Datasets:

Tamazight-NLP
/

IRCAM-CORPUS

ⵉⵟⵟⵓ ⵜⴰⴳⵓⵊⵉⵍⵜ ⴰⵎⵎⴰⵙ ⵏ ⵉⴷⵔⴰⵔⵏ ⵉⵅⴰⵜⴰⵔⵏ ⵏ ⴼⴰⵣⴰⵣ, ⵜⵍⵍⴰ ⵢⴰⵜ ⵜⵇⴱⵉⵍⵜ ⵜⴰⵎⵇⵇⵔⴰⵏⵜ ⴷⵉⴳⵙ ⵢⴰⵏ ⵓⵔⴳⴰⵣ ⵉⵙⵎ ⵏⵏⵙ ⵃⵎⵎⵓ, ⵢⵓⵎⵥ ⵜⴰⵏⴱⴰⴹⵜ ⵏ ⵜⵇⴱⵉⵍⵜ. ⵎⵇⵇⴰⵕ ⵖⵓⵔⵙ ⵉⴳⴳⵓⴷⵉ ⵍⵎⴰⵍ, ⴷ ⵉⵢⵙⴰⵏ ⴷ ⵜⵡⵜⵎⵉⵏ ⵉⵖⵓⴷⴰⵏ, ⵓⵔ ⴰⵙ ⵉⴼⴽⵉ ⵕⴱⴱⵉ ⵜⴰⵔⵡⴰ. ⴰⵔ ⵢⴰⵏ ⵡⴰⵙⵙ ⴳ ⵡⵓⵙⵙⴰⵏ ⵏ ⵜⴼⵙⵓⵜ, ⵜⴰⵔⵓ ⴰⵙ ⵜⵎⵟⵟⵓⴹⵜ ⵏⵏⵙ ⵜⴰⵏⴳⴳⴰⵔⵓⵜ ⵢⴰⵜ ⵜⵔⴱⴰⵜ ⵉⵖⵓⴷⴰⵏ, ⵉⵙⵎ ⵏⵏⵙ ⵉⵟⵟⵓ. ⵎⴰⵛⴰ ⵜⵓⵎⵔⵜ ⵏ ⵃⵎⵎⵓ ⵜⵏⵏⴳⵣⴰ ⴰⵛⴽⵓ ⵎⴰⵢⵙ ⵏ ⵉⵟⵟⵓ ⵜⵎⵎⵓⵜ ⵍⵍⵉⴳ ⵜⵜ ⵜⵓⵔⵓ. ⵜⵇⵇⵉⵎ ⵜⵙⵍⵎⵢⴰ ⵜⵓⵙⵉ ⵜⵜ ⵢⵓⵜ ⵣⵉ ⵜⵡⵜⵎⵉⵏ ⵏ ⵃⵎⵎⵓ ⵜⴳ ⴰⵎ ⵉⵙ ⵜⵔⴰ ⴰⴷ ⵜⵜ ⵜⵙⴳⵎ. ⵜⵇⵇⵉⵎ ⵜⵙⵍⵎⵢⴰ ⵛⴰ ⵏ ⵡⵓⵙⵙⴰⵏ, ⵜⵏⵏⴰ ⴰⵙ ⵜⵎⵟⵟⵓⴹⵜ ⵏⵏⵙ ⵉ ⵃⵎⵎⵓ ⵀⴰⵜ ⵜⵎⵎⵓⵜ. ⵜⴰⵙⵉ ⵜⵜ ⵜⴰⵡⵉ ⵜⵜ ⵖⵔ ⴰⵎⵎⴰⵙ ⵏ ⵉⵎⴽⵙⴰⵡⵏ, ⵉⴷⴷⵅ ⵓⵔ ⴷⴷⵊⵉⵏ ⵜⵃⵎⵉⵍ ⵉⵟⵟⵓ ⴷ ⵎⴰⵢⵙ ⵏⵏⴰ ⵉⵎⵎⵓⵜⵏ. ⵣⵔⵉⵏ ⴽⵉⴳⴰⵏ ⵏ ⵉⵙⴳⴳⵯⴰⵙⵏ, ⵉⵟⵟⵓ ⴰⵔ ⵜⴽⵙⵙⴰ ⵜⵉⴼⵓⵏⴰⵙⵉⵏ ⴷ ⵡⵓⵍⵍⵉ. ⴰⵔ ⵜⵜⵍⵍⵎ ⵜⴰⴹⵓⴹⵜ ⴷ ⵜⵓⵜⵎⵉⵏ ⵏ ⵉⵎⴽⵙⴰⵡⵏ. ⴰⵔ ⵜⵥⵟⵟⴰ ⵉⵛⴹⵉⴼⵏ ⴷ ⵉⵥⵏⵏⴰⵕⵏ ⴷ ⵜⵊⵍⵍⵓⴱⴰⵢ ⵃⵎⴰ ⴰⴷ ⵜⴰⴼ ⵎⴰ ⵜⴻⵜⵜⵛⴰ. ⵍⵍⵉⴳ ⵜⵎⵇⵇⵓⵕ ⵉⵟⵟⵓ, ⵜⴳ ⵢⴰⵜ ⵜⴳⵥⵉⵡⵜ ⵉⵖⵓⴷⴰⵏ ⴽⵉⴳⴰⵏ, ⴰⵔ ⵉⵙ ⴽⴽⴰⵜⵏ ⵉⵎⴷⵢⴰⵣⵏ ⵉⵣⵍⴰⵏ: ⵉⵟⵟⵓ ⵎⵛ ⴽⴽⵔⵅ ⵉⵟⵟⵓ ⵎⵛ ⴷⴰ ⴳⴳⴰⵏⵅ ⵉⵟⵟⵓ ⵎⵛ ⵉⵡⵉⵅ ⴰⴱⵔⵉⴷ ⴰ ⵡⴰ ⴷ ⵜⵜ ⵉⴳⴰⵏ ⴳ ⵡⴰⵍⵎⵙⵙⵉ ⵏⵏⵙ! ⵉⵙⵍⵍⴰ ⵃⵎⵎⵓ ⵉ ⵢⵉⵣⵍⵉ ⵅⴼ ⵉⵟⵟⵓ, ⵉⵏⵏⴰ ⴰⵙⵏ ⵉ ⵉⵙⵎⵅⴰⵏ ⵏⵏⵙ: ⵎⴰⵢ ⵜⵎⵙ ⵉⵟⵟⵓ ⵢⴰⴷ ⵉⵖⵓⴷⴰⵏ ⵅⴼ ⵜⵜⵡⴰⴱⴱⴰⵢⵏ ⵉⵣⵍⴰⵏ!? ⴷⴷⵓⵏ ⵉⵙⵎⵅⴰⵏ ⴰⵡⵉⵏ ⵜⵜ ⵉⴷ. ⵏⵜⵜⴰⵜ, ⵢⴰⵏⵏⴰⵢ ⵜⵜ ⵃⵎⵎⵓ ⵢⵉⵔⵉ ⵜⵜ. ⵓⵔ ⵉⵙⵙⵉⵏ ⵉⴷ ⵉⵍⵍⵉⵙ ⴰⵢ ⵜⴰⴳⴰ, ⵉⵔⴰ ⴰⴷ ⵜⵜ ⵢⴰⵡⵍ. ⴰⵔ ⵙⵙⵎⴰⵔⵏ ⵉ ⵜⵎⵖⵔⴰ, ⴳⵔⴰⵏ ⵉⵖⵛⵓⴱⴰ, ⴳⵉⵏ ⵜⵉⵔⴰⵛ ⵉ ⵉⵢⵙⴰⵏ, ⴰⵎⵥⵏⵜ ⵜⵙⵎⵅⵉⵏ ⵉⵟⵟⵓ ⵙⵙⵍⵙⵏⵜ ⴰⵙ ⵜⴰⴼⵙⵓⵜ. ⵜⴰⵏⵏⴰⵢ ⵜⵜ ⵜⵎⵟⵟⵓⴹⵜ ⵏ ⴱⴰⴱⴰⵙ, ⵜⴰⴽⵣ ⵜⵜ. ⵜⵉⴼⴰⵡⵜ ⵣⵉⴽ, ⵜⴷⴷⵓ ⵜⵙⴼⴰⴼⴰ ⵉⵟⵟⵓ ⵙⴳ ⵓⵏⵓⴷⴷⵎ ⵜⵏⵏⴰ ⴰⵙ ⴰⴷ ⵉⴷⵙ ⵜⵎⵓⵏ ⴰⴷ ⵜⴳⵔ ⴰⵚⵟⵟⴰ. ⵜⵎⵓⵏ ⵉⴷⵙ ⵉⵟⵟⵓ ⴰⵔ ⴰⴼⵍⵍⴰ ⵏ ⵢⴰⵜ ⵜⴰⵍⴰⵜⵜ, ⴷⵣⵉⵏⵜ ⵜⵉⴳⵓⵙⵉⵏ. ⴽⵓ ⵜⵣⴳⵣⵉⵍ ⵜⵎⵟⵟⵓⴹⵜ ⵏ ⴱⴰⴱⴰⵙ ⵢⴰⵜ ⵜⴽⵓⵔⵜ ⵏ ⵓⵚⵟⵟⴰ, ⵜⵜⵇⵇⵍ ⵉⵟⵟⵓ ⴰⵍⵍⵉⴳ ⵜⵓⵃⵍ, ⵜⴽⴽⵔ ⵜⵙⵜⵓⵜⵜⵉ ⵜⴰⴽⵓⵔⵜ ⵏ ⵓⵚⵟⵟⴰ, ⵜⵙⵙⴰⴽⵉ ⵜⵜ ⵉ ⵜⴳⵙⴰⵔⵜ, ⵜⵏⵏⴰ ⵉ ⵉⵟⵟⵓ: ⵛⵎ ⵜⵎⵥⵥⵉⵢⵜ ⵜⴰⴱⵄⴰ ⵜⵜ! ⴰⵡⵉ ⵜⵜ ⵉⴷ!. ⵜⴷⴷⵓ ⵉⵟⵟⵓ ⵜⴹⴼⵓⵕ ⵜⴰⴽⵓⵔⵜ. ⵜⴰⵎⵟⵟⵓⴹⵜ ⵏ ⴱⴰⴱⴰⵙ ⵜⴷⴷⴰ ⵖⵔ ⵉⵅⴰⵎⵏ ⵜⴳ ⴰⵎ ⵉⵙ ⴷⴰ ⵜⵔⵣⵣⵓ ⵅⴼ ⵉⵟⵟⵓ. ⵛⵡⵉ ⵜⵏⵏⴰ ⴰⵙⵏ ⵉ ⴰⵢⵜ ⵜⵇⴱⵉⵍⵜ ⵀⴰⵜ ⵉⵏⵏ ⵜⵔⵓⵍ ⵉⵟⵟⵓ. ⴽⴽⵔⵏ ⵉⵎⵏⴰⵢⵏ ⴰⴷ ⵔⵣⵣⵓⵏ, ⵜⵏⵏⴰ ⵙⵏ ⵀⴰⵜⵉⵏ ⵜⵔⵣⴰ ⵢⴰⴷ ⵎⴰ ⴳⴰⵏ ⴰⵏⵙⴰ, ⵛⴰ ⵓⵔ ⵜ ⵜⵓⴼⵉ. ⴽⵓ ⵜⵜⴽⵔⵓⵔⵓⵢ ⵜⴰⴽⵓⵔⵜ, ⵜⴹⴼⴼⵓⵕ ⵜⵜ ⵉⵟⵟⵓ ⴰⵍⵍⵉⴳ ⵜⴽⴽⴰ ⵜⵉⴳⵙⵔⵉⵏ. ⵜⴱⴱⵉ ⵉⵖⵥⵕⴰⵏ ⵓⵍⴰ ⵜⵜ ⵜⵜⵓⵎⵥ ⵉⵟⵟⵓ, ⴰⵔ ⵜⵜⴽⴽⴰ ⴹⴰⵕ ⴰⵙ ⴰⵍⵍⵉⴳ ⵜⵓⵎⵥ ⴰⵢⵏⵏⴰ ⴷⵉⴳⵙ ⵉⵇⵇⵉⵎⴰⵏ, ⵜⴱⵕⵕⵎ ⴰⴷ ⵜⴷⴷⵓ ⵓⵔ ⵜⵄⵇⵇⵉⵍ ⵉ ⵓⴱⵔⵉⴷ ⵏⵏⴰ ⵙⴳ ⵜⴽⴽⴰ. ⵜⴹⴼⵓⵕ ⴰⴱⵔⵉⴷ ⵏⵏⵙ ⴰⵔ ⵜⴷⴷⵓ ⴰⵍⵍⵉⴳ ⵖⵉⴼⵙ ⵢⵉⴼⴼⵓ ⵍⵃⴰⵍ. ⵙⴳ ⵓⴼⵍⵍⴰ ⵏ ⵢⴰⵜ ⵜⵡⵔⵉⵔⵜ ⵜⴰⵏⵏⴰⵢ ⵉⵜⵙ ⵏ ⵉⵅⴰⵎⵏ ⵖⵔ ⵜⵜⵉⵙⴰⵄ. ⴰⵔ ⵜⵜⵃⵉⵍ ⴰⵍⵍⵉⴳ ⵜⵏ ⵉⵏ ⵜⵉⵡⴹ. ⴷⴰⵢ ⴼⴼⵖⵏ ⴷ ⵣⵉⴳⵙⵏ ⵙⴰ ⵏ ⵉⵎⵏⴰⵢⵏ ⵏⵉⵢⵏ ⵖⴼ ⵉⵢⵙⴰⵏ ⵓⵎⵍⵉⵍⵏ ⵔⴰⵏ ⴰⴷ ⴷⴷⵓⵏ ⵖⵔ ⵜⵃⵉⵢⵢⴰⵃⵜ. ⴰⵔ ⴷⵉⴳⵙⵏ ⵜⵜⴰⵏⵏⴰⵢ ⴰⵍⵍⵉⴳ ⵖⵍⵉⵏ. ⵜⴷⴷⵓ ⵜⴽⵛⵎ ⵖⵔ ⴰⵅⴰⵎ ⴰⵅⴰⵜⴰⵔ, ⵜⴰⴼ ⵏⵏ ⵎⴰⵢ ⴳⴰⵏ ⵉⵛⴹⵉⴼⵏ, ⵎⴰⵢ ⴳⴰⵏ ⵍⵃⵔⵉⵔ, ⵎⴰⵢ ⴳⴰⵏ ⴰⵥⵕⴼ, ⵎⴰⵢ ⴳⴰⵏ ⵓⵔⵖ. ⵜⵇⵇⵉⵎ ⵅⴼ ⵢⴰⵏ ⵓⵛⴹⵉⴼ, ⵢⴰⵡⵉ ⵜⵜ ⵢⵉⴹⵚ ⴰⵍⵍⵉⴳ ⵜⵜ ⴷ ⵉⵙⴼⴰⴼⴰ ⵓⵙⵉⵏⵃⵉⵔ ⵏ ⵉⵢⵙⴰⵏ. ⵜⴼⴼⵖ ⴰⵔ ⵜⵔⵣⵣⵓ ⵎⴰⵏⵉ ⵖⵔ ⴰⴷ ⵜⴼⴼⵔ, ⵜⴰⵏⵏⴰⵢ ⵢⴰⵜ ⵜⴱⴰⵔⴷⴰ, ⵜⴽⴽ ⴷⴷⴰⵡ ⴰⵙ. ⴽⵛⵎⵏ ⴷ ⵉⵎⵏⴰⵢⵏ ⵙⴳ ⵜⵃⵉⵢⵢⴰⵃⵜ, ⵙⵙⵏⵓⵏ ⵜⵉⵙⴽⵯⵔⵉⵏ ⵜⵛⵉⵏ ⵜⵏⵜ. ⵉⵟⵟⵓ, ⵏⵜⵜⴰⵜ, ⴷⴰ ⵜⵕⴰⵄⴰ ⵙⴳ ⴷⴷⴰⵡ ⵏ ⵜⴱⴰⵔⴷⴰ. ⵏⵉⵜⵜⵏⵉ ⴷⴷⴰⵏ ⴰⴷ ⴳⵏⵏ, ⵜⴼⵖ ⴷ ⵉⵟⵟⵓ ⵜⴻⵜⵜⵛ ⴰⵢⵏⵏⴰ ⵉⵇⵇⵉⵎⴰⵏ, ⵜⴰⵖⵓⵍ ⵜⴳⵏ ⴷⴷⴰⵡ ⵏ ⵜⴱⴰⵔⴷⴰ. ⵜⵉⴼⴰⵡⵜ ⵣⵉⴽ ⴷⴰ ⵜⵜⴷⴷⵓⵏ ⵉⵎⵏⴰⵢⵏ ⵖⵔ ⵜⵃⵉⵢⵢⴰⵃⵜ, ⵓⵔ ⴷⴰ ⴷ ⵜⵜⴰⵖⵓⵍⵏ ⴰⵔ ⴰⵖⵍⵍⵓⵢ ⵏ ⵜⴰⴼⵓⵢⵜ. ⵜⴽⴽⵔ ⵉⵟⵟⵓ, ⵜⵙⵙⵏⵓ ⴰⵙⵏ ⴰⴼⵜⵜⴰⵍ, ⵜⵙⵔⵙ ⴰⵙⵏ ⵜ ⵜⴷⴷⵓ ⵙ ⵡⴰⵏⵙⴰ ⵏⵏⵙ. ⵍⵍⵉⴳ ⴷ ⵓⵡⴹⵏ ⵉⵎⵏⴰⵢⵏ, ⵢⴰⵙⵉ ⵓⵎⵇⵕⴰⵏ ⴷⵉⴳⵙⵏ ⵉⵎⵉⵇⵇ ⵉⵛⵉ ⵜ ⵉ ⵢⴰⵏ ⵉⴽⵣⵉⵏ ⵃⵎⴰ ⴰⴷ ⵉⵕⴰⵄⴰ ⵉⵙ ⴷⵉⴳⵙ ⵙⵙⵎ. ⵉⵎⵉⵍ ⵓⵔ ⵜ ⵢⴰⵖ ⴰⵡⴷ ⵃⴰⵃ, ⴰⵙⵉⵏ ⴰⵔ ⵜⴻⵜⵜⵛⴰⵏ. ⵙⴳ ⵉⴹ ⵏⵏⴰ, ⴰⴷⴷⴰⵢ ⴷ ⴰⵖⵓⵍⵏ, ⴷⴰ ⴷ ⵜⵜⴰⴼⴰⵏ ⵓⵜⵛⵉ ⵉⵜⵜⵔⵙ. ⵉⴽⴽⵔ ⵉⵏⵏⴰ ⴰⵙⵏ ⵓⵅⴰⵜⴰⵔ: ⴰⴷ ⵏⴳ ⵜⴰⵡⴰⵍⴰ ⵃⵎⴰ ⴰⴷ ⵏⵉⵙⵉⵏ ⴱⴰⴱ ⵏ ⵓⵢⴰ. ⴰⵔ ⵉⴽⴽⴰⵜ ⵡⵓⵍ ⵏ ⵉⵟⵟⵓ. ⴽⵓ ⴰⵙⵙ ⴷⴰ ⵜⵜⴼⴼⵔ ⵙⴳ ⴷⵉⴳⵙⵏ ⴰⵔ ⴰⵙⵙ ⵡⵉⵙⵙ ⵙⴰ ⴰⵢ ⴷ ⵜⵓⵙⴰ ⵜⵡⴰⵍⴰ ⵏ ⵓⵎⵏⵣⵓ. ⵉⴷⴷⵓ ⵖⵔ ⴷⴷⴰⵡ ⵏ ⵢⴰⵏ ⵓⵅⵍⵉⴷⵊ, ⵉⵙⵙⵓ ⴰⵛⴹⴹⵓⵕ ⵏⵏⵙ ⵉⵖⵎⵙ ⵙ ⵡⴰⵢⵢⴰⴹ ⴰⵔ ⵉⵜⵜⵕⴰⵄⴰ ⵖⴰⵙ ⵙ ⵢⴰⵜ ⵜⵉⵟⵟ. ⵜⴼⴼⵖ ⴷ ⵉⵟⵟⵓ ⵜⴰⵙⵉ ⵜⴰⵇⵍⵉⵍⵜ ⴰⴷ ⵜⴰⴳⵎ ⴰⵎⴰⵏ ⵏ ⵓⵖⴱⴰⵍⵓ. ⵍⵍⵉⴳ ⵜⴽⵏⴰ ⴰⴷ ⵜⴰⴳⵎ, ⵉⴷⴷⵓ ⴷ ⵙ ⵍⵃⵉⵍⵜ ⵉⴳⵏⵓ ⴰⵛⴹⴹⵓⵕ ⵏⵏⵙ ⵖⵔ ⵡⵉⵏ ⵉⵟⵟⵓ. ⵢⴰⵎⵥ ⵜⵜ ⵉⴽⴽⵙ ⴰⵙ ⴰⵖⴰⵎⵉⵙ ⵅⴼ ⵡⵓⴷⵎ ⵉⴱⵀⴹ ⵉ ⵜⵖⵓⴷⵉ ⵏⵏⵙ. ⵜⴰⴷⵔ ⵉⵟⵟⵓ ⵉ ⵡⴰⵍⵍⵏ. ⵍⵍⵉⴳ ⵜⵖⵍⵉ ⵜⴰⴼⵓⵢⵜ, ⵉⵏⵄⵜ ⴰⵙⵏ ⵜⵜ ⵓⵎⵏⴰⵢ ⵉ ⴰⵢⵜⵎⴰⵙ ⴰⴽⴽⵯ, ⵉⵇⵇⵉⵙ ⴰⵙⵏ ⵎⴰⵢ ⴰⵙ ⵉⵊⵕⴰⵏ, ⵙⵏⴱⴳⵉⵡⵏ ⵉⵙⵙ ⵉⵔⵉⵏ ⴰⴷ ⵜⵜ ⴰⵡⵉⵏ ⴰⴽⴽⵯ. ⵉⵔⵉⵏ ⴰⴷ ⵏⵏⴰⵖⵏ, ⵜⵏⵏⴰ ⴰⵙⵏ ⵉⵟⵟⵓ: ⴰⴷ ⴰⵡⵏ ⵖⵎⵓⵖ, ⵡⵏⵏⴰ ⵎⵉ ⵜⵖⵎⴰ ⵍⵃⵏⵏⴰ ⴳ ⵓⴼⵓⵙ ⴰⵢ ⵔⴰⴷ ⴰⵡⵍⵅ. ⵜⴰⵙⵉ ⵜⵥⴹ ⵍⵃⵏⵏⴰ ⵜⵓⵛⵓⵔ ⵜ ⴷ ⵏⵏⵡⵡⴰⵔ ⵜⵔⵡⵉ ⵜ ⵙ ⵡⴰⵎⴰⵏ ⵏ ⵓⵍⴷⴷⵊⵉⴳ, ⵜⴳ ⵜ ⴳ ⵓⴱⵓⴹ ⵏ ⵜⵇⵚⵕⵉⵢⵜ. ⵜⵖⵎⵙ ⴰⵙ ⵙ ⵡⴰⴼⵔ ⵏ ⵜⴰⴷⴷⵓⵊⵜ, ⵜⴰⵙⵉ ⴷ ⵕⵕⵓⴼ ⵜⵔⵡⵉ ⵜ, ⵜⴳ ⵜ ⴰⴼⵍⴰ ⵏⵏⵙ. ⵜⴷⴷⵓ ⴰⵔ ⴰⵙⵏ ⵜⵖⵎⵎⵓ ⵙⴳ ⵓⵅⴰⵜⴰⵔ ⴰⵔ ⴰⵎⵥⵢⴰⵏ, ⵏⵜⵜⴰ ⴰⵎⵉ ⵜⴳⴰ ⵍⵃⵏⵏⴰ. ⵜⵉⴼⴰⵡⵜ ⴰⴼⵉⵏ ⵏⵏ ⵍⵃⵏⵏⴰ ⴳ ⵓⴼⵓⵙ ⵏ ⵓⵎⵏⵣⵓ. ⵉⵜⵜⵔ ⵉ ⵉⵟⵟⵓ ⴰⴷ ⵜ ⵜⴰⵡⵍ, ⵜⵏⵏⴰ ⴰⵙ: ⵎⵛ ⵜⵔⵉⴷ ⴰⴷ ⵉⵢⵉ ⵜⴰⵡⵍⴷ, ⴰⴼ ⵉⵢⵉ ⴱⴰⴱⴰ. ⵉⴽⴽⵔ ⴰⵔ ⵉⵔⵣⵣⵓ ⵏⵜⵜⴰ ⴷ ⴰⵢⵜⵎⴰⵙ ⴰⵍⵍⵉⴳ ⵏⵏ ⵓⵡⴹⵏ ⵜⴰⵇⴱⵉⵍⵜ ⵏ ⵃⵎⵎⵓ. ⵢⴰⵍⵙ ⴰⵙ ⵓⵎⵏⵣⵓ ⵉ ⵃⵎⵎⵓ ⵎⴰⵢ ⵉⵊⵕⴰⵏ ⵉ ⵉⵟⵟⵓ. ⵉⴱⵀⴹ ⵃⵎⵎⵓ, ⴽⵓ ⵉⵜⵜⵔⵓ ⵉⴹⵚⵚⴰ ⵙ ⵜⵓⵎⵔⵜ ⵉⴷⵅ ⵢⵓⴼⴰ ⵉⵅⴼ ⵏⵏⵙ ⵖⵓⵔⵙ ⵜⴰⵔⴱⴰⵜⵜ. ⵢⴰⵎⵥ ⵜⴰⵎⵟⵟⵓⴹⵜ ⵏⵏⵙ ⵉⵛⵔⴼ ⵜⵜ ⵖⵔ ⵉⵢⵙⴰⵏ ⵏ ⵢⵓⴽ ⴳ ⵉⵎⵏⴰⵢⵏ. ⵉⴳ ⴰⵙ ⵃⴰⵎⵎⵓ ⵉ ⵉⵍⵍⵉⵙ ⵜⴰⵎⵖⵕⴰ ⵜⴰⵅⴰⵜⴰⵔⵜ.