍⵅⴰⵍⵏ; ⵍⵍⴰⵏⵜ ⵜⵙⴷⴷⵉⵢⵉⵏ ⵏ ⵡⴰⵇⵇⴰⵢⵏ, ⵢⵉⵍⵉⵏⵜ ⵜⵙⴷⴷⵉⵢⵉⵏ ⵏ ⵏⵏⵓⵇⵇⵕⵟ ⵏⵏⴰ ⴷ ⵉⵜⵜⵓⵜⵜⵓⵢⵏ ⴳ ⵉⴷⵎⴰⵔⵏ. ⵜⴰⵎⵟⵟⵓⴹⵜ, ⴱⴰⵛ ⴰⴷ ⵜⵉⵥⵉⵍ, ⵍⵍⴰ ⵜⵜⴳⴳ ⵜⴰⵥⵓⵍⵜ, ⵜⴳ ⵍⵎⵙⵡⴰⴽ; ⵍⵍⴰ ⵜⵜⵉⵍⵉ ⵍⵍⴰ ⵜⴳⴰ ⴰⵃⵊⵊⴰⵎ ⴳ ⵉⵖⵥⵥⴰⵥⵏ ⴷ ⵉⴼⴰⵙⵙⵏ ⴷ ⵉⴹⵓⴹⴰⵏ; ( 228 ) ⵍⵍⴰ ⵜⵜⵉⵍⵉⵏⵜ ⵢⵉⵜⵙ ⵍⵍⴰ ⴳⴰⵏⵜ ⴳ ⵉⵖⴰⵍⵏ, ⴳ ⵉⴷⵎⴰⵔⵏ, ⴳ ⵉⴹⴰⵕⵏ, ⴳ ⵢⵉⵍⵖⴰⵏ; ⵜⵍⵍⴰ ⵜⵎⵟⵟⵓⴹⵜ ⵏⵏⴰ ⵜ ⵉⵜⴳⴳⵏ ⴳ ⵉⵅⴼ ⵏ ⵜⵉⵏⵣⴰⵔ, ⵉⵏⴳⵔ ⵡⴰⵍⵍⵏ; ⵉⵙⵜ ⵡⴰⵀⵡⵡⴰ, ⵍⵍⴰ ⵜ ⵜⵜⴳⴳⵏⵜ ⴳ ⵡⴰⴳⴳⵎⵓⵛⵏ; ⴰⵙⵙ ⴰⴷ ⵉⴱⴷⴰ ⴱⵏⴰⴷⵎ ⵉⵜⴼⵀⴰⵎ, ⴷⵔⵓⵙⵏⵜ ⵜⵄⵢⵢⴰⵍⵉⵏ ⵜⵉⵎⵥⵥⵢⴰⵏⵉⵏ ⵏⵏⴰ ⵉⵜⴳⴳⵏ ⴰⵃⵊⵊⴰⵎ, ⵉⵜⵅ ⵍⵍⴰ ⵉⵜⵚⵅⵚⴰⵕ ⴰⵅⵏⵛⵓⵛ ⴰⵀⴰ ⵢⵉⵍⵉ ⵉⵃⵕⵎ ⴳ ⴷⴷⵉⵏ. ⴰⴷⴷⴰⵢ ⵜⵉⵍⵉ ⵛⴰ ⵏ ⵜⵎⵖⵔⴰ, ⵍⵍⴰ ⵜⴳⴳⵏⵜ ⵜⵄⵢⵢⴰⵍⵉⵏ ⵍⵃⵏⵏⴰ, ⵍⵍⴰ ⵖⵎⵎⵏⵜ ⵉⴹⴰⵕⵏ, ⵖⵎⵏⵜ ⵉⴼⴰⵙⵙⵏ, ⴳⵏⵜ ⵜⵜ ⵉ ⵉⵅⴼ. ⵜⴰⵎⵟⵟⵓⴹⵜ ⵍⵍⴰ ⵖⵓⵔⵙ ⵜⵜⵉⵍⵉ ⵜⵅⵔⵉⴹⵜ ⵏ ⵏⵏⵡⴰⵕ, ⵜⵉⵍⵉ ⵖⵓⵔⵙ ⵜⵉⵏ ⵍⵃⵏⵏⴰ, ⵜⵉⵍⵉ ⵖⵓⵔⵙ ⵜⵉⵏ ⵜⴰⵥⵓⵍⵜ, ⵜⵉⵍⵉ ⵖⵓⵔⵙ ⴰⴳⴳⵯⴷ ⵜⵉⵏ ⵏⵏⵓⵇⵇⵕⵟ; ⵍⵍⴰ ⵖⵓⵔⵙ ⵜⵜⴰⴼⴰⵜ ⵜⴰⵅⵕⵉⴹⵜ ⵏ ⵍⴼⵍⵓⵙ, ⵎⴰⵛⴰ ⵍⵍⴰ ⵜⵏⵜ ⵉⵜⵜⴳⴳ ⴰⴳⴳⵯⴷ ⴳ ⵜⵙⴰⵍⴰⵍⵜ ⵏⵏⵙ ⵅⴷⴷ ⵍⵍⴰ ⵜⵏⵜ ⵜⴽⵎⵎⵙ ⴳ ⵜⴰⵙⵙⴰⵙⵜ ⵏⵏⵙ. ⵍⴼⴰⵍ ⵏ ⵚⵚⴱⴰⵃ ⵉⵍⵍⴰ ⵢⵓⵏ ⵉⵥⵉⵍ ⴰⴷ ⵖⵉⴼⵙ ⵉⵚⴱⴱⵃ ⴱⵏⴰⴷⵎ ⵢⵉⵍⵉ ⵢⵓⵏ ⵓⵔ ⵉⵄⴷⵉⵍ ⵚⵚⴱⴰⵃ ⵏⵏⵙ; ⵍⵍⴰ ⵜⵜⵉⵍⵉ ⵢⵓⵜ ⵏ ⵜⵎⵟⵟⵓⴹⵜ ⵅⴷⴷ ⵢⵓⵏ ⵓⵔⵢⴰⵣ ⵍⵍⴰ ⵜⵜⵉⵔⵉⵏ ⴰⵢⵜ ⵜⴳⵎⵎⵉ ⴰⴷ ⵜ ⵏⵏⴰⵍⵏ ⴰⴷⴷⴰⵢ ⴷⴷⵓⵏ ⵖⵔ ⵜⵏⴷⵉⵏⵜ ⵅⴷⴷ ⵖⵔ ⵙⵙⵓⵇ; ( 231 ) ⵉⵍⵍⴰ ⵢⵓⵏ ⵓⵔⵢⴰⵣ ⵎⵛ ⵙⵔⵙ ⵉⵊⵎⵄ ⴳ ⵓⴱⵔⵉⴷ ⴰⴷⴷⴰⵢ ⵉⴼⴼⵖ ⵙⴳ ⵓⵅⵅⴰⵎ ⵅⴷⴷ ⴰⴷ ⵙⵔⵙ ⵉⵊⵎⵄ ⴳ ⵜⵜⴰⵙⵉⵄ, ⵍⵍⴰ ⵖⵉⴼⵙ ⵉⵜⴼⴼⵖ ⵚⵚⴱⴰⵃ ⵏⵏⴰ ⴷ ⴰⴱⵅⵅⴰⵏ ⴷ ⴰⵎⴱⵅⵅⵔ; ⵍⵍⴰⵏ ⵎⴷⴷⵏ ⵏⵏⴰ ⵉⵜⵜⵉⵏⵉⵏ ⵚⵚⴱⴰⵃ ⵍⴻⵍⵍⴰⵀ, ⵣⵔⵉⵏ, ⵢⵉⵍⵉⵏ ⵡⵉⵏⵏⴰ ⴷ ⵜⵜⵄⴰⵢⴰⴷⵏⵉⵏ ⴰⴱⵔⵉⴷ ⵏⵏⵙⵏ ⵍⵍⴰ ⵜⵜⵖⵉⵎⴰⵏ ⵛⵡⵉ ⵄⴰⴷ ⴰⴷ ⵜⴽⴽⵔⵏ ⴰⴷ ⴷⴷⵓⵏ. ⵓⵔ ⵉⵄⴷⵉⵍ ⴰⴷ ⵉⵖⵔ ⵢⵓⵏ; ⴰⵚⴹⴼⵕ ⵏ ⵜⵖⵓⵔⵉ ⵉⵅⵅⴰ. ⵡⴰⵍⴰⵢⵏⵏⵉ ⵓⵔ ⵉⴷⴷ ⵅⴰⵙ ⵎⴷⴷⵏ ⴰ ⵎⵉ ⵓⵔ ⵉⵄⴷⵉⵍ ⵍⴼⴰⵍ; ⵍⵍⴰⵏⵜ ⵍⵃⵡⴰⵢⵊ ⵏⵏⴰ ⵓⵔ ⴷⴰ ⵉⵜⵜⵙⵎⵎⴰ ⵃⴷⴷ ⵚⵚⴱⴰⵃ ⵅⴷⴷ ⵜⴰⴷⴳⴳⵯⴰⵜ. ⵜⴰⵙⴰⵔⵓⵜ, ⵍⵍⴰ ⴰⵙ ⵜⵜⵉⵏⵉⵏ ⵎⴷⴷⵏ ⵚⵚⴱⴰⵃ: « ⵜⴰⵏⴼⵜⴰⵃⵜ », ⵉⵙⵙⵢⵏⵉ: « ⴰⵏⴼⵜⴰⵃ », ⴰⴼⴰⵏ: « ⴱⵓ ⵓⵖⵔⵓⵎ » ⵅⴷⴷ « ⵓⵎⵍⵉⵍ », ⵍⵄⴰⴼⵉⵜ: « ⴰⵙⵉⴷⴷ », ⴰⵛⵔⵇⵉ: « ⴰⵎⵔⴱⵓⵃⵉ » ⵍⵍⴰⵏⵜ ⵢⵉⵜⵙ ⵏ ⵍⵃⵡⴰⵢⵊ ⵓⵔ ⴷⴰ ⵜⵏⵜ ⵉⵜⵜⵉⵏⵉ ⵃⴷⴷ ⵙ ⵉⵙⵎ ⵏⵏⵙⵏⵜ ⴰⴳⴳⵯⴷ ⴳ ⵡⴰⵎⵎⴰⵙ ⵏ ⵡⴰⵙⵙ. ⵜⴰⴱⵅⵅⴰⵏⵜ, ⵍⵍⴰ ⴰⵙ ⵏⵜⵜⵉⵏⵉ: « ⵜⴰⵎⵍⵍⴰⵍⵜ », ⴽⴹⵕⴰⵏ: « ⴱⵓⵔⴱⵃ », ⴰⵎⵙⵎⴰⵔ ⵓⵔ ⵜ ⵜⵜⵉⵏⵉ ⵃⴷⴷ, ⵏⵜⵜⴰ ⴷ ⵓⵎⵛⵛⵓ ⴷ ⵓⵃⵍⴰⵙ ⴷ ⵓⵔⴼⴰⴼ. ⵡⵏⵏⴰ ⵉⵚⴱⴱⵃⵏ ⵅⴼ ⵡⵓⴷⴰⵢ ⵓⵔ ⴰⵙ ⵉⵄⴷⵉⵍ ⵚⵚⴱⴰⵃ, ⵙ ⵓⵢⵏⵏⴰ ⴰⵙ ⵎⵉ ⵏⵜⵜⵉⵏⵉ: « ⴰⵎⵙⵙⴰⵙ », ⴰⴳⴳⵯⴷ ⴳ ⵡⴰⵎⵎⴰⵙ ⵏ ⵡⴰⵙⵙ; ⴰⵎⵛⵉⵙ ⴰⴳⴳⵯⴷ ⴳ ⵉⴽⵄⴱ: « ⵡⴰⵔ ⵚⵚⴱⴰⵃ », ⴰⵃⵍⵍⵓⴼ: « ⴰⴱⵓⵍⵅⵉⵔ », ⴰⴱⴰⵖⵓⵙ: « ⵡⴰⵔ ⵚⵚⴱⴰⵃ », ⴰⵖⵢⵢⵓⵍ: « ⴰⵃⴷⴰⴷⵉ », ⵉⵏⵙⵉ: « ⴱⵓ ⵉⵙⵏⵏⴰⵏ » ⵅⴷⴷ « ⴱⵓ ⵜⵙⵏⵏⴰⵏⵉⵏ », ⵍⴽⵜⵔⴰ ⵎⵛ ⴱⴱⵉⵏ ⴰⴱⵔⵉⴷ ⴷⴰⵔ ⵏⵏⴽ! ⵚⵚⴱⴰⵃ ⵏ ⵡⵓⵛⵛⵏ ⵓⵔ ⵉⵄⴷⵉⵍ, ⵏⵜⵜⴰ ⴷ ⵎⵊⵊⵖⵢⵓⵍ ⴷ ⵓⴳⵔⵓ ⴷ ⵓⵄⴰⵇⴰⵕ ⴷ ⵉⵙⵎⵖ ⴷ ⵜⵓⵙⵙⴰⵔⵜ ⴷ ⵓⵖⵕⴹⴰ. ⴰⵖⵢⵢⵓⵍ, ⴰⴷⴷⴰ ⵉⵙⵀⵓⵕⵕⴹ, ⵍⵍⴰ ⵏⵜⵜⵉⵏⵉ: « ⴰⵄⵓⴷⵓ ⴱⵉⵍⵍⴰⵀ ⵎⵉⵏ ⵛⵛⵉⵟⴰⵏ ⵕⵕⴰⵊⵉⵎ » ⵉⵜⵜⵅ ⵉⵏⵏⴰ ⴰⵙ ⵍⵍⴰ ⵉⵜⵜⵉⵍⵉ ⵛⵛⵉⵟⴰⵏ ⵍⵍⴰ ⵉⵇⵕⵕⵇ ⴳ ⵜⵉⴳⵍⴰⵢ; ⴰⴷⴷⴰ ⵉⵙⵀⵓⵕⵕⴹ ⵓⵖⵢⵓⵍ ⵍⵍⴰ ⵜⵜⴼⴼⵖⵏⵜ ⵜⵉⴳⵍⴰⵢ ⵏⵏⴰ ⵇⵇⴰⵃ, ⵙⵙⵓⴼⵖⵏⵜ ⴽⵓⵍ ⵢⵓⵜ ⵙ ⵛⵛⵉⵟⴰⵏ. ⵉⴷⴷ ⵜⴰⵡⵙⵙⴰⵔⵜ ⴷⵉⵅ ⵡⵏⵏⴰ ⴷⵉⵙ ⵉⵊⵎⵄⵏ, ⵍⵍⴰ ⵉⵜⵜⵉⵏⵉ: « ⴱⵉⵙⵎⵉⵍⵍⴰⵀ ⵕⵕⵃⵎⴰⵏ ⵕⵕⴰⵃⵉⵎ », ⵉⵜⵜⵅ ⵉⵏⵏⴰ ⴰⴽ ⵜⴰⵡⵙⵙⴰⵔⵜ ⴷ ⵛⵛⵉⵟⴰⵏ ⴰⴷ ⵜⴳⴰ. ⵎⵓⴽⴽⴰ ⴰⴷⴷⴰⵢ ⵜⵙⵖⵓⵢⵢ ⴳ ⵃⴷⴷ ⴳ ⵢⵉⴹ, ⵉⵅⵅⴰ ⵍⴼⴰⵍⵍ ⵏⵏⴰ, ⵍⵍⴰ ⵉⵜⵜⵎⵜⴰⵜ ⵃⴷⴷ ⵙⴳ ⵓⵅⵅⴰⵎ; ⵓⵔ ⴷⴰ ⵜⵙⵖⵓⵢⵢⵓ ⵎⵉⵄⴰⴷ ⴰⵔ ⴷ ⵢⵉⵍⵉ ⵃⴷⴷ ⵍⵍⴰ ⵉⵎⵕⴹ; ⵃⵔⴰ ⴰⴷ ⴰⵙ ⵙⵍⵍⵏ ⵎⴷⴷⵏ, ⵍⵍⴰ ⴷ ⵜⵜⴰⵙⵉⵏ ⵢⵓⵏ ⵓⵚⴼⴹ ⵏ ⵍⵄⴰⴼⵉⵜ, ⵍⵍⴰ ⵜⵜ ⵉⵙⵙ ⴽⴽⴰⵜⵏ ⴱⴰⵛ ⵓⵔ ⴷ ⵜⵜⵄⴰⵢⴰⴷ. ⴰⵎⵛⵉⵙ ⴰⴳⴳⵯⴷ ⴰⴷⴷⴰⵢ ⵜⵡⴷⴷⵏ ⵜⴼⵓⵍⵍⵓⵙⵜ ⵍⵍⴰ ⵜⵜⴳⴳⵯⴷⵏ ⴰⵢⵜ ⵓⵅⴰⵎ, ⴰⵎⵥⵏ ⵜⵜ, ⵖⵔⵙⵏ ⴰⵙ. ⵉⵍⵍⴰ ⴰⴳⴳⵯⴷ ⵍⵎⵕⴹ ⵏⵏⴰ ⵓⵔ ⴷⴰ ⵉⵜⵙⵎⵎⴰ ⵃⴷⴷ: ⴰⴷ ⵉⵊⵊⵉ ⵍⵍⴰ ⴰⵙ ⵜⵜⵉⵏⵉⵏ ⵚⵚⵍⵟⴰⵏ, ⵜⴰⵊⵏⵏⵉⵜ: ⵓⵍⵜⵎⴰⵙ, ( ⵜⵍⵍⴰ ⴷⵉⵢⵙ ⵓⵍⵜⵎⴰⵙ ), ⵍⵊⵏⵓⵏ ⴰⵢⵜ ⵓⵍⴰⵢⵍⵍⴰⵀ ⵅⴷⴷ ⵔⵉⵊⴰⵍ ⵍⴱⵍⴰⴷ. ⵍⵍⴰⵏⵜ ⵢⵉⵜⵙ ⵏ ⵍⵃⵡⴰⵢⵊ ⵏⵏⴰ ⵉⴳⴰⵏ ⵍⴼⴰⵍⵍ ⵉⵥⵉⵍ: ⴰⴷⴷⴰⵢ ⴷ ⴰⵙⵉⵏ ⵎⴷⴷⵏ ⵜⵉⵙⵍⵉⵜ, ⵉⵄⴷⵍ ⵍⴼⴰⵍⵍ ⵎⵛ ⴰⵏⵏⴰⵢⵏ ⴳ ⵓⴱⵔⵉⴷ ⵓⵛⵛⵏ ⵅⴷⴷ ⵉⴼⵉⵖⵔ ⵅⴷⴷ ⵜⴰⵎⵍⴰⵍⵜ ⵙ ⵓⵢⵏⵏⴰ ⴰⵙ ⵜⵜⵉⵏⵉⵏ: ⴰ ⵕⵥⵎⴰⵜ ⴰⵖ ⵏⵏ ⴰⴱⵔⵉⴷ ⴰ ⵉⵅⴰⵎⵏ ⵎⵇⵇⵓⵕⵏⵉⵏ ⴰ ⵓⵛⵛⵏ ⵅⴷⴷ ⵜⴰⵎⵍⴰⵍⵜ ⴰ ⵉⴼⵉⵖⵔ ⵏ ⵓⴱⵔⵉⴷ ⴰ ⵍⵓⵎⵏⴷ ⵎⵛ ⵉⵎⵎⵓⵜ ⴰⵎⵛⵉⵙ ⴰⴳⴳⵯⴷ ⴱⵍⵍⴰⵔⵊ, ⴰⴳⴳⵯⴷ ⴰⵖⵖⵓ, ⵡⵏⵏⴰ ⵙⵉⵙ ⵉⵊⵎⵄⵏ ⵅⴷⴷ ⴰⴷ ⵜ ⵉⵙⵓ. ⵍⵄⴷⵓⵍ ⴰⴷⴷⴰⵢ ⵢⵉⵔⵉ ⵅⴷⴷ ⴰⴷ ⵢⴰⵡⵍ ⵛⴰ ⵏ ⵜⵎⵟⵟⵓⴹⵜ, ⵍⵍⴰ ⵉⵜⴷⴷⵓ ⵖⵔ ⴷⴰⵜ ⵏ ⵍⵄⴷⵓⵍ; ⵎⵛ ⵜⴳⴰ ⵜⵎⵟⵟⵓⴹⵜ ⴷ ⵜⴰⵜⵔⵔⴰⵙⵜ, ⵉⴳⴳ ⵍⵄⵉⵍ ⴰⵜⵔⵔⴰⵙ, ⵍⴰⵀⵍ ⵏⵏⵙⵏ ⴰⴷ ⵉⵜⵜⴷⴷⵓⵏ, ⵍⵍⴰ ⵜⵜⴰⵔⵓⵏ ⵊⵊⵡⵉⵊⴰ; ⵎⵛ ⵜⴳⴰ ⵜⵎⵟⵟⵓⴹⵜ ⴷ ⵜⴰⵊⵊⴰⵍⵜ, ⵉⵅⵚⵚ ⴰⴷ ⵜⵃⴹⵕ ⵏⵜⵜⴰⵜ ⵙ ⵉⵅⴼ ⵏⵏⵙ ⴷⴰⵜ ⵏ ⵍⵄⴷⵓⵍ; ( 240 ) ⴰⴷⴷⴰⵢ ⵉⵍⵉⵏ ⵍⵍⴰ ⵇⵇⵉⵎⵏ ⴷⴰⵜ ⵏ ⵍⵄⴷⵓⵍ, ⵍⵍⴰ ⵉⵜⵜⵙⴰⵡⴰⵍ ⵢⵓⵏ ⵏ ⵍⵄⴰⴷⵍ, ⵢⵉⵏⵉ ⴰⵙ ⵉ ⵜⵎⵟⵟⵓⴹⵜ: « ⵙⵉⵡⵍ ⵎⴰⴷ ⵉⵙ ⵜⵔⵉⵜ ⴰⴷ ⵜⴰⵡⵍⵜ ⴰⵔⵢⴰⵣ ⵉⵏⵏ! »; ⵓⵔ ⴷⴰ ⵉⵜⵜⴰⵔⵓ ⵍⵛⴰⵄⴹ ⵎⵉⵄⴰⴷ ⴰⵔ ⴷ ⴰⵙ ⵜⵉⵏⵉ: « ⵢⵢⵉⵀ ». ⵉⴷⴷ ⵡⵉⵏⵏⴰ ⵙⵖⴰⵏⵉⵏ ⵛⴰ ⵏ ⵍⵎⵍⴽ, ⵢⵓⵏ ⵢⵉⴳⵔ ⵅⴷⴷ ⵓⵔⵜⵉ ⵅⴷⴷ ⵎⵛ ⵢⵓⵎⵥ ⵢⵓⵏ ⵏ ⵍⵎⴰⵍ ⵙⴳ ⵖⵓⵔ ⵃⴷⴷ ⵙ ⵕⵕⴱⵄ ⵅⴷⴷ ⵙ ⵜⵜⵓⵍⵓⵜ ⵅⴷⴷ ⵙ ⵏⵏⵚⵚ, ⵍⵄⴷⵓⵍ ⴰⴷ ⵉⵜⵜⴰⵔⵓⵏ ⴰⵢⵏⵏⴰ ⴳ ⵍⴽⵓⵏⵏⴰⵛ ⴱⴰⵛ ⵓⵔ ⵉⵜⵜⵄⴰⵢⴰⴷ ⵢⵓⵏ ⴳ ⵢⵓⵏ ⵅⴷⴷ ⴰⴷ ⵜ ⵉⵏⴽⵕ. ⴰⴷⴷⴰ ⵉⵎⵎⵜ ⵃⴷⴷ, ⴰⵀⴰ ⵢⴰⵊⵊ ⴷ ⵇⴱⴰⵍⴰ ⵏ ⵍⵎⴰⵍ ⴷⴼⴼⵉⵔ ⴰⵙ, ⵍⵍⴰ ⴷ ⵜⵜⴷⴷⵓⵏ ⵍⵄⴷⵓⵍ, ⵍⵍⴰ ⴰⵙ ⵜⵜⴳⴳⵏ ⴰⵜⵔⵔⴽ, ⵍⵍⴰ ⵜⵇⵢⵢⴰⴷⵏ ⴽⵓⵍ ⵎⴰⴷ ⵉⵍⵍⴰⵏ; ⵍⵍⴰ ⴷ ⵉⵜⴷⴷⵓ ⴱⵓ ⵜⵎⴰⵔⵜ, ⵍⵍⴰ ⵉⵜⵜⴰⵡⵉ ⵍⵃⵇⵇ ⵏⵏⵙ ⵙⴳ ⴽⵓⵍⵛⵉ; ⵉⴷⴷ ⵍⵄⴷⵓⵍ, ⵍⵍⴰ ⵟⵟⴰⵎⵥⵏ ⴽⵟⵕ ⵏ ⵍⵃⵇⵇ ⵏⵏⵙⵏ; ( 243 ) ⵍⵍⴰ ⵜⵔⵔⴰⴽⵏ ⵍⵄⴷⵓⵍ ⵡⵏⵏⴰ ⵉⵎⵎⵓⵜⵏ ⴱⴰⵛ ⴰⴷ ⵉⴹⵀⵕ ⵎⴰⴷ ⵉⵍⵍⴰⵏ ⵇⵇⴰⵃ, ⴱⴰⵛ ⵓⵔ ⵜⵜⵓⵢⴰⵛⵛⴰⵏ ⵡⵉⵏⵏⴰ ⵖⴰ ⵡⵔⵜⵏⵉⵏ, ⴱⴰⵛ ⵎⵛ ⵉⵍⵍⴰ ⵛⴰ ⵏ ⵓⵔⴱⴰ ⴰⵎⵥⵥⵢⴰⵏ ⵏⵏⴰ ⵓⵔ ⵉⵙⵙⵉⵏⵏ ⵛⴰ, ⴰⴷ ⴰⵙ ⵉⵜⵜⵓⵇⵢⵢⴷ ⵎⴰⴷ ⴷ ⵢⵓⵊⵊⴰ ⵉⴱⴱⴰⵙ; ⵍⵄⴷⵓⵍ ⴰⴷ ⵢⵓⵟⵟⵓⵏ ⵍⵡⵔⵜ ⴳ ⵉⵡⵔⵉⵜⵏ; ⵎⵛ ⵜⵍⵍⴰ ⵛⴰ ⵏ ⵜⵔⴱⴰⵜ, ⵍⵍⴰ ⵟⵟⴰⵎⵥ ⵍⵃⵇⵇ ⵏⵏⵙ, ⵜⴱⵔⵔⴰ ⴰⵢⵜ ⵎⴰⵙ ⴷⴰⵜ ⵏ ⵍⵄⴷⵓⵍ. ⴰⴷⴷⴰ ⵢⵉⵔⵉ ⵢⵓⵏ ⴰⴷ ⵉⵙⵖ ⵢⵓⵏ ⵏ ⵢⵉⴳⵔ, ⵉⵅⵚⵚ ⴰⵙ ⴰⴷ ⴱⵔⵔⴰⵏ ⵇⵇⴰⵃ ⴰⵢⵜ ⵍⴰⵀⵍ ⵏ ⵡⵏⵏⴰ ⵉⵣⵣⵏⵣⴰⵏ; ⵎⵛ ⵓⵔ ⴱⵔⵔⴰⵏ ⵉⵎⴽⴽⵏ ⵢⵓⵏ ⵏ ⵡⴰⵙⵙ ⵎⵛ ⵍⵍⴰⵏⵜ ⵍⴼⵍⵓⵙ ⵖⵓⵔ ⵢⵓⵏ ⴷⵉⴳⵙⵏ, ⴰⴷ ⴷ ⵉⴽⴽⵔ ⴰⴷ ⵉⵛⴼⵄ ⴰⵢⵏⵏⴰ ⵉⵏⵣⴰⵏ ⵎⵖⴰⵔ ⵎⵛ ⵉⵏⵣⴰ ⵙⴳ ⵡⴰⵀⵡⵡⴰ. ⵜⵉⵥⵉⵜ ⵜⵉⵥⵉⵜ, ⴰⴷⴷⴰⵢ ⵜⵜ ⵉⵇⴷⴷⵔ ⵕⴱⴱⵉ, ⵍⵍⴰ ⵜⵜⵉⵍⵉ ⴰⴽⴽⵯ ⴳ ⵎⵉ, ⴰⴳⴳⵯⴷ ⴳ ⵍⵎⵣⴰⵃ; ⵍⵍⴰ ⵜⵎⵖⴰⵏⴰⵏⵏ ⵎⴷⴷⵏ: ⴰⵡⴰⵍ ⵙⴳⵉⵙ, ⴰⵡⴰⵍ ⵙⴳⵉⴽ, ⵉⵣⴰⵢⴷ ⴷⵉⴳⵙ ⵛⵛⵉⵟⴰⵏ; ⴷⴰ ⵉⵎⵖⵓⵕ ⵡⴰⵡⴰⵍ, ⵉⴳ ⵜⵉⵛⵛⵓⵜ ⴽⴰ ⵙⴳ ⵡⴰⴷ, ⴽⴰ ⵙⴳ ⵡⴰⵏⵏ, ⵄⴷⴷⵓⵏ ⵉⵎⵄⵓⵢⴰⵔ, ⴰⵡⴹⵏ ⵎⴷⴷⵏ ⴰⴼⵓⵙ. ⵎⵛ ⵓⵔ ⵢⵢⵉⵏ ⴳ ⵜⵉⵥⵉⵜ, ⵎⵛ ⵓⵔ ⵍⵍⵉⵏ ⵍⵍⴰ ⵎⵄⵡⵡⴰⵍⵏ, ⵍⵍⴰ ⵜⵜⵎⵡⴰⵜⵏ ⵅⴰⵙ ⵙ ⵉⴼⴰⵙⵙⵏ ⵙ ⴷⴷⴱⵣⴰ; ⵍⵍⴰ ⵜⵎⵛⵏⵏⴰⵇⵏ, ⵎⵣⵢⵢⴰⵕⵏ, ⴷⵃⵉ ⵉⵢⵉ, ⴰⴷ ⴽ ⴷⵃⵉⵃ ⵎⵉⵄⴰⴷ ⴰⵔ ⴷ ⵜⵏ ⴱⴹⵓⵏ ⵎⴷⴷⵏ; ⴰⴷⴷⴰⵢ ⵜⵎⵖⵓⵕ ⵜⵉⵥⵉⵜ, ⵍⵍⴰ ⵜⵎⵡⴰⵜⵏ ⵎⴷⴷⵏ ⵙ ⵉⵙⵍⵍⵉⵡⵏ ⵅⴷⴷ ⵙ ⵉⵖⵣⵣⴰⵍⵏ, ⵙ ⵜⵖⵓⵕⵢⵉⵏ, ⵎⵎⴻⵎⵔⴰⵣⵏ, ⵇⵇⵉⵎⵏ ⵉⴷⴰⵎⵎⵏ ⵍⵍⴰ ⵜⵜⴰⵣⵣⴰⵍⵏ. ⵍⵍⴰ ⵉⴱⴷⴷⵓ ⵡⴰⵡⴰⵍ ⴳ ⵡⴰⵍⵓ, ⵎⴰⵛⴰ ⵉⵎⵄⵓⵢⴰⵔ ⴰⴷ ⵉⴷⴷⵕⵕⴰⵏ ⴰⵡⴰⵍ ⴷ ⴰⵖⵓⵢⵢⵉ: - ⵎⴰⴷ ⵢⴰⵖⵏ ⵃⵏⵉⵏⵉⴽ? - ⴷ ⵎⴰⴷ ⵢⴰⵖⵏ ⵃⵏⵉⵏⴽ ⵛⴳⴳ? - ⴰ ⵉⵢⵢⴷⵉ ⵏ ⵄⵉⴱⴰⴹ ⵍⵍⴰⵀ! - ⵓⵍⵍⴰⵀ ⵎⵛ ⵉⵢⵢⴰⵏ ⵉⵢⵢⴷⵉ ⵅⴰⵙ ⴽⴳⴳ! - ⵓⵔ ⵉⵍⵍⵉ ⵉⵢⴷⵉ ⴰⵔ ⴷ ⵜⵉⵍⵉⵜ. - ⴰ ⴰⵏⴳⴳⴰⵔⵓ ⵏ ⵎⴷⴷⵏ. - ⴰ ⵏⵏⴰⵢⴱⴰ, ⴰ ⵎⵎⵉⵙ ⵏ ⵏⵏⴰⵢⴱⴰ. ⵡⴰⵍⴰⵢⵏⵏⵉ ⵓⵔ ⴷⴰ ⵉⵜⵎⵄⴰⵢⴰⵔⵏ ⵅⴰⵙ ⵜⵉⵄⵢⵢⴰⵍⵉⵏ. ⵙ ⵍⵎⵕⵕⴰⵜ ⵡⵏⵏⴰ ⵉⵍⵍⴰⵏ ⵙ ⵍⵄⵇⵇⵍ ⵏⵏⵙ ⵓⵔ ⴷⴰ ⵉⵜⵙⵄⴷⴷⵓ ⵍⵃⴹⵕⴰ, ⵍⵍⴰ ⵉⵜⵇⵇⵏ ⴷⴷⵄⵓⵜ ⴳ ⵓⵎⴷⴷⴰⴽⴽⵯⵍ ⵏⵏⵙ, ⵢⴰⵎⵥ ⵖⵉⴼⵙ ⵛⵛⵀⵓⴷ, ⵉⴷⴷⵓ ⵖⵔ ⵍⵎⵅⵣⵏ; ⴰⵎⴰ ⵍⵍⴰ ⵜ ⵉⴹⴼⴼⵓⵕ ⵡⵏⵏⴰ ⴷⴰ ⵢⵉⵥⵉ, ⴰⵎⴰ ⵍⵍⴰ ⴰⵙ ⵉⵜⵜⵉⵏⵉ: « ⴰⴽⵎ ⴳ ⵟⵟⴰⵚⵉⵍⴰ ⵏⵏⴽ, ⵍⵍⴰ ⵜⵣⵣⵔⵜ ⵜⵉⵣⴷⵏⵜ; ⵎⵛ ⴽ ⵉⵏⵏ ⵍⴰⵃⵉⵖ, ⵏⴽⴽ ⴰⵎⵎ ⴽⵉⵢⵢ; ⵎⵛ ⴽ ⵉⵏⵏ ⵍⴰⵃⵉⵖ, ⴱⴰⴱⴰ ⵓⵔ ⵉⵢⵉ ⵢⵓⵔⵉⵡ! » ( 249 ) ⵎⵛ ⵉⵍⵍⴰ ⵢⵓⵏ ⵍⵍⴰ ⵉⵙⵙⵄⵏⴷ, ⵍⵍⴰ ⵉⵜⵜⵖⵉⵎⴰ, ⵍⵍⴰ ⵉⵜⵙⵄⴷⴷⵓ ⵜⴰⵇⵣⵣⴰⵎⵓⵜⵜ, ⵍⵍⴰ ⵉⵜⵣⵣⵔ ⵉⵏⵥⴰⴹⵏ ⵏ ⵜⴰⵎⴰⵔⵜ ⵏⵏⵙ ⴷⴰⵜ ⵏ ⵎⴷⴷⵏ, ⵢⵉⵏⵉ ⴰⵙ: « ⵉⵡⴰ ⵀⴰ ⵜⵏ ⴰⵢ ⴰⴷ, ⵉⵡⴰ ⵄⵇⵇⵍ ⴰⵙ ⵎⵛ ⵓⵔ ⴰⴽ ⴷ ⵢⵉⵖ ⵜⴰⵊⵍⵍⴰⴱⵜ ⴳ ⵍⵇⴷⴷ ⵏⵏⴽ, ⴰ ⵟⵟⴰⵚⵉⵍⴰ ⵏ ⵛⵛⵎⴰⵢⵜ! » ⵉⴷⴷ ⵜⵉⵄⵢⵢⴰⵍⵉⵏ, ⵏⵉⵜⵜⵏⵜⵉ, ⵍⵍⴰ ⵜⵜⵉⵥⵉⵏⵜ ⴷⵉⵎⴰ ⵅⴰⵙ ⴳ ⵍⵎⵣⴰⵃ, ⴰⵎⴰ ⴳ ⵍⵡⴰⵛⵓⵏ ⴰⴷⴷⴰⵢ ⵉⵥⵉⵏ ⴰⵎⴰ ⴳ ⵍⵃⵡⴰⵢⵊ ⵏ ⵓⵅⴰⵎ ⵎⵛ ⵍⵍⴰⵏⵜ ⴳ ⵢⵓⵏ ⵏ ⵓⵅⴰⵎ ⴰⵎⴰ ⴳ « ⵉⵏⵏⴰ ⵉⵢⵉ », « ⵉⵏⵏⴰ ⴰⵎ ». ⴰⵢⵏⵏⴰ ⵉⵄⴷⴷⴰⵏ ⵜⵉⵥⵉⵜ ⵏⵏⵙⵏⵜ ⵍⵍⴰ ⵜⵜⵉⵍⵉ ⵅⴰⵙ ⵙ ⵡⴰⵡⴰⵍ ⵅⴰⵙ ⵙ ⵉⵎⵄⵓⵢⴰⵔ ⴰⵎⴰ ⵍⵍⴰ ⵜⵜⵎⵖⴰⵏⴰⵏⵜ, ⵉⵏⵉⵏⵜ ⴰⵢⵏⵏⴰ ⴰⵙⵏⵜ ⵉⵍⵍⴰⵏ ⴳ ⵍⵅⴰⴹⵕ ⵙ ⵚⵚⵡⴰⴱ, ⴰⵎⴰ ⵍⵍⴰ ⵜⴼⴼⵖⵏⵜ ⵉⵣⵣⵢⴰⵔⵏ ⵢⵓⵜ ⵖⵔ ⵢⵓⵜ, ⵓⵔ ⴷⴰ ⵜⵜⴰⵊⵊⴰⵏⵜ ⵍⴰ ⴰⵥⵡⵕ ⵍⴰ ⵟⵟⴰⵚⵉⵍⴰ; ( 251 ) ⵡⵉⵏ ⵜⴳⵉⵔⴰ, ⵎⵎⵣⴷⵓⵏⵜ, ⵎⵢⴰⵎⴰⵥⵏⵜ ⵙⴳ ⵉⵛⵉⵅⴰⵏ, ⵎⵛⵏⵛⵓⵕⵏⵜ, ⵎⵎⵅⴱⴰⵛⵏⵜ, ⵢⵉⵍⵉⵏⵜ ⴰⴳⴳⵯⴷ ⵜⵉⵏⵏⴰ ⵜⵜⵎⵎⴻⵎⵔⴰⵣⵏⵉⵏ. ⵡⴰⵍⴰⵢⵏⵏⵉ ⵉⵎⵄⵓⵢⴰⵔ ⴰⴷ ⵉⴳⴰⵏ ⵡⵉⵏⵏⵙⵏⵜ; ⵍⵍⴰ ⵜⵜⵎⵎⵛⴼⴰⵏⵜ ⵉⵖⵓⴼⵏⴰⵏ, ⵇⵇⵉⵎⵏⵜ ⴽⵓⵍ ⵢⵓⵜ ⴳ ⵜⵢⵎⵎⵉ ⵏⵏⵙ ⵅⴷⴷ ⴷⴰⵜ ⵏ ⵍⴱⵉⵜ ⵏⵏⵙ, ⵍⵍⴰ ⵜⵜⴰⵖ. ⵉⴷⴷ ⵍⵡⴰⵛⵓⵏ ⵉⵎⵥⵥⵢⴰⵏⵏ, ⵍⵍⴰ ⵜⵎⵢⴰⵎⴰⵥⵏ ⵙⴳ ⵜⵎⵣⴰⵔ, ⴰⵔ ⵜⵏⵜ ⵜⵜⵎⵎⵊⴱⴰⴷⵏ ⴰⵔ ⵜⵙⵖⵓⵢⵢⵓⵏ ⵎⵉⵄⴰⴷ ⴰⵔ ⴷ ⵉⵜⵜⵓⵖⵍⴱ ⵢⵓⵏ ⴷⵉⴳⵙⵏ, ⴰⵔ ⴷ ⵉⵇⵇⵉⵎ ⵍⵍⴰ ⵢⴰⵍⵍ. ⵍⵍⴰ ⵜⵎⵛⴰⵔⵔⴰⵄⵏ ⵍⵡⴰⵛⵓⵏ ⵙ ⵡⴰⴷⴷⵔⵔⴰⵢⵏ ⵅⴷⴷ ⵙ ⵍⴽⵓⵔ ⴰⴷⴷⴰⵢ ⵜⵔⵡⵓ, ⵜⵉⵖⵚⵜ ⵖⵔ ⵜⵖⵚⵜ, ⵎⴰⵛⴰ ⴷⵖⵢⴰ ⵍⵍⴰ ⵜⵎⵎⵚⵍⴰⵃⵏ. ⵍⵄⵉⵍ, ⴰⴷⴷⴰⵢ ⵉⴳ ⵍⴼⵙⴰⴷ, ⵍⵍⴰ ⵜ ⵟⵟⴰⵎⵥ ⵎⴰⵢⵙ, ⵍⵍⴰ ⵜ ⵜⵜⵀⵔⵔⴰⵙ ⵙ ⵓⴼⵓⵙ ⵅⴷⴷ ⵙ ⵢⵓⵏ ⵏ ⵓⵖⵣⵣⴰⵍ ⵓⵙⴷⵉⴷ ⵅⴷⴷ ⵙ ⵢⵓⵜ ⵏ ⵜⴼⵍⵓⵜ, ⵅⴷⴷ ⵍⵍⴰ ⴰⵙ ⵜⵜⵄⵔⵔⴰ ⵜⴰⵎⵚⵚⴰⵟⵜ, ⵜⵇⵇⵉⵎ ⵍⵍⴰ ⵜ ⵜⵇⵣⵣⴰⴼ ⴰⵔ ⴷ ⵉⵇⵇⵉⵎ ⵍⵍⴰ ⵉⵙⵖⵓⵢⵢⵓ: ( 254 ) « ⴰⵢⴰ ⵢⵎⵎⴰ, ⵍⵄⴰⵕ ⵏⵏⵎ, ⵄⵎⵕⵓ ⵓⵔ ⵜⵜⵄⴰⵡⴰⴷⵖ; ⴰⵢⴰ ⵢⵎⵎⴰ ⵍⵃⴱⵉⴱⴰ, ⵍⵄⴰⵕ ⵏⵏⵎ, ⴰⵡⵡⴰ ⵢⵎⵎⴰ, ⵎⵎⵓⵜⵖ ». ⴰⴷⴷ ⴰⵙ ⵉⵎⵏⵄ ⵍⵄⵉⵍ ⵉ ⵎⴰⵢⵙ, ⵍⵍⴰ ⵜ ⵜⵜⵍⴰⵃⴰⵢ, ⵜⵉⵏⵉ ⴰⵙ: « ⵉⵡⴰ ⵄⵇⵇⵍ ⴰⵙ, ⵎⵛ ⵓⵔ ⴰⴽ ⵜⵜ ⴳⵉⵖ, ⵙ ⵍⵃⵃⵕⴰⵎ ⵏ ⴱⴰⴱⴰ ⵃⵏⵉⵏⵉ ⵜⵜⴽⴽⵜ ⴰⴼⵓⵙ ⵉⵏⵓ, ⵉⵡⴰ ⴽⵎⵙ ⵜⵜ ⵎⴰⵏⵉ ⴳ ⴰⴽ ⵜⵚⵃⴰ. » ⵍⵅⵓⵎⵎⴰⵕ ⴰⵍⵍⵉⴳ ⵙⵓⵍⵖ ⵎⵥⵥⵉⵖ ⴷⵉⵎⴰ ⴷ ⵍⵅⵓⵎⵎⴰⵕ, ⵙⴳ ⵚⵚⴱⴰⵃ ⵎⵉⵄⴰⴷ ⵜⴰⴷⴳⴳⵯⴰⵜ ⴰⵔ ⴷ ⵜⴷⴷⵓ ⵢⵎⵎⴰ ⴰⴷ ⵉⵢⵉ ⵊⵊⴱⵕ ⴰⴷ ⵜⵛⵖ ⵉⵎⵏⵙⵉ ⵅⴷⴷ ⴰⴷ ⴳⵏⵖ. ⴰⴷⴷⴰⵢ ⵏⵉⵔⵉ ⴰⴷ ⵏⵅⵓⵎⵎⵕ ⵜⵉⵖⵣⵣⴰⵍⵉⵏ, ⵍⵍⴰ ⵏⵊⵊⵎⵓⵄ ⴽⵕⴰⴹ ⵅⴷⴷ ⵕⴱⵄⴰ ⵏ ⵍⵡⴰⵛⵓⵏ, ⴽⵓⵍ ⵢⵓⵏ ⵙ ⵜⵖⵣⵣⴰⵍⵜ ⵏⵏⵙ; ⴽⵓⵍ ⵢⵓⵏ ⵍⵍⴰ ⵉⵜⵜⵉⵏⵉ: « ⴳⴳⴰⵔⵖ ⵜⵉⵖⵣⵣⴰⵍⵉⵏ »; ⵡⵏⵏⴰ ⵉⵣⵡⴰⵔⵏ, ⵍⵍⴰ ⵉⵊⵊⵎⵓⵄ ⵜⵉⵖⵣⵣⴰⵍⵉⵏ, ⴷⴰ ⵉⵢⵔⵉ ⵜⵏⵜ ⵏⵏⵉⴳ ⵉⵅⴼ ⵏⵏⵙ ⵖⵔ ⴷⴼⴼⵉⵔ ⴰⵙ. ⵜⴰⵖⵣⵣⴰⵍⵜ ⵏⵏⴰ ⵉⵏⵉⵏ ⴳ ⵜⵉⵏⵏⴰ ⵢⴹⵏⵉⵏ, ⵍⵍⴰ ⵜⵜ ⵉⵜⵜⴰⵙⵉ ⴱⴰⴱ ⵏⵏⵙ, ⴷⴰ ⵉⵙⵙⵓⴷⵎ ⴰⴼⵓⴷ ⵏⵏⵙ, ⴷⴰ ⵉⴼⴼⵖ ⵙⴳ ⵍⵅⵓⵎⵎⴰⵕ; ⵡⴰⵍⴰⵢⵏⵏⵉ ⵎⵛ ⵜⵏⵉ ⵅⴰⵙ ⵙ ⵉⵅⴼ ⵏ ⵉⴼⵉⵖⵔ, ⵍⵍⴰ ⵉⵜⵜⵄⴰⵡⴰⴷ ⵍⵅⵓⵎⵎⴰⵕ ⴷ ⵡⵉⵏⵏⴰ ⵉⴹⵏⵉⵏ; ( 258 ) ⵎⵛ ⵉⴽⴽⴰ ⵢⵓⵏ ⴷⴼⴼⵉⵔ ⵏ ⵡⵏⵏⴰ ⵉⵜⵜⵅⵓⵎⵎⴰⵕⵏ, ⵍⵍⴰ ⴰⵙ ⵜⵜⵉⵏⵉⵏ ⵍⵡⴰⵛⵓⵏ: « ⵉⴽⴽⴰⵜ ⴽ ⵉⵖⵚⵚ »; ⵍⵍⴰ ⴰⵙⵏ ⵉⵜⵜⵉⵏⵉ ⵏⵜⵜⴰ ⵇⴱⵍ ⴰⴷ ⵜ ⵙⵉⵡⵍⵏ: « ⵃⵍⴰⵍ ⵉⵢⵉ »; ⵍⵍⴰ ⴰⵙ ⵜⵜⵉⵏⵉⵏ, ⵏⵉⵜⵏⵉ: « ⵃⵕⴰⵎ ⴰⴽ »; ⴰⵏⴳⴳⴰⵔⵓ ⵍⵍⴰ ⵉⵜⴷⴷⵓ ⵍⵍⴰ ⵉⴱⵏⵏⵓ ⵜⴰⵖⵣⵣⴰⵍⵜ ⵏⵏⵙ ⵅⴼ ⵡⵉⵏⵏⴰ ⵉⴹⵏⵉⵏ; ⵅⴷⴷ ⵍⵍⴰ ⵜⵜⵔⵢⵢⴰⴼⵏ ⵍⵡⴰⵛⵓⵏ ⴰⴷ ⵎⵛⴰⵕⴰⵄⵏ ⵜⵉⵖⵣⵣⴰⵍⵉⵏ; ⵍⵍⴰ ⵜⵜⵉⵏⵉⵏ: ( 259 ) « ⵛⴰⵕⵄ, ⵓⵔ ⵜⵛⴰⵕⴰⵄⵖ, ⵜⵛⴰⵕⴰⵄⵖ ⴷ ⴰⵏⴳⴳⴰⵔⵓ! » ⵡⵏⵏⴰ ⵎⵉ ⵜⵇⵔⵔⴱ ⵜⵖⵣⵣⴰⵍⵜ ⵏⵏⵙ, ⴰⴷⴷⴰⵢ ⵛⴰⵕⵄⵏ, ⵍⵍⴰ ⵉⵜⴷⴷⵓ, ⵍⵍⴰ ⵜⵜ ⵉⴱⵏⵏⵓ, ⵍⵍⴰ ⵜⵜ ⵉⵜⵜⵔⴽⴽⵡⴰⵊ ⴳ ⵡⴰⵛⴰⵍ; ⵍⵍⴰ ⵣⵍⵍⵉⵏ ⵍⵡⴰⵛⵓⵏ ⵜⴰⵖⵣⵣⴰⵍⵜ ⵏⵏⴰ ⵙ ⵜⵉⵏⵏⵙⵏ; ⵎⵛ ⵓⵔ ⵜⵜ ⵉⵙⵙⵉⵖ ⴰⴳⴳⵯⴷ ⵢⵓⵏ, ⵍⵍⴰ ⴷⴷⵢⵢⴰⵄⵏ ⴰⴷ ⴷ ⴰⵙⵉⵏ ⴽⵓⵍ ⵢⵓⵏ ⵜⴰⵖⵣⵣⴰⵍⵜ ⵏⵏⵙ; ( 260 ) ⵡⵏⵏⴰ ⴷ ⵢⵓⵡⴹⵏ ⵖⵔ ⵍⵇⵇⴰⵎ ⴷ ⴰⵏⴳⴳⴰⵔⵓ, ⵏⵜⵜⴰ ⴰⴷ ⵉⴱⵏⵏⵓⵏ ⵜⵉⵏⵏⵙ; ⵎⵛ ⵉⴳⴳⵯⴷ ⵢⵓⵏ, ⴰⵀⴰ ⵉⵔⵡⵍ ⴰⴷ ⴷ ⵢⴰⵙⵉ ⵜⴰⵖⵣⵣⴰⵍⵜ ⵏⵏⵙ ⵇⴱⵍ ⴰⴷ ⵉⵡⵡⵜ ⵓⵏⴳⴳⴰⵔⵓ, ⵍⵍⴰ ⴰⵙ ⵜⵜⵉⵏⵉⵏ: « ⵉⴽⴽⴰⵜ ⴽ ⵉⵖⵚⵚ », ⴷⴰ ⵉⴷⴷⵓ ⴰⴷ ⵉⴱⵏⵓ ⵜⴰⵖⵣⵣⴰⵍⵜ ⵏⵏⵙ. ⵎⵛ ⵉⵙⵙⵉⵖ ⵢⵓⵏ ⵜⴰⵖⵣⵣⴰⵍⵜ ⵏⵏⴰ ⵉⵜⵜⵓⴱⵏⴰⵏ, ⵍⵍⴰ ⵉⵜⵜⴰⵙⵉ ⵃⵔⵔⴷⴰ, ⵉⴷⴷⵓ ⴰⴷ ⴷ ⵉⵊⵎⵄ ⵜⵉⵖⵣⵣⴰⵍⵉⵏ ⵢⴰⴹⵏⵉⵏ; ⵎⵛ ⵉⵙⵔⵙ ⴰⴹⴰⵕ ⵅⴷⴷ ⴰⴷ ⴰⵙ ⵜⴰⵡⵡⴹ ⵛⴰ ⵏ ⵜⵖⵣⵣⴰⵍⵜ ⵏ ⵉⵄⴱⴰⵏⵏ, ⵍⵍⴰ ⵜⵜⵉⵍⵉⵏ ⵍⵡⴰⵛⵓⵏ ⵍⵍⴰ ⵃⴹⴰⵏ ⵜ, ⵍⵍⴰ ⵜⴽⵍⵓⴼⵏ ⴳ ⵜⵖⵣⵣⴰⵍⵉⵏ ⵏⵏⵙⵏ, ⴷⴰ ⵔⵡⵍⵏ ⵖⵔ ⵍⵇⵇⴰⵎ ⵡⵏⵏⴰ ⵉⴳⴳⵉⵔⵏ, ⵍⵍⴰ ⵜⵜ ⵉⴱⵏⵏⵓ ⵜⴰⵡⴰⵍⴰ ⵏⵏⵙ; ( 262 ) ⴰⴷⴷⴰⵢ ⴷ ⵢⴰⵡⴹ ⵡⵏⵏⴰ ⵜⵜ ⵉⵙⵙⵉⵖⵏ ⵖⵔ ⵍⵇⵇⴰⵎ, ⵍⵍⴰ ⵉⵜⵙⵔⵓⵙ ⵜⵉⵖⵣⵣⴰⵍⵉⵏ, ⴷⴰ ⵢⵉⵏⵉ ⵉ ⵡⵏⵏⴰ ⵜⵜ ⵉⴱⵏⴰⵏ: « ⴽⴰⵔⴼ ⴰⵡⵍⵍⴰ ⵎⴰⵡⵙ? » - ⴰⴷⴷ ⴰⵙ ⵢⵉⵏⵉ « ⴽⴰⵔⴼ », ⵍⵍⴰ ⵉⵜⵙⵡⴰⵔ ⴳ ⵓⵖⵣⵣⴰⵍ ⵏⵏⵙ, ⴷⴰ ⵉⵏⵇⵇⵣ; ⵓⴽⴰⵏ ⵉⵣⴰⵢⴷ ⵍⵅⵎⵎⴰⵕ ⵎⵉⵄⴰⴷ ⴰⵔ ⴷ ⵢⴰⵡⴹ ⵢⵓⵏ ⴷⵉⵙⵏ ⵖⵔⵙ ⴰⵏⵙⴰ ⵏ ⵍⴱⵏⵉ, ⴰⵔ ⴷ ⵉⵃⵉⵊ; ⵡⵏⵏⴰ ⵉⵅⵚⵚⵕ ⵇⴱⵍ ⴰⴷ ⵉⵃⵉⵊⵊ, ⵍⵍⴰ ⵉⵜⵄⴰⵡⴰⴷ ⴰⴷ ⵢⴰⵍⵙ ⵙⴳ ⵓⴱⵓⴹ; ( 263 ) ⵡⵏⵏⴰ ⵉⵅⵎⵎⵕⵏ ⴱⵍⴰ ⵍⵎⵕⵜ ⵏⵏⵙ, ⵍⵍⴰ ⴰⵙ ⵜⵜⵉⵏⵉⵏ: ⵉⴽⴽⴰⵜ ⴰⴽ ⵉⵖⵚⵚ, ⴷⴰ ⵉⵇⵇⵉⵎ ⵓⵔ ⵉⵜⵅⵎⵎⴰⵕ ⵢⵓⵜ ⵏ ⵍⵎⵕⵜ; ⴰⴷⴷⴰ ⵉⵃⵉⵊⵊ ⵢⵓⵏ, ⵍⵍⴰ ⵉⵜⵇⵍⵍⴰⵄ ⴱⵓ ⵜⵖⵣⵣⴰⵍⵜ ⵜⴰⵖⵣⵣⴰⵍⵜ ⵏⵏⵙ, ⵉⵙⵙⴱⴷⴷ ⵜⵜ, ⵢⴰⵎⵥ ⵜⵜ ⵙⴳ ⵉⵅⴼ, ⵉⵇⵇⵏ ⴰⵍⵍⵏ ⵅⴷⴷ ⵉⴹⵕⵏ ⴰⵢⵍⵎⵓⵙ, ⴷⴰ ⵉⵡⵡⵜ ⴰⵙ ⵡⵏⵏⴰ ⵉⵃⵉⵊⵊⵏ ⵜⴰⵖⵣⵣⴰⵍⵜ ⵙ ⵜⵖⵣⵣⴰⵍⵜ ⵏⵏⵙ, ⴷⴰ ⴷⴷⵓⵏ ⴰⴷ ⵄⴱⵕⵏ ⵛⵃⴰⵍ ⵏ ⵜⵖⵣⵣⴰⵍⵉⵏ ⴰⵙ ⵜⴱⵄⴷ, ( 264 ) ⵎⵛ ⵜⴱⵄⴷ ⵙ ⵄⵛⵕⴰ ⵏ ⵜⵖⵣⵣⴰⵍⵉⵏ, ⵍⵍⴰ ⴷⵉⵙ ⵜⵜⵉⵍⵉⵏ ⵄⵛⵕⴰ ⵏ ⵉⵖⵢⵢⴰⵍ ⵅⴷⴷ ⵄⵛⵔⴰ ⴷ ⵓⵙⵏⵓⵙ; ⵜⴰⴷⴳⴳⵯⴰⵜ, ⴰⴷⴷⴰ ⵉⵢⵢⵏ, ⵍⵍⴰ ⴷ ⵊⵊⵎⵓⵄⵏ ⵉⵡⵡⵓⵔⴷⴰⵏ ⵏ ⵡⴰⵏⵙⴰ, ⵍⵍⴰ ⵜ ⵜⵜⴻⵜⵜⵏ; ⴰⵎⵛⵉⵙ ⴰⴷ ⵖⵉⴼⵙ ⵜⵜⴽⴽⵏ ⵍⵡⴰⵛⵓⵏ ⵇⵇⴰⵃ ⴳ ⵡⵏⵏⴰ ⵉⴱⵏⴰⵏ ⵜⵖⵣⵣⴰⵍⵜ. ⵉⴷⴷ ⵍⵉⵛⴰⵕⴹ ⴷⵉⵖ, ⵍⵍⴰ ⵜⵜ ⴱⵏⵏⵓⵏ ⵍⵡⴰⵛⵓⵏ, ⵉⵙⵍⵍⵉ ⴳ ⵉⵙⵍⵍⵉ, ⴷⴰ ⴱⴹⵓⵏ ⴳ ⵙⵉⵏ ⵢⵢⵉⵍⴰⵏ; ⵍⵍⴰ ⵜⴷⴷⵓⵏ, ⵍⵍⴰ ⴷ ⵊⵊⵎⵓⵄⵏ ⵉⵢⴳⴳⵯⴰⵍⵏ ⵉⵙⵍⵍⵉⵡⵏ, ⴷⴰ ⴱⴷⵓⵏ ⵍⵅⵎⵎⴰⵕ; ⵡⵏⵏⴰ ⵜⵜ ⵉⵙⵜⵓⵜⵜⵉⵏ, ⵍⵍⴰ ⵉⵜⵜⵏⵓⵢ ⵏⵜⵜⴰ ⴷ ⵉⵎⴷⴷⵓⴽⴽⵯⴰⵍ ⵏⵏⵙ ⴳ ⵡⵉⵏⵏⴰ ⵉⴹⵏⵉⵏ ⵎⵉⵄⴰⴷ ⵍⵉⵛⴰⵕⵜ, ⴷⴰ ⵄⴰⵢⴷⵏ ⴷ. ⵍⵍⴰⵏ ⵡⵉⵏⵏⴰ ⵉⵜⵜⵅⵎⵎⴰⵕⵏ ⵍⵉⵛⴰⵕⵜ ⵙ ⵍⴼⵍⵓⵙ ⵎⴰⵛⴰ ⵃⵕⴰⵎ ⵍⵅⵎⵎⴰⵕ ⵏⵏⴰ! ⵉⴷⴷ ⵇⵏⵢⵓⴼⴼⵔ ⴰⵍⵜⵓ, ⵍⵍⴰ ⵓⵟⵟⵓⵏ ⵍⵡⴰⵛⵓⵏ ⵅⴼ ⵙⵉⵏ, ⵜⴰⴷⴳⴳⵯⴰⵜ ⴰⴷⴷⴰⵢ ⵜⵡⵡⵜ ⵜⴰⵍⵍⵙⵜ; ⵏⵏⵚⵚ ⴷⵉⵢⵙⵏ ⵍⵍⴰ ⵉⵜⵇⵇⵏ, ⵏⵏⵚⵚ ⵍⵍⴰ ⵜⴼⴼⵔ; ⵍⵍⴰ ⵜⵜⵓⵜⵜⵓⵢⵏ ⵍⵡⴰⵛⵓⵏ ⴳ ⵓⵅⵏⵛⵓⵛ, ⴷⴰ ⵇⵇⵏⵏ ⴰⵍⵍⵏ; ⵍⵍⴰ ⵉⵜⵜⵉⵍⵉ ⵢⵓⵏ ⴳ ⵡⵉⵏⵏⴰ ⴼⴼⵔⵔⵉⵏ, ⵍⵍⴰ ⵉⵃⴹⴰ ⵎⴰⴷ ⵓⵔ ⴷⴰ ⵉⵜⵙⴽⵙⵉⵡ ⵃⴷⴷ; ⵡⵏⵏⴰ ⵉⵖⵓⵛⵛⴰⵏ, ⵍⵍⴰ ⵜ ⵙⵙⵓⴼⵓⵖⵏ ⵣⵉ ⵍⵅⵓⵎⵎⴰⵕ; ( 267 ) ⵍⵍⴰ ⴰⵙⵏ ⵉⵜⵜⵉⵏⵉ ⵡⵏⵏⴰ ⵜⵏ ⵉⵃⴹⴰⵏ: « ⵎⴰⴷ ⵉⵜⵜⴰⵡⵉ ⵓⵄⵟⵟⴰⵕ? »; ⵍⵍⴰ ⴰⵙ ⵜⵜⵉⵏⵉⵏ: « ⵜⵉⵙⵓⵔⴰ ⴷ ⵍⵃⵏⵏⴰ! »; ⵍⵍⴰ ⴰⵙⵏ ⵉⵜⵜⵉⵏⵉ, ⵏⵜⵜⴰ: ⵡⵏⵏⴰ ⵉⵙⴽⵙⵓⵏ ⴰⴷ ⴰⵙ ⴷⴷⵓⵏⵜ ⴳ ⵉⵡⴰⵍⵍⵏ! »; ⵡⵏⵏⴰ ⵉⵄⵡⵡⵍⵏ ⴰⴷ ⵉⵙⴽⵙⵓ, ⵍⵍⴰ ⴰⵙ ⵉⵜⵜⵉⵏⵉ: « ⵉ ⵎⵛ ⴰⴽ ⴷⴷⵓⵏⵜ ⴽⴳⴳ ⵉⵡⴰⵍⵍⵏ! » ⴰⴷⴷⴰⵢ ⴼⴼⵔⵔⵉⵏ ⵍⵡⴰⵛⵓⵏ, ⵍⵍⴰ ⵉⵜⵙⵖⵓⵢⵢⵓ ⵢⵓⵏ ⴷⵉⴳⵙⵏ ⵅⴷⴷ ⵢⵓⵏ ⵏⵏⴰ ⵓⵔ ⴷⴰ ⵉⵜⴼⴼⵔⵏ, ⵍⵍⴰ ⴰⵙⵏ ⵉⵜⵜⵉⵏⵉ: « ⵉⵏⵡⴰ ⵓⵅⴷⵓⵍ! », ⴰⴷ ⴰⵙⵏ ⵢⵉⵏⵉ: « ⵉⵏⵡⴰ ⵓⵅⴷⵓⵍ », ⵍⵍⴰ ⵜⴽⴽⵔⵏ ⵡⵉⵏⵏⴰ ⵇⵇⵏⵏⵉⵏ ⴰⴷ ⵕⴰⵄⴰⵏ ⴳ ⵡⵉⵏⵏⴰ ⴼⴼⵔⵔⵉⵏ; ⵓⵔ ⴷⴰ ⵉⵜⵜⵖⵉⵎⴰ ⵅⴷⴷ ⴳ ⵍⵇⵇⴰⵎ; ⴰⴷⴷⴰ ⵢⴰⴼ ⵢⵓⵏ ⵢⵓⵏ, ⵍⵍⴰ ⵜ ⵉⵟⵥⵥⵄ ⴰⴷ ⵜ ⵢⴰⵎⵥ, ⵓⵔ ⴷⴰ ⵜ ⵉⵜⵜⴰⵊⵊⴰ ⴰⴷ ⵉⵔⵡⵍ ⵖⵔ ⵍⵇⵇⴰⵎ ⴰⴷ ⵉⵙⵓ; ( 269 ) ⵎⵛ ⵜ ⵢⵓⵎⵥ, ⵍⵍⴰ ⴰⵙ ⵉⴽⵎⵎⵣ ⵉⵅⴼ, ⵢⵉⵏⵉ ⴰⵙ: « ⵉⵡⴰ ⵀⴰ ⵉⵢⵉ ⴽⵎⵣⵖ ⴰⴽ » ⵅⴷⴷ « ⵀⴰ ⵉⵢⵉ ⵇⵔⵔⵄⵖ ⴰⴽ! »; ⵎⵛ ⴰⵙ ⵉⵎⵏⵄ, ⵍⵍⴰ ⵉⵔⴳⴳⵯⵍ ⵖⵔ ⵍⵇⵇⴰⵎ, ⵢⵉⵏⵉ: « ⵅⵅⵓⴱⴱ », ⴰⴷⴷⴰⵢ ⵉⵙⵓ. ⵇⵇⵏⵢⵓⴼⴼⵔ, ⵍⵍⴰ ⵉⵜⵜⵉⵍⵉ ⴰⴷⴷⴰ ⵢⵉⵍⵉ ⵍⵃⴰⵍ ⵍⵍⴰ ⵉⵄⴷⵍ, ⴰⴷⴷⴰ ⵢⵉⵍⵉ ⵡⴰⴽⴰⵍ ⵍⵍⴰ ⵉⵚⵃⴰ, ⴱⴰⵛ ⵓⵔ ⵜⵜⵓⵜⵜⵓⵢⵏ ⵍⵡⴰⵛⵓⵏ, ⵜⴰⴷⴳⴳⵯⴰⵜ ⵖⵔ ⵜⵣⵉⵔⵉ. ⵓⵎⴰ ⵣⵣⵡⵉⵃⵍ ⴷⵉⵖ, ⵍⵍⴰ ⵜ ⵜⵜⵅⵓⵎⵎⴰⵕⵏ ⵍⵡⴰⵛⵓⵏ ⴰⴷⴷⴰⵢ ⵉⵍⵉⵏ ⵉⴱⴰⵡⵏ, ⴳ ⵓⵏⴱⴷⵓ ⵅⴷⴷ ⴳ ⵜⵢⵉⵢⵢⵉⵡⵉⵏ, ⴰⴷⴷⴰⵢ ⵣⵔⵔⵄⵏ ⵎⴷⴷⵏ; ⵍⵍⴰ ⵜⵜⵉⵍⵉⵏ ⵙⵉⵏ ⵅⴷⴷ ⴽⵕⴰⴹ, ⴳⵏ ⴽⵓⵍ ⵢⵓⵏ ⵙ ⵄⵛⵕⴰ ⵅⴷⴷ ⵄⵛⵔⵉⵏ ⵏ ⵜⵢⵓⵢⵢⴰ ⵉⴱⴰⵡⵏ ⵉⵎⵍⵍⴰⵍⵏ ⴷ ⵙⵏⴰⵜ ⵅⴷⴷ ⵕⴱⵄⴰ ⵏ ⵜⵢⵉⵢⵢⵉⵡⵉⵏ ⵏ ⵜⵖⵉⴹⵜⵏ; ( 271 ) ⴰⴷⴷⴰⵢ ⵉⵔⵉⵏ ⴰⴷ ⴱⴷⵓⵏ ⵍⵅⵓⵎⵎⴰⵕ, ⵍⵍⴰ ⵉⵜⵜⴰⵙⵉ ⵢⵓⵏ ⴷⵉⴳⵙⵏ ⵍⴽⵓⵎⵛⴰ ⵏ ⵉⴱⴰⵡⵏ, ⴷⴰ ⵉⵇⵇⵉⵎ ⵍⵍⴰ ⵜⵜ ⵉⵜⵜⴼⵕⵕⴰⵇ: « ⴱⵉⵢⴰ ⴱⵉⴽ » ⵎⵉⵄⴰⴷ ⴰⵔ ⴷ ⵜⵏⵙ ⴳ ⵢⵓⵏ; ⵡⵏⵏⴰ ⴳ ⵜⵏⵙⴰ, ⵏⵜⵜⴰ ⴰⴷ ⵉⵜⵜⵅⵓⵎⵎⴰⵕⵏ ⴷ ⴰⵎⵣⵡⴰⵔⵓ; ⵍⵍⴰ ⵉⴳⴳⴰⵔ ⵉⴱⴰⵡⵏ ⵙ ⵓⴼⵓⵙ, ⵉⵙⵏⴰⵍ ⴰⵙⵏ ⵜⴰⴷⴰⵡⵜ ⴳ ⵢⵓⵏ ⵓⴼⵓⵙ, ⴷⴰ ⵉⵢⵢⵔ ⵜⵏ ⴰⵍⵜⵓ ⴳ ⵉⵢⵏⵏⴰ, ⴷⴰ ⵉⵍⵇⵇⴼ ⴰⵢⵏⵏⴰ ⴳ ⵎⵉ ⵉⵃⴽⵎ; ⵎⵛ ⵉⵍⵇⵇⴼ ⵊⵊⵓⵊⵜ, ⵍⵍⴰ ⵉⴼⵟⵟⵕ. ⵎⵛ ⵉⵍⵇⵇⴼ ⵍⵓⵇⵇⵔⴷ ⵅⴷⴷ ⵜⴰⵖⵖⴰⴹⵜ ⵖⵓⵔ ⵉⴱⴰⵡⵏ, ⵍⵍⴰ ⵉⵅⵚⵚⵕ, ⵢⴰⵊⵊ ⵡⵏⵏⴰ ⵉⴹⵏⵉⵏ ⴰⴷ ⵉⵅⵎⵎⵕ ⵜⴰⵡⴰⵍⴰ ⵏⵏⵙ; ⴰⴷⴷⴰⵢ ⴼⴹⵕⵏ, ⵍⵍⴰ ⵜⵜⵕⴰⵄⴰⵏ ⵎⴰⴷ ⵓⵔ ⵜⵜⵍⵇⵇⴰⴼⵏ ⵜⵉⵖⴹⵜⵏ; ⵡⵏⵏⴰ ⵉⵙⵙⵏⵏ ⴰⴷ ⵉⵅⵓⵎⵎⵔ, ⵍⵍⴰ ⵉⴳⴳⴰⵔ ⵉⴱⴰⵡⵏ ⴳ ⵉⵢⵏⵏⴰ ⴱⴰⵛ ⴰⴷ ⴼⵕⵕⵇⵏ ⵃⵔⴰ ⴰⴷ ⵢⴰⵏⵏⴰⵢ ⵜⴰⵖⵖⴰⴹⵜ ⴱⴰⵛ ⴰⴷ ⵜⵜ ⵉⵍⵇⵇⴼ; ( 273 ) ⵉⵍⵍⴰ ⵡⵏⵏⴰ ⵉⵜⵍⵇⵇⴰⴼⵏ ⴰⴳⴳⵯⴷ ⵙⵏⴰⵜ ⴳ ⵓⴷⵡⴰⵍ; ⵡⴰⵍⴰⵢⵏⵏⵉ ⵎⵛ ⵓⵔ ⵉⵏⵏⵉ: « ⵃⵍⴰⵍ ⵜⵡⴰⵎ », ⵍⵍⴰ ⵉⵜⵙⵔⵓⵙ ⵢⵓⵜ ⵙⴳ ⵙⵏⴰⵜ ⵏⵏⴰ; ⴰⴷⴷⴰⵢ ⵇⴹⵓⵏⵜ ⵜⵖⴹⵜⵏ, ⵍⵍⴰ ⵜⵜⵅⵎⵎⴰⵕⵏ ⴳ ⵉⴱⴰⵡⵏ ⵉⵎⵍⵍⴰⵍⵏ ⵏⵏⴰ ⵇⵇⵉⵎⵏⵉⵏ; ⴰⵢⵏⵏⴰ ⵉⵍⵇⵇⴼ ⵢⵓⵏ, ⵍⵍⴰ ⵜ ⵉⵜⵜⵃⴰⵙⴰⴱ; ⵎⵛ ⵢⵓⴼⴰ ⵊⵊⵓⵊⵜ, ⵍⵍⴰ ⵜ ⵉⵜⵜⴰⵙⵉ; ( 274 ) ⵎⵛ ⵢⵓⴼⴰ ⵍⵓⵇⵇⵕⴹ, ⵍⵍⴰ ⵜ ⵉⴹⴹⵕⵕⴰ; ⵎⵛ ⵉⴼⴹⵕ ⵢⵓⵏ, ⴰⵀⴰ ⵓⵔ ⵉⵃⵍⵍⴰ ⵙ ⵢⵓⵜ ⵏ ⵜⵖⵖⴰⴹⵜ, ⵍⵍⴰ ⵉⵜⵙⵔⵓⵙ ⴰⵢⵏⵏⴰ ⵙ ⵉⴼⴹⵕ ⴰⴷⴷⴰⵢ ⴽⵎⵎⵍⵏ ⵍⵡⴰⵛⵓⵏ ⴹⴹⵓⵕ ⴰⵎⵣⵡⴰⵔⵓ, ⵉⵅⵚⵚ ⴽⵓⵍ ⵢⵓⵏ ⴰⴷ ⵖⵓⵔⵙ ⵉⵍⵉⵏⵜ ⵕⴱⵄⴰ ⵏ ⵜⵢⵉⵢⵢⵉⵡⵉⵏ ⵏ ⵜⵖⴹⵜⵏ; ⵎⵛ ⵓⵔ ⵖⵓⵔⵙ ⵍⵍⵉⵏⵜ, ⵍⵍⴰ ⵜⵏⵜ ⵉⵙⵙⴰⵖ ⵙ ⵖⵓⵔ ⵡⵏⵏⴰ ⴰⵙ ⵜⵏⵜ ⵢⵓⵡⵉⵏ ⵙ ⵕⴱⵄⴰ ⵏ ⵉⴱⴰⵡⵏ ⵉ ⵜⴰⵖⵖⴰⴹⵜ ⵅⴷⴷ ⴽⵟⵕ; ⵎⵛ ⵓⵔ ⵢⵓⵡⵉ ⴰⴳⴳⵯⴷ ⵔⵔⵉⵃⵜ ⵅⴷⴷ ⵎⵛ ⵓⵔ ⵖⵓⵔⵙ ⵉⵍⵍⵉ ⵙ ⵎⵉ ⵖⴰ ⵜⵏⵜ ⵉⵙⵖ ⵇⵇⴰⵃ, ⵍⵍⴰ ⵉⵜⴽⴽⵔ ⵡⵏⵏⴰ ⵉⵖⵍⴱⵏ, ⵍⵍⴰ ⵉⵜⵜⴳⴳ ⵜⵉⵖⴹⵜⵏ ⵏ ⵓⵎⴷⴷⴰⴽⴽⵯⵍ ⵏⵏⵙ ⴷⴷⴰⵡ ⵏ ⵢⵉⴷⴷⵉⴷ ⴱⴰⵛ ⴰⴷ ⴰⵙ ⴰⴼⴼⵏⵜ. ⵍⵓⵇⵜ ⵏ ⵍⵅⵔⵉⴼ ⴰⵢ ⴰⴷ, ⴽⵎⵎⵍⵏ ⵎⴷⴷⵏ ⴰⵎⵡⴰⵔ ⴷ ⵓⵔⵡⴰ, ⵢⵓⵔⴰ ⴱⵏⴰⴷⵎ ⵙ ⵓⴼⵓⵙ, ⴰⵡⴹⵏⵜ ⵜⵎⵖⵔⵉⵡⵉⵏ, ⴽⴽⵔⵏ ⵎⴷⴷⵏ ⵍⵍⴰ ⵜⵜⴰⵡⵍⵏ; ⴳ ⵜⵖⵚⵜ ⵏⵏⵖ ⵙⵏⴰⵜ ⵏ ⵜⵎⵖⵔⵉⵡⵉⵏ ⴰⴷ ⵉⵣⵔⵉⵏ, ⵜⵉⵏ ⵎⴻⵎⵎⵉⵙ ⵏ ⴱⵍⵃⴰⵊⵊ ⴷ ⵜⵉⵏ ⵎⴻⵎⵎⵉⵙ ⵏ ⵎⴱⴰⵕⴽ; ( 277 ) ⴱⵍⵃⴰⵊⵊ ⵢⵓⵡⵍ ⵉ ⵎⴻⵎⵎⵉⵙ ⵙⴳ ⴰⵢⵜ ⵃⵎⵉⴷⴰⵏ, ⴼⴰⴹⵎⴰ ⵕⵃⵃⵓ ⵉⵍⵍⵉⵙ ⵏ ⵕⵃⵃⵓ ⴰⵎⵇⵇⵕⴰⵏ, ⵉⴷⴷ ⵎⴱⴰⵕⴽ ⵢⵓⵡⵍ ⴰⵙ ⵏⵜⵜⴰ ⵉ ⵎⴻⵎⵎⵉⵙ ⵙⴳ ⵉⵃⵎⵓⴷⵏ, ⵢⵓⵜ ⵍⵍⴰ ⴰⵙ ⵜⵜⵉⵏⵉⵏ ⵜⴰⴱⵏⵄⵙⵙⵓⵜ, ⵉⵍⵍⵉⵙ ⵏ ⴱⵏⵄⵙⵙⵓ. ⵉⵡⴰ ⵎⴰⵜⵜⴰ ⵜⵎⵖⵔⵉⵡⵉⵏ ⵎⴰⵜⵜⴰ! ⵜⵉⵎⵖⵔⵉⵡⵉⵏ ⵜⵉⵎⵇⵇⵕⴰⵏⵉⵏ! ⵓⵔ ⵏⵏ ⵉⵇⵇⵉⵎ ⵃⴷⴷ, ⴽⵓⵍⵛⵉ ⵉⵜⵛⴰ, ⵍⴽⵜⵔⴰ ⵖⵓⵔ ⴱⵍⵃⴰⵊⵊ, ⵉⵙⵙⵓ ⵙ ⵡⵓⴷⵉ! - ⵉⵙⵖⴰⵔ ⵉⵎⵏⴰⵢⵏ ⵄⵍⴰⵃⴰⵍ? - ⵉⵙⵖⴰⵔ ⵜⵏ! ⴰⴳⴳⵯⴷ ⵎⴱⴰⵕⴽ ⵉⵙⵖⴰⵔ ⵜⵏ! ⵇⵇⴰⵃ ⵉⵎⴷⴷⵓⴽⴽⵯⴰⵍ ⵏⵏⵙⵏ ⵅⴷⵎⵏ ⴰⵙⵏ ⴷ, ⵅⴰⵙ ⵍⴰⵀⵍ ⵏⵏⵙⵏ ⴰⴷ ⵉⴳⴰⵏ ⵍⵄⵓⵕⴹⵜ! ⴰⴳⴳⵯⴷ ⵢⵓⵏ ⵏⵏⴰ ⵉⵖⵉⵏ ⴰⴷ ⵜⵏ ⵉⵄⴰⵡⵏ ⴰⴳⴳⵯⴷ ⵙ ⵓⵢⴷⴷⵉⴷ ⵏ ⵡⴰⵎⴰⵏ! ⴰⵢⵡⴰ ⵎⴰ ⵙ ⵇⵇⵉⵎⵏ ⵖⵔ ⵃⴷⴷ! ⵍⵍⴰⵏ ⵙ ⵓⵢⵏⵏⴰ ⵏⵏⵙⵏ! - ⵉⵡⴰ, ⵢⴰ ⵃⵏⵏⴰ, ⵏ ⵜⵉⵎⵖⵔⵉⵡⵉⵏ! ⴷⴷⴰⵏ ⵎⴷⴷⵏ ⵍⵍⴰ ⵉⵙⵙⵏ ⵜⵜⵀⵔⴱⴰⵍⵏ! ⴰⵀⴰ ⵎⴰⵏⵉ ⴰⵙ ⵜⵜ ⵉⴽⵎⵎⵍ ⵎⴱⴰⵕⴽ, ⴰⵍⵍⵉⴳ ⵜⵛⴰⵏ ⵎⴷⴷⵏ ⵙⵡⴰⵏ, ⵜⴰⵡⴹ ⵍⵓⵇⵜ ⵏ ⵍⵖⵕⵎ; ⵎⴷⴷⵏ ⵔⴰⵏ ⴰⴷ ⵖⵔⵎⵏ, ⴷⴰ ⵏⵜⵜⴰ ⵉⵣⴰⵢⴷ ⴷⴰ ⵉⵏⵏⴰ ⴰⵙⵏ: ( 280 ) « ⵙⵙⴽⵏⴹⵖ ⴷⵉⵙ ⵉⵖⵙⴰⵏ ⵏ ⴱⴰⴱⴰ ⵃⵏⵉⵏⵉ, ⴰ ⵏⵜⵜⴰⵏ ⵓⵔ ⵓⵎⵉⵥⵖ ⵛⴰ ⵏ ⴳⵔⴽ ⵏ ⵃⴷⴷ. - ⵍⴰ ⵍⴰ ⵉⵃⵎⵓⴷⵏ ⵍⵍⴰ ⵙⵙⵖⵔⴰⵎⵏ ⵡⵉⵏⵏⴰ ⵜⵛⴰⵏⵉⵏ, ⴰⵀⴰ ⵡⵏⵏⴰ ⵓⵔ ⵉⵖⵔⵉⵎⵏ ⵅⴷⴷ ⴰⴷ ⵉⵔⵡⵍ, ⵍⵍⴰ ⴰⵙ ⵜⵜⴳⴳⵏ ⵍⴼⴹⵉⵃⵜ ⵙ ⵉⵣⵍⴰⵏ. ⴰⵊⵊ ⴽⵎⵎⵉⵏⵜ ⵉⵇⵎⵎⴰⵕⵏ ⵏⵏⴰ ⵙ ⵖⵉⴼⵉ, ⴽⵓⵍⵛⵉ ⵖⵓⵔⵙⵏ ⵍⵍⴰ ⵉⵏⵣⵣ! ⵍⴰ ⵜⵉⵍⵍⵊⵓⴷⵜ ⵍⴰ ⵜⴰⵎⵇⵇⵕⴰⵏⵜ! - ⴳ ⵎⴰⴷ ⴳⴰⵏⵜ ⵜⵄⵢⵢⴰⵍⵉⵏ ⴰⴷ ⵏⵏⴰ ⴷ ⵉⵡⵉⵏ? ⵥⵉⵍⵏⵜ ⵛⴰ ⴰⴷ ⴱⵄⴷⴰ ⵚⴱⵃⵏⵜ ⵛⴰ? - ⵉⵡⴰ ⴷ ⵜⵄⵢⵢⴰⵍⵉⵏ! ⵓⵔ ⵏⵏ ⵓⵊⵊⵉⵏⵜ ⵛⴰ, ⵍⴰ ⵉⵍⵇⴹⴹ ⵍⴰ ⵉⵙⵙⵉⴼⴹⵜ ⵄⴰⴷ ⵜⵉⵙⵍⵉⵜ ⵏ ⴱⵍⵃⴰⵊⵊ ⵜⵓⵡⵉ ⵜⵜ ⵉⴷ ⴳ ⵜⵉⵏ ⵎⴱⴰⵔⴽ. ⵀⵉ ⵎⴰⴷ ⴷ ⵓⵡⵉⵏⵜ? ⵓⵡⵉⵏⵜ ⴷⴷ ⴽⴰ ⴰⴱⵄⴷⴰ? ⵉⵜⵜⵅ ⵏⵏⴰⵏ ⵉⵢⵉ ⵜⵜⴰⵎⴰⵏ ⵏⵏⵙⵏⵜ ⴰⴷ ⴱⵄⴷⴰ ⵉⵖⵍⴰ! - ⴰⵃⵃⵉ, ⴰⴷ ⵓⵔ ⵜⵜⵙⴰⵍ, ⴳⴰⵏⵜ ⵟⴰⵟⵚⴰ! ⴳⴰⵏⵜ ⵟⴰⵟⵚⴰ! ⴳⴰⵏⵜ ⵄⵓⵇ! ⵜⵜⴰⵎⴰⵏ ⵍⵍⴰ ⵖⵉⴼⵙ ⵜⵜⵎⵄⴰⵏⴰⴷⵏ ⵎⴷⴷⵏ; ⴰⴷⴷⴰⵢ ⴷ ⵜⴷⴷⵓⵜ ⵖⵔ ⵜⵉⵏ ⵍⵄⵏⴰⵢⵜ ⴷ ⵜⵎⵖⵔ, ⵓⵔ ⴷⴰ ⵜⵜⴰⴼⴰⴷ ⵅⴰⵙ ⵍⵃⵙⴰⵢⵎ! ⵉⵡⴰ ⴰⴷ ⴱⵄⴷⴰ ⵢⵍⵍⵉⵙ ⵏ ⵄⵍⵉ ⵓ ⵄⵙⵙⵓ, ⵓⵔ ⵏⵏ ⵜⵓⵊⵊⵉ ⵛⴰ! ⵉⵍⵍⴰ ⵖⵓⵔⵎ ⵍⵓⵅⴱⴰⵕ! - ⵉⵢⵢⵉⵀ! ⴰⵎⵎ ⵢⵍⵍⵉⵙ ⵏ ⵄⵍⵉ ⵓ ⵄⵙⵙⵓ ⴰⵎⵎ ⵜⵉ! ⵎⵎⴰⵅ ⵎⴰ ⵔⴰⴷ ⴰⵡⵉⵏⵜ? ⴷⴷⴰⵏⵜ ⴷ ⵍⵍⴰ ⵜⵛⵢⵢⴰⵔⵏⵜ, ⴽⵓⵍ ⵢⵓⵜ ⵙ ⵜⵢⵔⵜⵉⵍⵜ ⴷ ⵜⴰⵙⵙⵏⴷⵓⵇⵇⵜ! ⴰ ⵍⵄⵣⴰ! ⵎⵎⴰⵅ ⵉⵎⵎⵓⵜ ⴰⵙ ⵡⵓⵍ ⵉ ⵉⵟⵟⵓ ⵄⵍⵉ ⴰⵏⵛⵜⵉ ⴰⵍⵍⵉⴳ ⵓⵔ ⵜⵢⵉ ⵛⴰ ⵉ ⵢⵍⵍⵉⵙ ⵜⴰⵏⵉⵍⴰ ⵏ ⵜⵄⵢⵢⴰⵍⵉⵏ? ⴰ ⵕⵃⵃⵓ, ⴰ ⵎⴻⵎⵎⵉ, ⵎⴰⵜⵜⴰ ⵟⴰⵟⵚⴰ ⴰⴷ! ⵉⵀ! ⵓⵔ ⵉⵅⵚⵚⵏ ⵅⴰⵙ ⵜⴰⵙⵙⵏⴷⵓⵇⵇⵜ! ⵎⴰⴷ ⴷⵉⴳⵙ! ⵉⵙⵍⵍⵉⵡⵏ! ⴰ ⵢⵎⵎⴰ, ⵛ ⵉⵢⵉ ⵜⵓⵟⵟⵓⴱⵜ! - ⵎⴰⴷ ⵉⵢⵉ ⵉⵛⴰⵏ ⵜⵓⵟⵟⵓⴱⵜ? ⴰⵙ ⵜⵜ ⵉⴷ ⴱⴱⵉⵖ ⵙⴳⵉⵢⵉ! - ⵉⵡⴰ ⵛ ⵉⵢⵉ ⵜⵉⵢⵍⵉⵜ! - ⴰⵢⵀ! ⵉⴹ ⵍⵍⵉ ⴷ ⵜⵉⵢⵍⵉⵜ, ⴰⵙⵙ ⴰⴷ ⴷ ⵜⵉⵢⵍⵉⵜ! - ⵍⴰ! ⵛ ⵉⵢⵉ ⵜⵉⵢⵍⵉⵜ! - ⴰ ⵅⴰⵍⵉ, ⴼⴼⵖ ⵙⵖⵉⴼⵉ ⴰⴷ ⵜⵅⵓⵎⵎⵕⵜ ⵢⵓⵏ ⵍⵡⴰⵛⵓⵏ! ⵎⴰⴷ ⴽ ⵢⴰⵖⵏ ⵜⵙⴽⴰⵡⵜ ⵉⵢⵉ! ⴰ ⵍⴰⵜⵉⴼ, ⵓⵔ ⵉⵢⵉ ⵜⵜⴰⵊⵊⴰⵜ ⴰⴷ ⵙⵙⴼⵍⴷⵖ ⵙ ⵉⵖⵚⴰⵏ ⵉⵏⵓ, ⴰ ⵍⵄⵣⴰ ⴰⴷ. ⴰⵎⵛ ⵉⴹ ⴰⴷ ⵉⴽⴽⴰⵍ ⵎⵓⵃⴰⵏⴷ ⵍⵍⴰ ⵉⵙⵙⵢⵍⵉ ⵜⴰⴼⵓⵛⵜ ⵉⵏⵓ! ⵎⵉⵍⵎⵉ ⴰ ⵔⴰⴷ ⵜⴰⵡⴹ ⵍⵓⵇⵜ ⵏ ⵙⵙⴽⵡⵉⵍⴰ ⴰⴷ ⵀⵏⵏⴰⵅ! - ⴰⵃⵃⵉ! ⵓⵔ ⵖⵓⵔⵎ ⵍⵅⴱⴰⵕ? ⵜⴽⴽⵔ ⴼⴰⴹⵎⴰ ⵕⵃⵃⵓ ⴰⴱⵄⴷⴰ ⵙ ⵍⵄⴹⵕ! - ⴰ ⵎⵓⵃⵏⴷ, ⴰ ⵎⴻⵎⵎⵉ, ⵎⴰⵜⵜⴰ ⵍⵊⵉⵍ ⴰⴷ! ⵜⴰⴱⵏⵄⵙⵙⵓⵜ ⴰⴱⵄⴷⴰ ⵓⵔ ⴷⵉⵙ ⵛⵛⴽⴽ! ⵉⵡⴰ ⴱⴰⵣⵣ! ⵓⵔ ⵉⵙⵀⵉⵍⵍ ⵅⴰⵙ ⵉⵄⴷⴷⵉⵙⵏ! ⵉⵏⵏⴰ ⴰⵎ ⵍⵍⴰ ⵜⵙⵓⵃⵍ ⵜⵏ ⵙⴳⵉⵙ ⵜⵜⵉⵏⵉⵜ; ⵛⵃⴰⵍ ⵏ ⵍⴼⵛⵓⵛ ⵛⵃⴰⵍ! ⵓⵔ ⴷⴰ ⵜⵅⴷⴷⵎ ⵓⵔ ⴷⴰ ⵜⵔⴷⴷⵎ! - ⴰⵢⵏⵏⴰ ⵏ ⵄⵉⵛⴰ ⵄⵍⵍⴰ ⵜⴰⵎⵖⴰⵔⵜ ⵏⵏⵙ ⴰⴷ ⵉⵃⵚⵍⵏ! - ⵍⴰ ⵍⴰ ⴼⵉ ⵃⵇⵇ ⵍⵍⴰⵀ! ⴰⴳⴳⵯⴷ ⵄⵉⵛⴰ ⵄⵍⵍⴰ ⵓⵔ ⴷⴰ ⵜⵜ ⵜⵜⴰⵊⵊⴰ ⴰⴷ ⵜⴳ ⴰⴼⵓⵙ ⴳ ⵡⴰⵎⴰⵏ! ⵉⵡⵉⵏ ⴷ ⴰⴽⵙⵓⵎ, ⵓⵡⵉⵏ ⴷ ⵍⴼⵉⴽⵉⵜ, ⵓⵡⵉⵏ ⴷ. ⵉⵡⴰ ⴷ ⴰⴷ ⴰⵙⵏ ⵉⵄⵊⴱ ⵍⵃⴰⵍ ⵉ ⴰⵢⵜ ⵓⵅⴰⵎ ⵏⵏⵙ; ⵍⵍⴰ ⵜⵅⵚⵚ ⴰⵙⵏ ⴷⴷⵔⵔⵉⵜ! - ⵉⵡⴰ ⵍⵍⴰ ⵙⵅⵚⵕⵏ ⵜⵜ! ⵛⴰ ⵏ ⵍⵀⴱⴰⵍ ⵛⴰ! ⵉⵎⵉⵍ ⵜⴰⵃⵃⵕⴰⵎⵜ ⴰⴷ ⵜⴳⴰ! ⵡⴰⵍⵓ! ⵛⴰ ⵓⵔ ⴰⵙ ⵜⵙⵙⵉⵏ; ⴰⵙⵙ ⵏⵏⴰ ⴰⴷ ⵜⴷⴷⴰ ⵜⵎⵖⴰⵔⵜ ⵏⵏⵙ, ⵜⵏⵏⴰ ⴰⵎ: ⵎⵔ ⵉⴷⴷ ⵉ ⵓⵄⴷⴷⵉⵙ ⵏⵏⴰ, ⴰ ⵏⵜⵜⴰ, ⵎⴰⴷ ⴰⵙ ⵜⵜ ⴰⵊⵊⵏ ⵖⵓⵔⵙⵏ. ⵉⵡⴰ ⵇⵇⵍⵉ ⵏⵜⵜⴰⵜ ⴰⴷ ⵜⵜ ⵉⵅⵟⴰⵕⵏ! ⴰⴷ ⵓⵔ ⵖⵉⴼⵙ ⵜⵜⴰⵡⵉ ⴽⵎⵎ ⴳ ⵜⵙⵃⵃⴰⵔⵜ ⵏⵏⴰ! - ⴰⵢⵡⴰ ⵛⵛⵉ ⴳ ⵓⵔⵢⴰⵣ ⵏⵏⵙ ⴰⴳ ⵉⵍⵍⴰ! - ⴳ ⵛⵃⴰⵍ ⵏⵏⵙ ⴰⵢⴰ? - ⵛⵀⵕ ⵏⵏⵙ ⵡⵉⵙ ⵙⵉⵏ ⴰⵢⴰ! ⴰⵙⵙ ⵏⵏⴰ ⴰⵍⵍⵉⴳ ⵙⵙⵉⵢⴰ ⵉⴽⴽⴰ ⵛⵛⵔⵉⴼ ⴰⴷ ⵜⵜ ⵜⵓⵡⵉ ⵜⵎⵖⴰⵔⵜ ⵏⵏⵙ ⵜⵜⵣⵓⵔ! - ⵜⴰⴱⵏⵄⵙⵙⵓⵜ ⴷ ⵙⵉⴷⵉ ⵢⵓⵙⴼ ⴰⴷ ⴰⵙ ⵉⵢⵢⴰⵏ ⴰⴳⴳⵯⵔⵏ; ⵍⵍⴰ ⵜⵄⵍⵍⵎ ⴰⵙ ⵜⴰⵎⵖⵔⵓⵙⵜ. ⵉⵡⴰ ⵙⴳ ⵉⵡⵉⵣ ⴷ ⵓⵡⵡⴹⵏⵜ, ⵔⴳⴳⵯⵍⵏ, ⵀⴰ ⵜⵏ ⵖⵔ ⵣⵣⴰⵡⵉⵜ, ⵀⴰ ⵜⵏ ⵖⵔ ⵎⵓⵍⴰⵢ ⵄⵇⵓⴱ! - ⵉⵏⵏⴰ ⴰⵎ, ⴰ ⵃⵏⵏⴰ, ⵄⵓⴷⴰ ⴰⵎⵎ ⵓⴼⵓⵙ ⵏ ⵕⴱⴱⵉ ⴰⴷⴷⴰⵢ ⵜⴳ ⴰⵃⴼⵓⵔ ⵉ ⵃⴷⴷ. ⴰⵊⵊ ⵉⵢⵉ ⴽⵎⵎⵉⵏⵜ! ⵇⵇⴰⵃ ⵓⵔ ⴷⴰ ⵜⵜⵄⵏⴰⵇ ⵙ ⵡⵉⵏⵏⴰ ⴰⵙ ⵉⵛⴰ ⵃⴷⴷ! ⵓⵔ ⵜⵜ ⵉⴷ ⵓⵡⵉⵖ ⵏ ⵙⵙⵎⵉⴷⴰ ⴷ ⵍⵇⵇⴰⵍⴱ ⵏ ⵙⵙⵓⴽⴽⵯⵕ! ⴰⵍⵍⵉ ⵜⴷⴷⴰ, ⵜⵏⵏⴰ ⴰⵙⵏⵡⴰⵏⵏⵉ ⵏ ⵏⴹⴰⴹⴰⵏⵜ, ⴼⴽⵖ ⴰⵙ ⵜⴰⴼⵓⵍⵍⵓⵙⵜ ⴷ ⵓⵖⵕⵕⴰⴼ ⵏ ⵡⵓⴷⵉ ⴷ ⵜⵅⵕⵉⵜ ⵏ ⵙⵙⵎⵉⴷⴰ ⴷ ⵍⵇⵇⴰⵍⴱ ⵏ ⵙⵙⴽⴽⵯⵕ! ⴰⵍⵍⵉⴳ ⵜⴷⴷⴰ, ⵜⵏⵏⴰ ⴰⵙⵏⵜ ⴰⵎⵎ ⵜ ⵜⴽⴽⴰ ⵙⴳ ⵉⵚⵏⴹⴰⵍ. ⴰⵢⵡⴰ ⵓⵔ ⴷⴰ ⵉⵜⵜⵄⵏⴰⵇ ⵃⴷⴷ ⴰⵙⵙ ⴰⴷ! ⴰⵢⴰ ⵉⴷⴷⴰ ⵍⵃⴰⵍ, ⴰ ⵃⵏⵏⴰ, ⵇⵇⴰⵃ ⵓⵔ ⵖⵉⵔⵙ ⵏⴹⵕⵏ; ⵄⴰⴷ ⴰⴷ ⵙⵙⵃⵔⵛⵖ ⵢⵓⵏ ⵓⵥⵡⴰⴹ ⵏ ⵉⵎⵏⵙⵉ! ⴷⴷⵉⵖ ⴰⴷ ⴷⴷⵓⵖ ⵃⵔⴰ ⴰⴷ ⵉⴳ ⵛⴰ! ⵍⵍⴰⵀ ⵉⵀⵏⵏⵉⴽ! ⵜⴷⴷⴰ ⵃⵍⵉⵎⴰ ⴰⴷ ⵜⴰⵢⵎ, ⵓⵔ ⵙⵙⵉⵏⵖ ⵜⵓⵡⵡⴹ ⵎⴰ ⵜⵜⵙⵓⵍ. ⴰⵃⵃⵉ! ⴳ ⵛⵡⵉⵜⵜ ⴰⴷ ⵜⵜⵓⵖ ⴰⵢⵏⵏⴰ ⵖⵔ ⵎⵉ ⴷ ⴷⴷⵉⵅ; ⵛⴼ ⵉⵢⵉ ⵜⴰⵍⵍⵓⵏⵜ ⴰⴷ ⵙⵙⵉⴼⴼⵖ, ⴰⴷ ⴰⵎ ⵜⵜ ⵉⴷ ⴹⵕⵕⵖ! - ⵀⴰⵎ ⵜⵜ ⴰⵢⵏⵏⴰ ⵏⵏⵉⵢ ⵏ ⵉⵅⴼ ⵏⵏⵎ, ⴰⵥⵥⴹ ⵖⵉⵔⵙ; ⵍⵄⴰⵕ ⵏⵏⵎ, ⴰ ⵍⵃⴱⵉⴱⴰ, ⵔⴰⵔ ⵉⵢⵉ ⵜⵜ ⵉⴷ ⴰⵙ ⵜⵜ ⵃⴷⴰⵊⵊⵖ ⴰⵙⴽⴽⴰ ⵚⵚⴱⴰⵃ! ⵀⴰⵛ ⵢⴰⵎⵏⴰ ⵃⴷⴷⵓ ⴷⵉⵖ! - ⵢⴰⵎⵏⴰ ⵍⵃⵙⵏ! ⴰ ⵢⴰⵎⵏⴰ ⵍⵃⵙⵏ! ⵎⴰⵏⵉⴳ ⵜⵍⵍⵉⵜ? - ⴰ ⵉⵡⴰ ⵣⴰⵢⴷ, ⵀⴰ ⵉⵢⵉ! - ⴰ ⵎⵙⵍⵅⵉⵔ! - ⵎⵙⵍⵅⵉⵔ! - ⵉⵙ ⵖⵓⵔⵎ ⵛⴰ ⵏ ⵜⵉⵙⵏⵜ, ⵓⵔ ⵓⴼⵉⵖ ⵎⴰⵙ ⵔⴰⴷ ⵎⵍⵍⵃⵖ ⵉⵎⵏⵙⵉ! ⵉⴹ ⵍⵍⵉ ⴰⴷ ⵙⵖⵉⵖ ⵛⴰ ⵥⴹⵉⵖ ⵜ; ⴰⵖ ⴰⵎ ⵛⵡⵉ ⵙⴳⵉⵙ. - ⵀⵉ ⵛⴰ ⵏ ⵜⵏⵜⵓⵏⵜ! ⵃⵔⴰ ⵢⵓⴹⵖ ⴷ, ⴷⴷⵉⵖ ⵄⵣⵣⴰⵖ ⴰⵢⵜ ⵄⴱⴷⵔⵔⵃⵎⴰⵏ. - ⵍⴰ ⴰ ⵃⵏⵏⴰ! ⴳⴳⵓⵍⵍⵉⵖ ⴰ ⵛⴰ ⵏ ⵜⵏⵜⵓⵏⵜ ⵓⵔ ⵜⵜ ⵛⵉⵖ ⵉ ⵃⴷⴷ, ⵍⵍⴰ ⵉⵢⵉ ⵜⴼⴼⵖ ⴳ ⵍⵡⴰⵛⵓⵏ; ⵔⴰⵄⴰ ⵣⵉⵖ ⵜⴰⵎⴰⵔⵜ ⵏ ⵕⵃⵃⵓ ⵍⵍⴰ ⵜⴼⵍⵓⴼⵍ ⵙ ⵉⵃⴱⵓⴱⵏ. - ⴰ, ⴳ ⴰⵙ ⴰⴽⴼⴼⵓⵙ, ⴷⵖⵉⵢⴰ ⴰⴷ ⴰⵙ ⵜⵊⵊⵉ! ⴰⵙⵙⴰⵍⴰⵎ ⵓⵄⵍⵉⴽⵓⵎ! _ ⵙⵙⴰⵍⴰⵎ ⵓⵕⴰⵃⵎⴰⵜⵓ ⵍⵍⴰⵀ! _ⵎⴰⴷ ⵜⵄⵏⵉⵜ, ⵍⴰⴱⴰⵙ! _ⵉⵡⴰ ⵏⵍⵍⴰ, ⵀⴰ ⵎⵓⵃⴰⵏⴷ ⵓⵍⵄⵕⴱⵉ! ⵍⵍⴰ ⵏⴷⵃⵃⵉ ⵉⵖⵙⴰⵏ, ⵎⴰ ⵔⴰⴷ ⵏⴳ! ⴷⴷⵓⵏⵉⵜ ⵉ ⵉⴷ ⴱⴰⴱ ⵏⵏⵙ, ⵡⵉⵏⵏⴰ ⵟⵕⵕⵃⵏⵉⵏ! ⵉⵡⴰ ⵎⴰ ⵔⴰⴷ ⵉⴳ ⴱⵏⴰⴷⵎ! ⵉⵙ ⵜⵙⵡⵡⵇⵜ ⴰⵙⵙ ⴰⴷ ⵙⵙⵓⵇ? _ ⵉⵡⵉⵖ ⵢⵓⵏ ⵉⵅⴼ ⵏ ⵡⵍⵍⵉ, ⵣⵣⵏⵣⵖ ⵜ. _ ⴰⴷ ⵉⴱⵄⴷ ⵍⵃⴰⵍ, ⴰ ⵅⴰⵍⵉ; ⵡⵏⵏⴰ ⵓⵔ ⵖⵓⵔ ⵉⵍⵍⵉ ⴳ ⵎⵉ ⴳ ⵔⴰⴷ ⵉⵏⵉⵢ, ⵓⵔ ⴷⵉⴳⵙ ⵎⴰ ⵔⴰⴷ ⵉⴷⴷⵓⵏ ⴰⵔ ⵉⵎⵓⴹⴰⵍ ⵉⵏⵏ! _ ⵅⵉⵔ ⵕⴱⴱⵉ ⵏ ⴰⵢⵜ ⵄⵎⵕ ⴰⴷ ⴷⵉⵏⵏ ⴰⵏⵏⴰⵢⵖ. ⵍⵍⴰ ⵜⵜⵄⴰⵕⴰⴹⵏ ⵉ ⵟⵟⵓⵎⵓⴱⵉⵍ, ⵓⵎⴰ ⴰⴳⴳⵯⴷ ⵜⴰⴱⵀⵉⵎⵜ ⵡⵏⵏⴰ ⵜⵜ ⵉⵏⵉⵏ ⴷ ⴰⴷ ⵉⴼⴼⵉⴷⴳ. - ⵉⵡⴰ ⵎⴰⴷ ⵉⵖⵍⴰⵏ, ⵎⴰⴷ ⵉⵕⵅⵚⵏ? _ ⵉⵡⴰ ⴽⵓⵍ ⵍⵃⴰⵊⵜ ⵙ ⵜⵜⴰⵎⴰⵏ ⵏⵏⵙ. _ⵛⵃⴰⵍ ⴰⴷ ⵓⵡⴹⵏ ⵉⵔⴷⵏ? ⵉⵡⴰ ⵜⵜⵟⵕⵃⵜⵏ ⵛⵡⵉ ⵙⵙⵓⵇ ⴰⴷ! ⵍⵍⴰⵏ ⵙⴳ ⵎⵢⵢⴰ ⴷ ⵜⵎⴰⵏⵢⵉⵏ ⴰⵔ ⵎⵉⵜⴰⵢⵏ ⴷ ⵄⵛⵕⴰ; ⵙⵙⵓⵇ ⵉⵏⵏ ⵓⵡⴹⵏ ⴰⵔ ⵎⵉⵜⴰⵢⵏ ⴷ ⵕⴱⵄⵉⵏ! ⵡⴰⵍⴰⵢⵏⵏⵉ ⵇⵇⵏ ⵜⵉⵟⵟ ⵏ ⵜⴼⵓⵛⵜ! ⵜⵓⵡⵡⵜ ⴰⴽⴽⵯ ⵕⵕⵃⴱⵜ ⵏⵏⴰ ⴰⵍⵍⵉⵖ ⵓⵔ ⵜⵓⴼⵉ ⵎⴰⵏⵉ ⵖⵔ; ⴰ ⵜⴰⴷⴳⴳⵯⴰⵜ ⴷⴰ ⵜⵜⵡⴰⵔ ⴰⵢⵏⵏⴰ ⵓⵔ ⵉⵍⵍⵉ! _ ⵉⴷ ⴱⵓ ⵍⵎⵉⵣⴰⵏ? ⵛⵉ ⵜⵍⴰⵜⵉⵏ ⵏ ⵍⴽⴰⵎⵢⵓ ⴰⴷ ⴳⵉⵙ ⴰⵏⵏⴰⵢⵖ. - ⵉⵡⴰ ⵉⴷ ⴹⴹⵕⴰ ⴷ ⵜⵎⵥⵉⵏ ⴰⵎⵎ ⵉⵣⴰⵢⴷⵏ ⵛⵡⵉ! _ⵛⵃⴰⵍ ⴹⴹⵕⴰ? _ⴹⴹⵕⴰ ⴰⵔ ⵎⵢⵢⴰ ⴷ ⵅⵎⵙⴰ ⵓⵜⵍⴰⵜⵉⵏ! ⵜⵓⵎⵥⵉⵏ ⵎⵉⵢⵢⴰ, ⵎⵉⵢⵢⴰ ⴷ ⵄⵛⵕⴰ ⵎⵛ ⵓⵔ ⵏⵏ ⵓⵊⵊⵉⵏⵜ ⵛⴰ! _ⵉⵡⴰ ⵕⴱⴱⵉ ⴰⴷ ⴰⵖ ⵉⵛ ⵔⵔⵅⴰ! ⵉⵡⴰ ⴽⵢⵢ, ⴷⴰⴱⴰ ⴰⴷ ⵜⵕⵡⵓ, ⴷⴰ ⵉⵄⴷⴷⵓ ⵍⵅⵉⵔ! _ⴰⵏⵏⴰⵢⵖ ⵜⵙⵖⵉⵜ ⴷ ⵛⴰ ⵏ ⵉⵎⴰⵙⵙⵏ! _ⵙⵖⵉⵖ ⴷ, ⵢⵢⵉⵀ, ⵉⵎⴰⵙⵙⵏ, ⵡⴰⵍⴰⵢⵏⵏⵉ ⵓⵔ ⵉⵢⵉ ⵄⵊⵉⴱⵏ ⴽⵔⴰ ⵇⴱⴰⵍⴰ; ⵓⵔ ⴷ ⵉⴽⵊⵉⵎ ⴽⵔⴰ ⵙⵙⵓⵇ! ⴽⵔⴰ ⵏ ⵕⴱⵄⴰ ⵏ ⵜⵎⴰⵙⵙⵉⵏ, ⴷⵖⵢⴰ ⵜⵜⵢⵉⵙⵢⵏⵜ. ⵉⵡⴰ ⵎⴰ ⵔⴰⴷ ⵉⴳ ⴱⵏⴰⴷⵎ! ⴰⴷ ⵉⵇⵛⵛⵕ ⵢⵓⵏ ⴰⴽⴰⵍ ⵓⵎⴰ ⵎⴰⵜⵜⴰ ⵏ ⵜⵄⵕⵕⴰⴹⵜ ⵏⵏⴰ ⵎⵉ ⵏⵖⵉⵖ ⵡⴰⵍⴰ ⵏⵉⵙⵙⵉⵏ ⴰⵙ! ⴰⴳⴳⵯⴷ ⵏⴽⴽ ⴷ ⵓⵎⴰⴷⴷ ⴰⴷ ⴷ ⵓⵡⵉⵖ ⵍⵃⵙⵏ ⵓⵟⵟⴰⵍⴱ, ⵉⵕⵇⵇⵄ ⵉⵢⵉ ⴰⵢⵏⵏⴰ ⵉⴽⵛⵛⵓⴹⵏ; ⵡⵍⵍⴰⵀ ⵅⴰⵙ ⵙⵜⵜⵉⵏ ⵔⵢⴰⵍ ⴰⴷ ⵙ ⵉⵢⵉ ⵉⵊⴱⴷ! ⴰⵀⴰ ⵓⵔ ⵉⵄⵏⵉⵇ! _ ⴰⴳⴳⵯⴷ ⵡⵉⴷ ⵉⵏⵓ, ⵎⵉⵢⵢⴰ ⴷ ⵄⵛⵕⴰ ⴰⴷ ⴷⵉⴳⵙⵏ ⵛⵉⵖ! ⵉⵡⴰ ⴰⴷ ⵢⴰⵎⵥ ⴱⵏⴰⴷⵎ ⴰⴼⵓⵙ. ⴰⴷ ⵉⵙⵡⵡⵇ ⴷ ⵍⵇⵇⴰⵢⴷ? _ ⵉⵍⵍⴰ ⴷⵉⴳⵙ ⵏⵜⵜⴰ ⴷ ⵍⴽⵓⵏⵟⵕⵓⵍ ⴷ ⵓⴽⵜⴰⵜⴱⵉ! ⵍⵍⴰⵏ ⴰⴽⴽⵯ ⴷⵉⴳⵙ ⴰⵢⵜ ⵃⵙⴰⵢⵏ, ⵍⵍⴰ ⵉⵃⴹⴹⵕ ⵜⵏ ⵉⵏⵏ ⵓⵎⵅⴰⵣⵏⵉ, ⴽⵍⴰⵏ ⴷⵉⴳⵙ, ⵍⵍⴰ ⵜⵛⵎⵎⴰⵛⵏ ⴰⵔ ⵜⴰⴷⴳⴳⵯⴰⵜ, ⵢⴰⴷⵔ ⴰⵙⵏ ⵖⵔ ⴼⴰⵙ, ⵇⵇⴰⵃ ⵓⵔ ⴷⵉⴳⵙⵏ ⵉⵙⴰⵍ ⵃⴷⴷ! ⵎⴰⴷ ⵎⵙⵉⵏ? ⵎⴰⵏ ⴷⵉⴳⵙⵏ? _ ⵃⵎⵎⵓ ⴷ ⵉⵟⵟⵓ ⵕⵃⵃⵓ, ⵄⵍⵉ ⵏ ⴱⵏ ⵄⵍⵉ, ⴰⵔⵔⴰⵡ ⵏⵏⵙⵏ, ⵄⵍⵉ ⵓⵃⵎⵎⵓ! _ ⴷ ⴳ ⵎⵉ? _ ⵉⵏⵏⴰ ⴰⴽ, ⴰ ⵅⴰⵍⵉ, ⵉⵥⵉⵏ ⴳ ⵛⴰ ⵏ ⵍⵃⴷⴷ ⵏ ⵜⵎⴰⵣⵉⵔⵜ, ⵎⵡⴰⵜⵏ ⵙ ⵉⵖⵣⵣⴰⵍⵏ, ⵉⵜⵜⵓⵎⵔⵣ ⵃⵎⵎⵓ ⵉ ⵉⵟⵟⵓ ⵕⵃⵃⵓ … ⴰⵢⵡⴰ ⴰⴳⴳⵯⴷ ⴽⵉⵢⵢ ⴰⵢⵜ ⵃⵙⴰⵢⵏ ⵍⵍⴰ ⵣⵖⵍⵍⵏ, ⵇⵇⴰ ⵓⵔ ⵙⵙⵉⵏⵏ ⵉⵍⵍⴰ ⵍⵎⵅⵣⵏ ⵎⴰⴷ ⵓⵔ ⵉⵍⵍⵉ. - ⵉⵡⴰ ⴷⴷⴰⵏ ⵖⵔ ⵍⵀⴰⵡⵉⵢⵜ; ⴰⴷ ⵜⵏ ⵉⵡⵡⵜ ⵍⵇⵇⴰⵢⴷ ⵙ ⵍⵃⴱⵙ ⴰⵔ ⴷ ⵖⴱⵓⵏ, ⵍⴰ ⵡⵉⴷ ⵍⴰ ⵡⵉⵏⵏ! - ⵀⵢⵢ! ⵎⴰⵜⵜⴰ ⵜⴰ ⵏⵏⴰⵍⵏ ⵜⵜ; ⵓⵔ ⵜⵏ ⵉⵜⵜⴼⵓⴽⴽⵓⵏ ⵅⴰⵙ ⵏⵉⵜⵏⵜⵉ ⵎⵛ ⴰⵙⵏⵜ ⵕⵥⵎⵏ! ⵍⴰ ⵍⴰ! ⵓⵔ ⵜⵏ ⵉⵏⴼⵉⵄ ⴷⵖⵉ, ⵍⴰ ⵛⴼⴰⵏ ⵍⴼⵍⵓⵙ ⵍⴰ ⵇⵇⵉⵎⵏ; ⵢⵓⵡⵡⴹ ⵡⴰⵡⴰⵍ ⵖⵔ ⵍⵎⵓⵔⴰⵇⵉⴱ, ⵉⵢⵢⴰ ⵃⵎⵎⵓ ⵙⵙⵔⵜⵉⴼⵉⴽⴰ ⵙⴳ ⵖⵓⵔ ⵓⴹⴱⵉⴱ ... - ⵉⵡⴰ ⴷⴷⴰⵏ ⴰⵢⵜ ⵎⴰⴽ ⴰⴷ ⵎⵅⴰⴹⴰⵏ ⴷ ⵜⵃⵔⵔⴰⵜ! - ⵃⵔⴰ ⴰⴷ ⵉⵙⵉⵏⵏ ⵉⵙ ⴷⵣⵔⵉ ⵍⵓⵇⵜ ⵏ ⵜⵔⵢⴰⵣⵜ ⵓⵔ ⵜⵇⵇⵉⵎ! ⴳ ⵎⴰⵏⵉ ⴳ ⵏⵏ ⴼⴼⵖⵏ ⴰⵢⵜ ⵃⵔⴽⴰⵜ ⵏⵉⵜⵜⵏⵉ ⴷ ⵓⵕⵓⵎⵉ ⴳ ⵜⵎⴰⵣⵉⵔⵜ ⵏⵏⴰ? - ⵍⵍⴰ ⵜⵜⵙⵓⵍ ⴷⴷⵄⵓⵜ ⴰⵎⵛⵉⵙ, ⴰⵕⵓⵎⵉ ⵉⵜⵜⵉⵏⵉ ⴰⵙⵏ: « ⵙⵖⵉⵖ ⵙⴳ ⵢⵓⵏ », ⵏⵉⵜⵜⵏⵉ ⵜⵜⵉⵏⵉⵏ ⵅⴰⵙ ⵉⵙ ⴰⵙ ⴽⵔⴰⵏ ⵛⴰ, ⵓⵔ ⵉⴷⴷ ⴰⴳⴳⵯⴷ ⵇⵇⴰⵃ; ⵉⵡⴰ ⵍⵍⴰ ⵢⴰⵏ ⴰⴷ ⴰⵙⵏ ⴷ ⵉⵙⵙⵓⴼⵖ ⵍⵎⵅⵣⵏ ⵍⵎⵓⵀⵏⴷⵉⵣ ⴰⴷ ⴰⵙⵏ ⵉⵄⴱⵔ. ⴰⴳⴳⵯⴷ ⴽⵉⵢⵢ, ⴰⵢⵜ ⵃⵔⴽⴰⵜ ⵏⵏⴰ, ⵉⵏⵜⵍⴰⴼ, ⵓⵔ ⵓⵟⵟⵓⵏ ⴷ ⵓⵕⵓⵎⵉ ⵎⵉⵄⴰⴷ ⴰⵔ ⴷ ⵜⵏ ⵉⵙⵙⵓⴼⵖ ⵣⵉ ⵜⵎⴰⵣⵉⵔⵜ! ⵡⴰⵍⴰⵢⵏⵏⵉ ⵡⵏⵏⴰ ⵉⵔⵣⴰⵏ ⵅⴼ ⵛⴰ, ⵍⵍⴰ ⵜ ⵉⵜⵜⴰⴼⴰ! - ⵍⵍⴰ ⵉⵄⵎⵎⵕ ⵜⵏ ⵙ ⵓⵎⵔⵡⴰⵙ, ⵍⴰ ⴰⵔⵢⴰⵣ, ⵍⴰ ⵜⴰⵎⵟⵟⵓⴹⵜ! ⴰ ⵎⴰⴷ ⴰⴽ ⵜⵜ ⵉⵢⵢⴰⵏ, ⵀⴰ ⵣⵣⵉⵜⵓⵏ, ⴰⵙⵙ ⴰⴷ, ⴳ ⵙⵙⵓⵇ! ⴰⴷ ⵓⵔ ⵇⵇⵉⵎⵏ ⴰⵙⵙ ⴰⴷ ⵉⵃⵎⵓⴷⵏ ⵥⵥⴰⴹⵏ ⵜ; ⵃⵔⴰ ⵡⵏⵏⴰ ⵉⵏⵇⵇⵔⵏ ⴷⵉⴳⵙⵏ ⵛⴰ ⵏ ⵜⵄⵍⵍⴰⴼⵜ, ⴷⴰ ⵉⵔⵡⵍ ⵙⵉⵙ ⵖⵔ ⵍⵎⵉⵣⴰⵏ! - ⴰ ⵉⵡⴰ ⵉⵏⵏⴰ ⴰⴽ ⵄⵍⴰⵃⴰⵍ ⴰⵔ ⴷⵉⴳⵙ ⵓⴼⴰⵏ ⵍⵖⵍⵍⵜ! ⵉⵖⵍⴰ ⵏⵜⵜⴰ ⵙⴳ ⵣⵣⵉⵜ ⵡⵏⵏⴰ ⵜ ⵉⵣⵣⵏⵣⵏ ⴰⵀⴰ ⵉⵙⵖ ⵜⵜ ⵣⵉ ⵙⵙⵓⵇ! ⴰ ⵏⵏⴰⵏ ⴰⴽ, ⴰ ⵃⵏⵉⵏⵉ, ⵍⵎⴰⴽⵉⵏⴰ ⵏⵏⴰ ⵏ ⵓⵕⵓⵎⵉ ⵜⵥⵉⵍ; ⴷⵉⴳⵙ ⴰⴷ ⵥⵥⴰⴹⵏ ⵇⵇⴰⵃ ⴰⵢⵜ ⵄⵎⵕ! ⵜⵓⴼ ⵏⵜⵜⴰⵜ ⵜⵉⵙⵉⵔⴰ ⴰⴷ ⵏⵏⵖ, ⵏⴽⴽⵏⵉ, ⵍⴰ ⴳ ⵓⵙⵏⵖⴷ ⵡⴰⵍⴰ ⴳ ⵓⵄⵚⴰⵕ! ⵍⵍⴰ ⴰⴽ ⵜⵙⵙⵓⴼⵓⵖ ⵢⵓⵜ ⵏ ⵣⵣⵉⵜ ⴰⵎⵎ ⴷⴷⵀⴱ. - ⵎⴰⵏⵉ ⴳ ..., ⵜⵙⵓⵍⴷ ⵓⵔ ⵜⵥⴹⵉⴷ? ⵍⴰ ⵍⴰ! ⵉⵙⵓⵍ ⴰⵖ ⴽⴰ ⵄⴰⴷ ⴰⴷ ⵜ ⵏⵏⵇⵇⵕ! ⵓⵎⵥⵖ ⴰⵎⵅⵉⴱ ⵏⵏⴰ ⵏ ⵍⵃⴱⵉⴱ, ⵉⵏⵇⵇⵔ ⵉⵢⵉ ⵢⵓⵏ ⵏ ⵄⵛⵕⴰ, ⵇⵇⴰⵃ ⴽⵓⵍⵛⵉ ⵉⵛⵍⵖ ⵜ, ⴽⵓⵍⵛⵉ ⵉⵄⵎⴰ ⵜ; ⴰ ⵕⴱⴱⵉ, ⵄⵎⵓ ⴰⵙ ⵜⵏⵜ. - ⴰ ⵣⵣⵉⵜⵓⵏ, ⵉⵅⵚⵚ ⴰⵙ ⵓⵙⵔⵔⴱ! - ⴰ ⵉⵡⴰ ⵎⴰⵏⵉ ⴳ ⵢⵓⵡⴹ ⴱⵏⴰⴷⵎ ⴰⴷ ⵜ ⵉⵙⵔⵔⴱ! ⴰ ⵜⴰⵏⵏⴰⵢⵜ ⵏ ⵉⵅⵍⵉⴳⴳⵏ ⵏⵏⴰ ⵖⵓⵔ ⴰⵢⵜ ⵊⴰⴱⵔ! ⵉⵏⵏⴰ ⴰⴽ, ⴰ ⵃⵏⵉⵏⵉ, ⵉⵍⵇⵇⵎ ⵜⵏ ⵢⵓⵏ ⴷⵉⴳⵙⵏ ⵓⴼⵉⵖ ⵜ ⵉⴷ ⵉⴹ ⵍⵍⵉ, ⵉⵙⵉⴽⴽ ⵉⵢⵉ ⴷ ⵓⴹⴰⵕ ⵙⵙⵉⵢⵉⵙⵙ, ⵍⵍⴰ ⵜⵏ ⵉⵜⵏⵇⵇⴰⵔ! - ⴰⴳⴳⵯⴷ ⴰⵢⵜ ⵎⵉⵎⵓⵏ ⵍⵍⴰ ⵍⵇⵇⵎⵏ ⵇⵇⴰⵃ ⵜⵉⵣⵎⵎⵓⵔⵉⵏ ⵏⵏⴰ ⴷⴰⵜ ⵏ ⵉⵅⴰⵎⵏ! ⵡⴰⵍⴰⵢⵏⵏⵉ ⵉⵏⵏⴰ ⴰⴽ ⵓⵔ ⵜⵥⵉⵍ ⴽⴰ ⵣⵣⵉⵜ ⵏⵏⴰ! ⵜⵃⵕⵕ ⵍⵍⴰ ⵜⵇⵇⴹⴰⵄ! ⴰ ⵙⵖⵉⵖ ⴷ ⴰⵙⵙ ⵏⵏⴰ ⵏ ⵙⵙⵓⵇ ⵢⵓⵜ ⵏ ⵍⴱⵟⵟⴰ ⵏ ⵣⵣⵉⵜ, ⵜⴳⴰ ⵙⴳⵉⵙ ⴼⴰⴹⵎⴰ ⵉ ⴽⵔⴰ ⵏ ⵓⴽⵙⵓⵎ, ⵡⵍⵍⴰⵀ ⵎⵛ ⵏⵖⵉⵢ ⴰⴷ ⵜ ⵏⵛⵛ, ⵉⵃⵕⵕ ⵍⵍⴰ ⵉⵜⵊⵢⵢⴰⴼ; ⴰⵢⵏⵏⴰ ⵏⵏⴰ ⵉⵛⴰⵢⴹⵏ, ⵍⵍⴰ ⵏⵓⵊⵊⴰ ⵜ ⴰⴷ ⵙⵔⵙ ⵏⴷⵀⵀⵏ ⵉ ⵍⴱⵀⴰⵢⵎ ⴷ ⵉⵡⴰ ⴰⴷ ⵙⵔⵙ ⴷⵀⵀⵏⵏ ⵍⵡⴰⵛⵓⵏ ⵜⵉⵎⵣⴰⵔ ⵏⵏⵙⵏ! ⵢⵓⵢⵢ ⵢⵓⵢⵢ ⵢⵓⵢⵢ! ... - ⵍⵍⴰⵀ ⵉⵙⵎⵎⵄⵏⴰ ⵅⵉⵔ! ⵎⴰⵜⵜⴰ ⵓⵢⴰ? ⵖⵓⵔ ⵎⵉ ⴰⵙⵖⵓⵕⵟ ⴰⴷ? - ⴰ ⵢⴰⵎⵏⴰ ⵃⵎⵎⵓ ⴰⴷ ⵖⵓⵔ ⵉⵣⴰⵢⴷ ⵛⴰ! ⵄⵍⴰⵃⴰⵍ ⴷ ⵍⵄⵉⵍ! - ⴰⵢ ⴰⴷ ⵃⵏⵏⴰ, ⵓⵔ ⵉⵇⵇⵉⵎ ⵃⴷⴷ ⴰⴷ ⵉⴽⴽ ⵜⴰⴳⴳⵓⵔⵜ ⵖⵔ ⵃⴷⴷ, ⵓⵔ ⵉⵇⵇⵉⵎ ⴰⴷ ⵉⵎⴹⵍ ⵃⴷⴷ ⵃⴷⴷ! ⵉⵎⴰ ⴷ ⵉⵙ ⵜ ⵜⵄⵍⵎ ⵉⵎⴰ ⵖⴰ ⵉⵙ ⵜ ⵉⴱⴷⴷⵏ, ⵉⵎⴰ ⴷ ⵉⵙ ⵜⵖⵔⴰ! ⴰⵃⵃⵉⵢ, ⵉⵙ ⵓⵔ ⴷⴰ ⵏⵍⵍⵉ? ⵉⵡⴰ ⴱⴰⵥⵥ, ⴰ ⵃⵏⵏⴰ; ⵕⴱⴱⵉ ⴰⴷ ⴰⵖ ⴷ ⵢⴰⵣⵏ ⵛⴰ ⵏ ⵍⵄⴼⵓ! - ⴰⵢⵡⴰ ⴷⴷⵏⵓⴱ ⵏⵏⵙ ⵙ ⵉⵅⴼ ⵏⵏⵙ! ⵓⵔ ⵏⴽⵔⵉⵀ ⴰⴷ ⵏⵃⴰⴹⵕ ⵉ ⵃⴷⴷ! ... ⵡⴰⵍⴰⵢⵏⵏⵉ ⵀⴰ ⵏⵏ ⵎⵔⵉⵎ ⵍⵍⴰ ⵜⵜⵖⴰⵡⴰⵍ, ⵍⵍⴰ ⵜⵜⵓⵜⵜⵓⵢ, ⴰⵔ ⵜⴽⴽⵔ ⵜⵢⵍⵍⵉⵏⵜ. ⵏⵜⵜⴰⵜ, ⵉⴷⵡⴰⵍⴰ, ⴰⴷ ⵉⵙⵖⵓⵔⵜⵏ. - ⵙⵙⵉⵡⴳ ⵙⴳ ⵖⵔ ⵜⵉⵟⵟ ⵏⵏⵎ! ⴰ ⵉⵏⵏⴰ ⴰⵎ ⵏⵜⵜⴰⵜ ⴰⴷ ⵉⴱⴱⵉⵏ ⵜⵉⵎⵉⵟⵜ ⵉ ⵉⵅⴼ ⵏⵏⵙ! - ⴰⵃⵃⵉⵢ! ⴰ ⵎⵓⵃⴰⵏⴷ, ⴰ ⵎⴻⵎⵎⵉ, ⵎⴰⵜⵜⴰ ⵍⵊⵉⵍ ⴰⴷ! ⵉⵡⴰ ⴱⴰⵣⵣ ⵎⴰⵎⵉ ⵜⵜⵉⵖⵉⵏⵜ ⵜⴰⵢⵛⵛⵉⵏ! ⵉⴷⴷ ⴼⴰⴹⵎⴰ ⵃⴷⴷⵓ ⴰⴱⵄⴷⴰ, ⵜⵜⵙⵎⵎⵣⴷⴰ ⵙ ⵍⵄⵉⵍ. ⴰⵃⵃⵉⵢ, ⴰ ⵃⵏⵏⴰ, ⵇⵇⴰⵃ ⵓⵔ ⵜ ⵙⵍⵉⵖ! - ⵢⵓⵎⴰⵢⵏ ⴰⴷ ⵜⵇⵇⵉⵎ ⵍⵍⴰ ⵜⵓⵎⵥ ⵙ ⵓⵙⵇⵇⵏ! - ⴼⴰⴹⵎⴰ, ⴰ ⴼⴰⴹⵎⴰ! ⵉⵡⴰ ⵔⴰⵄⴰ ⴳⵉⵖ ⵉ ⵜⵙⵃⵜⵉⵜ ⴰⴷ, ⵎⴰⴷ ⵉⵣ ⴷⴰ ⵜⵙⵍⴰ ⵎⴰⴷ ⵉⵙ ⴷⴰ ⵜⵙⵙⴼⵍⵉⴷ! ⴰ ⴰⵡⵔⴰ ⵅⵍⴰⵀ, ⵀⴰ ⵜⴰⵄⵟⵓⵕⵜ, ⴰⵡⵉ ⴷ ⵜⴰⵖⵢⵢⵓⵍⵜ ⴰⴷ ⵜⴷⴷⵓⴷ ⵙ ⵡⴰⵎⴰⵏ, ⴰⴷ ⵜⴷⴷⵓⴷ ⴰⴷ ⵜⵙⵄⴰⴷ! ⴰ ⵅⴰⵍⵜⵉ, ⴰⴷ ⵓⵔ ⵉⵢⵉ ⵙⵙⵓⵃⵓⵍ, ⵍⵍⴰ ⵉⵙⵓⵍ ⵍⵃⴰⵍ ⵅⴼ ⵉⵢⵎ, ⵀⴰ ⵏⵏ ⵉⵙⵜ ⵡⴰⴼⵍⵍⴰ ⵍⵍⴰ ⵙⵓⵍⵏⵜ ⵓⵔ ⴷⴷⵉⵏⵜ! - ⴰ ⵜⴰ ⵀⴰⵀ ⵏⵏⵎ, ⴷⴰ ⴽⵎ ⵙⵉⴽⴽⵖ ⵉ ⵓⴼⵓⵙ, ⵎⴰⴷ ⴽⵎ ⵢⴰⵖⵏ ⵜⴼⴼⵖⴷ ⴼⴰⵔⵇ ⵛⵛⵖⵍ, ⵓⵔ ⵜⵇⵇⵉⵎ ⵍⵍⴰ ⵜⵜⴰⵖⵜ ⵕⵕⴰⵢ! ⵡⴰⵍⴰⵢⵏⵏⵉ ⵀⴰ ⵜⵏ ⴰⵢ ⴰⴷ, ⵅⴰⵙ ⵎⵛ ⵓⵔ ⴷ ⵖⵉⵔⵉ ⵊⵊⴱⵉⵔⵜ! ⴰ ⵍⵍⴰⵀ ⵉⵄⴰⵡⵏ ⴰ ...! - ⴰ ⵍⵍⴰⵀ ⵉⵙⵍⵍⵎ! ⵎⴰⴷ ⴰⵎ ⵉⵢⵢⴰ ⵍⵃⴰⵍ? - ⴰⵢⵡⴰ ⵏⵍⵍⴰ, ⴰ ⵓⵍⵜ ⵍⴰⵀⵍ. - ⴰ ⵎⴰⴷ ⵉⵣⴰⵢⴷⵏ ⵖⵓⵔ ⵜⴰⴹⴹⵊⴰⵕⵜ ⵏⵏⵎ? - ⴰ ⴷ ⵜⴰⵔⴱⴰⵜ! - ⵃⴰ! ... ⵉ ⵎⴰⴷ ⵜⵎⵙ ⵍⵎⵓⵎⵙⵉⵅⴰ ⵏⵏⴰ ⵉⵙⵖⵓⵔⵜⵏ? ⴰⵎⵎ ⴳ ⴷⵉⵏⵏ ⵖⵓⵔⵙ ⵉⵣⴰⵢⴷ ⵙⵉⴷⵏⴰ ⵄⴰⵍⵉ! ⵉⵡⴰ ⵎⵛ ⴰⴷ ⵅⴰⵙ ⵜⵉⵔⴱⴰⵜⵉⵏ, ⵍⵍⴰ ⵏⵖⵔⵇ ⴷⵉⴳⵙⵏⵜ! - ⴰ ⵓⵔ ⵉⵇⵇⵉⵎ ⴱⵏⴰⴷⵎ ⵉⵜⵜⵃⵛⵛⴰⵎ! ⵜⴰⴷⴳⴳⵯⴰⵜ ⴰⵍⵍⵉⴳ ⴷ ⵢⵓⵡⴹ ⵎⵓⵃⴰⵏⴷ ⵙⴳ ⵍⵅⵅⵍⴰ, ⵜⵄⴰⵕⴹ ⴰⵙ ⵅⴷⵉⵊⴰ, ⵜⵄⵍⵎ ⴰⵙ ⵙ ⵓⵣⴰⵢⴷ ⵏ ⵜⵔⴱⴰⵜ; ⵜⵜⵓⵖ ⵜ ⵍⵍⴰ ⵉⵙⵙⵓⵜⵓⵔ ⵉ ⵕⴱⴱⵉ ⵍⵄⵉⵍ ⴰⴷ ⵉⵅⵍⴼ ⵉⴱⴱⴰⵙ, ⵉⵎⵉⵍ ⵀⴰ ⵜ ⵉⵖⵉ ⵜⵜ ⵉⴷ ⵙ ⵜⵔⴱⴰⵜ. ⵍⵍⴰⵏⵜ ⵍⵍⵉ ⵉⵙⵜ ⵍⴰⵀⵍ ⵏⵏⵙ ⵍⵍⴰ ⴷⵓⵔⵏⵜ ⴰⵙ ⵉ ⵢⴰⵎⵏⴰ ⵃⵎⵎⵓ, ⵖⵔⵙⵏⵜ ⴰⵙ ⵢⵓⵜ ⵏ ⵜⴼⵓⵍⵍⵓⵙⵜ, ⴳⵏⵜ ⴰⵙ ⴱⵉⵏⵙⵙⵉⵙ, ⴳⵏⵜ ...; ⵜⴽⴽⵔ ⵅⴷⵉⵊⴰ, ⵜⴷⴷⵣ ⵍⵃⵏⵏⴰ, ⵜⴳ ⴰⵙ ⵜ ⵉ ⵉⴼⴰⵙⵙⵏ ⴷ ⵉⵅⴼ, ⵜⴳ ⴰⵙ ⵜⴰⵥⵓⵍⵜ ⵉ ⵉⵡⴰⵍⵍⵏ, ⵜⴰⵙⵉ ⵉⵄⴱⴰⵏⵏ ⵏⵏⵙ ⴷ ⵉⵛⵕⵡⵉⴹⵏ, ⵜⵙⵉⴽⴽ ⴰⵙⵏ ⵚⵚⴰⴱⵓⵏ. ⴰⵙⴽⴽⴰ ⴽⴽⵔ ⵎⵓⵃⴰⵏⴷ, ⵍⵍⴰⵏⵜ ⵖⵓⵔⵙ ⵛⴰ ⵏ ⵛⵛⵉⵢⴰⵀ. ⵉⵖⵔⵙ ⵉ ⵢⵓⵏ ⵓⵇⵜⵔⵉⴱ, ⵜⵜⵛⴰ ⵜⵎⵟⵟⵓⴹⵜ, ⵜⴽⵏⴼ, ⵜⵄⴷⵇ ⵉⵅⴼ ⵏⵏⵙ; ⵜⵍⵜ ⵉⵢⵢⴰⵎ ⴰⴷ ⵜⴽⴽⴰ ⵢⴰⵎⵏⴰ ⵃⵎⵎⵓ ⵍⵍⴰ ⵜⵙⵓⵡⵓⵏ; ⵡⵉⵙ ⵕⴱⵄ ⵉⵢⵢⴰⵎ ⵜⴽⴽⵔ ⴷⵊⵎⵄ ⵉⵊⵓⵎⴰⴹ ⵏⵏⵙ, ⵓⵔ ⵜⵓⴼⵉ ⴰⴷ ⵜⵇⵇⵉⵎ ⴰⵔ ⴷ ⵜⵙⴱⴱⵄ; ⵎⴰⵛⴰ ⴰⴳⴳⵯⴷ ⵜⴰⴹⴹⵊⴰⵕⵜ ⵏⵏⵙ ⵓⵔ ⴰⵙ ⵜⴱⵅⵉⵍ ⵛⴰ. ⴰⵙⵙ ⵡⵉⵙⵙ ⵕⴱⵄ ⵉⵢⵢⴰⵎ ⵉⵛⴰⵍ ⴷ ⵎⵓⵃⴰⵏⴷ ⵉⵔⴷⵏ ⵙⴳ ⵙⵙⵓⵇ, ⵊⵎⵄⵏⵜ ⴷ ⵜⵄⵢⵢⴰⵍⵉⵏ, ⵄⴷⵍⵏⵜ ⵜⵏ ⵉ ⵙⵙⵉⴱⵄ, ⵉⵜⵜⵅ ⵉⵄⴰⵢⴷ ⵙⵙⵉⴱⵄ ⵏ ⵜⵔⴱⴰⵜ ⴰⵙⵙ ⴰⴷ ⵍⵍⴰ ⵉⴹⴹⴰⴹⴹⴰ ⵡⵉⵏ ⵍⵄⵉⵍ; ⵓⵔ ⵉⵇⵇⵉⵎⵏ ⴰⵙⵙ ⴰⴷ ⵅⴰⵙ ⴰⴷ ⵜⴰⵙⵉ ⵜⵔⴱⴰⵜ ⵍⵄⵍⴰⵎ! ⴰⵢⴰ ⵃⵏⵏⴰ, ⵕⴱⴱⵉ ⴰⴷ ⴽⵎ ⵉⴷ ⵉⵀⴷⵓ, ⴰ ⵜⴰⵎⵟⵟⵓⴹⵜ ⴰⴷ! ⴰⵢⵢⵉⵀ, ⴰⵎⵎ ⵍⵄⵊⴱ, ⴰ ⵎⵎ ⵏⵏⵡⴰⵄⵕ! ⵎⵔ ⵜⵓⴼⵉⵜ ⴰⵙⵉⴼ ⵏⵏⴰ ⵉⵢⵉ ⵉⵜⵛⴰⵏ, ⴽⵯⴰⵏ ⵍⵍⴰ ⵜⵣⴰⵢⴷⴷ ⴷⵉⴳⵙ ⴰⵎⴰⵏ! ⵡⴰⵍⴰⵢⵏⵏⵉ ⵎⵛ ⵖⵓⵔⵙ ⵇⵇⵉⵎⵖ, ⵅⴰⵙ ⴽⵎⵎ ⴰⴷ ⵢⵓⵔⵓ ⵎⵓⵃⴰⵏⴷ ⴰⵎⵇⵇⵕⴰⵏ! ⴰⴷⴷⴰⵢ ⴷⴷⵓⵖ, ⴷⴰ ⵜⵡⵡⵜ ⴰⵏⵙⴰ ⵉⵏⵓ ⵙ ⵓⵣⴷⵓⵣ ⴱⴰⵛ ⴰⴷ ⴰⵎ ⵉⴱⵔⵔⴷ ⵡⵓⵍ! ⴰⵢⵡⴰ, ⴷⴷⴰⴱⴰ ⴰⴷ ⵜⴱⵔⵔⴷⴷ ⴰⵢⵏⵏⴰ ⵖⵔ ⵜⵊⴱⴱⴷⴷ; ⵡⴰⵍⴰⵢⵏⵏⵉ ⵎⴰⵏⵉ ⵜⵡⴰⵍⴼⵏⵜ ⵛⴰ ⵏ ⵓⵄⵎⵎⵕ ⵏ ⵓⵅⴰⵎ! ⵅⴰⵙ ⴰⵙⵢⵢⵃ ⵅⴰⵙ ⴷⴷⵄⴰⵡⵉ ⵅⴰⵙ ⵉⵣⵡⴰⵔⵏ! - ⵓⵔ ⵉⵢⵢⵉⵏ ⴰⵣⵡⴰⵔ ⵅⴰⵙ ⴽⵯⵏⵏⵉⵏⵜⵉ, ⵓⵔ ⵉⵢⵢⵉⵏ ⵉⴷ ⵎⵎⵓ ⵍⴼⴹⴰⵢⵃ ⵅⴰⵙ ⵟⵟⴰⵚⵉⵍⴰⵜ ⵏⵏⴽⵯⵏⵜ! ⵍⵍⴰⵀ ⴰ ⵎⵛ ⵓⵔ ⵉⴽⴽⵉⵔ ⴰⴷ ⵉⵢⵉ ⵉⵛ ⵜⴰⵅⵅⴰⵏⵜ ⵉⵏⵓ ⵖⵔ ⴷⵉⵏⵏ, ⴰ ⵏⵜⵜⴰ, ⵖⵓⵔⵙ ⵓⵔ ⵜⵜⵇⵇⵉⵎⵖ. - ⴰ ⴱⴰⵥⵥ! ⵍⵍⴰ ⵜⵙⴰⵡⴰⵍⵜ ⴰⴱⵄⴷⴰ ⵉⵡⵙⵄⴰⵎ! ⵎⵎⴰⵅ ⵎⴰⴷ ⴰⵙ ⵜ ⵜⵓⵡⵉⵜ? ⵎⵎⴰⵅ ⵎⴰⴷ ⴰⵙ ⵜⵢⵉⵜ ⵙⴳ ⵡⵉⵙ ⴷ ⵜⵓⵡⵡⵜ? ⵜⴰⴱⵏⵛⴳⵔⴰⴹⵜ ⴰⴷ ⵜ ⵜⵓⴼⵉⵜ ⵜⴰⴱⵏⵛⴳⵔⴰⴹⵜ ⴰⴷ ⵖⵓⵔⵎ ⵉⵙⵓⵍⵏ! ⵉⵡⴰ ⴱⴰⵥⵥ ⵉ ⵡⵏⵏⴰ ⵓⵔ ⴷⴰ ⵉⵜⵜⵃⵛⵛⴰⵎⵏ! ⵉⵥⴹⵡⴰⵏ? ⴰⴷ ⵜⵏ ⵉⴷ ⴱⴱⵉⵖ ⵙⴳⵉⵙ! ⴰ ⵅⴰⵍⵜⵉ ⴱⵄⴷ ⵉⵢⵢⵉ, ⴰ ⵅⴰⵍⵜⵉ ⵟⴰⵕⴽ ⵉⵢⵉ, ⵛⴼ ⵉⵢⵉ ⵜⵜⵉⵙⴰⵄ ⴰⴷ ⵇⵇⵏⵏ ⵉⵎⵊⵊⴰⵏⵏ ⵉⵏⵓ ⴰⴷ ⵀⵏⵏⴰⵖ! ⴰ ⵅⴰⵍⵜⵉ, ⵎⵛ ⵓⵔ ⴰⵡⵏ ⵄⵊⵉⴱⵖ, ⵛⴰⵜ ⵉⵢⵉ ⵜⴰⴱⵔⴰⵜⵜ ⵉⵏⵓ; ⵎⴰⴷ ⴽⵯⵏ ⵢⴰⵖⵏ, ⵍⵍⴰ ⵜⵙⵃⵕⵕⵎ ⵖⵉⴼⵉ ⵍⵎⵄⵉⵛⵜ, ⵍⵍⴰ ⵜⵙⴽⴰⵡⵏ ⵉⵢⵉ, ⵍⵍⴰ ⵜⵙⵙⵖⵍⵉⵎ ⵜⴰⴼⵓⵛⵜ ⵉⵏⵓ! ⵀⴰ ⴽ ⵎⵓⵃⴰⵏⴷ ⵉⵕⵡⵡⵃ ⴷ ⵜⴰⴷⴳⴳⵯⴰⵜⵜ! ⵎⵓⵃⴰⵏⴷ. - ⵉⵎⵎⴰ, ⴰ ⵉⵎⵎⴰ! ⵓⵔ ⵉⵍⵍⵉ ⵎⴰⵜⵜⴰ ⵎⴰⴷ ⴽ ⵏⵏⴰ ⵢⵉⵖ! ⵓⵔ ⴳⵉⵖ ⵎⴰⵙ ⵏ ⵃⴷⴷ, ⵓⵔ ⵉⵢⵉ ⵃⴷⴷ ⵎⴻⵎⵎⵉ! ⴷⴰⵢ ⵜⴽⴽⵔ ⵜⵎⵅⵉⴱⵜ, ⵍⵍⴰ ⵜⵊⵎⵓⵄ ⵉⵇⵛⵓⵛⵏ ⵏⵏⵙ ⴰⴷ ⵜⴷⴷⵓ, ⴱⴰⵛ ⴰⴷ ⵜⵙⴽⴽⵔ ⵍⵄⴰⴼⵉⵜ. ⵎⴰⴷ ⵉⵊⵕⴰⵏ ⴷⵉⵖ? ⵓⵔ ⴰⵖ ⵜⵜⴰⵊⵊⴰⵏⵜ ⴰⴷ ⵏⵀⵏⵏⴰ ⵢⵓⵏ ⵢⵉⴹ! ⵉⵡⴰ ⴰ ⵃⵏⵉⵏⵉ, ⵉⵏⵉ ⴰⵙ ⵜ ⵉ ⵍⴰⵍ ⵏ ⵓⵅⴰⵎ ⵏⵏⴽ ⵏⵏⴰ ⵉⵣⵣⵓⵔⵄⵏ ⵓⵔ ⵜⵃⵎⵉⴷ ⵕⴱⴱⵉ! ⵜⴽⴽⵔ ⴷ ⵖⵉⵔⵉ ⴰⵍⵜⵓ, ⵓⵔ ⵉⵢⵉ ⵏⵏ ⵜⵓⵊⵊⵉ ⵍⴰ ⴰⵥⵡⵕ ⵍⴰ ⵟⵟⴰⵚⵉⵍⴰ! ⵙⴳ ⵚⵚⴱⴰⵃ ⵍⵍⴰ ⴷ ⵜⵣⴷⴷⵓ ⴰⴷ ⵉⵢⵉ ⵜⵀⵔⵔⵙ; ⵎⵔⵉⴷⴷ ⵉ ⵡⴰⴹⴹⵊⴰⵕⵏ ⴽⵯⴰⵏ ⵜⵏⵖⴰ ⵉⵢⵉ, ⵉⵙ ⴰⵙ ⵏⵏⵉⵖ: ( 330 ) « ⵎⴰⴷ ⴽⵎ ⵢⴰⵖⵏ ⵅⴰⵙ ⵙⴰⵢⵃ ⵕⴰⵢⵃ » ⵡⴰⵍⴰⵢⵏⵏⵉ ⵎⵛ ⵉⵍⵍⴰ ⵎⴰⴷ ⵉⴼⴼⵖⵏ ⴷ ⵏⴽⴽ; ⵀⴰ ⵜⴰⵅⴰⵏⵜ ⵏⵏⵓⵏ, ⴰ ⵃⵏⵉⵏⵉ; ⵡⴰⵍⴰⵢⵏⵏⵉ ⴷⴷⴰⴱⴰ ⴰⴷ ⵉⵢⵉ ⵜⴼⴽⴽⵔⴷ, ⵓⵔ ⵉⵢⵉ ⵜⵜⴰⴼⴰⴷ! ⴰ ⵜⴰ, ⵙⵔⵙ ⵉⵛⵕⵡⵉⴹⵏ ⵏⵏⵎ, ⵎⴰ ⴽⵎ ⵢⴰⵖⵏ ⵜⴼⴼⵖⵜ ⵉⵅⴼ ⵏⵏⵎ, ⴰⵖ ⴰⴽⴰⵍ, ⴰⵊⵊ ⴰⵖ ⴰⴷ ⵏⵙⵇⵇⵔ, ⵜⴰⵏⵉⵍⴰ ⵏ ⵉⵄⴷⴰⵡⵏ ⵉⵚⵎⵎⴰⴹⵏ ⴰⴷ ⴷⵉⴳⵏⵖ ⵜⵙⵙⵏ! ⵍⴰ, ⵍⴰ, ⵍⴰ! ⵍⴰ, ⵍⴰ! ⵓⵔ ⴷⴰ ⵜⵜⵖⵉⵎⴰⵖ ⴰⴱⴰⴷⵏ! ⵅⴰⵙ ⴰⵎⴰ ⵏⴽⴽ ⴰⵎⴰ ⵏⵜⵜⴰⵜ! ⵓⵔ ⴷⴰ ⵜⴰⵎⵟⵟⵓⴹⵜ, ⵓⵔ ⴷⴰ ⵃⴰⵀ! ⵎⵛ ⵜⵢⵉⵜ ⵎⴻⵎⵎⵉ, ⵀⴰ ⴷ ⴰⴷ ⵉⵢⵉ ⵜⴰⵖⵜ ⵕⵕⴰⵢ; ⵉⵙ ⵓⵔ ⵉⵢⵉ ⵜⴰⵖⵜ ⵕⵕⴰⵢ, ⵓⵔ ⴳⵉⵖ ⵎⴰⵢⴽ, ⵓⵔ ⵜⵢⵉⵜ ⵎⴻⵎⵎⵉ, ⵚⵅⴹⵖ ⵖⵉⴼⴽ ⴰⵎⵎ ⵓⵢⵏⵏⴰ ⵉⵚⵅⴹ ⴳ ⵉⵢⵏⵏⴰ ⵅⴼ ⵡⴰⵛⴰⵍ! ⴰ ⵜⴰ? ⴰ ⵢⵎⵎⴰ? ⵎⴰⴷ ⴽⵯⵏⵜ ⵢⴰⵖⵏ ⵜⵚⵃⵕⵕⵏⵜ ⵖⵉⴼⵏⵏⵖ ⵜⴰⵇⵛⵛⵓⵔⵜ ⵏ ⵓⵖⵔⵓⵎ! ⵜⴰⴷⴳⴳⵯⴰⵜ ⵏⵏⴰ ⵉⵃⵕⵕ ⵉⵎⵏⵙⵉ ⵓⵔ ⵜ ⵉⵜⵛⵉ ⵃⴷⴷ; ⵜⴽⴽⵔ ⴼⴰⴹⵎⴰ, ⵜⴰⵎⵟⵟⵓⴹⵜ ⵏ ⵎⵓⵃⵏⴷ ⵜⵙⵙⵏⵓ ⵢⵓⵜ ⵏ ⵜⵓⵖⵔⵉⴼⵜ ⴳ ⵜⴱⵍⴰⴹⵜ ⵓⵔ ⵉⴷⴷ ⴰⴳⴳⵯⴷ ⴰⴼⴰⵏ, ⵎⴰⴷ ⴰⵙⵏ ⵜ ⵉⵛⴰⵏ ⵉⵢⵍⵍⵉⵏⵏ, ⵜⴰⵡⵉ ⵜⵜ ⵉⴷ ⴳ ⵓⵎⵉⴷⵓⵏ, ⵜⵙⵔⵙ ⵜⵜ ⴷⴰⵜ ⵏ ⵓⵔⵢⴰⵣ ⵏⵏⵙ, ⵜⵄⴰⵢⴷ ⵖⵔⵙ ⴰⵍⵎⵙⵙⵉ, ⵜⵇⵇⵉⵎ ⴰⵔ ⵜⴰⵍⵍ; ⴰⵎⵛⵉⵙ ⴰⴷ ⵉⵇⵇⵉⵎ ⵓⵖⵔⵓⵎ ⵏⵏⴰ ⵓⵔ ⵜ ⵉⵃⴰⴷⴰ ⵃⴷⴷ. ⴰⵍⵍⵉⴳ ⵜⴽⵊⵎ ⴼⴰⴹⵎⴰ ⵜⵙⵙⴰ ⵍⴱⵉⵜ ⵏⵏⵙ ⵉⴽⴽⵔ ⵎⵓⵃⴰⵏⴷ ⵉⵍⴰⵃⴳ ⵜⵜ ⵉⴹⵕⵏ ⴷ ⵍⴱⴰⴱ ⴷⴼⴼⵉⵔ ⴰⵙ ⵖⵉⴼⵙⵏ, ⵉⵜⵓⵜⵜⴳ ⵉⵥⵥⵍ ⵍⵊⵉⵀⵜ ⵏ ⵍⴱⴰⴱ; ⵉⴷⴷ ⴼⴰⴹⵎⴰ, ⵍⵍⴰ ⵜⵍⵍⴰ ⴷⵉⴳⵙ ⵍⵃⵔⵉⵇⵜ, ⵍⵍⴰ ⵜⵙⵙⵏ ⵎⴰⴷ ⵜⵜ ⵉⵜⵜⵡⵓⵏⵓⵢⵏ, ⵜⵙⵅⵙⵉ ⴰⵙⵉⴷⴷ ⵜⵙⵏⵏⴷ ⵍⵍⴰ ⵜⵔⵢⵉⵢⵢⵉ. ⵎⴰⵏⵉⵛ, ⴰ ⵜⴰⵎⵅⵉⴱⵜ ⵏ ⵢⴰⵎⵏⴰ ⵃⴷⴷⵓ, ⵍⵍⴰ ⵜⵙⵙⵏ ⵎⴰ ⵔⴰⴷ ⵉⵊⵕⵓⵏ, ⵍⵍⴰ ⵜⵙⵙⵏ ⵉⵙ ⵜⵛⵅⵅⴷ ⵍⵄⴰⴼⵉⵜ. ⴳ ⵡⴰⵎⵎⴰⵙ ⵏ ⵢⵉⴹ, ⴰⵍⵍⵉⴳ ⵉⵙⵙⵏ ⵎⵓⵃⴰⵏⴷ ⵉⵙ ⵢⵏⵏ ⵡⴰⴹⴹⵊⴰⵕⵏ, ⵉⴽⴽⵔ ⵢⴰⵙⵉ ⴷ ⵢⵓⵏ ⵉⵣⵉⴽⵔ, ⵉⵇⵇⵉⵎ ⴰⵔ ⵙⵔⵙ ⵉⵜⵜⵀⵔⵔⴰⵙ ⴼⴰⴹⵎⴰ; ⵉⵇⵇⵉⵎ ⴽⵓⵔ ⵉⴽⴽⴰⵜ ⵜⵙⵖⵓⵢⵢⵓ ⵎⵉⵄⴰⴷ ⴰⵍⵍⵉⴳ ⴷⵉⴳⵙ ⵜⵏⵏⵇⴹⵄ, ⴰⵍⵍⵉⴳ ⴰⵙ ⵉⴼⴼⵖ ⵡⵓⵍ; ⵇⵇⴰⵃ ⵓⵔ ⴷ ⵉⴷⵢⵢⵉⵄ ⵃⴷⴷ, ⴰⴷ ⵜⵜ ⵉⴼⵓⴽⴽ; ⵜⵍⵍⴰ ⵜⵎⵖⴰⵔⵜ ⵏⵏⵙ ⵍⵍⴰ ⵜⵙⵙⴼⵍⵉⴷ, ⵍⵍⴰ ⵜⴳⴳ ⵅⵅⵉⵛⵜ; ( 335 ) ⴰⵍⵍⵉⴳ ⵜⵏⵏⴰ: « ⵀⴰⴷⴰ ⵊⵀⴷ », ⴰⵍⵍⵉⴳ ⵉⴱⵔⵔⵇ ⵕⵕⴰⵢ, ⴰⵍⵍⵉⴳ ⴰⵙ ⵉⴱⵔⵔⴷ ⵡⵓⵍ, ⵜⴽⴽⵔ ⴷ, ⵍⵍⴰ ⵜⵏⴷⴷⵔ, ⴰⵔ ⵜⴷⵃⵃⵉ ⵍⴱⴰⴱ, ⴰⵔ ⵜⵇⵇⴰⵔ ⴰⵔ ⵜⵛⵀⴰⴷ: « ⴰ ⵜⵏⵖⵉⵜ ⵕⵕⵓⵃ, ⵀⴰ ⵎⵓⵃⴰⵏⴷ, ⴰⴷ ⵜⴷⴷⵓⵜ ⵖⵔ ⵍⵃⴱⵙ, ⵓⵔ ⵜⴹⵀⴰⵕⵜ, ⴰ ⵜⵏⵖⵉⵜ ⵉⵍⵍⵉⵙ ⵏ ⵎⴷⴷⵏ ... » ⴰⵍⵍⵉⴳ ⵢⵓⵊⵊⴰ ⵎⵓⵃⴰⵏⴷ ⵜⴰⵎⵟⵟⵓⴹⵜ ⵏⵏⵙ ⴽⵓⵍⵛⵉ ⴷ ⴰⵣⵉⵣⴰ, ⵄⴰⴷ ⴰⴷ ⵖⵉⴼⵙ ⵉⴽⴽⵔ; ⴷⴰ ⵀⴰ ⴷ ⵎⴰⵢⵙ ⵜⴽⵊⵎ ⴷ ⵍⵍⴰ ⵜⵚⵅⴰⴹ ⴰⵍⵜⵓ: « ⵀ ⴰⵃⵃⵉ, ⵀ ⴰⵃⵃⵉ, ⵉⵔⴰ ⴰⴷ ⵉⵏⵖ ⵕⵕⵓⵃ ⴰⴷ ⵉⴷⴷⵓ ⴰⴷ ⵜ ⵢⵓⵜ ⵓⵔⵡⴰⵙ! ⴳ ⵎⵉ ⴰⴱⵄⴷⴰ ⴰ ⵕⴱⴱⵉ! ⴰⵙⵙ ⵏⵏⴰ, ⵉⴽⴽⴰ ⵜ ⵎⵓⵃⴰⵏⴷ ⴳ ⵓⵅⴰⵎ, ⵓⵔ ⵉⴷⴷⵉ ⵙ ⵎⴰⵏⵉ, ⴰⴳⴳⵯⴷ ⴱⴰⵔ ⴰⴷ ⴰⵙ ⵜⵔⵡⵍ ⵜⵎⵟⵟⵓⴹⵜ, ⵡⴰⵍⴰⵢⵏⵏⵉ ⵎⴰⵏⵉ ⵖⴰ ⵜⵔⵡⵍ ⵜⵣⵓⵖⴱⵉⵜ! ⵓⵔ ⴷⵉⴳⵙ ⵎⴰ ⵖⴰ ⵉⵃⵔⵔⴽⵏ! ⵜⴽⵍⴰ ⵍⵍⴰ ⵜⵥⵥⵍ ⴳ ⵓⴳⵔⵜⵉⵍ ⵓⵔ ⵜⵓⴼⵉ ⴰⴳⴳⵯⴷ ⵎⴰ ⵖⴰ ⴰⵙ ⴷ ⵉⵛⴼⵏ ⴰⵎⴰⵏ ⴰⴷ ⵜⵄⴷⵇ ⵕⵕⵓⵃ! ⵓⵔ ⵜⵜⵛⵉ, ⵓⵔ ⵜⵙⵡⵉ ⵅⴰⵙ ⵉⵙ ⵜⵏⴷⴷⵔ. ⴰⵙⵙ ⵏⵏⴰ ⵢⴰⵎⵏⴰ ⵃⴷⴷⵓ ⵜⴰⵎⵖⴰⵔⵜ ⴰⴷ ⵉⵣⴷⴰⵏ, ⴰⴷ ⵢⵓⵢⵎⵏ, ⴰⴷ ⵉⴳⴰⵏ ⴽⵓⵍⵛⵉ! ⵜⴰⴷⴳⴳⵯⴰⵜ ⵜⴰⵡⵉ ⴰⵙ ⴷ ⵉ ⴼⴰⴹⵎⴰ ⵢⵓⵜ ⵏ ⵜⵣⵢⵏⵜ ⵏ ⵓⵖⵕⵓⵎ ⴷ ⵢⴰⵏ ⵏ ⵡⴰⵍⴽⴰⵙ ⵏ ⵡⴰⵜⴰⵢ ⴳ ⵉⵎⵏⵙⵉ, ⵎⴰⵏⵉ ⵣⵉ ⵖⴰ ⴰⵙ ⵉⴽⴽ?! ⴰⵎⵛⵉⵙⵙ ⴰⴷ ⵜⵇⵇⵉⵎ ⴼⴰⴹⵎⴰ ⵜⵥⵥⵓⵖⵓⵕ ⵓⵙⵙⴰⵏ ⵉ ⵍⵃⴰⵍⵜ ⵏⵏⴰ ⴰⵔ ⵢⵓⵏ ⵏ ⵡⴰⵙⵙ ⵉⵖⴼⵍ ⴱⵏⴰⴷⵎ, ⴷⴰ ⵜⵜⵉⵏⵉ: ⵙⵙⵉⵢⴰⴷ ⴰⴷ ⴽⴽⴰⵏⵜ! ⵜⴰⴷⴳⴳⵯⴰⵜ ⴰⵍⵍⵉⴳ ⴷ ⵉⵔⵡⵡⵃ ⴳⵯⵎⴰⴽ, ⴷⴰ ⵜⵜⵍⵇⴼ ⵜ ⵎⴰⵢⵙ ⵙ ⵡⴰⵡⴰⵍ: « ⴰ ⵜⵄⵎⵎⵔ ⴰⴽ ⵜⵜ! ⴰ ⵉⵕⵕⵥ ⴰⴽ ⵡⵓⵍ! ⴰⵢⵡⴰ ⴰⴽⵎ ⴷⵖⵉ ⵍⴰⵃ ⵜⵜ ⴰⴷ ⵜⴳⵜ ⵜⴰⴹⵚⴰ! » ⵉⵡⴰ ⵄⴰⴷ ⵍⵍⵉ ⴰⴳ ⵉⵇⵇⵉⵎ ⵍⵍⴰ ⵉⵜⵅⵎⵎⴰⵎ, ⴰⴷ ⵉⵔⵓⵔⴰ ⵙ ⵉⵅⴼ ⵏⵏⵙ ⵉⵙ ⵉⵃⴹⴰ! ⴰⵍⵍⵉⴳ ⵉⴽⵛⵎ ⵖⵔ ⵍⴱⵉⵜ, ⵢⵓⴼⴰ ⵜⵜ ⵉⵏⵏ ⵍⵍⴰ ⵜⵜⵚⴼⴼⴰⵕ, ⵜⵍⵜ ⵉⵢⵢⴰⵎ ⴷⴼⴼⵉⵔ ⵓⵢⵏⵏⴰ ⵉⵏⵉⵢ ⴳ ⵓⵙⵔⴷⵓⵏ, ⵉⴷⴷⵓ ⵣⵄⵎⴰ ⴰⴷ ⵜⵜ ⵉⴷ ⵉⴹⵕ, ⵍⵍⴰ ⵉⵜⵜⵉⵏⵉ ⵜⵍⵍⴰ ⵖⵓⵔ ⵍⴰⵀⵍ ⵏⵏⵙ; ⵡⴰⵍⴰⵢⵏⵏⵉ ⵓⵔ ⵏⵏ ⵢⵓⴼⵉ ⵃⴷⴷ, ⵓⵔ ⵉⵙⵙⵉⵏ ⵃⴷⴷ ⵎⴰⵏⵉ ⵖⵔ ⵜⵜ ⵜⵛⴼⴰ! ⵉⴽⴽⵔ ⵡⴰⵡⴰⵍ, ⵜⵉⵥⵉⵜ, ⵉⵖⵓⵢⵢⴰ; ⵜⵇⵇⵉⵎ ⵎⴰⵢⵙ ⵏ ⴼⴰⴹⵎⴰ, ⵍⵍⴰ ⵜⴰⵍⵍ ⴰⵔ ⵜⵜⵄⴰⵢⴰⵔ ⵎⵓⵃⴰⵏⴷ! ⵎⴰⵏⵉ ⵖⴰ ⵜⵜⵉⵍⵉ, ⵎⴰⵏⵉ ⵓⵔ ⵜⵜⵉⵍⵉ, ⴽⴽⵔⵏ, ⵎⵓⵃⴰⵏⴷ ⴷ ⵉⴱⴱⴰⵙ ⵏ ⴼⴰⴹⵎⴰ ⵎⵓⵏⵏ ⵖⵔ ⵣⵣⴰⵡⵉⵜ, ⴰⴼⵏ ⵜⵜ ⵉⵏⵏ ⵍⵍⴰ ⵜⵜⵣⴰⵡⵉ. ⴰⵍⵍⵉⴳ ⵢⴰⵏⵏⴰⵢ ⴱⵓⴳⵕⵉⵏ ⵎⴰⴷ ⵉⵊⵕⴰⵏ ⵉ ⵉⵍⵍⵉⵙ, ⵉⵇⵇⵉⵎ ⵍⵍⴰ ⵉⵟⵟⵉⵥⵉ, ⵉⴳⴳⴰⵍⵍ ⴰ ⵏⵜⵜⴰ ⵓⵔ ⴰⵙ ⵜⵜ ⵉⴹⵕⵕ ⵎⵉⵄⴰⴷ ⴰⵔ ⴷ ⴽⴽⵏ ⴷⴰⵜ ⵏ ⵍⵎⵅⵣⵏ; ⴰⵎⵛⵉⵙⵙ ⴰⴷ ⵜⵎⵓⵏ ⴼⴰⴹⵎⴰ ⴷ ⵉⴱⴱⴰⵙ; ⵉⴷⴷ ⵎⵓⵃⴰⵏⴷ, ⵉⵇⵇⵉⵎ ⵛⵛⵔⵉⴼ ⴰⵔ ⵙⵔⵙ ⵉⵟⵟⵉⵥⵉ ⵓⵔ ⴰⵙ ⵢⵓⵊⵊⵉ ⵛⴰ; ⴰⵍⵍⵉⴳ ⵉⵔⴰ ⴰⴷ ⵉⴷⴷⵓ, ⵉⵊⴱⴷ ⵛⴰ ⵏ ⵍⴼⵍⵓⵙ ⵉⵛⴰ ⵜⵏⵜ ⵉ ⵛⵛⵔⵉⴼ ⴷ ⵥⵥⵢⴰⵕⵟ ⵉⴽⵔⴼ ⴷⴰⵜ ⴰⵙ, ⵉⵔⴰ ⴰⴷ ⵜ ⵉⴷⴼⵄ ⴳ ⵓⴹⴳⴳⵯⴰⵍ ⵏⵏⵙ ⴱⴰⵔ ⴰⴷ ⵜ ⵉⴷⵄⵓ; ⵉⵡⴰ ⵉⵏⵏⴰ ⴰⵙ ⵛⵛⵔⵉⴼ: « ⴰⴽⵎ ⴷⴷⴰⴱⴰ ⴰⴷ ⵏⴰⵏⵏⴰⵢ ⵎⵛ ⵓⵔ ⵢⵓⵡⵡⵉⴹ ⵡⴰⵡⴰⵍ ⵖⵔ ⵍⵇⵇⴰⵢⴷ ». ⴰⵙⵙ ⵏ ⵙⵙⵓⵇ ⵓⵔ ⵢⵓⵛⵉⴳ ⵎⵓⵃⴰⵏⴷ ⵎⵉⵄⴰⴷ ⴰⵍⵍⵉⵖ ⴷ ⵉⴷⴷⴰ ⵓⵎⵅⵣⵏⵉ ⵣⵉⴽ ⵍⵍⴰ ⴰⵙ ⵉⵇⵇⴰⵕ ⵖⵔ ⴱⵕⵕⴰ ⴷⴰ ⵉⴼⵀⵎ ⵜⵜ ⵉⵙ ⵙⵔⵙ ⵉⵛⴽⴽⵎ ⵃⴷⴷ; ⴰⵎⵛⵉⵙⵙ ⴰⵙ ⵉⵏⵏⴰ ⵓⵎⵅⵣⵏⵉ ⴰⴷ ⵉⵃⴹⴹⵕ ⵖⵔ ⵍⴱⵉⵔⵓ, ⵏⵜⵜⴰ ⴷ ⵜⵎⵟⵟⵓⴹⵜ ⵏⵏⵙ. ⴰⵍⵍⵉⴳ ⵣⴰⵢⴷⵏ ⵖⵔ ⴷⴰⵜ ⵏ ⵍⵇⵇⴰⵢⴷ ⵉⵖⵔ ⴷ ⵓⵎⵅⵣⵏⵉ ⵉ ⵍⵎⵓⴽⵍⵍⵉⴼ, ⵉⵄⴰⵡⴷ ⵎⴰⴷ ⵉⵊⵕⴰⵏ; ⵇⵇⴰⵃ ⵓⵔ ⵉⵕⵥⵉⵎ ⵎⵓⵃⴰⵏⴷ ⴰⵇⵇⵎⵓ, ⴷⴰ ⵉⵏⵏⴰ ⴰⵙ ⵍⵇⵇⴰⵢⴷ: « ⵣⵔⵉ ⵙⴰ ⴰⴷ ⵜⵜⵓⵕⴱⴱⴰⵜ ⵛⵡⵉⵢ, ⴰ ⵛⵛⵉⵟⴰⵏ ⴰⴷ »! ⴷⴰ ⵉⵏⵏⴰ ⴰⵙ ⵓⵎⵅⵣⵏⵉ: « ⴰⵅ ⴰⵎ » ⵙ ⵓⵖⵣⵣⴰⵍ, ⴷⴰ ⵉⵏⴳⴳⵔ ⵜ ⴰⵍⵍⵉⴳ ⵉⴷⴷⴰ ⴰⴷ ⵉⵜⵜⵓⵜⵜⴳ ⴳ ⵓⵇⵇⵎⵓ; ⴰⵎⵛⵉⵙⵙ ⴰⴷ ⵜ ⵏⴷⵀⵏ ⵖⵔ ⵍⵃⴱⵙ, ⵉⵇⵇⵉⵎ ⴷⵉⴳⵙ ⵛⵀⵕ. ⵍⵍⵉ ⵏⵏⴰ ⵄⴰⴷ ⴰⴷ ⵜⴱⵔⵔⴷ ⵎⴰⵢⵙ ⵏ ⵎⵓⵃⴰⵏⴷ ⵕⵕⴰⵢ ⵏⵏⵙ, ⴰⴷ ⵜⵇⵇⵉⵎ ⵍⵍⴰ ⵜⴰⵍⵍ, ⴰⴷ ⵜⵔⵓⵔⴰ ⵙ ⵉⵅⴼ ⵏⵏⵙ ⵉⵙ ⴷ ⵏⵜⵜⴰⵜ ⴰⴷ ⵉⴳⴰⵏ ⵇⵇⴰⵃ ⴰⵢⵏⵏⴰ; ⵉⵡⴰ ⵜⵇⵇⵉⵎ ⵛⵀⴰⵔ ⴰⵖⵣⵣⴰⴼ ⵓⵔ ⵜⵓⴼⵉ ⵎⴰⴷ ⵖⵉⴼⵙ ⵉⴽⵛⵎⵏ ⵡⴰⵍⴰ ⴰⴷ ⵉⴼⴼⵖ, ⵍⵍⴰ ⵜⵍⵍⴰ ⴳ ⵢⵓⵜ ⵏ ⵜⵎⴰⵔⴰ ⵏ ⵉⵄⴷⴰⵡⵏ. ⵉⴷⴷ ⴼⴰⴹⵎⴰ, ⵜⴰⵎⵟⵟⵓⴹⵜ ⵏ ⵎⵓⵃⴰⵏⴷ, ⵓⵔ ⵜⵔⵉ ⴰⴷ ⵜⵄⴰⵢⴷ ⵙ ⴰⵅⴰⵎ ⵏⵏⵙ ⴷ ⵜⵎⵖⴰⵔⵜ ⵏⵏⵙ ⵍⵍⴰ ⵜⵍⵍⴰ ⴷⵉⴳⵙ; ⴰⴳⴳⵯⴷ ⵏⵜⵜⴰⵜ ⵜⴱⵔⵔⴷ ⴰⵇⵊⴷⵉⵎ ⵖⵓⵔ ⵍⴰⵀⵍ ⵏⵏⵙ ⴰⵍⵍⵉⵖ ⵙⵉⴳⵙ ⵊⵊⵉⵡⵏⵏ. ⴰⵍⵍⵉⴳ ⴷ ⵉⴼⴼⵖ ⵎⵓⵃⴰⵏⴷ, ⴷⴷⴰⵏ ⴷ ⵎⴷⴷⵏ ⵕⴰⵢⴱⵏ ⵖⵉⴼⵙ, ⵄⴷⴷⴰⵏ ⵡⵉⵏⵏⴰ ⵖⵉⴼⵙ ⵉⵄⵢⵢⴱⵏ; ⴰⵙⴽⴽⴰ ⵏⵏⵙ ⵉⵏⵉⵢ ⵅⴼ ⵜⵙⵔⴷⵓⵏⵜ ⵉⴷⴷⵓ ⵙ ⵉⴹⵓⵍⴰⵏ ⵏⵏⵙ ⴰⴷ ⴷ ⵉⴹⵕⵕ ⴼⴰⴹⵎⴰ; ⵡⴰⵍⴰⵢⵏⵏⵉ, ⵉⴳⴳⵓⵍⵍⴰ ⴱⴱⴰⵙ ⵓⵔ ⴰⵙ ⵜⵜ ⵉⴹⵕⵕ ⴱⵃⵔⴰ ⵎⵛ ⴰⵙ ⵉⵛⴰ ⵜⴰⵅⵅⴰⵏⵜ ⵏⵏⵙ ⵙ ⴰⵢⵎⵎⴰⴹ ⵉⵏⵏ ⵉ ⵜⵜⵉⵙⴰⵄ ⵙⴳ ⵜⵎⵖⴰⵔⵜ ⵏⵏⵙ; ⵉⵇⵇⵉⵎ ⵎⵓⵃⴰⵏⴷ ⴰⵔ ⵉⵜⵜⵣⴰⵡⴰⴳ, ⴰⵍⵍⵉⴳ ⵓⵔ ⵔⵉⵏ ⵉⵇⵇⵏ ⴰⵙⵏ ⴷⴷⵄⵓⵜ, ⵉⴷⴷⵓ; ⴰⵙⵙ ⵏ ⵍⵃⴽⴰⵎ ⵇⵔⵔⴷⵏ ⴷⴰⵜ ⵏ ⵍⵇⴰⴹⵉ, ⵉⴱⴷⵓ ⵖⵉⴼⵙⵏ ⵙ ⵜⵅⴰⵏⵜ ⴷ ⵏⵏⴼⵇⵜ; ( 348 ) ⴰⵎⵛⵉⵙⵙ ⴰⴷ ⵉⴽⴽⵔ ⵓⵣⵓⵖⴱⵉ ⵏ ⵎⵓⵃⴰⵏⴷ, ⵉⵙⵖⴰ ⴰⵙ ⵉ ⵜⵎⵟⵟⵓⴹⵜ ⵏⵏⵙ ⵇⵇⴰⵃ ⴰⵢⵏⵏⴰ ⴰⵙ ⵉⵅⵚⵚⵏ; ⵡⴰⵍⴰⵢⵏⵏⵉ ⵎⵉⵙⵎ ⴰⴳ ⵔⴰⴷ ⵉⵢⵢ ⵉ ⵎⴰⵢⵙ, ⵎⴰⴷ ⴰⵙ ⵜⵜ ⵢⴰⵊⵊ ⵓⵃⴷ ⵏⵏⵙ, ⵃⵛⵓⵎⴰ; ⵓⵔ ⵉⵍⵍⵉ ⵎⴰⴳ ⵔⴰⴷ ⵙⵔⵙ ⵢⵉⵍⵉⵏ, ⵎⴰⴷ ⴰⵙ ⵜⵜ ⵢⴰⵊⵊ ⵖⵓⵔⵙ, ⵓⵔ ⴰⵙ ⵜⵇⵇⴱⵉⵍ ⵜⵎⵟⵟⵓⴹⵜ; ⵎⴰ ⵖⴰ ⵉⵢⵢ ⵎⴰ ⵓⵔ ⵉⵜⵜⴳⴳ, ⵉⴽⴽⵔ ⵉⴷⴷⵓ ⵉⴹⵕⵕⵇ ⵉ ⵛⵛⵔⵉⴼ ⵉⴷⴼⵄ ⵜ ⴳ ⵉⴹⵓⵍⴰⵏ ⵏⵏⵙ; ⵉⵇⵇⵉⵎ ⵛⵛⵔⵉⴼ ⴰⵔ ⵜⵏ ⵉⵜⵏⵀⵓⵣ ⴳ ⵜⵅⴰⵏⵜ. ⵉⵡⴰ ⵙⴳ ⵡⴰⵙⵙ ⵏⵏⴰ ⵄⴰⴷ ⴰⴷ ⵜⵃⵎⴷ ⵜⴰⴼⵇⵇⵉⵔⵜ ⵕⴱⴱⵉ, ⵍⵍⴰ ⵜⵜⴻⵜⵜ ⴰⵔ ⵜⵜⵙⵙ, ⵜⵇⵇⵏ ⴰⵇⵇⵎⵓ ⵏⵏⵙ. ⵛⵀⵕ ⴷⴼⴼⵉⵔ ⵓⵢⵏⵏⴰ, ⵜⴽⴽⵔ ⴼⴰⴹⵎⴰ ⵍⵍⴰ ⵜⵜⵉⵏⵉⵜ; ⵉⵡⴰ ⴷⴰ ⵉⵄⵊⴱ ⵍⵃⴰⵍ ⵉ ⴽⵓⵍⵛⵉ ⵍⴰ ⴰⵢⵜ ⵓⵅⴰⵎ ⵏⵏⵙ ⵍⴰ ⵍⴰⵀⵍ ⵏⵏⵙ; ⵉⴽⴽⵔ ⵎⵓⵃⴰⵏⴷ ⵎⴰⵏⵉ ⵉⵙⵡⵡⵇ, ⵢⴰⵡⵉ ⴰⵙ ⴷ ⴽⵓⵍ ⵎⴰⴷ ⵜⵔⴰ; ⵉⴷⴷ ⵜⴰⵎⵖⴰⵔⵜ ⵏⵏⵙ, ⵜⵄⴰⵢⴷ ⵜⵢⴰ ⵍⵃⵔⵉⵔ, ⵜⴷⴷⴰ ⴰⴷ ⵜⵟⵟⵉⵇⵙ ⵙ ⵍⴼⵕⴰⵃⵉⵜ, ⵓⵔ ⴷⴰ ⵜⵜⴰⵊⵊⴰ ⴼⴰⴹⵎⴰ ⴰⴷ ⵜⴳ ⴰⴼⵓⵙ ⴳ ⵡⴰⵎⴰⵏ. ⵉⵡⴰ ⵜⵇⵇⵉⵎ ⴰⴽ ⴼⴰⴹⵎⴰ ⵓⵔ ⵜⵓⵊⵊⵉ ⵍⴼⵛⵓⵛ ⵏⵏⴰ ⵓⵔ ⵜⵢⵉ, ⴰⵎⵎ ⵉⴷⴷ ⵅⴰⵙ ⵏⵜⵜⴰⵜ ⴰⴷ ⵉⵜⵜⴰⵔⵓⵏ. ⵙⴳ ⵍⵍⵉ ⵓⵔ ⵊⵊⵉⵏ ⵓⵔ ⵜⵃⵔⵉⵇ, ⵜⵙⵙⵏ ⵉⵙ ⵜⵜⵢⵉⵎⵥ, ⴰⴳⴳⵯⴷ ⵍⴰⵀⵍ ⵏⵏⵙ ⵓⵔ ⵇⵇⵉⵎⵏ ⵍⵍⴰ ⴰⵙ ⵙⵙⵍⵡⵉⵖⵏ ⴰⵡⴰⵍ. ⵉⵡⴰ ⴰⵍⵍⵉⴳ ⵉⵍⵓⵍ ⵍⵄⵉⵍ, ⵉⵜⵜⵅ ⴷ ⵍⵄⵉⵍ ⴰⴷ ⵜⵓⵔⵓ, ⵢⴰⵏ ⴰⴽⴽⵯ ⵢⵓⵏ ⵏ ⵙⵙⵉⴱⵄ ⴰⵅⴰⵜⴰⵔ, ⵓⵔ ⵏⵏ ⵉⵇⵇⵉⵎ ⵃⴷⴷ. ⵍⵍⴰ ⵍⵍⴰⵏ ⴰⴽ ⴰⵙⵙ ⴰⴷ ⵓⵔ ⴰⵙⵏ ⵅⵚⵚ ⵔⵔⴱⵃ! ⵡⴰⵀⵡⵡⴰ ⵜⴰⵇⵇⴱⵉⵍⵜ ⵏ ⴰⵢⵜ ⵙⴰⴷⴷⵏ ⵜⵎⵥⵥⵉ; ⵓⵔ ⴷⵉⴳⵙ ⵉⵄⴷⴷⵉ ⴱⵏⴰⴷⵎ ⵉⵜⵜⵅ ⵉⵄⴷⴷⴰ ⵍⵎⵕⴹ, ⵄⴷⴷⴰ ⵍⴱⴰⵕⵓⴹ, ⵜⵄⴷⴷⴰ ⵍⵎⵓⵜ ⴷ ⵍⵎⵓⵅⵎ; ⵜⴰⵇⵇⴱⵉⵍⵜ ⵍⵍⴰ ⵜⴱⴹⴰ ⵅⴼ ⵕⴱⵄⴰ ⵏ ⵍⵇⵙⴰⵎⵉ, ⴽⵓⵍ ⵍⵊⵎⴰⵄⵜ ⵓⵃⴷ ⵏⵏⵙ, ⵓⵔ ⴷⴰ ⵉⵟⵟⵅⵓⵍⵓⴹ ⵃⴷⴷ ⵃⴷⴷ, ⵓⵔ ⴷ ⴰⵎⵎ ⵡⴰⵙⵙ ⴰⴷ; ( 352 ) ⵜⵜⵓⵖ ⵎⴷⴷⵏ ⵍⵍⴰ ⵜⵜⴰⵡⵍⵏ ⵣⵉ ⵜⵖⵚⵜ ⵏⵏⵙⵏ, ⵅⴰⴹⵉ ⵎⴰⵏⵉ ⴳ ⵉⵜⵜⴰⵡⵍ ⵢⵓⵏ ⵙⴳ ⵛⴰ ⵏ ⵍⵊⵎⴰⵄⵜ ⵢⴰⴹⵏⵉ ⵡⴰⵍⴰ ⵙⴳ ⵛⴰ ⵏ ⵜⵇⵇⴱⵉⵍⵜ ⵢⴰⴹⵏⵉ. ⵡⴰⵍⴰⵢⵏⵏⵉ ⴳ ⵍⵓⵇⵜ ⵏⵏⴰ ⵊⵊⵉⵡⵏⵏ ⵎⴷⴷⵏ ⴰⵖⵔⵓⵎ, ⵊⵊⵉⵡⵏ ⴰⵖⵖⵓ ⴷ ⵡⵓⴷⵉ ⵉⵜⵜⵅ ⴰⵢⵏⵏⴰ ⵖⵓⵔⵙⵏ ⵍⵍⴰ ⴰⵙⵏ ⴷⵉⴳⵙ ⵉⵜⵜⴳⴳ ⵕⴱⴱⵉ ⵍⴱⴰⵕⴰⴽⴰ; ⴰⵢⵏⵏⴰ ⴽⵔⵣⵏ ⵍⵍⴰ ⴷ ⵉⵜⵜⴰⵙⴰ, ⵜⵄⴷⴷⴰ ⵜⵎⴰⵣⵉⵔⵜ ⵍⴰ ⴳ ⵜⵃⵔⵔⴰⵜ ⵡⴰⵍⴰ ⴳ ⵍⴽⵙⴱ. ⵜⵜⵓⵖ ⵎⴷⴷⵏ ⵍⵍⴰ ⵜⵜⵄⵉⵛⵏ ⵅⴰⵙ ⵙ ⵜⵃⵔⵔⴰⵜ ⴷ ⵍⴽⵙⴱ; ⵎⴰⵛⴰ ⵍⵍⴰ ⴰⵙ ⵜⵜⵉⵏⵉⵏ ⵉⵎⵇⵇⵕⴰⵏⵏ ⵏ ⵜⴰⵎⴰⵣⵉⵔⵜ ⵜⵜⵓⵖ ⵜⵜ ⵍⵍⴰ ⵜⵖⵎⵙ ⵙ ⵉⵢⵥⴹⵎ ⴷ ⵓⵣⵓⴳⴳⵯⴰⵔ, ⴽⵓⵍⵛⵉ ⵅⴰⵙ ⵉⴳⴷⵎⵉⵡⵏ, ⴽⵓⵍⵛⵉ ⵅⴰⵙ ⵉⵃⴷⵔⴰⵔⴰⴼⵏ, ⵍⵍⴰⵏ ⴰⴳⴳⵯⴷ ⵡⴰⵏⵙⵉⵡⵏ ⵏⵏⴰ ⵜⵜⵓⵖ ⴷ ⵍⵖⴰⴱⵜ ⴰⵎⵎ ⵖⵎⵕⴰ, ⵓⵔ ⴷⴰ ⴷⵉⴳⵙⵏ ⵉⵜⵜⴽⴽⵏ ⵅⴰⵙ ⵉⵇⵟⵟⴰⵄⵏ; ( 354 ) ⵉⵜⵜⵅ ⵜⵄⴷⴷⴰ ⵜⵎⴰⵣⵉⵔⵜ ⵏ ⵜⵃⵔⵔⴰⵜ, ⵓⵔ ⵊⵊⵉⵏ ⵉⵜⵜⵓⵃⴰⵣ ⴱⵏⴰⴷⵎ ⴰⴷ ⵇⵍⵍⵄ ⵍⵎⵃⵕⵓⵎ ⴷ ⵉⵡⴰ ⴰⴷ ⵉⴹⵡⵡⴰⵄ ⵜⴰⵎⴰⵣⵉⵔⵜ; ⵜⵍⵍⴰ ⵍⵄⴷⴰⵡⵜ ⵍⵍⵉ; ⵓⵔ ⴷⴰ ⵉⵜⵜⵖⵉⵎⴰ ⴱⵏⴰⴷⵎ ⴰⴷ ⵉⵙⵙⵉⴽⵍ ⴰⵛⴰⵍ ⴱⴰⵛ ⴰⴷ ⵉⵅⵎⵎⴻⵎ ⵉ ⵍⴰⵚⵍ; ⵎⴰⵛⴰ ⵇⵇⴰⵃ ⵜⴰⵎⴰⵣⵉⵔⵜ ⵍⴰ ⵍⵎⵃⵕⵓⵎ ⵍⴰ ⵜⵏⵏⴰ ⵉⵥⵉⵍⵏ ⵍⵍⴰ ⵜⴱⴷⴰ; ( 355 ) ⴰⴷⴷⴰ ⵢⵉⵍⵉ ⴱⵓⵀⵢⵢⵓⴼ, ⵍⵍⴰ ⵜⵜⵓⵎⵙⴰⵖ ⵜⵎⴰⵣⵉⵔⵜ ⵅⴰⵙ ⵙ ⵓⵃⵎⵎⵓⵎ. ⵉⵜⵜⵅ ⵜⵄⴷⴷⴰ ⵜⵎⴰⵣⵉⵔⵜ ⵏⵏⴰ ⵓⵔ ⴷⴰ ⵉⵜⵜⵓⴽⵔⴰⵣⵏ ⵍⵍⵉ, ⵉⵄⴷⴷⴰ ⵍⴽⵙⴱ, ⵉⵍⵍⴰ ⵎⴰⵏⵉ ⵖⴰ ⵉⵀⴷⵓ ⵍⵎⴰⵍ; ⵉⵜⵊⵊⵕ ⴱⵏⴰⴷⵎ ⵍⵍⵉ, ⴽⵓⵍ ⵜⴰⵅⴰⵏⵜ ⵍⵍⴰ ⵖⵓⵔⵙ ⵜⵜⴰⴼⴰⴷ ⵜⵉⵃⵉⵎⵔⵜ ⵏ ⵡⵓⵍⵍⵉ ⴷ ⵉⵢⵢⵉⵙ ⴷⴰⵜ ⵏ ⵓⵅⴰⵎ. ⵎⴰⵛⴰ ⵡⴰⵀⵡⵡⴰ ⵎⴷⴷⵏ ⵍⵍⴰⵏ ⴳ ⵜⵎⴰⵔⴰ ⵏ ⵍⵎⵙⴽⵏ; ⵇⵇⴰⵃ ⵎⴷⴷⵏ ⵍⵍⴰ ⵙⴽⵏⵏ ⴳ ⵓⵅⴰⵎ, ⵓⵔ ⵍⵍⵉⵏⵜ ⵍⵍⵉ ⵍⴱⵢⵓⵜ ⵉⵜⵜⵅ ⵉⵍⵍⴰ ⴱⵏⴰⴷⵎ ⵓⵔ ⵉⵕⵚⵉ: ⴰⵎⴰ ⵀⴰ ⵜ ⵖⵔ ⵍⵄⵣⵉⴱ, ⴰⵎⴰ ⵀⴰ ⵜ ⴰⴷ ⵔⵡⵍ, ⴰⵎⴰ ...; ⴰⴳⴳⵯⴷ ⵡⵏⵏⴰ ⵉⴱⵏⴰⵏ ⵛⴰ ⵏ ⵜⴰⵍⴱⵉⵜⵜ, ⵍⵍⴰ ⵉⵜⴼⴼⵖ ⵙ ⵓⵅⴰⵎ ⴰⵎⴰ ⴰⴷ ⵉⵖⵓⴱⴱⵔ ⴰⵎⴰ ⴰⴷ ⵉⵀⴷⵓ. ⴰⴷⴷⴰⵢ ⴷ ⵓⵜⵏ ⵉⵄⴷⴰⵡⵏ, ⵇⵇⴰⵃ ⵡⵉⵏⵏⴰ ⵍⵍⴰⵏⵉⵏ ⵜⴰⵎⴰ ⵏ ⵉⴼⵔⴰⵏ, ⵍⵍⴰ ⴷⵉⴳⵙⵏ ⴽⵊⵊⵎⵏ, ⵍⴰ ⵏⵉⵜⵏⵉ ⵍⴰ ⵍⵎⴰⵍ ⵏⵏⵙⵏ: ⵡⵉⵏⵏⴰ ⴱⵄⴷⵏⵉⵏ ⵍⵍⴰ ⵔⴳⴳⵯⵍⵏ ⵙ ⵕⵕⵃⵉⵍ ⵖⵔ ⵜⵜⵉⵙⴰⵄ; ⵉⵡⴰ ⵜⴽⴽⴰ ⴳ ⵜⵇⵇⴱⵉⵍⵜ ⵏ ⴰⵢⵜ ⵙⴰⴷⴷⵏ: ⵔⴰⵏ ⴰⵢⵜ ⵡⴰⵕⴰⵢⵏ ⴰⴷ ⵜⵏ ⵙⵙⵓⴼⵖⵏ ⵙⴳ ⵜⵎⴰⵣⵉⵔⵜ, ⵓⵔ ⵀⵏⵏⴰⵏ ⴰⵍⵍⵉⴳ ⴷ ⵉⴷⴷⴰ ⵓⵢⵍⵍⵉⴷ ⵉⴱⴱⵉ ⴰⵙⵏ ⴷ ⵉⵅⴼⴰⵡⵏ ⵉⵜⵜⵅ ⵄⵚⴰⵏ ⵍⵎⵅⵣⵏ. ⴰⴷⴷⴰⵢ ⴼⴼⵖⵏ ⵎⴷⴷⵏ ⵙ ⵍⵄⵣⵉⴱ ⴰⵀⴰ ⵄⴷⴷⵓⵏ ⵉⵅⴰⵎⵏ, ⵍⵍⴰ ⵜⵏ ⴱⵏⵏⵓⵏ ⵇⵇⴰⵃ ⴳ ⵢⵓⵏ ⵏ ⵡⴰⵏⵙⴰ, ⴰⵊⵊⵏ ⴳ ⵡⴰⵎⵎⴰⵙ ⵎⴰⵏⵉ ⴳ ⵔⴰⴷ ⵢⵉⵍⵉ ⵍⵎⴰⵍ; ⴰⴷⴷⴰ ⵉⵡⵡⵜ ⵢⵉⴹ, ⵢⵉⵍⵉ ⵓⵎⵖⴰⴱ ⴷ ⵓⵏⵥⴰⵕ ⵍⵍⴰ ⵜⴳⴳⵯⴷⵏ ⵎⴷⴷⵏ ⴳ ⵉⵅⵡⵡⴰⵏⵏ; ⵍⵍⴰ ⵕⵥⵥⵎⵏ ⵉ ⵉⴹⴰⵏ ⵏⵏⵙⵏ ⴰⴷ ⵄⵙⵙⵉⵙⵏ, ⵇⵇⵉⵎⵏ ⵍⵍⴰ ⵜⵜⵎⵎⵖⵔⴰⵏ ⵙⴳ ⵓⵅⴰⵎ ⵙ ⴰⵅⴰⵎ ⴱⴰⵛ ⵓⵔ ⵜⵏ ⵉⵜⵜⴰⵡⵉ ⵓⵏⵓⴷⴷⵎ ⵎⵉⵄⴰⴷ ⴰⵔ ⴷ ⵢⴰⵍⵉ ⵡⴰⵙⵙ. ⴰⵙⵙ ⴰⴷ, ⵍⵃⵎⴷⵓⵍⵉⵍⵍⴰⵀ, ⴽⵓⵍ ⵢⵓⵏ ⵍⵍⴰ ⵉⵡⵡⵜ ⵜⵉⵢⵎⵎⵉ ⵏⵏⵙ ⵍⵍⴰ ⵉⴹⵓⵕ ⴰⵙ ⵚⵚⵓⵕ, ⵜⵉⵍⵉ ⵍⵄⵙⵙⴰ ⵍⵍⴰ ⵜⵏⵏⴹ ⵓⵔ ⵉⵍⵍⵉ ⵍⴰ ⴰⵅⵡⵡⴰⵏ ⵡⴰⵍⴰ ⵎⴰⴷ ⴰⴽ ⵜⵜ ⵉⵜⵜⵛⵡⵡⴰⵛⵏ; ⴽⵓⵍ ⴰⵅⴰⵎ ⵉⵍⵍⴰ ⵖⵓⵔⵙ ⵉⵖⵔⵎ ⵏⵏⵙ; ⵡⴰⵀⵡⵡⴰ ⴽⵓⵍ ⵜⴰⵅⴰⵏⵜ ⵍⵍⴰ ⵖⵓⵔⵙ ⵉⵜⵜⵉⵍⵉ ⵢⵓⵏ ⵓⵅⴰⵎ; ⴰⴷⴷⴰⵢ ⵉⵍⵉⵏ ⵉⵏⴱⵢⴰⵡⵏ, ⵏⵏⵚⵚ ⵏ ⵓⵅⴰⵎ ⵍⵍⴰ ⴷⵉⴳⵙ ⵜⵜⵉⵍⵉⵏⵜ ⵜⵄⵢⵢⴰⵍⵉⵏ, ⵏⵏⵚⵚ ⵎⴷⴷⵏ; ( 360 ) ⴰⵃⵏⴷⵉⵔ, ⵉⵇⵇⵛⵓⵛⵏ, ⵉⴽⵔⵡⴰⵏ, ⴽⵓⵍⵛⵉ ⴷⵉⴳⵙ; ⵙⵙⵏⴷⵓⵇ ⵍⵍⴰ ⵜ ⵜⵜⵇⵇⵏⵏ ⵎⴷⴷⵏ ⵙ ⵟⵟⵡⴰⵍⴰⵜ ⴱⴰⵔ ⴰⴷ ⵙⵔⵙ ⵉⵔⵡⵍ ⵃⴷⴷ ⵎⵛ ⵉⵔⴰ ⴰⴷ ⵜ ⵉⵃⵡⵡⵣ. ⴰⴷⴷⴰ ⵉⴽⴽⴰⵜ ⵓⵏⵥⴰⵕ, ⵍⵍⴰ ⵜ ⵜⵔⴷⴷⵍ ⵜⵎⵟⵟⵓⴹⵜ ⵜⵉⵔⴼⴰⴼⵉⵏ, ⵜⴳⴷ ⵉⵎⵎⵛⵛⴰ ⵙⴳ ⵓⵣⵡⵓ, ⵜⵇⵇⵉⵎ ⴰⴷ ⵜⵃⵏⴷⵔ ⵖⵔ ⴷⴰⵅⵍ ⴳ ⴷⴷⵓⵅⴰⵏ; ⵉⴷⴷ ⵍⵎⴰⵍ, ⵎⵛⵓⵔ ⵉⴷⴷⵉ ⴰⴷ ⵉⴷⵔⵔⵇ ⴳ ⵉⴼⵔⴰⵏ, ⵍⵍⴰ ⵖⵉⴼⵙ ⵜⵜⴽⴽ ⵜⵎⴰⵔⴰ, ⵓⵔ ⴷⵉⴳⵙ ⵍⴽⵙⴱ. ⵎⵛ ⴷⴷⴰⵏ ⵉⵄⴷⴰⵡⵏ ⴰⴷ ⵓⵜⵏ, ⵜⴰⴷⴳⴳⵯⴰⵜ ⵍⵍⴰ ⵜⵙⵙⵏⵡⴰ ⵜⵎⵟⵟⵓⴹⵜ ⵉⵎⵏⵙⵉ ⴷⵖⵉⵢⴰ, ⵜⴰⵎⵣ ⵉⴼⵓⵍⵍⵓⵙⵏ, ⵜⵔⴷⵍ ⴰⵅⵅⴰⵎ, ⵜⴰⵙⵙ ⵜ; ⵜⴰⴷⴳⴳⵯⴰⵜ ⴰⴷⴷⴰⵢ ⴷ ⵉⵔⵡⵡⵃ ⵍⵎⴰⵍ, ⵍⵍⴰ ⵜⵜⵎⵉⵏⵙⵉⵡⵏ ⵎⴷⴷⵏ, ⴷⴰ ⴽⴽⵔⵏ ⴰⴷ ⴷⴷⵓⵏ, ⴰⴷ ⵕⵕⵥⵏ ⵖⵔ ⴷⴼⴼⵉⵔ. ⵉⴷⴷ ⵜⴰⵃⵔⵔⴰⵜ ⵍⵍⵉ, ⵍⵍⴰ ⴽⵔⵔⵣⵏ ⵎⴷⴷⵏ ⴰⵢⵏⵏⴰ ⵏ ⵜⵏⴹⵉⵕⵉⵏ, ⴷⴷⵓⵏ ⵓⵔ ⴷⴰ ⵜⵜⵔⴰⵢⴰⴱⵏ ⵎⵉⵄⴰⴷ ⴰⵔ ⴷ ⵉⵔⵉⵏ ⴰⴷ ⵎⵢⵔⵏ; ⵎⴰⵛⴰ ⵄⵎⵕⵓ ⵓⵔ ⵉⵍⵍⵉ ⵍⴰⵎⴰⵏ: ⴰⵎⴽⵙⴰ ⵙ ⵍⵎⴷⴼⵄ, ⴰⴼⵍⵍⴰⵃ ⵙ ⵍⵎⴷⴼⵄ; ⵡⵏⵏⴰ ⵉⵙⴰⴼⵔⵏ ⵍⵍⴰ ⵉⴳⴳⵯⴷ ⴰⴷ ⴰⵙ ⵃⵜⴰⵍⵏ ⵎⵛ ⵜ ⵉⵣⵣⵏⵣ ⵃⴷⴷ. ⵎⴰⵛⴰ ⵍⵍⵉ ⵍⵍⴰ ⴰⴽ ⵜⵜⵉⵏⵉⵏ ⵎⴷⴷⵏ ⵜⵍⵍⴰ ⵜⵔⵢⴰⵣⵜⵜ: ⵍⵃⴱⵙ ⴷ ⵍⴱⴰⵕⵓⴹ ⵉ ⵉⵔⵢⵣⵏ ⴰ ⵎⵉ ⵉⵍⵍⴰ, ⵓⵔ ⵉⴷⴷ ⵉ ⵜⵄⵢⵢⴰⵍⵉⵏ; ⴰⵙⵙ ⴰⴷ ⵉⵔⵢⵉⵣⵏ ⴰⵖⵓⵍⵏ ⴷ ⵛⵛⵎⴰⵢⵜ, ⵛⵛⵎⴰⵢⵜ ⴷ ⵉⵔⵢⵉⵣⵏ ⴰⴼⴰⴷ ⵏⵏⴽ ⴰ ⵍⵇⵓⵕⵟⴰⵚ! ⵉⴷⴷ ⴰⵙⵙ ⴰⴷ ⵕⴰⵢⴱ ⴰⴷ ⵜⴰⵏⵏⴰⵢⵜ, ⵜⴱⴷⴷⵍ ⴷⴷⵓⵏⵉⵜ! ⵎⵔ ⵉⴷⴷ ⴰⴷ ⵉⵄⴰⵢⴷ ⵡⵏⵏⴰ ⵉⵎⵎⵓⵜⵏ, ⵓⵔ ⵉⵜⵜⵄⵇⵇⴰⵍ ⴳ ⵡⴰⵏⵙⴰ ⵏⵏⴰ ⴳ ⵉⵄⵉⵛ; ⵎⴰⵏⵉ ⵉⵥⴹⵎⵉⵡⵏ, ⵎⴰⵏⵉ ⵉⵥⵓⵕⴰⵏ! ⴽⵓⵍⵛⵉ ⵉⵜⵜⵓⵇⵍⵍⵄ, ⴽⵓⵍⵛⵉ ⵉⵜⵜⵓⴽⵔⵣ, ⴽⵓⵍⵛⵉ ⵎⴰⵏⵉ ⵖⵔ ⴹⴹⵕⵕⵜ ⵉⵅⴼ ⴷ ⵉⵖⵔⵎⴰⵏ; ⴰⴱⵔⵉⴷ ⵏ ⵟⵟⵓⵎⵓⴱⵉⵍ ⵍⵍⴰ ⵉⴽⴽⴰ ⵊⴰⵊ ⵏ ⵜⵇⵇⴱⵉⵍⵜ, ⵉⵕⵓⵎⵉⵢⵏ ⵍⵍⴰ ⴽⵔⵔⵣⵏ ⵜⵉⵎⵉⵣⴰⵔ ⵉⵏⵙⵍⵎⵏ, ⵍⵡⴰⵛⵓⵏ ⵍⵍⴰ ⵜⵇⵇⵕⴰⵏ ⵜⴰⵄⵊⵎⵉⵢⵜ, ⴰⵔⵢⴰⵣ ⵍⵍⴰ ⵉⵜⵜⴻⵜⵜ ⴷ ⵓⵕⵓⵎⵉ ⴱⵓ ⵛⵛⵎⵔⵓⵔ ⴰⴼⵓⵙ ⴷ ⵓⴼⵓⵙ; ( 365 ) ⴰⵔⵢⴰⵣ, ⴰⵙⵙ ⴰⴷ, ⴷ ⵡⵏⵏⴰ ⵉⵜⵛⴽⴽⴰⵎⵏ ⴷ ⵡⵏⵏⴰ ⴳ ⵓⵔ ⵉⵍⵍⵉ ⵡⵓⵍ; ⵏⵜⵜⴰⵏ ⴰⴷ ⵉⵜⵜⵃⴰⴹⴰⵕⵏ ⴳ ⵉⵊⵎⵓⵄⵏ, ⵏⵜⵜⴰⵏ ⴰⴷ ⵉⵃⴽⴽⵎⵏ! ⵉⵄⵔⵔⵉⵎⵏ ⵓⵔ ⵇⵇⵉⵎⵏ, ⵓⵔ ⵜⵇⵇⵉⵎ ⵜⵔⵢⴰⵣⵜⵜ; ⴱⵏⴰⴷⵎ ⵉⵄⴷⴷⴰ, ⵜⵛ ⵉⵢⵉ ⴰⴷ ⵓⵔ ⴽ ⵜⵛⵖ! ⵎⴰⵏⵉ ⵜⵉⵃⵉⵎⵔⴰⵡⵉⵏ ⵎⴰⵏⵉ ⵜⴰⴼⴼⵉⵡⵉⵏ, ⴰⴳⴳⵯⴷ ⵍⴱⴰⵕⴰⴽⴰ ⵏ ⵕⴱⴱⵉ ⵜⵜⵓⵕⴼⵄ ⵉⵙ ⴰⵖ ⵉⵅⵅⴰ ⵡⵓⵍ; ( 366 ) ⵅⴰⵙ ⵡⵡⵜ ⴷⵉⵢⵉ, ⴰⴷ ⴷⵉⴽ ⵡⵡⵜⵖ, ⴰⵏⵙⵍⵎ ⵢⴰⵖⵓⵍ ⴷ ⴰⵕⵓⵎⵉ, ⴰⵕⵓⵎⵉ ⴷ ⴰⵏⵙⵍⵎ; ⵎⴷⴷⵏ ⵉⵄⴰⵢⴷ ⵓⵔ ⵖⵓⵔⵙⵏ ⵍⵃⵢⴰ ⴰⴷ ⵜⵜⴽⴽⵎⵓⵏ, ⵍⵍⴰ ⵓⵊⵊⴰⵏ ⵉⵛⵉⵅⵡⴰⵏ ⴰⵎⵎ ⵜⵄⵢⵢⴰⵍⵉⵏ, ⵍⵍⴰ ⴽⴽⴰⵜⵏ ⵜⴰⵎⴰⵔⵜ, ⵓⵔ ⵉⵇⵇⵉⵎ ⵍⵃⵢⴰ. ⵡⴰⵍⴰⵢⵏⵏⵉ ⴰⵢ ⴰⴷ ⴰⴷ ⵜⵔⴰ ⵍⵓⵇⵜ, ⵕⴱⴱⵉ ⴰⴷ ⴰⵖ ⴷ ⵢⴰⵣⵏ ⵛⴰ ⵏ ⵡⵓⵙⵙⴰⵏ ⵏⵏⴰ ⵥⵉⵍⵍⵉⵏ. ⴰⵡⴰ ⵎⴰⵜⵜⴰ ⵍⵃⴽⴰⵎ ⵏⵏⴰ ⵉⵇⵇⵉⵎⵏ! ⴰⵙⵙ ⴰⴷ ⴰⵔⵢⴰⵣ ⵓⵔ ⵜ ⵙⵙⵎⵏⴰⵄⵏⵜ ⴰⴳⴳⵯⴷ ⵍⴼⵍⵓⵙ ⵎⵛ ⵜⵏⵜ ⵉⵛⴰ! - ⵎⵉⵙⵎ, ⵎⵉⵙⵎ? ⴰ ⵄⵍⴰⵃⴰⵍ, ⵍⵍⴰ ⵜⵅⵕⵕⴰⴼⵜ, ⴰ ⴰⵔⵢⴰⵣ ⴰⴷ! ⵎⵎⴰ ⴷ ⵇⵇⵉⵎⵏⵜ ⵍⴼⵍⵓⵙ ⵙⵡⴰⵏⵜ ⴽⴰ! ⵡⵍⵍⴰⵀ, ⴰ ⵎⵛ ⵓⵔ ⵜⵛⴼⵉⵜ ⴷⴷⵇⵇⴰ, ⴰ ⵎⵛ ⵓⵔ ⵜⵡⵡⵉⵜ ⵜⵉⵢⵜⵉ ⵜⴰⵅⴰⵜⴰⵔⵜ ⵙⴳ ⵍⵎⵕⵜ ⵜⴰⵎⵣⵡⴰⵔⵓⵜ ⴰⵔ ⵜⴷⴷⵉⵜ! ⵓⵔ ⵉⵇⵇⵉⵎ ⴰⵙⵙ ⴰⴷ ⵓⵢⵏⵏⴰ ⵏ ⵍⵎⵣⴰⵃ! ⴰⵙⵙ ⴰⴷ ⴰⴳⴳⵯⴷ ⵍⵇⵓⵢⵢⴰⴷ ⵍⵍⴰ ⵜⵓⴳⴳⵯⴹⵏ ⵉⵛⵎⵛⴰⵎⵏ! ⵄⴷⴷⴰⵏ ⵉⵛⵎⵛⴰⵎⵏ ⵏⵏⴰ ⵚⵚⴰⵡⴰⴹⵏⵉⵏ ⴰⵡⴰⵍ ⵉ ⵉⵕⵓⵎⵉⵢⵏ! - ⵅⵍⴰⵚⵚ ⴰⴳⴳⵯⴷ ⴽⴳⴳ ⴰⵎⵎ ⵢⵉ ⵓⵔ ⴷⴰ ⵉⵜⵜⴰⵡⵉ ⵍⵎⵓⵔⴰⵇⵉⴱ ⵍⵅⴱⴰⵕ ⵉ ⵓⵢⵏⵏⴰ ⵉⵟⵟⵊⵕⵓⵏ! ⴰⴳⴳⵯⴷ ⵏⵜⵜⴰ ⵍⵍⴰ ⵕⴰⵢⴱ ⴳ ⴽⵓⵍⵛⵉ; ⵇⵇⴰⵃ ⵍⵍⴰ ⵎⵕⴰⵢⴰⴱⵏ ⵖⵉⴼⵙⵏⵜ. ⴰ ⵅⴰⵙ ⵙⵙⵓⵇ ⵉⵏⵏ ⴰⴷ ⵉⵙⵉⵡⵍ ⵍⵇⵇⴰⵢⴷ ⵍⵖⵓⵍ ⴱⵜⴰⵢⵜⴰⵢ ⵓⵔ ⵉⵃⵛⵛⵉⵎ ⵓⵔ ⵉⵄⵔⵉⴳ: ⵜⵍⵍⴰ ⵢⵓⵜ ⵏ ⴷⴷⵄⵓⵜ ⵖⵔ ⵏⵙⵎⴰⵄⵉⵍ ⴷ ⵃⴷⴷⵓ ⵓⵔⵃⵃⵓ, ⵉⵡⴰ ⵓⵔ ⴰⴽ ⵉⵅⴼⵉ ⵍⵃⴰⵍ, ⵙⵎⴰⵄⵉⵍ ⵙ ⵓⵢⵏⵏⴰ ⵏⵏⵙ ⵉⵛⴰⵄⵍⴰⵃⴰⵍ ⵍⴼⵍⵓⵙ; ⴰⵙⵙ ⵏⵏⴰ ⵏ ⵙⵙⵓⵇ ⵍⵍⴰ ⵉⵣⵔⵉ ⵍⵇⵇⴰⵢⴷ ⴷⴰ ⵢⴰⵏⵏⴰⵢ ⵎⵎⵉⵙ ⵏ ⵙⵎⴰⵄⵉⵍ ⵊⴰⵊ ⵏ ⵢⵓⵏ ⵓⵇⵉⴹⵓⵏ ⵍⵍⴰ ⵉⵇⵇⵉⵎ ⴷⴰ ⵉⵖⵔⴰ ⴰⵙ ⴷ ⵎⴷⴷⵏ ⵍⵍⴰ ⵍⵍⴰⵏ: ( 370 ) « ⴰ ⵎⵎⵉⵙ ⵏ ⵙⵎⴰⵄⵉⵍ! ⴰ ⵉⵏⵉ ⴰⵙ ⵉ ⵉⴱⴱⴰⴽ ⴷⴷⵄⵓⵜ ⵏⵏⴰ ⴳⵔ ⴰⵙ ⴷ ⵓⵄⵟⵟⴰⵕ ⵏⵏⴰ ⵏ ⵃⴷⴷⵓ ⴰⵎⵊⵊⵓⴹ ⴷⴷⴰⴱⴰ ⴰⴷ ⵜⵜ ⵄⴷⵍⵖ, ⵅⴰⵙ ⵜⵜⵀⵏⵏⴰⵜ! ⴰ ⵉⴱⴱⴰⴽ ⴷ ⵡⵉⵏⵏⵖ ⴰⴷ ⵉⴳⴰ, ⴷⴷⴰⴱⴰ ⴰⴷ ⵜ ⵙⵙⵖⵍⴱⵖ ⵅⴼ ⴹⴹⴰⵍⵎ ⵏⵏⴰ! » ⵢⵓⵜ ⵏ ⵍⵎⵕⵕⵜ ⴰⴷ ⴰⵏⵏⴰⵢⵖ ⵅⵍⴰⵀ ⵎⴰⴷ ⵙⵡⴰⵏⵜ ⵍⴼⵍⵓⵙ, ⴰⴱⵔⵉⴷ ⵏⵏⴰ ⵜⴳⴳⵏⵜ ⴰⴳⴳⵯⴷ ⵊⴰⵊ ⵏ ⵉⵙⵍⵍⵉ. - ⴰ ⵅⴰⵍⵉ, ⵍⵍⴰ ⵜⵙⴰⵡⴰⵍⵏⵜ ⵡⵏⵏⴰ ⵜⵏⵜ ⵉⵛⴰⵏ! - ⵢⵓⵜ ⵏ ⵍⵎⵕⵕⵜ ⵓⵎⵥⵏ ⴰⵢⵜ ⵡⴰⴷⴷⴰ ⵎⵉⵍⵓⴷ ⵅⴼ ⵜⵎⵟⵟⵓⴹⵜ ⵏ ⴱⵓ ⵄⵍⵉ, ⵙ ⵡⴰⵙⵙ ⴷ ⵜⴰⴼⵓⵛⵜ ⵍⵍⴰ ⵜⵃⵎⴰ, ⵙ ⵛⵛⵀⵓⴷ ⵙ ..., ⵉⵡⴰ ⵉⴽⴽⵔ ⵓⵖⵓⵢⵢⵉ, ⵍⴰⵃⵉⵏ ⵜ ⴰⵔ ⴰⵅⴰⵎ ⵏⵏⵙ, ⵉⵎⵏⵄ ⴰⵙⵏ ⵓⵔ ⵜ ⵓⵎⵉⵥⵏ ⵙ ⴰⴼⵓⵙ; ( 372 ) ⵉⵡⴰ ⴰ ⵙⵉⴷⵉ ⵉⵏⵓ, ⵉⴽⴽⵔ ⵉⴱⴱⴰⵙ ⵏ ⵎⵉⵍⵓⴷ, ⵉⴷⴷⵓ ⵖⵔ ⵙⵉⴷⵉ ⵄⵍⵉ, ⵉⴹⵕⵕⵇ ⴰⵙ ⵉⵜⵅ ⴷ ⴰⵎⴷⴷⴰⴽⴽⵯⵍ ⵏ ⵍⵇⵇⴰⵢⴷ; ⵉⵡⴰ ⴽⴽⵔⵏ ⴷⴷⵓⵏ, ⵅⵍⴹⵏ ⵉⵏⵏ ⵅⴼ ⵍⵇⵇⴰⵢⴷ, ⵉⵣⴰⵢⴷ ⵙⵉⴷⵉ ⵄⵍⵉ, ⵉⵙⵉⵡⵍ ⵙⵔⵙ, ⵉⵛ ⴰⵙ ⵜⵏⵜ, ⵉⵣⴰⵢⴷ ⵉⴱⴱⴰⵙ ⵏ ⵎⵉⵍⵓⴷ, ⵉⵜⵓⵜⵜⴳ, ⵉⴽⵔⴼ ⴷⴰⵜ ⵏⵏⵙ, ⵉⵙⵉⵡⵍ ⵍⵇⵇⴰⵢⴷ, ⵉⵏⵏⴰ ⴰⵙ: « ⴰⴽⵎ ⴰⴱⵔⵉⴷ ⵏⵏⴽ ⴰⴷ ⵓⵔ ⵜⵜⴳⴳⵯⴷ, ⴰⵙⵙ ⵏ ⵍⵃⴽⴰⵎ ⵓⵔ ⵉⵜⵜⵊⵕⵓ ⵛⴰ ⵉ ⵎⴻⵎⵎⵉⴽ, ⴰⴽⵎ, ⵇⵇⵉⵎ ⴳ ⵍⴰⵎⴰⵏ »; ( 373 ) ⵢⴰⵥⵥⴹ ⵉⴱⴱⴰⵙ ⵏ ⵎⵉⵍⵓⴷ ⵖⵔ ⵜⴰⵇⵇⵔⴰⴱⵜ, ⵉⵊⴱⴷ ⴷ ⴰⵍⵜⵓ ⵛⴰ ⵏ ⵍⴼⵍⵓⵙ ⵢⴰⵥⵥⴹ ⵜⵏⵜ ⵉ ⵍⵇⵇⴰⵢⴷ: « ⵍⴰⵡⴰⵀ, ⵍⴰⵡⴰⵀ, ⵉⵏⵏⴰ ⴰⵙ ⵍⵇⵇⴰⵢⴷ, ⵓⵔ ⵜⵜⵃⴷⴰⵊⵊⴰⵜ, ⵓⵔ ⵜⵜⵃⴷⴰⵊⵊⴰⵜ », ⴽⵓⵔ ⵜⵏⵜ ⵉⴷⵃⵃⵉ ⵉ ⵜⴰⵇⵇⵔⴰⴱⵜ, ⵉⵜⵜⵉⵏⵉ ⴰⵙ « ⵓⵔ ⵜⵜⵃⴷⴰⵊⵊⴰⵜ! » - « ⵍⴰⵡⴰⵀ, ⴰ ⵍⵇⵇⴰⵢⴷ, ⵅⴰⵙ ⵍⵉⵚⴰⵏⵚ ⵉ ⵟⵟⵓⵎⵓⴱⵉⵍ » ⴰⵙ ⵉⵏⵏⴰ ⴷⵉⵖ ⵡⵏⵏⴰ ⵉⴹⵏⵉ! ⴰⵙⵙ ⵏ ⵙⵙⵓⵇ ⵃⴹⴹⵕⵏ ⴷ ⴰⵢⵜ ⵓⵖⵓⵢⵢⵉ, ⵜⴰⵎⵟⵟⵓⴹⵜ, ⴰⵔⵢⴰⵣ ⵏⵏⵙ, ⵎⵉⵍⵓⴷ, ⵛⵛⵀⵓⴷ, ⵕⴱⴱⵉ ⵓⵔ ⴽ ⵉⵜⵙⵃⴰⴹⴰⵕ! ⵍⵍⴰ ⵉⵍⵍⴰ ⵍⵇⵇⴰⵢⴷ ⵍⵍⴰ ⵉⵇⵇⵉⵎ ⵏⵜⵜⴰ ⴷ ⵍⵎⵓⵔⴰⵇⵉⴱ ⴷ ⵉⵎⵖⴰⵔⵏ ⴷ ...; ⴷⴰ ⵀⴰⴷ ⵎⵉⵍⵓⴷ ⴷ ⵜⵎⵟⵟⵓⴹⵜ ⴷ ⵓⵔⵢⴰⵣ ⴷ ⵛⵛⵀⵓⴷ, ⴷⴰ ⵉⵙⵉⵡⵍ ⴱⵓ ⵄⵍⵉ ⵉⵏⵏⴰ ⴰⵙ: ( 375 ) « ⴰ ⵍⵇⵇⴰⵢⴷ, ⴰⴷ ⴳⵉⴽ ⵉⴱⴰⵕⴽ ⵕⴱⴱⵉ, ⴰⵔⵢⴰⵣ ⴰⴷ, ⵉⵚⵚⵃⵕⵎ ⵖⵉⴼⵉ ⴰⵔⴰⵡ ⵉⵏⵓ ⴷ ⵍⵎⴰⵃⴰⵍ ⵉⵏⵓ ⵙ ⵡⴰⵙⵙ ⴷ ⵜⴰⴼⵓⵛⵜ ⵍⵍⴰ ⵜⵃⵎⴰ, ⵀⴰ ⵛⵛⵀⵓⴷ, ⵀⴰ ⴽⵓⵍⵛⵉ, ⵉⴽⴽⵔ ⵓⵖⵓⵢⵢⵉ, ⵉⴹⴼⵓⵕ ⵜ ⵎⵉⵄⴰⴷ ⴰⵍⵍⵉⴳ ⵉⴽⵊⵎ ⵊⴰⵊ ⵏ ⵓⵅⴰⵎ ⵏⵏⵙ; ⴷⵖⵉ, ⴰ ⵍⵇⵇⴰⵢⴷ, ⵀⴰ ⵜⵜ ⴷⴰⵜ ⵏⵏⴽ! ». ⴷⴰ ⵉⵙⵉⵡⵍ ⵍⵇⵇⴰⵢⴷ, ⴷⴰ ⵙⵉⵡⵍⵏⵜ ⵍⴼⵍⵓⵙ, ⴷⴰ ⵉⵏⵏⴰ ⴰⵙ ⵉ ⵓⵎⵣⵡⴰⵔⵓ ⵣⵉ ⵛⵛⵀⵓⴷ: « ⵙⵉⵡⵍ ⴽⴳⴳ ⵎⵛ ⵖⵓⵔⴽ ⵎⴰ ⵖⴰ ⵜⵉⵏⵉⵜ! » - « ⵢⵢⵉⵀ, ⴰ ⵍⵇⵇⴰⵢⴷ!, ⵏⴰⵏⵏⴰⵢ ⵎⵉⵍⵓⴷ ⵉⴽⵊⵎ ⵖⵔ ⵙ ⴰⵅⴰⵎ ⵏ ⵓⵔⵢⴰⵣ ⴰⴷ, ⵉⴼⴼⵖ ⵉⴹⴼⵓⵕ ⵜ ⵓⵖⵓⵢⵢⵉ ⵎⵉⵄⴰⴷ ⴰⵔ ⴰⵅⴰⵎ! ». ⴷⴰ ⵉⵏⵏⴰ ⴰⵙ ⵍⵇⵇⴰⵢⴷ ⵉ ⵓⵎⵅⵣⵏⵉ: « ⵛ ⴰⵙ ⵢⵓⵜ ⵟⵟⵕⵛⴰ ⵉ ⵡⵍⴷ ⵍⵃⵃⵕⴰⵎ ⴰⴷ! ». ⴷⴰ ⵉⵏⵏⴰ ⴰⵙ ⵓⵎⵅⵣⵏⵉ: « ⴰⵖ ⴰⵎ » ⵙ ⵓⵖⵣⵣⴰⵍ ⵉ ⵎⴰⴽ ⵎⵉⵄⴰⴷ ⴰⵍⵍⵉⴳ ⵜ ⵖⵉⴼⵙ ⵉⵕⵥⴰ, ⴷⴰ ⵉⵏⵏⴰ ⴰⵙ: « ⵣⵔⴳ ⵙ ⴰⴷ ⵜⵓⵕⴱⴱⴰⵜ ⴱⴰⵛ ⴰⴷ ⵜⵉⵙⵉⵏⵜ ⵉⵃⵍⵍⴰⵍⵏ ⵏⵏⴰ ⵎⵉ ⵜⵓⵎⵕⵜ » ⴷⴰ ⵉⵙⵉⵡⵍ ⵍⵇⵇⴰⵢⴷ ⴷⴰ ⵉⵏⵏⴰ ⴰⵙ ⵉ ⵡⵏⵏⴰ ⴹⵏⵉ: « ⵙⵉⵡⵍ ⴽⴳⴳ ⴰ ⵛⵛⵉⵟⴰⵏ ⴰⴷ! » ⴷⴰ ⵉⵙⵉⵡⵍ ⵛⵛⴰⵀⴷ ⴷⴰ ⵉⵏⵏⴰ ⴰⵙ: ( 378 ) « ⴰⵢ ⴰⴷ ⵍⵇⵇⴰⵢⴷ ⵕⴱⴱⵉ ⴰⴷ ⴳⵉⴽ ⵉⴱⴰⵔⴽ, ⵛⴰ ⵓⵔ ⵜ ⵏⴰⵏⵏⴰⵢ, ⵉⵍⵍⴰ ⵕⴱⴱⵉ ⵉⵛⴰⵀⴷ! » ⴷⴰ ⵙⵉⵡⵍ ⵍⵇⵇⴰⵢⴷ, ⴷⴰ ⵉⵏⵏⴰ ⴰⵙ: « ⵉⵡⴰ ⴼⴼⵖ, ⵉⴼⴼⵖ ⴰⴽ ⵡⵓⵍ, ⴰ ⵛⵛⵉⵟⴰⵏ ⵏ ⵜⵇⵇⴱⵉⵍⵜ, ⵎⵔ ⵉⴷⴷ ⴰⴷ ⵜⵄⴰⵡⴷⵜ, ⴰⴷ ⴰⴽ ⵉⴳ ⵜⵏⵏⴰ ⵎⵉ ⵖⴰ ⵜⵄⵇⵇⵍⵜ! ⵉⵡⴰ ⵀⴰ ⵜⴰ ⵣⵣⵔⵉⵖ ⴰⴽ ⵜⵜ! » ⴷⴰ ⵣⴰⵢⴷⵏ ⴷ ⵡⵉⵏⵏⴰ ⵉⴹⵏⵉ, ⴷⴰ ⵙⵉⵡⵍⵏ ⵙ ⵢⵓⵏ ⵓⵇⵇⵎⵓ, ⵏⵏⴰⵏ ⵓⵔ ⴰⵏⵏⴰⵢⵏ ⵓⵔ ⵥⵕⵉⵏ! ( 379 ) ⴷⴰ ⵉⵙⵉⵡⵍ ⵍⵇⵇⴰⵢⴷ, ⴷⴰ ⵉⵏⵏⴰ ⴰⵙ ⵉ ⵓⵔⵢⴰⵣ ⵏ ⵜⵎⵟⵟⵓⴹⵜ: « ⵉⵡⴰ ⵎⴰⴷ ⵖⵓⵔⴽ ⴰⴷ ⵜ ⵜⵉⵏⵉⵜ, ⵎⴰⵜⵜⴰ, ⵉⵙ ⴷⴰ ⵜⴳⴳⴰⵔⵜ ⵍⴱⴰⵟⵍ ⵅⴼ ⵎⴷⴷⵏ? ⵎⴰⵏⵉⴽ ⴰ ⴰⵎⵅⵣⵏⵉ? ⴰⵡⵉ ⵡⵉ ⵀⴰ ⵜⵏ ( ⵎⵉⵍⵓⴷ ⴷ ⵓⵔⵢⴰⵣ ⵏ ⵜⵎⵟⵟⵓⴹⵜ ) ⵖⵔ ⵜⴱⵏⵉⵇⵜ ⴰⵔ ⴷ ⵅⵍⵍⵚⵏ ⵍⵅⴹⵉⵜ, ⵎⵉⵜⴰⵢⵏ ⵔⵢⴰⵍ ⵢⵓⵏ! ⴰⵎⵛⵉⵙⵙ ⴰⴷ ⵉⵜⵜⵊⵕⵓⵏ ⵍⴰ ⵉ ⵡⵏⵏⴰ ⵢⵓⴹⵏ ⵍⴰ ⵉ ⵡⵏⵏⴰ ⵉⵜⵜⵢⵓⴹⵏ; ⵇⵇⴰⵃ ⴰⵢⵜ ⵍⵎⵅⵣⵏ ⵍⵍⴰ ⵏⵟⵟⵕⵏ: ⵙⴳ ⵓⵎⵅⴰⵣⵏⵉ ⴰⵔ ⵍⵇⵇⴰⵢⴷ! ⴰⴷⴷⴰⵢ ⴷ ⵢⴰⵡⴹ ⵡⴰⵡⴰⵍ ⵏ ⵛⴰ ⵏ ⵍⴽⵓⴼⴰ ⵖⵔ ⵜⵇⵇⴱⵉⵍⵜ, ⵍⵍⴰ ⵉⵙⵙⵓⵜⵓⵔ ⵍⵇⵇⴰⵢⴷ ⵇⴷⴷⴰ ⵡⴰ ⵇⴷⴷⴰ ⵏ ⴱⵏⴰⴷⵎ; ( 381 ) ⴰⵎⵖⴰⵔ ⵍⵍⴰ ⵉⴳⴳⴰⵔ ⵅⴼ ⵜⵇⵇⴱⵉⵍⵜ ⴽⵟⵕ ⵓⵢⵏⵏⴰ ⴱⴰⵛ ⴰⴷ ⵉⴼⵔⵓ ⴰⵢⵏⵏⴰ ⵉⵛⴰⵢⴹⵏ ⵙ ⵍⴼⵍⵓⵙ; ⴰⵎⵅⵣⵏⵉ ⵍⵍⴰ ⴷ ⵉⵜⵙⴽⴽⴰⵔ ⵇⵇⴰⵃ ⵜⴰⵇⵇⴱⵉⵍⵜ, ⵍⴰ ⴰⵎⵥⵥⵢⴰⵏ ⵍⴰ ⴰⵎⵇⵇⵕⴰⵏ ⵅⴰⵙ ⵡⵏⵏⴰ ⵉⴷⵀⵏⵏ ⵙⵙⵉⵔ; ⴰⵎⵅⵣⵏⵉ, ⵓⵔ ⴰⵙ ⵉⵍⵍⵉⵏ ⴳ ⵓⵇⵇⵎⵓ ⵅⴰⵙ ⵙⵙⵅⵓⵔⵜ ⴷ ⵓⵖⵣⵣⴰⵍ ⴳ ⵓⴼⵓⵙ; ( 382 ) ⴰⵎⵖⴰⵔ ⴷⵉⵎⴰ ⵍⵍⴰ ⵢⵓⵡⵉ ⴷ ⵍⵅⴱⴰⵕ ⵏ ⵛⴰ ⵏ ⵟⵕⵥⵉ; ⵍⴽⵓⴼⴰ ⵓⵔ ⵜⵍⵍⵉ ⵓⵔ ⴷⴰ ⵜⵜⵓⵜⵜⵓⴳ ⵅⴰⵙ ⵅⴼ ⵡⵏⵏⴰ ⵓⵔ ⵉⵙⵙⵉⵏⵏ ⴰⵎⵖⴰⵔ; ⵍⵃⴱⵙ ⵓⵔ ⵊⵊⵉⵏ ⵉⵅⴹⵉ ⵡⵏⵏⴰ ⴷ ⵉⵇⵔⵔⴱⵏ ⴷⴰⵜ ⵏ ⵍⵇⵇⴰⵢⴷ ⵅⴰⵙ ⴳ ⴷⴷⵄⴰⵡⵉ; ⵍⵍⴰⵏ ⵍⵇⵓⵢⵢⴰⴷ ⵏⵏⴰ ⴰⴽ ⵉⵜⵜⵉⵏⵉⵏ ⴱⵟⴰⵢⵟⴰⵢ: « ⴱⴰⴱⴰⴽ, ⵢⵓⵡⵉ ⴽ ⵉⴷ ⵕⴱⴱⵉ; ⵇⵇⴰⵃ ⵓⵔ ⵉⵢⵉ ⵜⵙⵙⵉⵏⵜ ⴷ ⵍⵇⵇⴰⵢⴷ ⴰⴷ ⴳⵉⵖ ⵎⴰⴷ ⴰⵎⴽⵙⴰ! ». ⵡⵏⵏⴰ ⵖⵓⵔ ⴰⵢⵏⵏⴰ ⵏⵏⵙ ⴰⵀⴰ ⵓⵔ ⵊⵊⵏ ⵉⵕⴰⵢⴱ ⴳ ⵍⵎⵅⵣⵏ ⵡⴰⵍⴰ ⵉⵛⴼ ⴰⵖⵔⵓⵎ ⵏⵏⵙ, ⵍⵍⴰ ⵖⵉⴼⵙ ⵟⵟⵕⴰⵄⴰⵏ ⵉⵛⵎⵛⴰⵎⵏ ⴷ ⵉⵎⵅⵣⵏⵉⵢⵏ ⴷ ⵉⵛⴽⴽⴰⵎⵏ ⵎⵉⵄⴰⴷ ⴰⵔ ⴷ ⵉⴳ ⵛⴰ, ⴷⴰ ⵙⵙⵉⵡⴹⵏ ⵜ ⴳ ⵡⴰⵏⵙⴰ ⵖⵔ ⵍⴱⵉⵔⵓ; ⴰⴷⴷⴰ ⵉⵊⵕⵓ ⵛⴰ, ⵓⵔ ⵊⵊⵉⵏ ⵓⴼⵉⵏ ⴷⵖⵉⵢⴰ ⴱⴰⴱ ⵏ ⴷⴷⵄⵓⵜ ⵎⵖⴰⵔ ⵜ ⵙⵙⵏⵏ ⵎⴷⴷⵏ, ⵡⴰⵍⴰⵢⵏⵏⵉ ⵎⵉⵄⴰⴷ ⴰⵔ ⴷ ⵉⵙⵉⴽⴽ ⵍⵇⵇⴰⵢⴷ ⴷ ⵓⵎⵖⴰⵔ ⵎⴰⴷ ⵔⴰⵏ ⴳ ⵓⴼⵓⵙ. ⵡⵏⵏⴰ ⵉⵄⵎⴰ ⵕⴱⴱⵉ ⵀⴰ ⵉⴷⴷⵓ ⴰⴷ ⵢⴰⵎⵥ ⴰⵡⴽⵉⵍ ⴳ ⵛⴰ ⵏ ⴷⴷⵄⵓⵜ; ⵍⵍⴰ ⵉⵜⴷⴷⵓ ⵖⵔ ⵍⵃⴱⵙ ⴰⵎⵎⵉ ⴷⵉⴳⵙ ⵜⵙⴽⵙⵉⵡⵜ. ⵎⴰⵛⴰ ⵍⵍⴰⵏ ⵎⴷⴷⵏ ⵏⵏⴰ ⵣⵉ ⵜⵜⴳⴳⵯⴷ ⵍⵇⵇⴰⵢⴷ ⴰⴷ ⵙⵔⵙ ⵛⵜⴽⴰⵏ ⵖⵓⵔ ⵍⵎⵓⵔⴰⵇⵉⴱ ⵅⴷⴷ ⵖⵓⵔ ⵓⵢⵍⵍⵉⴷ; ⵢⵉⵍⵉⵏ ⵎⴷⴷⵏ ⵏⵏⴰ ⵜⵜⴷⵔⵔⴰⵇⵏⵉⵏ ⵉ ⵛⴰ ⵏ ⵓⴹⴱⵉⴱ ⵅⴷⴷ ⵛⴰ ⵏ ⵓⵕⵓⵎⵉ ⵅⴷⴷ ... ⵡⴰⵀⵡⵡⴰ ⴰⵍⵍⵉⴳ ⵙⵓⵍⵏ ⵎⴷⴷⵏ, ⵍⵍⴰ ⵜⵜⵙⴽⴰⵏⵏ ⴳ ⵓⵅⴰⵎ, ⴽⵓⵍ ⵜⴰⵅⴰⵏⵜ ⵍⵍⴰ ⵖⵓⵔⵙ ⵜⵜⴰⴼⴰⵜ ⴰⵅⴰⵎ ⵏⵏⵙ; ⵎⵛ ⵄⴷⴷⴰⵏ ⴰⵢⵜ ⵓⵅⴰⵎ, ⵍⵍⴰ ⵜⴽⴽⵔⵏⵜ ⵜⵄⵢⵢⴰⵍⵉⵏ, ⵍⵍⴰ ⵣⵟⵟⵏⵜ ⵢⵓⵏ ⵓⵅⴰⵎ ⵢⴰⴹⵏⵉⵏ; ⵍⵍⴰ ⵊⵊⵎⵓⵄⵏⵜ ⵉⵏⵥⴰⴹⵏ ⵏ ⵜⵖⴹⵜⵏ ⵎⵉⵄⴰⴷ ⴰⵔ ⴷ ⵄⴷⴷⵓⵏ, ⴷⴰ ⴳ ⵢⵓⵏ ⵡⴰⵙⵙ ⵊⵎⵄⵏⵜ ⴰⴷ ⴳⵉⵏⵜ ⵜⵉⵡⵉⵣⵉ ⵏ ⵓⵇⵔⵛⵍ ⴷ ⵡⵓⵍⵓⵎ; ( 386 ) ⵍⵍⴰ ⵜⵜⵛⵛⵓⵔⵏⵜ ⵜⴰⴹⵓⴹⵜ ⴷ ⵉⵏⵥⴰⴹⵏ, ⴷⴰ ⵍⵍⵎⵏⵜ ⵉⴼⵉⵍⴰⵏ ⵏ ⵛⵛⵎⵉⴹ; ⵎⵛ ⵍⵍⴰⵏⵜ ⵙⵏⴰⵜ ⵅⴷⴷ ⴽⵕⴰⴹⵜ ⵏ ⵜⵙⵍⴰⵜⵉⵏ, ⵍⵍⴰ ⵜⴽⴽⵔⵏⵜ ⵍⴰ ⴷⵊⵔⵔⴰⴷⵏⵜ ⴽⵓⵍ ⵢⵓⵜ ⵖⵔⵙ ⴰⴼⵍⵉⵊⵊ ⵏⵏⵙ; ⴰⴷⴷⴰⵢ ⵉⵄⴷⵍ ⵍⵃⴰⵍ ⴳ ⵜⴼⵙⴰ, ⵍⵍⴰ ⴳⴳⴰⵔⵏⵜ ⴼⵍⵉⵊⵊⵏ ⴱⵕⵕⴰ, ⴷⴰⵢ ⵇⵇⵉⵎⵏⵜ ⴰⴽ ⴽⵓⵍⵍ ⴰⵙⵙ ⵍⵍⴰ ⵜⴷⴷⵣⵏⵜ ⵎⵉⵄⴰⴷ ⴰⵔ ⴷ ⵜ ⴽⴽⵙⵏⵜ; ( 387 ) ⵙ ⵡⵓⴷⵓⵣ ⵏⵏⴰ ⵍⵍⴰ ⵖⵓⵔⵙⵏⵜ ⵜⵜⵉⵍⵉⵏ ⵡⴰⴳⵔⵉⵡⵏ ⴽⵓⵍ ⵢⵓⵏ ⴰⵏⵛⵜ! ⴰⴷⴷⴰⵢ ⴽⴽⵙⵏ ⵉⴼⵍⵉⵊⵊⵏ, ⵙⵜⵜⴰ ⵅⴷⴷ ⵜⵎⴰⵏⵢⴰ ⵅⴷⴷ; ⴽⵓⵍ ⵢⵓⵏ ⴷ ⵎⴰⴷ ⵉⵜⵜⴳⴳ. - ⵍⵍⴰⵏ ⵉⵅⴰⵎⵏ ⵉⵎⵥⵥⵢⴰⵏⵏ, ⵢⵉⵍⵉⵏ ⵉⵅⴰⵎⵏ ⵉⵎⵇⵇⵕⴰⵏⵏ - ⵍⵍⴰ ⵜⴽⴽⵔⵏⵜ ⵜⵄⵢⵢⴰⵍⵉⵏ, ⵍⵍⴰ ⵢⵏⵏⵓⵏⵜ ⵉⴼⵍⵉⵊⵊⵏ ⵏⵏⴰ ⵢⵓⵏ ⵖⵔ ⵢⵓⵏ! ⵉ ⵢⵉⵜⵙ ⵏ ⵜⵇⵇⴱⵉⵍⵉⵏ, ⵍⵍⴰ ⴷ ⵊⵊⵎⵓⵄⵏ ⴰⵢⵜ ⵜⵖⵚⵜ, ⵇⵇⵉⵎⵏ ⴰⴷ ⵎⵄⴰⵡⴰⵏⵏ ⵜⵉⴳⵏⵉ ⵏ ⵓⵅⴰⵎ; ( 388 ⵍⵍⴰ ⴰⵙⵏ ⵉⵜⵜⴳⴳ ⴱⴰⴱ ⵏ ⵓⵅⴰⵎ ⵉⵎⵛⵍⵉ ⴰⴷⴷⴰⵢ ⴽⵎⵎⵍⵏ ⵍⵅⴷⵏⵜ; ⴰⴷⴷⴰⵢ ⴽⵎⵎⵍⵏⵜ ⵉⴼⵍⵉⵊⵊⵏ, ⵍⵍⴰ ⵥⵟⵟⵏⵜ ⵜⵉⵔⴼⴰⴼⵉⵏ ⵏⵏⴰ ⵜⵚⴹⵓⵕⵏⵜ ⵉ ⵓⵅⴰⵎ ⴰⴷⴷⴰⵢ ⵜ ⴱⵏⵏⵓⵏⵜ. ⴰⴳⴳⵯⴷ ⵜⵉⵔⴼⴰⴼⵉⵏ ⵍⵍⴰ ⵜⵏⵜ ⴳⵏⵏⵓⵏⵜ ⵙ ⵉⴼⵍⵉⵊⵊⵏ; ⵎⵛ ⵉⵄⴷⵍ ⵍⵃⴰⵍ, ⵍⵍⴰ ⵜⵏⵜ ⵜⵜⴰⵙⵉⵏⵜ ⴱⴰⵛ ⴰⴷ ⵢⵓⵡⵜ ⵓⵥⵡⵓ ⴷ ⵉⵡⴰ ⴰⴷ ⴷ ⵉⴽⵊⵎ ⵓⵙⵉⴷⴷ; ⵃⵔⴰ ⴰⴷ ⵉⵅⵅⵓ ⵍⵃⴰⵍ, ⴷⴰⵢ ⵕⵥⵎⵏⵜ ⴰⵙⵏⵜ, ⴷⴰ ⵚⴹⵓⵕⵏⵜ ⴷⴷ ⵉⵎⵛⵛⴰ ⵙⴳ ⵓⵚⵎⵎⵉⴹⴷ ⵓⵣⵡⵓ; ⴳ ⵡⴰⵎⵎⴰⵙ ⵍⵍⴰ ⵜⵜⵉⵍⵉⵏⵜ ⵜⵉⵔⵙⴰⵍ, ⵍⵍⴰ ⵀⵣⵣⵏⵜ ⴰⵃⵎⵎⴰⵕ; ⵍⵍⴰⵏ ⵃⵎⵎⴰⵕⵏ ⵏⵏⴰ ⵣⵡⵡⵇⵏⵉⵏ, ⴰⵎⴰ ⵙ ⵙⴱⴰⵢⴰ, ⴰⵎⴰ ⵅⴰⵙ ⵙ ⵓⵏⵇⵇⵛ. ⵉⴷⴷ ⵟⵟⵕⵓⴼⴰⵜ ⵏ ⵓⵅⴰⵎ, ⵍⵍⴰ ⵜⵜⵉⵍⵉⵏⵜ ⵍⵍⴰ ⵜⵓⵊⴱⴷⵏⵜ ⵙ ⵉⵣⴰⴽⴰⵔⵏ ⵏⵏⴰ ⵇⵇⵏⵏⵉⵏ ⵖⵔ ⵜⴰⵡⵡⵓⵙⵉⵏ, ⵢⵉⵍⵉⵏ ⵉⵖⵣⵣⴰⵍⵏ ⵏⵏⴰ ⵀⵣⵣⵏⵉⵏ ⵟⵟⵕⵓⴼⴰⵜ ⴱⴰⵛ ⵓⵔ ⵜⵜⵉⵃⴷⵉⵔⵏⵜ; ⵉⵣⴰⴽⴰⵡ ⵏ ⵜⴰⵡⵡⵓⵙⵉⵏ ⵍⵍⴰ ⵜⵜⵉⵍⵉⵏ ⵍⵍⴰ ⵇⵇⵏⵏ ⵙ ⴰⵅⴰⵎ ⵙ ⵉⵅⵔⵉⴱⵏ; ⵜⴰⵎⴰⵔⴰ ⴰⴷ ⵉⵜⵜⴽⴽⵏ ⵅⴼ ⵜⵄⵢⵢⴰⵍⵉⵏ ⴰⴷⴷⴰⵢ ⵢⵉⵍⵉ ⵓⵣⵡⵓ ⵅⴷⴷ ⴰⴷⴷⴰ ⵉⴱⵣⵢ ⵡⴰⵛⴰⵍ ⵉⵜⵜⵅ ⵍⵍⴰ ⵜⵇⵍⵍⴰⵄⵏⵜ ⵜⴰⵡⵡⵓⵙⵉⵏ, ⴷⴰ ⵉⵜⵜⵓⵜⵜⴳ ⵓⵅⴰⵎ; ( 391 ) ⵉⵡⵄⵔ ⵍⵍⵉ ⵍⴱⵏⵉ ⵏⵏⵙ ⵎⵛ ⵉⵍⵍⴰ ⵍⵍⴰ ⵉⴱⵣⴳ. ⴰⴷⴷⴰⵢ ⴱⵏⵓⵏ ⵎⴷⴷⵏ ⴰⵅⴰⵎ, ⵓⵔ ⴷⴰ ⴹⴹⵕⵕⴰⵏ ⵉⵅⵔⵉⴱⵏ ⵖⵔ ⵙ ⴰⵊⵊⴰⵕ ⵏⵏⵙⵏ ⵉⵜⵅ ⵍⵍⴰ ⴷⵉⴳⵙ ⵜⵜⴼⴼⵖⵏ. ⴰⵍⵍⵉⴳ ⵕⵚⴰⵏ ⵎⴷⴷⵏ, ⵢⵉⵍⵉ ⵍⵀⵏⴰ, ⴽⴽⵔⵏ ⵍⵍⴰ ⴱⵏⵏⵓⵏ ⵉⵖⵔⵎⴰⵏ; ⵍⵍⴰ ⵉⵊⵊⵎⵓⵄ ⵓⵔⵢⴰⵣ ⵏⵜⵜⴰ ⴷ ⵍⴰⵀⵍ ⵏⵏⵙ ⴷ ⵉⵡⵓⵊⵉⵍⵏ ⵏⵏⵙ ⴷⴰⵢ ⴱⵏⵓⵏ ⵉⵖⵔⵎ; ⵡⴰⵀⵡⵡⴰ ⵍⵍⴰ ⴱⵏⵏⵓⵏ ⵎⴷⴷⵏ ⵙ ⵍⵍⵓⵃ, ⵍⵍⴰ ⵜⴷⴷⵓⵏ ⵎⵉⵄⴰⴷ ⵢⵓⵏ ⵏ ⵡⴰⵏⵙⴰ ⵏⵏⴰ ⴳ ⵎⵉ ⵥⵉⵍ ⵡⴰⴽⴰⵍ ⵉ ⵍⴱⵏⵉ, ⴷⴰ ⵖⵣⵏ ⵜ ⴰⴷ ⴱⵏⵓⵏ; ⵇⵇⴰⵃ ⴰⵢⵜ ⵓⵅⴰⵎ, ⵍⴰ ⵎⴷⴷⵏ ⵍⴰ ⵜⵉⵄⵢⵢⴰⵍⵉⵏ ⵍⵍⴰ ⵅⴷⴷⵎⵏ, ⵛⴰ ⵍⵍⴰ ⵉⵜⵜⴰⴳⵎ ⴰⵎⴰⵏ, ⵛⴰ ⵍⵍⴰ ⵉⵜⵜⵏⵇⵇⴰⵍ ⴰⴽⴰⵍ ⵉ ⵍⵎⵄⵍⵍⵎⵉⵏ, ⵛⴰ ⵍⵍⴰ ⵉⵜⵜⵉⵍⵉ ⴷ ⵟⵟⵍⵄ ⴷ ⵓⵖⴰⵏⵉⵎ, ⵛⴰ ...; ( 393 ) ⵍⵍⴰⵏ ⵎⴷⴷⵏ ⵏⵏⴰ ⴽⴽⴰⵜⵏⵉⵏ ⵕⴱⵄⴰ ⵏ ⵍⴰⴹⵡⴰⵕ ⵅⴷⴷ ⵅⵎⵙⴰ, ⴽⵓⵍ ⵢⵓⵏ ⴷ ⵎⴰ ⵎⵉ ⵉⵖⵉⴳ, ⵢⴰⵏ ⵙⴳ ⵡⴰⴼⵍⵍⴰ ⵏ ⵍⵄⵎⴰⵎⴰ ⵙ ⵉⵙⵍⵍⵉ ⴰⴷⴷⴰⵢ ⵖⵕⵚⵏ ⵍⴳⴰⵢⵣⴰ; ⴰⴷⴷⴰⵢ ⴽⵎⵎⵍⵏ ⵍⴱⵏⵉ, ⵍⵍⴰ ⴱⵟⵟⵓⵏ ⵍⴱⵢⵓⵜ ⵏ ⵉⵖⵔⵎ ⵅⴼ ⵜⵅⴰⵎⵉⵏ, ⴷⴰ ⵢⵔⵏ ⵉⵍⴰⵏ; ⵡⵏⵏⴰ ⵉ ⵎⵉ ⵢⵓⵙⴰ ⵛⴰ, ⵍⵍⴰ ⴷⵉⴳⵙ ⵉⵜⵜⵙⴽⴰⵏ; ( 394 ) ⵉⵖⵔⵎ ⵍⵍⴰ ⵖⵓⵔⵙ ⵉⵜⵜⵉⵍⵉ ⵅⴰⵙ ⵢⵓⵏ ⵏ ⵍⴱⴰⴱ, ⴷⵉⵎⴰ ⵍⵍⴰ ⵉⵡⵊⵊⵀ ⵖⵔ ⵍⵇⴱⵍⵜ; ⵡⵏⵏⴰ ⵖⵓⵔⵙ ⵎⵉ, ⵍⵍⴰ ⵉⵄⴷⴷⵍ ⵣⵉ ⵍⵅⵛⴱ, ⵡⵏⵏⴰ ⵓⵔ ⵢⵓⴼⵉⵏ ⵙ ⵎⵉ, ⵍⵍⴰ ⵉⵜⵜⵙⵏⴰⵍⴰ ⵢⵓⵜ ⵏ ⵜⵥⵟⵟⴰ ⵏ ⵓⵣⵓⴳⴳⵯⴰⵔ. ⵜⵉⵢⵎⵎⵉ ⵡⴰⵀⵡⵡⴰ, ⵍⵍⴰ ⵜⵜⵉⵍⵉ ⵉ ⴰⵢⵜ ⵉⵖⵔⵎ ⵇⵇⴰⵃ, ⵉ ⵍⵎⴰⵍ; ⵜⴰⵢⵛⵛⵉⵏ ⵍⵍⴰ ⵜⴳⴳⵏⵜ ⵜⴰⵡⴰⵍⴰ ⵅⴼ ⵓⵛⵟⵟⴱ ⵏⵏⵙ. ⵉⵖⵔⵎⴰⵏ ⵡⵡⴰⵀⵡⵡⴰ ⵓⵔ ⵖⵓⵔⵙⵏ ⵚⵚⵕⴰⵊⵎ ⴰⵎⵎ ⵜⵉⴷⵔⵉⵏ ⵏ ⵡⴰⵙⵙ ⴰⴷ, ⵉⵜⵜⵅ ⵍⵍⴰ ⵜⵜⴳⴳⵯⴷⵏ ⵎⴷⴷⵏ ⴳ ⵉⵅⵡⵡⴰⵏⵏ ⵅⴷⴷ ⴳ ⵉⵄⴷⴰⵡⵏ; ⵅⴰⵙ ⵛⵛⴽⴽⵓⵍ ⴰⴷ ⵉⵍⵍⴰⵏ, ⴷⵉⵎⴰ ⵍⵍⴰ ⵜⵇⵇⵏ ⵢⴰⵍⵍⵙⵜ, ⵍⴽⵟⵕⴰ ⵎⵛ ⵜⵍⵍⴰ ⵍⴱⵉⵜ ⴷⴰⵜ ⵏ ⵍⴱⵉⵜ, ⵢⵉⵍⵉ ⵓⵄⵔⵉⵛ ⴰⵍⵜⵓ ⴷⴰⵜⴰⵜⵙⵏⵜ. ⵍⵍⴰⵏ ⵉⵖⵔⵎⴰⵏ ⵏⵏⴰ ⵖⵓⵔ ⵉⵜⵜⵉⵍⵉ ⴽⵓⵍ ⵍⵇⵇⵏⵜ ⵙ ⵍⴱⵕⵊ ⵉ ⵍⵄⵙⵙⴰ; ⵍⵍⴰⵏ ⵎⴷⴷⵏ ⵏⵏⴰ ⴱⵏⵏⵓⵏⵉⵏ ⵍⵖⵕⴰⴼⵉ. ⵡⴰⵀⵡⵡⴰ ⵍⵍⴰ ⵜⵅⵟⴰⵕⵏ ⵢⵓⵏ ⵏ ⵡⴰⵏⵙⴰ ⵏⵏⴰ ⵉⵄⵍⵍⴰⵏ, ⵢⵓⵜ ⵏ ⵜⵇⵇⵍⵉⵄⵜ, ⵍⵍⴰ ⴷⵉⴳⵙ ⴱⵏⵏⵓⵏ ⵎⵖⴰⵔ ⵉⴱⵄⴷ ⵙⴳ ⵡⴰⵎⴰⵏ, ⵎⵖⴰⵔ ⴷ ⵍⵃⵕⵛ; ⵡⵏⵏⴰ ⵖⵓⵔ ⵜⵍⵍⴰ ⵜⵢⵎⵎⵉ ⵏⵏⵙ ⵓⵃⴷ ⵏⵏⵙ, ⵍⵍⴰ ⵉⵟⵚⴹⵓⵕ ⵍⴱⵢⵓⵜ ⵉ ⴽⵕⴰⴹⵜ ⵏ ⵍⴰⵊⵢⴰⵀ; ⵅⴰⵙ ⵉ ⵍⵊⵉⵀⵜ ⵏ ⵍⵇⵇⴱⵍⵜ, ⵓⵔ ⴷⴰ ⴷⵉⴳⵙ ⵉⴱⵏⵏⵓ ⵛⴰ, ⵍⵍⴰ ⴷⵉⴳⵙ ⵉⵜⵜⴰⵊⵊⴰ ⵍⴱⴰⴱ; ⵍⵍⴰ ⵉⴹⴹⵕⵕⴰ ⵍⴱⵉⴱⴰⵏ ⵉ ⵍⴱⵢⵓⵜ ⵖⵔ ⵍⵇⵇⴱⵍⵜ ⵖⵔ ⵍⵊⵉⵀⵜ ⵏ ⵎⴽⴽⴰ, ⵙⴳ ⵓⵏⵥⴰⵕ ⴷ ⵓⵣⵡⵓ. ⵍⵡⴰⵛⵓⵏ ⵉⵎⵥⵥⵢⴰⵏⵏ ⴳ ⵓⵏⴱⴷⵓ, ⴰⴷⴷⴰ ⵉⵃⵎⵓ ⵍⵃⴰⵍ, ⵍⵍⴰ ⴷⵉⴳⵙⵏ ⵜⵜⵉⵍⵉ ⵜⵇⵇⵔⵉⵏⵜ; ⵍⵍⴰ ⴷⵉⴳⵙⵏ ⵜⵜⵉⵍⵉ ⵜⴰⵡⵍⴰ, ⵍⵍⴰ ⵜⵜⵔⴰⵔⴰⵏ, ⴰⵢⵏⵏⴰ ⵜⵜⴳⴳⵏ ⵍⵍⴰ ⵢⵓⵣⵣⵍ; ⵍⵍⴰ ⵉⵜⵜⵉⵍⵉ ⵍⵄⵉⵍ ⵍⵍⴰ ⵉⵙⴽⴽⴼ ⵓⵔ ⴷⴰ ⵉⵜⵜⴻⵜⵜ, ⵓⵔ ⴷⴰ ⵉⵟⴻⵟⵟⴹ ⵅⴰⵙ ⴰⵎⴰⵏ, ⵍⵍⴰ ⵉⵜⵜⵉⵍⵉ ⵍⵍⴰ ⵉⵃⵓⵔⴼⴰ; ( 398 ) ⴳ ⵍⵅⵔⵉⴼ ⴰⵎⵎ ⵜⵙⵍⵎⵢⴰ ⵓⵔ ⴷⴰ ⵜⴻⵜⵜ ⴰⴼⵜⵜⵉⵅ ⵉⵜⵅ ⵃⵔⴰ ⴰⴷ ⵜ ⵜⵜⵛ ⵅⴷⴷ ⴰⴷ ⵢⵉⵍⵉ ⴳ ⵓⵅⴰⵎ, ⵃⵔⴰ ⴰⴷ ⵜⴽⴹⵓ ⵜⵙⵍⵎⵢⴰ ⴷⴰ ⵀⴰⵛ ⵖⵉⵔⵙ ⵜⴰⵇⵇⵔⵉⵏⵜ, ⴷⴰⵢ ⵜⵇⵇⵉⵎ ⵍⵍⴰ ⵜⴽⵎⵎⵣ ⵜⴰⵏⵣⴰⵔⵉⵏ ⵙ ⵜⴼⵓⵙⵜⵜ! ⴷⵉⵎⴰ ⵍⵍⴰ ⵜⵢⴰ ⵉⵔⵉⵏ! ⴰⴷⴷⴰⵢ ⵖⵉⵔⵙ ⵜⴹⵕⵕ ⵎⴰⵢⵙ ⵉⵙ ⴷⵉⴳⵙ ⵜⴰⵇⵇⵔⵉⵏⵜ ⵍⵍⴰ ⵜⴽⴽⵔ ⵍⵍⴰ ⵜⵜⴰⵡⵉ ⵍⵄⵉⵍ ⵖⵔ ⵢⵓⵜ ⵏ ⵜⵎⵟⵟⵓⴹⵜ ⵏⵏⴰ ⵜⵜ ⵉⵜⴽⴽⵙⵏ; ⵜⴰⵎⵟⵟⵓⴹⵜ ⵏⵏⴰ, ⵍⵍⴰ ⴰⵙ ⵜⵜⵉⵏⵉⵏ ⵎⴷⴷⵏ ⵎⵎ ⵜⵇⵇⵔⵉⵏⵜ! ⵍⵍⴰ ⵟⵟⴰⵎⵥ ⵜⴰⵙⵍⵎⵉⵢⴰ ⵍⵍⴰ ⴰⵙ ⵜⵛⵕⵕⴹ ⵉⴼⴰⵙⵙⵏ ⴷ ⵉⴹⴰⵕⵕⵏ; ⵍⵍⴰ ⵜⵙⴹⵓⵕ ⴰⵛⵕⴰⴹ ⴷⴰⵢ ⵜⴰⵎⵙ ⴰⵙ ⴽⴹⵕⴰⵏ; ⵍⵍⴰ ⵜⵛⵕⵕⴹ ⴰⴳⴳⵯⴷ ⴳ ⵉⵏⵔ; ⵎⵛ ⵜⵔⴰⵔⵜ ⵍⴱⴰⵍ, ⴰⴷ ⵜⴰⵏⵏⴰⵢⵜ ⵇⵇⴰⵃ ⵍⵡⴰⵛⵓⵏ ⵍⵍⴰ ⵛⵕⴹⵏ ⴳ ⵉⵏⵔ! ⵍⵍⴰ ⵜⴽⴽⵔ ⵜⵎⵟⵟⵓⴹⵜ ⵣⵉⴽ ⵇⴱⵍ ⵜⴰⴼⵓⵛⵜ ⴰⴷ ⵜⴰⵡⵉ ⵎⴻⵎⵎⵉⵙ ⵙ ⵖⵔ ⵎⵎ ⵜⵇⵇⵔⵉⵏⵜ; ⵃⵔⴰ ⴰⴷ ⵜⵄⴰⵢⴷ, ⵍⵍⴰ ⵜⵜⴳⴳ ⵜⵙⵍⵎⵢⴰ ⵍⴰⴱⴰⵙ. ⵉⴷⴷ ⵜⵓⵙⵓⵜ ⵏⵜⵜⴰⵜ, ⵓⵔ ⵉⴷⴷ ⴰⵎ ⵜⵇⵇⵔⵉⵏⵜ, ⵍⵍⴰ ⵜⵏⵟⵟⴹ, ⵃⵔⴰ ⴰⴷ ⵜⵉⵍⵉ ⴳ ⵛⴰ ⵏ ⵃⴷⴷ ⵍⵍⴰ ⵜⴽⴽⵔⵏ ⵎⴷⴷⵏ ⵍⵍⴰ ⴷ ⵜⵜⴰⵔⵓⵏ ⵉ ⵡⴰⵔⵔⴰⵡ ⵏⵏⵙⵏ ⵖⵓⵔ ⵛⴰ ⵏ ⵛⵛⵔⵉⴼ; ⴰⴷⴷⴰⵢ ⵜⵉⵍⵉ ⵜⵓⵙⵓⵜ ⴳ ⵛⴰ ⵏ ⵍⵄⵉⵍ, ⵍⵍⴰ ⵉⵜⴷⴷⵓ ⵉⴱⴱⴰⵙ ⵅⴷⴷ ⵎⴰⵢⵙ, ⵍⵍⴰ ⴰⵙ ⵜⵜ ⵉⴷ ⵜⵜⵇⴹⴰⵄⵏ ⵖⵓⵔ ⵛⵔⵉⴼ ⵅⴷⴷ ⵜⴰⵛⵛⵔⵉⴼⵜ, ⵍⵍⴰ ⴰⵙⵏ ⴷ ⵉⵜⵜⴰⵔⵓ ⵢⵓⵏ ⵏ ⵍⵃⵔⵣ ⵍⵍⴰ ⴰⵙ ⵜ ⵜⵜⴰⵢⵍⵏ ⵉ ⵜⵙⵍⵎⵉⵢⴰ ⵖⵔ ⵜⵎⴳⴳⵕⴹⵜ, ⴷⴰ ⵉⴳ ⵍⴰⴱⴰⵙ. ⵜⵅⵅⴰ ⵜⵓⵙⵓⵜ ⵏⵏⴰ ⵎⵛ ⵜⵜⵓⵜ ⵉ ⵍⵄⵉⵍ ⴰⵎⵥⵥⵢⴰⵏ, ⵍⵍⴰ ⵉⵜⵜⵓⵙⵓ, ⵍⵍⴰ ⵉⵜⵜⵓⵙⵓ ⵎⵉⵄⴰⴷ ⴰⵔ ⴷ ⴷⵉⴳⵙ ⵜⵏⵏⵇⴹⵄ ⴰⵔ ⴷ ⵉⴳ ⴰⵣⵉⵣⴰ ⴷⴰ ⵉⵙⵄⵓⵇⵇⵉ; ⵍⵍⴰⵏⵜ ⵜⵙⵍⵎⵉⵡⵉⵏ ⵏⵏⴰ ⵜⵎⵜⴰⵜⵏⵉⵏ ⵙ ⵜⵓⵙⵓⵜ ⵏⵏⴰ. ⵓⵎⴰ ⴰⵍⵍⵏ ⴷⵉⵅ, ⵓⵔ ⴷⴰ ⵜⵜⵉⵍⵉⵏⵜ ⵅⴰⵙ ⴳ ⵓⵏⴱⴷⵓ ⵅⴷⴷ ⴳ ⵍⵅⵔⵉⴼ; ⵍⵍⴰ ⵜⵜⵅⵓⵎⵎⴰⵕⵏ ⵍⵡⴰⵛⵓⵏ ⴳ ⵡⵉⴹⵕⵓⵕ ⴷⴰⵢ ⵣⵡⵉⵖⵏⵜ ⴰⵙⵏ ⵡⴰⵍⵍⵏ; ⴰⵙⴽⴽⴰ ⵏⵏⵙ ⴰⴷⴷⴰⵢ ⴽⴽⵔⵏ ⵙⴳ ⵓⵏⵓⴷⴷⵎ, ⵍⵍⴰ ⵜⵜⵉⵍⵉⵏⵜ ⵡⴰⵍⵍⵏ, ⵍⵍⴰ ⵇⵇⵏⵏⵜ, ⵍⵍⴰ ⵜⵟⵎⵎⵚⵏⵜ ⵙ ⵜⴰⵔⵜⴰ; ⴳ ⵍⵓⵇⵜ ⵏⵏⴰ, ⵍⵍⴰ ⵉⵜⵜⵄⴷⴷⵓ ⵡⵉⴹⵕⵓⵕ ⵇⵇⴱⴰⵍⴰ ⴷ ⵓⵣⵡⵓ ⴷ ⵉⵣⴰⵏ; ⵃⵔⴰ ⴰⴷ ⵏⵖⵏⵜ ⵡⴰⵍⵍⵏ ⵃⴷⴷ ⴷⴰⵢ ⵏⵇⵇⵣⵏⵜ ⵖⵔ ⵃⴷⴷ ⵢⴰⴹⵏⵉⵏ ⵉⵜⵜⵅ ⵍⵍⴰ ⵏⵟⵟⴹⵏⵜ. ⵍⵍⴰ ⵜⴽⴽⵔ ⵎⴰⵢⵙ ⵏ ⵍⵄⵉⵍ, ⵍⵍⴰ ⴰⵙ ⵜⵜⵙⵓⴷⴷⵓⵎ ⴰⵎⴰ ⵙⵙⴱⴰⵖⴰ ( ⴱⵓⵃⴱⵉⴱⴰ ) ⴰⵎⴰ ⴰⵎⴰⵏ ⵏ ⵎⴰⵟⵉⵛⴰ; ⵍⵍⴰ ⵉⵜⵜⵖⵉⵎⴰ ⵍⵄⵉⵍ ⵍⵍⴰ ⵉⵜⵜⴰⴼⵔⴰⵡ ⴰⵔ ⵉⵜⵜⵔⵓⵙ, ⵍⵍⴰ ⵉⵜⵜⵉⵖⵡⵉⵙ ⵙ ⵍⵃⵕⵕ; ⵜⴰⴷⴳⴳⵯⴰⵜ ⴰⴷ ⵜⵜⵇⵇⵙⵏⵜ ⵡⴰⵍⵍⵏ ⵉ ⵍⵡⴰⵛⵓⵏ ⵓⵔ ⵙⵙⵉⵏⵖ ⵙ ⵎⵉ: ⵍⵍⴰ ⴷⵉⴳⵙⵏⵜ ⵉⵜⵙⵙⴰⵔⴰ ⵛⴰ ⴰⵎ ⵉⴽⵛⵛⵓⴹⵏ; ⵜⴰⵔⵜⴰ ⴽⵓⵍ ⴰⵇⴷⴷⵉⴷ ⴰⵏⵛⵜ! ( 405 ) ⵍⵍⴰ ⵉⵜⴽⴽⵔ ⵍⵄⵉⵍ ⵙⴳ ⵓⵏⵓⴷⴷⵎ ⵍⴰⴱⴰⵙ, ⵍⵍⴰ ⴰⵙ ⵜⵙⵙⵉⵔⵉⴷ ⵎⴰⵢⵙ ⴰⵍⵍⵏ ⵙ ⵡⴰⵎⴰⵏ ⴷ ⵜⵉⵙⵏⵜ, ⵎⵉⵄⴰⴷ ⴰⵔ ⴷ ⴰⵙ ⵊⵊⵉⵏⵜ; ⵅⴷⴷ ⵍⵍⴰ ⵉⵜⴷⴷⵓ ⵙ ⴰⴹⴱⵉⴱ ⵍⵍⴰ ⴰⵙ ⴷ ⵉⵜⵜⵉⴽⴽ ⵛⴰ ⵏ ⴷⴷⵡⴰ ⵍⵍⴰ ⵜ ⵉⵜⵜⵙⵓⴷⴷⵓⵎ. ⵉⴷⴷ ⵜⴰⵡⵍⴰ, ⴰⴳⴳⵯⴷ ⵏⵜⵜⴰⵜ ⵓⵔ ⴷⴰ ⵜⵜ ⵉⴷ ⵉⵜⵚⵍⵍⴰⴹ ⵕⴱⴱⵉ ⵅⴰⵙ ⴳ ⵓⵏⴱⴷⵓ ⵅⴷⴷ ⴳ ⵍⵅⵔⵉⴼ, ⵍⴽⵟⵕⴰ ⵅⴼ ⵡⵉⵏⵏⴰ ⵙⴽⵏⵏⵉⵏ ⵟⵟⵕⴼ ⵏ ⵛⴰ ⵏ ⵡⴰⵙⵉⴼ; ⵉⵍⵍⴰ ⵡⵏⵏⴰ ⵟⵟⴰⵎⵥ ⵢⵓⵜ ⵏ ⵍⵎⵕⵕⵜ ⵅⴷⴷ ⵙⵏⴰⵜ ⵅⴷⴷ ⴽⵕⴰⴹⵜ ⴳ ⵡⴰⵙⵙ, ⴱⴰⴱ ⵏⵏⵙ ⵓⵔ ⴷⴰ ⵉⵜⵜⴻⵜⵜ ⵓⴷⵉ ⵡⴰⵍⴰ ⵣⵣⵉⵜ, ⵎⵛ ⵜⵏ ⵉⵜⵛⴰ ⵍⵍⴰ ⵜ ⵜⵀⵔⵔⴷ! ⴰⴳⴳⵯⴷ ⵜⴰⵡⵍⴰ ⵍⵍⴰ ⵜⵜ ⵜⵇⵇⴹⴰⵄⵏ ⵎⴷⴷⵏ ⵖⵓⵔ ⵛⴰ ⵏ ⵛⵛⵔⵉⴼ; ⵅⴷⴷ ⵍⵍⴰ ⵙⵙⵏ ⵍⴽⵉⵏⴰ! ⴰⴷⴷⴰⵢ ⵜⵄⴷⴷⵓ ⴳ ⵜⵇⵇⴱⵉⵍⵜ ⵍⵍⴰ ⴷ ⵉⵜⴷⴷⵓ ⵓⴹⴱⵉⴱ ⵍⵍⴰ ⵉⴽⴽⴰⵜ ⵛⵛⵓⴽⴰ. ⵉⴷⴷ ⴱⵓⵜⵍⵍⵉⵙ ⵏⵜⵜⴰ ⵍⵍⴰ ⵜ ⵉⴷ ⵉⵜⵚⵍⵍⴰⴹ ⵕⴱⴱⵉ ⵅⴼ ⵜⵇⵇⴱⵉⵍⵜ ⵙ ⵍⵎⵕⵕⴰⵜ; ⵍⵍⴰ ⵉⵜⴷⴷⵓ ⵓⵔⵢⴰⵣ, ⴰⴷ ⴰⵙ ⵉⵡⵡⵜ ⵢⵉⴹ ⵅⴷⴷ ⴰⴷⴷⴰ ⵉⵇⵔⵔⴱ ⵍⵎⵖⵔⴱ ⵓⵔ ⵉⵇⵇⵉⵎ ⵍⵍⴰ ⵉⵜⵜⴰⵏⵏⴰⵢ ⵛⴰ ⴷⴰⵜ ⵏ ⵉⴹⴰⵕⵕⵏ ⵏⵏⵙ, ⴷⴰⵢ ⵓⵔ ⵉⵍⵍⵉ ⵃⴷⴷ ⵏⵏⴰ ⵖⴰ ⵜ ⵉⵚⵚⵉⵡⴹⵏ ⴰⵎⴰ ⵍⵍⴰ ⵉⵜⵜⵛⵛⴽⴰ ⴰⵎⴰ ⵏⵏ ⵉⵇⵇⴰⵔ ⴰⵎⴰ ⵍⵍⴰ ⵉⵜⵜⵖⵉⵎⴰ ⵍⵍⴰ ⵉⵏⵙⵙ ⴳ ⵡⴰⵏⵙⴰ ⴰⵔ ⵚⵚⴱⴰⵃ! ⴱⵓⵜⵍⵍⵉⵙ ⵍⵍⴰ ⴰⵙ ⵜⵜⴳⴳⵏ ⵎⴷⴷⵏ ⴰⵔⴱⵉⴱ ⵏ ⵜⴰⵙⴰ; ⵍⵍⴰ ⵉⵜⴻⵜⵜ ⵓⵔⵢⴰⵣ ⴷ ⴰⵣⵉⵣⴰ; ⵉⵍⵍⴰ ⵓⵔⵢⴰⵣ ⵏⵏⴰ ⵉⵜⴷⴷⵓⵏ ⴰⵔ ⴰⵎⵎⴰⵙ ⵏ ⵍⵊⵎⴰⵄⵜ ⴷⴰ ⵉⵇⵇⵉⵎ ⵍⵍⴰ ⵉⵜⵙⵖⵓⵢⵢⵓ ⵎⵉⵄⴰⴷ ⴰⵔ ⴷ ⵖⵉⵔⵙ ⵔⵡⵍⵏ ⵎⴷⴷⵏ; ⵃⵔⴰ ⴰⴷ ⴰⵙ ⵢⵉⵏⵉ ⵃⴷⴷ: « ⴰ ⵎⴰⴷ ⴽ ⵢⴰⵖⵏ? ⵎⴰⴷ ⵉⵊⵕⴰⵏ? », ⵍⵍⴰ ⴰⵙ ⵉⵜⵜⵉⵏⵉ: « ⴰ ⴱⵓⵜⵍⵍⵉⵙ ⴰⴷ ⵖⵉⴼⵉ ⵉⵇⵇⴰⴷⴰⵄⵏ ⴰⴱⵔⵉⴷ »; ⴷⴰⵢ ⴱⵓⵜⵍⵍⵉⵙ ⵍⵍⴰ ⵙⵉⴳⵙ ⵉⵜⴼⴼⵖ, ⴷⴰ ⵉⵄⴰⵢⴷ ⵉ ⵡⵏⵏⴰ ⵉⴹⵏⵉⵏ |