agldun.txt

ⴰⴳⵍⴷⵓⵏ ⵉⵎⵎⵔⵏ ⴷⴳ ⵢⵉⵊⵊ ⵏ ⵓⵙⴰⵔⴰⴳ ⵏ ⵜⵎⴷⵉⵏⵜ, ⵉⵜⵜⵡⴰⵙⴱⴷⴷ ⵢⵉⵊⵊ ⵏ ⵓⵙⴼⵔⵉⵙ. ⵉⵕⴹ ⴰⵔⵚⵎⵉⴹ ⵏ ⵡⵓⵔⵖ. ⵖⴰⵔⵙ ⴷⵉ ⵜⵉⵟⵟⴰⵡⵉⵏ ⵙⵉⵏ ⵏ ⵓⵣⵣⵓⵎⵓⵔⵔⵓⴷ ⴷ ⵉⵎⵇⵇⵔⴰⵏⵏ ⴷ ⵢⵉⵛⵜ ⵏ ⵜⵓⵣⵣⴰⵍⵜ ⵏ ⵉⵥⵕⴰ ⵉⵙⴽⴽⵯⴰⵏ. ⵜⵓⴷⴼ ⴷ ⵜⴼⵍⵉⵍⵍⵙⵜ, ⵜⵅⵣⵔ ⴷⴳ ⵓⵙⴼⵔⵉⵙ ⵉⵍⵍⴰⵏ ⵅⴼ ⵢⵉⵊⵊ ⵏ ⵓⵙⵖⵉⵎ, ⵜⵓⴷⵙ ⵖⵔⵙ. ⵜⴰⴼⵍⵉⵍⵍⵙⵜ: ⴰⴷ ⵇⵇⵉⵎⵖ ⴷⴰ ⵉⴹ ⴰ. ⴷⴰ ⴰⵟⵟⴰⵚ ⵏ ⵍⵄⵡⵉⵏ ⴷ ⴰⵚⵎⵎⴰⴹ ⴷ ⵜⴰⵜⵜⴰⵢⵜ ⴷⴳ ⵉⴹⴰⵕⵏ ⵏ ⵓⴳⵍⴷⵓⵏ, ⴰⴷ ⵟⵟⵚⵖ ⴷⴳ ⵓⵅⵅⴰⵎ ⵏ ⵡⵓⵔⵖ. ⵉⴱⴷⴰ ⵓⴳⵍⴷⵓⵏ ⵉⵜⵜⵔⵓ. ⵉⴽⵙⵉ ⴰⵙⵏⵙⵔ, ⵓⴹⴰⵏ ⴷ ⵉⵎⵟⵟⴰⵡⵏ ⵅⴼ ⵜⴼⵍⵉⵍⵍⵙⵜ. ⵜⴰⴼⵍⵉⵍⵍⵙⵜ: ⵀⵀⵀ! ⵎⴰⵏⴰⵡⵢⴰ? ⵉⵛⵛⴰⵜ ⵓⵏⵥⴰⵕ. ⵛⴰ ⵏ ⴷⴷⴳ ⵉⴳⴳⴰ ⵓⵏⵣⵡⵉ ⴰ. ⵜⵓⵖⴰ ⵡⴰⵍⵓ ⵜⵉⵎⵓⴷⵍⴰ ⴷⴳ ⵓⵊⵏⵏⴰ. ⴰⵢ! ⵜⴰⵏⵇⵇⵉⴹⵜ ⵏⵏⵉⴹⵏ. ( ⵜⵅⵣⵔ ⴷⴳ ⵡⵓⴷⵎ ⵏ ⵓⴳⵍⴷⵓⵏ ) ⵎⵉⵏ ⵜⵄⵏⵉⴷ ⵛⴽⴽ? ⴰⴳⵍⴷⵓⵏ: ⵏⵛⵛ, ⴷ ⴰⴳⵍⴷⵓⵏ ⵉⵎⵎⵔⵏ. ⵜⴰⴼⵍⵉⵍⵍⵙⵜ: ⵎⴰⵢⵎⵎⵉ ⵜⴻⵜⵜⵔⵓⴷ? ⵜⵙⵙⵓⴼⵉⴷ ⴰⵢⵉ. ⴰⴳⵍⴷⵓⵏ: ⵜⵓⵖⴰ ⴷⴷⵔⵖ ⴷⵉ ⵜⵓⵎⵔⵜ, ⵓⵔ ⵙⵙⵉⵏⵖ ⵓⵎⵉ ⵇⵇⴰⵔⵏ ⵉⵎⵟⵟⴰⵡⵏ! ⵜⵓⵖⴰ ⵙ ⵡⴰⵙⵙ, ⵜⵜⵉⵔⴰⵔⵖ ⴰⴽⴷ ⵉⵎⴷⴷⵓⴽⴰⵍ ⵉⵏⵓ ⴷⵉ ⵜⵓⵔⵜⵉⵜ, ⵙ ⵢⵉⴹ ⵛⵟⵟⵃⵖ ⴷⵉ ⵜⵎⵚⵕⵉⵢⵜ ⵜⴰⵎⵇⵇⵔⴰⵏⵜ. ⵣⴷⴰⵜ ⵉ ⵜⵓⵔⵜⵉⵜ, ⵉⵔⴰ ⴷⵉⵏⵏⵉ ⵉⵊⵊ ⵏ ⵓⵖⴱⴰⵕ ⴷ ⴰⵎⴰⵜⵜⴰⵢ, ⵄⵎⵎⵕⵚ ⵓⵔ ⵙⵙⵇⵙⵉⵖ ⵎⵉⵏ ⴷⵉⵏⵏ ⵖⵔ ⵡⴰⵔⵏⴰⵙ, ⵎⵉⵏⵣⵉ ⵜⵓⵖⴰ ⴽⵓⵍⵛⵉ ⴷ ⴰⵚⴱⵃⴰⵏ ⴷⵉ ⵎⴰⵏⵉ ⵣⴷⵖⵖ. ⵜⵜⵍⴰⵖⴰⵏ ⴰⵢⵉ ⵉⵡⴷⴰⵏ ⵏ ⵜⴳⴰⴷⵉⵔⵜ, ⴰⴳⵍⴷⵓⵏ ⵉⵎⵎⵔⵏ. ⵙ ⵜⵉⴷⴷⵜ, ⵎⴰⵍⴰ ⴰⵙⵓⵔⴰⵔ ⴷ ⵜⵓⵎⵔⵜ. ⵜⴰⴼⵍⵉⵍⵍⵙⵜ: ⵎⴰⵢⵎⵎⵉ ⵉ ⴷⴰ ⵜⵍⵍⵉⴷ ⵔⵅⵅⵓ ⴷⴳ ⵓⵙⴰⵔⴰⴳ? ⴰⴳⵍⴷⵓⵏ: ⵎⵉⵏⵣⵉ ⵔⵅⵅⵓ ⵎⵎⵓⵜⵖ. ⴳⴳⵉⵏ ⵣⵣⴰⵢⵉ ⴰⵙⴼⵔⵉⵙ, ⵙⵔⵙⵏ ⴰⵢⵉ ⴷⴰ ⴷ ⴰⵎⴰⵜⵜⴰⵢ, ⵃⵎⴰ ⴰⴷ ⵥⵕⵕⵖ ⵜⴰⵙⵙⴰⵙⵜ ⴷⵉ ⵜⵎⴷⵉⵏⵜ ⴰ. ⴷⴰⵜ, ⵉⵔⴰ ⵖⴰⵔⵉ ⵓⵍ ⵏ ⵓⴼⴳⴰⵏ. ⵔⵅⵅⵓ ⵖⴰⵔⵉ ⵓⵍ ⵏ ⵓⵍⴷⵓⵏ, ⵎⴰⵛⴰ ⵙⵄⴷⴷⵓⵖ ⴰⴽⵓⴷ ⵜⵜⴻⵜⵔⵓⵖ. ⵜⴰⴼⵍⵉⵍⵍⵙⵜ: ⵉⵜⵜⵖⵉⵍ ⴰⵢⵉ ⵓⵍⴰ ⴷ ⵡⵓⵍ ⴳⴳⵉⵏ ⵜ ⵙ ⵡⵓⵔⵖ. ⴰⴳⵍⴷⵓⵏ: ⵖⵔ ⴰⴳⴳⵯⴰⵊ ⴷⴳ ⵓⴱⵔⵉⴷ, ⴷⵉⵏⵏⵉ ⵉⵛⵜ ⵏ ⵜⴰⴷⴷⴰⵔⵜ ⵜⴰⵎⴰⵏⵓⵣⵜ. ⵣⴳ ⵓⵙⵕⵥⵎ ⵉⵕⵥⵎⵏ, ⵜⴻⵜⵜⴱⴰⵏ ⴷ ⵢⵉⵛⵜ ⵏ ⵜⵎⵟⵟⵓⴹⵜ ⵜⵇⵇⵉⵎ ⵅⴼ ⵓⵙⵖⵉⵎ. ( ⵜⵓⴷⴼ ⴷ ⵜⵎⵟⵟⵓⴹⵜ ), ⵉⵥⵥⵕ ⴷⴳ ⵢⵉⵛⵜ ⵏ ⵜⵖⵎⵎⵔⵜ ⵎⴻⵎⵎⵉⵙ ⴰⵎⵓⴹⵉⵏ. ⴷⴰⴳⵙ ⵜⵉⵎⵙⵙⵉ, ⵉⵜⴻⵜⵜⵔ ⵍⵍⵛⵛⵉⵏ. ⵏⵜⵜⴰⵜ, ⵜⴰⵎⵥⵍⵓⴹⵜ ⵖⴰⵔⵙ ⵖⵉⵔ ⴰⵎⴰⵏ ⵏ ⵡⴰⵙⵉⴼ ⵉ ⴰⴷ ⴰⵙ ⵜⵏ ⵜⵡⵛ. ⵜⴰⴼⵍⵉⵍⵍⵙⵜ! ⵉ ⵕⴱⴱⵉ ⴽⵙⵉ ⵜⵓⵣⵣⴰⵍⵜ ⵉⵏⵓ ⵏ ⵉⵥⵕⴰ ⵉⵙⴽⴽⵯⴰⵏ, ⵃⵎⴰ ⵓⵔ ⵉⵜⵜⵔⵓ ⵓⵔⴱⴰ. ⵙⵍⵖⵏ ⵉⴹⴰⵕⵏ ⵉⵏⵓ ⴷⴰ ⴷⵉ ⵜⵔⵙⵍⵜ. ⵜⴰⴼⵍⵉⵍⵍⵙⵜ: ⵎⴰⵛⴰ, ⴰⵇⵇⴰ ⵜⵜⵕⴰⵊⴰⵏ ⴰⵢⵉ ⴷⵉ ⵎⵉⵚⵕⴰ. ⴳⴳⵉⵏ ⵉⵎⴷⴷⵓⴽⴰⵍ ⵉⵏⵓ ⵎⴰⵕⵕⴰ ⴰⴳⵔⴰⵡ ⵣⴷⴰⵜ ⵉ ⵡⴰⵙⵉⴼ ⵏ ⵏⵏⵉⵍ, ⴰⴷ ⵏⴰⵡⴹ ⵖⵔ ⵍⵀⵕⴰⵎⴰⵜ. ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ⵜⴰⴼⵍⵉⵍⵍⵙⵜ! ⵉ ⵕⴱⴱⵉ ⵇⵇⵉⵎ ⴰⴽⵉⴷⵉ ⵉⵊⵊ ⵏ ⵢⵉⴹ, ⴰⴷ ⵜⴳⴳⴷ ⴰⵎⴰⵣⴰⵏ ⵉⵏⵓ. ⴰⵔⴱⴰ ⵉⴼⴼⵓⴷ, ⵉⵎⵎⴰⵙ ⵜⵅⵢⵢⵇ. ⵜⴰⴼⵍⵉⵍⵍⵙⵜ: ⵓⵔ ⵙⵙⵉⵏⵖ! ⵄⵍⴰ ⵃⴰⵍ, ⵓⵔ ⵉⵢⵉ ⵉⵙⵙⵓⵙⵎⵏ ⵉⵃⵏⵊⵉⵔⵏ. ⵍⴱⴷⴷⴰ ⵜⵃⵊⵊⴰⵕⵏ ⴰⵢⵉ ⵙ ⵓⵥⵕⵓ, ⵄⴰⵡⴷ ⵜⵍⵍⴰ ⵜⵚⵚⵎⴹ. ⴰⴳⵍⴷⵓⵏ: ⴱⴰⵢⵏ! ⵓⵔ ⵜⴻⵜⵜⴰⴽⵉⴷ ⵛⴰ ⵉⴹ ⴰ ⴰⴽⴷ ⵜⵚⵚⵎⴹ. ⵜⴰⴼⵍⵉⵍⵍⵙⵜ: ⵡⴰⵅⵅⴰ! ⴰⴷ ⵇⵇⵉⵎⵖ ⵉⵊⵊ ⵏ ⵢⵉⴹ, ⴰⴷ ⴳⴳⵖ ⴰⵎⴰⵣⴰⵏ ⵏⵏⴽ. ⴰⴳⵍⴷⵓⵏ: ⵜⴻⵜⵜⵇⴰⴷⵉⵖ ⵛⵎⵎ ⴰ ⵜⴰⴼⵍⵉⵍⵍⵙⵜ. ⵜⴽⵙⵉ ⵜⴼⵍⵉⵍⵍⵙⵜ ⵜⵓⵣⵣⴰⵍⵜ ⵏ ⵓⴳⵍⴷⵓⵏ, ⵜⴹⵡⴰ ⵙ ⵏⵏⵊ ⵉ ⵜⵎⴷⵉⵏⵜ, ⵜⵉⵡⴹ ⵖⵔ ⵜⴰⴷⴷⴰⵔⵜ ⵜⴰⵎⴰⵏⵓⵣⵜ. ⵜⵙⵔⵙ ⵜⵓⵣⵣⴰⵍⵜ ⴰⴽⴷ ⵜⵎⵟⵟⵓⴹⵜ ⵉⵟⵟⵚⵏ ⵅⴼ ⵓⵙⵖⵉⵎ. ⵜⴹⵡⴰ ⵣⴷⴰⵜ ⵉ ⵜⵉⵙⵉ ⵏ ⵓⵔⴱⴰ, ⵜⴳⴳⴰ ⴰⵙ ⵍⵄⵡⵉⵏ ⵙ ⵉⴼⵔⵉⵡⵏ ⵏⵏⵙ ⴰⵍ ⵓⵎⵉ ⵉⵟⵟⵚ. ⴼⴼⵉⵔ, ⵉⴷⵡⵍ ⴷ ⵖⵔ ⵓⴳⵍⴷⵓⵏ. ⵜⴰⴼⵍⵉⵍⵍⵙⵜ: ⵡⴰⵅⵅⴰ! ⵙⴰⵍⵉⵖ ⴰⵙⵖⵍⴼ ⵉⵏⵓ. ⵙ ⵜⵉⴷⴷⵜ, ⵓⵔ ⵓⵛⵉⵖ ⵛⴰ ⴰⴽⴷ ⵜⵚⵚⵎⴹ. ⴰⴳⵍⴷⵓⵏ: ⵎⵉⵏⵣⵉ ⵜⴳⴳⵉⴷ ⵉⵛⵜ ⵏ ⵜⵉⴳⴰⵡⵜ ⴷ ⵜⴰⵚⴱⵃⴰⵏⵜ. ( ⵟⵟⵚⵏ, ⴰⴳⵍⴷⵓⵏ ⴷ ⵜⴼⵍⵉⵍⵍⵙⵜ ). ⵜⴰⴼⵍⵉⵍⵍⵙⵜ: ( ⵜⴽⴽⵔ ⴷ ⵣⴳ ⵢⵉⴹⵚ ) ⵡⴰⵅⵅⴰ! ⴰⵙⵙ ⴰ, ⴰⴷ ⵕⴰⵃⵖ ⵖⵔ ⵎⵉⵚⵕⴰ. ⴰⴷ ⴰⴽ ⴳⴳⵖ ⵛⴰ ⵏ ⵜⵉⴳⴰⵡⵜ ⴷⵉⵏⵏⵉ? ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ⵜⴰⴼⵍⵉⵍⵍⵙⵜ! ⵓⵔ ⵜⵣⵎⵎⵔⴷ ⴰⴷ ⵜⵇⵇⵉⵎⴷ ⵉⵊⵊ ⵏ ⵢⵉⴹ ⵏⵏⵉⴹⵏ? ⵜⴰⴼⵍⵉⵍⵍⵙⵜ: ⵎⴰⵛⴰ ⵜⵜⵕⴰⵊⴰⵏ ⴰⵢⵉ ⵉⵎⴷⴷⵓⴽⴰⵍ ⵉⵏⵓ ⴷⵉ ⵎⵉⵚⵕⴰ! ⴰⵙⵙ ⴰ, ⴰⴷ ⴰⵡⴹⵏ ⵖⵔ ⴰⴱⵓⵍⵀⵓⵍ. ⴰⴳⵍⴷⵓⵏ: ⴷⵉⵀⵉⵏⵏ, ⵣⴷⴰⵜ ⵉ ⵜⵎⴷⵉⵏⵜ, ⵜⵡⴰⵍⵉⵖ ⵉⵊⵊ ⵏ ⵓⵔⴱⴰ ⵉⵇⵇⵉⵎ ⵖⵔ ⵢⵉⵛⵜ ⵏ ⵜⴷⴰⴱⵓⵜ ⵅⴰⴼⵙ ⴰⵟⵟⴰⵚ ⵏ ⵜⴼⵔⵉⵡⵉⵏ. ⵢⵓⴷⴼ ⴷ ⵓⵏⵍⵎⴰⴷ ⵙ ⵓⵙⵖⵉⵎ ⴷ ⵜⴷⴰⴱⵓⵜ ⴷ ⵜⴼⵔⵉⵡⵉⵏ. ⴰⴳⵍⴷⵓⵏ: ⵉⵅⵙ ⴰⴷ ⵉⵙⴰⵍⴰ ⵉⵛⵜ ⵏ ⵜⵏⴼⵓⵙⵜ ⵏ ⵓⵎⵣⴳⵓⵏ, ⴰⴷ ⵜⵜ ⵉⵡⵛ ⵉ ⵓⵏⵎⵀⴰⵍ ⵏ ⵓⵎⵣⴳⵓⵏ ⵏ ⵜⵖⵔⵎⴰⵏⵜ ⵜⴰⴳⵔⴰⵡⵜ. ⵎⴰⵛⴰ, ⴷⴰⴳⵙ ⵜⵚⵚⵎⴹ, ⵓⵔ ⵉⵣⵎⵎⵔ ⴰⴷ ⵢⴰⵔⵉ ⵎⵉⵏⵣⵉ ⴷⴰⴳⵙ ⵜⵉⵎⵍⵉⵍⵍⴰⵢ ⵏ ⵍⴰⵥ. ⵜⴰⴼⵍⵉⵍⵍⵙⵜ: ⵡⴰⵅⵅⴰ! ⴰⴷ ⵕⴰⵊⵉⵖ ⵉⵊⵊ ⵏ ⵢⵉⴹ ⵏⵏⵉⴹⵏ. ⵖⴰⵔⴽ ⵛⴰ ⵏ ⵜⵓⵣⵣⴰⵍⵜ ⴰⴷ ⵜ ⴰⵡⵉⵖ? ⴰⴳⵍⴷⵓⵏ: ⵓⵀⵓ, ⵖⴰⵔⵉ ⵖⵉⵔ ⵜⵉⵟⵟⴰⵡⵉⵏ! ⴽⵓ ⵉⵛⵜ ⴷ ⴰⵣⵣⵓⵎⵓⵔⵔⵓⴷ ⴰⵎⵇⵇⵔⴰⵏ ⵉ ⴷ ⵉⵡⵉⵏ ⵣⴳ ⴽⵓⵍⵓⵎⴱⵢⴰ ⵛⴰ ⵏ ⵜⵉⵎⵉⴹⵉ ⵏ ⵓⵙⴳⴳⵯⴰⵙ. ⴽⴽⵙ ⴰⵢⵉ ⵉⵛⵜ ⵏ ⵜⵉⵟⵟ, ⴰⵡⵉ ⵜⵜ ⵉ ⵓⵏⵍⵎⴰⴷ. ⵉⵣⵎⵎⵔ ⴰⴷ ⵜⵜ ⵉⵣⵣⵏⵣ ⵃⵎⴰ ⴰⴷ ⵖⴰⵔⵙ ⵉⵍⵉⵏ ⵉⴽⵛⵛⵓⴹⵏ ⵉ ⵜⵚⵚⵎⴹ ⴷ ⵎⴰⵛⵛⴰ. ⴰⵎⵎⵓ, ⴰⴷ ⵜⵙⴰⵍⵉⴷ ⵜⵉⴳⴰⵡⵜ ⵏⵏⵎ. ⵜⴰⴼⵍⵉⵍⵍⵙⵜ: ⴰ ⴰⴳⵍⴷⵓⵏ ⵉⵏⵓ ⵉⵄⵉⵣⵣⵏ! ⵓⵔ ⵣⵎⵎⵔⵖ ⴰⴷ ⵜⵜ ⴳⴳⵖ. ⵜⵉⵟⵟⴰⵡⵉⵏ, ⵓⵀⵓ! ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ⵉ ⵕⴱⴱⵉ ⴳⴳ ⴰⵢⵉ ⵎⵉⵏ ⴷⴰⵎ ⵜⴻⵜⵜⵔⵖ. ⵜⵙⴳⵄⵄⴷ ⵜⴼⵍⵉⵍⵍⵙⵜ ⵜⵉⵖⵔⴹⵉⵏ, ⵜⴽⴽⵙ ⴰⵙ ⵉⵛⵜ ⵏ ⵜⵉⵟⵟ ⵜⵙⴽⴽⵯⴰ, ⵓⵛⴰ ⵜⴹⵡⴰ ⴷⵉ ⵜⵎⴷⵉⵏⵜ. ⵜⵉⵡⴹ ⵖⵔ ⵜⴰⴷⴷⴰⵔⵜ ⵏ ⵓⵏⵍⵎⴰⴷ. ⵜⵊⵊⴰ ⴰⵙ ⵜⵉⵟⵟ ⵏ ⵓⵣⵣⵓⵎⵓⵔⵔⵓⴷ, ⵜⴹⵡⴰ ⵄⴰⵡⴷ ⵖⵔ ⵓⴳⵍⴷⵓⵏ. ⴰⵏⵍⵎⴰⴷ: ( ⵉⵅⵣⵔ ⴷⴳ ⵓⵣⵣⵓⵎⵓⵔⵔⵓⴷ ) ⵓⵔ ⵜⴻⵜⵜⵉⵎⵏⵖ! ⵎⴰⵎⵛ ⵜⵎⵙⴰⵔ? ( ⵉⴼⴼⵖ ⵉⵎⵎⵔⵏ ). ⵜⴰⴼⵍⵉⵍⵍⵙⵜ: ⵡⴰⵅⵅⴰ! ⴳⴳⵉⵖ ⵎⵉⵏ ⵜⵅⵙⴷ. ⵔⵅⵅⵓ, ⴰⴷ ⵛⴽⴽ ⵙⵙⵉⴼⴹⵖ. ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ⵜⴰⴼⵍⵉⵍⵍⵙⵜ! ⵓⵔ ⵜⵣⵎⵎⵔⴷ ⴰⴷ ⴽⵉⴷⵉ ⵜⵜⵇⵇⵉⵎⴷ ⵉⵊⵊ ⵏ ⵢⵉⴹ ⵏⵏⵉⴹⵏ? ⵜⴰⴼⵍⵉⵍⵍⵙⵜ: ⵎⴰⵛⴰ, ⴰⵇⵇⴰⵏⵖ ⴷⴳ ⵓⵎⵡⴰⵏ. ⵓⵔ ⵉⵇⵇⵉⵎ ⵛⴰ ⵉ ⵓⴷⴼⵍ ⴰⴷ ⴷ ⵢⴰⵙ. ⵉⵅⵚⵚ ⴰⵢⵉ ⴰⴷ ⵕⴰⵃⵖ ⵖⵔ ⵎⵉⵚⵕⴰ. ⴰⴷ ⴷⵡⵍⵖ ⴷⵉ ⵜⴼⵙⴰ, ⴰⴷ ⴰⴽ ⴷ ⴰⵡⵉⵖ ⵉⵥⵕⴰ ⵉⵙⴽⴽⵯⴰⵏ ⴷ ⵜⵓⵣⵣⴰⵍⵜ ⵜⴰⵎⴰⵢⵏⵓⵜ. ⵜⵓⴷⴼ ⴷ ⵢⵉⵛⵜ ⵏ ⵜⵔⴱⴰⵜ ⵖⴰⵔⵙ ⵉⵛⵜ ⵏ ⵜⵣⵣⵏⴱⵉⵍⵜ ⵜⵛⵛⵓⵕ ⵙ ⵓⵛⴰⵏⴰ. ⴰⴳⵍⴷⵓⵏ: ⴷⴳ ⵓⵙⴰⵔⴰⴳ, ⴷⴰ ⵙ ⵡⴰⴷⴷⴰⵢ ⴷⵉⵏⵏⵉ ⵉⵛⵜ ⵏ ⵜⵔⴱⴰⵜ ⵜⵣⵏⵓⵣⴰ ⴰⵛⴰⵏⴰ. ⵜⵡⴹⴰ ⴰⵙ ⵜⵣⵣⵏⴱⵉⵍⵜ, ⵇⵇⴰⵄ ⵉⴹⵢⵢⵄ ⴰⵙ ⴷⴳ ⵓⴳⵍⵎⴰⵎ. ⴰⴷ ⵜⵜ ⵉⵡⵡⵜ ⴱⴰⴱⴰⵙ ⵎⴰⵍⴰ ⵓⵔ ⵜⵉⵡⵉ ⵜⵜⵎⵏⵢⴰⵜ ⵖⵔ ⵜⴰⴷⴷⴰⵔⵜ. ⵓⵔ ⵖⴰⵔⵙ ⵛⴰ ⵜⴰⵔⵖⵉⵡⵉⵏ, ⴷ ⵜⵙⵉⵔⴰ ⴷ ⵓⵔⵚⵎⵉⴹ ⵉ ⵖⴰ ⵜⵉⵕⴹ. ⵜⴰⴼⵍⵉⵍⵍⵙⵜ: ⵡⴰⵅⵅⴰ! ⴰⴷ ⵇⵇⵉⵎⵖ ⵉⵊⵊ ⵏ ⵢⵉⴹ ⵏⵏⵉⴹⵏ, ⵎⴰⵛⴰ ⵓⵔ ⵣⵎⵎⵔⵖ ⴰⴷ ⴰⴽ ⴽⴽⵙⵖ ⵜⵉⵟⵟ ⵉ ⴷⴰⴽ ⵉⵇⵇⵉⵎⵏ. ⴰⴷ ⵜⴷⵡⵍⴷ ⴷ ⴰⴹⵕⵖⴰⵍ. ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ⵉ ⵕⴱⴱⵉ ⴳⴳ ⵎⵉⵏ ⴷⴰⵎ ⵜⴻⵜⵜⵔⵖ. ⵜⴽⴽⵙ ⵜⴼⵍⵉⵍⵍⵙⵜ ⵜⵉⵟⵟ ⵏⵏⵉⴹⵏ, ⵜⴽⵙⵉ ⵜⵜ ⵉ ⵜⵔⴱⴰⵜ. ⵜⴰⵔⴱⴰⵜ: ⵀⵀⵀ! ⵎⵛⵃⴰⵍ ⵉⵛⵏⴰ ⵓⵙⴽⴽⵉⵏ ⴰ, ⵣⵣⴰⵊ ⴷ ⴰⵣⴳⵣⴰ. ⴰⴷ ⵜ ⴽⵙⵉⵖ ⵖⵔ ⵜⴰⴷⴷⴰⵔⵜ. ⵜⴰⴼⵍⵉⵍⵍⵙⵜ: ( ⵜⵄⵇⴱ ⴷ ⵖⵔ ⵓⴳⵍⴷⵓⵏ ) ⵜⴷⵡⵍⴷ ⴷ ⴰⴹⵕⵖⴰⵍ ⴰ ⴰⵎⴷⴷⵓⴽⵍ. ⵓⵔ ⵣⵎⵎⵔⵖ ⴰⴷ ⵛⴽⴽ ⵊⵊⵖ ⴰⵎⵎⵓ. ⵔⵅⵅⵓ, ⴰⴷ ⴽⵉⴷⴽ ⵇⵇⵉⵎⵖ. ⴰⴳⵍⴷⵓⵏ: ⵓⵀⵓ ⵜⴰⴼⵍⵉⵍⵍⵙⵜ! ⵔⵅⵅⵓ, ⵜⵣⵎⵎⵔⴷ ⴰⴷ ⵜⵕⴰⵃⴷ ⵖⵔ ⵎⵉⵚⵕⴰ, ⵅⵎⵎⵉⵏⵉ ⵖⴰ ⵜⵄⵇⴱⴷ ⴰⴷ ⴰⵢⵉ ⵜⴰⵍⵙⴷ ⵎⴰⵕⵕⴰ ⵎⵉⵏ ⵜⵥⵕⵉⴷ. ⵜⴰⴼⵍⵉⵍⵍⵙⵜ: ⵓⵀⵓ ⴰⵎⴷⴷⵓⴽⵍ! ⴷⴰ ⵉ ⵖⴰ ⵇⵇⵉⵎⵖ. ⴰⴳⵍⴷⵓⵏ: ⵜⵜⵇⴰⴷⵉⵖ ⵛⵎⵎ ⵜⴰⴼⵍⵉⵍⵍⵙⵜ. ⵔⵅⵅⵓ, ⴹⵓ ⴷⵉ ⵜⵎⴷⵉⵏⵜ, ⴰⵍⵙ ⴰⵢⵉ ⵎⴰⵕⵕⴰ ⵎⵉⵏ ⵜⵡⴰⵍⵉⴷ. ⵜⴹⵡⴰ ⵜⴼⵍⵉⵍⵍⵙⵜ ⴷⴳ ⵎⴰⵕⵕⴰ ⵉⵎⵓⴽⴰⵏ, ⵜⴹⵡⴰ ⵖⵔ ⵓⴳⵍⴷⵓⵏ. ⵜⴰⴼⵍⵉⵍⵍⵙⵜ: ⴰⴳⵍⴷⵓⵏ ⵉⵄⵉⵣⵣⵏ! ⵥⵕⵉⵖ ⵉⵎⵥⵍⴰⴹ ⴰⴽⴷ ⵓⴱⵔⵉⴷ, ⵉⵃⵏⵊⵉⵔⵏ ⵍⵍⵓⵥⵏ, ⵟⵟⵚⵏ ⵎⴷⵓⵔⵔⵓⵄⵏ ⵙ ⵡⴰⴷⴷⴰⵢ ⵉ ⵓⵣⵣⴳⵯⴰⵔ ⵥⵕⵉⵖ ⴰⵟⵟⴰⵚ ⵏ ⵜⵙⵙⴰⵙⵜ. ⴰⴳⵍⴷⵓⵏ: ⴰⵎⴷⴷⵓⴽⵍ! ⵓⵔ ⴷⵉⵏⵏⵉ ⵎⵉⵏ ⵓⵔ ⵉⵃⵍⵉⵏ ⴰⵎ ⵜⴰⵙⵙⴰⵙⵜ ⵏ ⵓⴼⴳⴰⵏ. ⵜⵡⴰⴷⵍⵖ ⵙ ⵡⵓⵔⵖ. ⵉ ⵕⴱⴱⵉ ⴽⴽⵙ ⴰⵢⵉ ⵓⵔⵖ ⴽⵙⵉ ⵜ ⵎⴰⵏⵉ ⵉⵜⵜⵅⵚⵚⴰ. ⵜⴽⴽⵙ ⵜⴼⵍⵉⵍⵍⵙⵜ ⴰⵔⵚⵎⵉⴹ ⵏ ⵡⵓⵔⵖ ⵏ ⵓⴳⵍⴷⵓⵏ, ⵜⴹⵡⴰ ⴷⴳ ⵎⴰⵕⵕⴰ ⵉⵎⵓⴽⴰⵏ. ⵜⵙⵙⵏⵀⵣⵣⴰ ⴰⵔⵚⵎⵉⴹ ⵉⵎⵉⴽⴽ ⵙ ⵉⵎⵉⴽⴽ ⴰⵍ ⴰⵎⵉ ⵢⵓⴹⴰ ⵎⴰⵕⵕⴰ ⵡⵓⵔⵖ. ⴼⴼⵉⵔ, ⵜⵄⵇⴱ ⴷ ⵖⵔ ⵓⴳⵍⴷⵓⵏ. ⵜⴰⴼⵍⵉⵍⵍⵙⵜ: ⴰⴳⵍⴷⵓⵏ ⵉⵄⵉⵣⵣⵏ! ⴰⴷ ⴽⵉⴷⴽ ⵎⵙⴰⴼⴰⴹⵖ. ⴰⴳⵍⴷⵓⵏ: ⵓⵀⵀⵀ ⵜⴰⴼⵍⵉⵍⵍⵙⵜ! ⴰⵇⵇⴰ ⵎⵎⵔⵖ. ⵔⵅⵅⵓ, ⴰⴷ ⵜⵕⴰⵃⴷ ⵖⵔ ⵎⵉⵚⵕⴰ. ⵜⵇⵇⵉⵎⴷ ⴰⴽⵉⴷⵉ ⴰⵟⵟⴰⵚ! ⵎⵙⴰⴼⴰⴹ ⴰⵢⵉ ⴷⴰⵜ ⵉ ⵖⴰ ⵜⵕⴰⵃⴷ. ⵜⴰⴼⵍⵉⵍⵍⵙⵜ: ⵓⵔ ⵜⵕⵉⵃⵖ ⵛⴰ ⵖⵔ ⵎⵉⵚⵕⴰ! ⴰⴷ ⵕⴰⵃⵖ ⵖⵔ ⵜⴰⴷⴷⴰⵔⵜ ⵏ ⵜⵎⵜⵜⴰⵏⵜ. ⵜⴳⴳⴰ ⵜⵎⵜⵜⴰⵏⵜ ⵓⵍⴰ ⴷ ⴰⵎⴰⵣⴰⵏ ⵏ ⵜⵓⵎⵔⵜ, ⵎⴰⵛⵉ ⴰⵎⵏⵏⵉ? ( ⵜⴷⵔⵔⵄ ⵉ ⵉⴹⴰⵕⵏ ⵏ ⵓⴳⵍⴷⵓⵏ ⵓⵛⴰ ⵜⵎⵎⵓⵜ ). ⴰⴳⵍⴷⵓⵏ: ⵜⴰⴼⵍⵉⵍⵍⵙⵜ! ( ⵉⵙⵍⴰ ⵉ ⵢⵉⵛⵜ ⵏ ⵜⵕⵥⵉⵜ. ⵉⵙⵙⵓⴼⵖ ⴷ ⵣⴳ ⵓⴷⴼⴼⴰⵙ ⵓⵍ ⵏ ⵓⵍⴷⵓⵏ ⵉⴱⴹⴰ ⵅⴼ ⵙⵉⵏ. ⵉⵊⵊⵉ ⵜ ⴰⴷ ⵢⵓⴹⴰ ⵅⴼ ⵜⵎⵓⵔⵜ ). ⵢⵓⴷⴼ ⴷ ⵓⵏⴱⴱⴰⴹ. ⴰⵏⴱⴱⴰⴹ: ⴰⵍ ⵓⵎⵉ ⵏⵛⵛ ⴷ ⴰⵏⴱⴱⴰⴹ ⵏ ⵜⵎⴷⵉⵏⵜ ⴰ, ⵉⵙⵙⵓⵙⵎ ⵉⵢⵉ ⴰⴷ ⵓⴳⵓⵔⵖ ⴷⴳ ⵓⵙⴰⵔⴰⴳ ⵃⵎⴰ ⴰⴷ ⵙⵙⵏⵜⵎⵖ ⴱⵍⵍⵉ ⴽⵓⵍⵛⵉ ⴰⵇⵇⴰⵜ ⵎⵍⵉⵃ. ( ⵉⵅⵣⵔ ⵖⵔ ⵓⴳⵍⴷⵓⵏ ) ⴰⵀⵀⵀ! ⵎⴰⵎⵛ ⵓⵔ ⵉⵃⵍⵉ ⵓⴳⵍⴷⵓⵏ ⵉⵎⵎⵔⵏ! ⵓⵔ ⵖⴰⵔⵙ ⵜⵉⵟⵟⴰⵡⵉⵏ ⵓⵍⴰ ⴷ ⵜⵓⵣⵣⴰⵍⵜ, ⵉⴷⵡⵍ ⵓⴽⵍⵓ ⵏ ⵡⵓⵔⵖ ⴷ ⴰⵎⵖⴷⴻⴷⴷⵉ. ⵉⵜⵜⴱⴰⵏ ⴷ ⴰⵎⵥⵍⵓⴹ. ⵉ ⵓⴳⴹⵉⴹ ⴰ ⵉⵎⵎⵓⵜⵏ ⵖⵔ ⵉⴹⴰⵕⵏ ⵏⵏⵙ? ⵉⵡⵜⴰ ⵜⴰⴼⵍⵉⵍⵍⵙⵜ ⵙ ⵓⴹⴰⵕ ⴰⵍ ⵓⵎⵉ ⵜⴼⴼⵖ. ⵇⵇⵉⵎⵏ ⵖⵉⵔ ⵉⴼⵔⵉⵡⵏ ⴷ ⵡⵓⵍ ⵉⵕⵥⵏ. ⴰⵏⴱⴱⴰⴹ: ⵓⵔ ⵜⵊⵊⵉⵎ ⵉⴳⴹⴰⴹ ⴰⴷ ⵎⵜⵏ ⴷⴰ. ⴰⴷ ⴰⴽⵓⵎ ⴷ ⵙⴽⴽⵖ ⵡⵉ ⵖⴰ ⵉⴽⴽⵙⵏ ⴰⵙⴼⵔⵉⵙ, ⵙ ⵡⵓⵣⵣⴰⵍ, ⴰⴷ ⵜⴳⴳⵎ ⵉⵊⵊ ⵏ ⵓⵙⴼⵔⵉⵙ ⴷ ⴰⵎⴰⵢⵏⵓ, ⵉⴷⵍⴰ ⵙ ⵡⵓⵔⵖ. ⵎⴰⵛⴰ, ⵜⵡⴰⵍⴰ ⴰ ⵙ ⵎⴰⵎⵛ ⵜⵡⴰⵍⵉⵖ ⵏⵛⵛ. ( ⵉⴼⴼⵖ ). ⵓⴷⴼⵏ ⴷ ⵙⵉⵏ ⵏ ⵉⵔⴳⴰⵣⵏ, ⴼⴼⵖⵏ, ⴽⵙⵉⵏ ⴰⵙⴼⵔⵉⵙ ⵏ ⵓⴳⵍⴷⵓⵏ ⵉⵎⵎⵔⵏ. ⴼⴼⵉⵔ, ⵢⵓⴷⴼ ⴷ ⴰⵏⵉⵔ. ⴰⵏⵉⵔ: ⴷ ⴰⵏⵎⵎⴰⵔⵓ, ⴰⴷ ⵜⵉⵍⵉⴷ ⴷ ⴰⵎⴰⵣⴰⵏ ⵏ ⵕⴱⴱⵉ! ⵙⵡⵉⵏⴳⵎⵎ, ⴰⵙⵙ ⴰ, ⵉⵙⵙⴽ ⴰⵢⵉ ⴷ ⴰⴷ ⴽⵙⵉⵖ ⵙⵉⵏ ⵏ ⵉⵙⴽⴽⵉⵏⵏ ⵉⵙⴽⴽⵯⴰⵏ ⵏ ⵜⵎⴷⵉⵏⵜ ⴰ. ⴱⴰⵢⵏ, ⵔⵅⵅⵓ ⴰⵇⵇⴰ ⴷⴰ ⴰⵟⵟⴰⵚ ⵏ ⵓⴳⵔⴰ! ⵉⵜⵜⴱⴰⵏ ⵎⴰⵕⵕⴰ ⵉⵡⴷⴰⵏ ⵖⴰⵔⵙⵏ ⵓⴳⴳⴰⵔ ⵏ ⵎⵉⵏ ⵉⵜⵜⵅⵚⵚⴰⵏ. ⵎⴰⵛⴰ ⵕⴱⴱⵉ, ⵓⵔ ⵜ ⵉⵜⵜⵉⵡⵉ ⴷⴳ ⵓⴳⵔⴰ. ⵏⵛⵛ, ⵙⵙⵏⵖ ⵎⵉⵏ ⵉⵔⵣⵣⵓ. ⵎⴰⵛⴰ, ⵎⴰⵏⵉ ⵜⵍⵍⴰ ⴽⴰⵔⵓⵎⴱⴰ, ⵓⵔ ⵜⵜ ⵓⴼⵉⵖ ⵛⴰ. ( ⵉⴱⴷⴰ ⵉⵔⵣⵣⵓ ⴰⵍ ⵎⴰⵏⵉ ⵢⵓⴼⴰ ⵉⴼⵔⵉⵡⵏ ⴷ ⵡⵓⵍ ⵉⵕⵥⵏ ) ⴱⴰⵢⵏ, ⵢⵢⵉⵀ! ⵢⵢⵉⵀ! ⵢⵢⵉⵀ! ⴷⴰ ⵉⵍⵍⴰⵏ. ⵓⵍ ⵏ ⵓⴳⵍⴷⵓⵏ ⵉⵎⵎⵔⵏ ⴷ ⵉⴼⵔⵉⵡⵏ ⵏ ⵜⴼⵍⵉⵍⵍⵙⵜ. ⵙ ⵣⵣⴰⴳⵙⵏ ⵜⴰⵎⴷⵉⵏⵜ ⴰ ⵜⵎⵖⴰⵔ, ⵎⴰⵕⵕⴰ ⴷⴷⵔⵏ ⴷⵉ ⵜⵓⵎⵔⵜ. ⵔⵅⵅⵓ, ⴰⴷ ⵄⵇⴱⵖ ⴰⴷ ⴰⵍⵙⵖ ⵉ ⵓⴳⵍⴷⵓⵏ ⴷ ⵜⴼⵍⵉⵍⵍⵙⵜ ⵎⴰⵎⵛ ⵓⴼⵉⵖ ⵜⴰⵎⴷⵉⵏⵜ ⵏⵏⵙⵏ, ⴰⴷ ⵉⵎⵎⵔ. ( ⵉⴼⴼⵖ ⵙ ⵉⴼⵔⵉⵡⵏ ⴷ ⵡⵓⵍ ⵉⵕⵥⵏ ). ⵜⴰⵔⴰⴱⴱⵓⵜ ⵏ ⵉⵃⵏⵊⵉⵔⵏ: ⵓⵀⵀⵀ ⵜⴰⵎⵓⵔⵜ ⵏ ⵕⴱⴱⵉ! ⵓⵔ ⵜⴻⵜⵜⵉⵡⵉⵎ ⴷⵉ ⵜⵖⴰⵡⵙⵉⵡⵉⵏ ⵏⴽⵓⵎ! ⵉⵅⵚⵚⴰ ⴰⵙⵡⵉⵏⴳⵎ ⵏⴽⵓⵎ ⴰⴷ ⵉⵍⵉ ⴷⴳ ⵎⵉⵏ ⵉⴷ ⵖⴰ ⴰⵔⵔⵏ ⵜⴰⵏⴽⵍⵡⵉⵜ ⵏ ⵜⵏⴼⴳⴰⵏⵜ ⴷ ⵡⵓⵍⴰⵡⵏ ⴷ ⴱⵓⵃⴱⵔ ⵏ ⵎⵉⴷⴷⵏ ⵖⵔ ⵓⴱⵔⵉⴷ. ⵜⵉⴳⵉⵔⴰ ⵃⴰⴳⴻ ⵃⴰⴳⴻ 6