krad_n_izzutan.txt

ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵡⵓⵔⵖ ⵏ ⵛⵛⵉⵟⴰⵏ ⵛⵃⴰⵍ ⵓⵢⴰ, ⵜⵓⵔⵓ ⵢⵉⵛⵜ ⵏ ⵜⵎⵖⴰⵔⵜ ⵉⵊⵊ ⵏ ⵓⵔⴱⴰ ⴷⴳ ⵡⴰⴽⵓⴷ ⵏ ⵓⵏⴳⴰⵢ, ⵉⵎⵎⴰⵔⵏⵉ ⴷ ⴰⵎⴰⵏⵏⴰⵣ. ⵏⵏⴰⵏ ⴰⵙ ⵉⵡⴷⴰⵏ ⵅⵎⵉ ⵉ ⵖⴰ ⵢⴰⵡⴹ ⴽⴽⵓⵥ ⴷ ⵎⵔⴰⵡ ⵏ ⵉⵙⴳⴳⵯⵓⵙⴰ, ⴰⴷ ⵢⴰⵡⵉ ⵢⵉⵍⵍⵉⵙ ⵏ ⵓⴳⵍⵍⵉⴷ. ⴷⴳ ⵡⴰⴽⵓⴷ ⴰ, ⵉⵙⵙⴰⵔⴰ ⵓⴳⵍⵍⵉⴷ ⴷⴳ ⵜⵎⴷⵉⵏⵜ ⴱⵍⴰ ⵎⴰ ⴰⴷ ⵜ ⵉⵙⵙⵏ ⵓⵍⴰ ⴷ ⵉⵊⵊ. ⵉⵙⵙⵇⵙⴰ ⵎⴰ ⴷⵉⵏⵏⵉ ⵛⴰ ⵏ ⵓⵏⵖⵎⵉⵙ ⴷ ⴰⵎⴰⵢⵏⵓ. ⴰⵔⵔⵉⵏ ⴷ ⵅⴰⴼⵙ ⵉⵡⴷⴰⵏ ⵏⵏⴰⵏ ⴰⵙ ⵉⵎⵎⴰⵔⵏⵉ ⴷ ⵢⵉⵊⵊ ⵏ ⵓⵔⴱⴰ ⴷ ⴰⵎⴰⵏⵏⴰⵣ. ⵜⵜⵉⵏⵉⵏ ⵎⴰⵕⵕⴰ ⵎⵉⵏ ⵖⴰ ⵉⴳⴳ ⵙⵙⴰ ⴷ ⵜⵙⴰⵡⵏⵜ, ⴰⴷ ⴰⵙ ⵉⵎⵓⵔⵙ, ⵏⵏⴰⵏ ⴰⵙ ⵄⴰⵡⴷ ⵅⵎⵉ ⵉ ⵖⴰ ⵉⵎⵖⴰⵔ, ⴰⴷ ⵢⴰⵡⵉ ⵢⵉⵍⵍⵉⵙ ⵏ ⵓⴳⵍⵍⵉⴷ. ⵜⵓⵖⴰ ⵖⴰⵔⵙ ⵖⵔ ⵓⴳⵍⵍⵉⴷ ⵓⵍ ⵉⵇⵙⵃ. ⵓⵍⵢⵏ ⴰⵙ ⵉⴷⴰⵎⵎⵏ ⵖⵔ ⵓⵣⵍⵍⵉⴼ ⴰⵍ ⵓⵎⵉ ⵉⵙⵍⴰ ⴰⵏⵖⵎⵉⵙ ⴰ. ⵉⵔⵣⵓ ⵅⴼ ⵉⵎⴰⵔⴰⵡⵏ ⵏ ⵓⵙⴳⵎⵉ ⵏⵏⵉ, ⵉⵏⵏⴰ ⴰⵙⵏ ⵙ ⵚⵡⴰⴱ: " ⴽⵏⵏⵉⵡ, ⴷ ⵉⵎⵥⵍⴰⴹ, ⵡⵛⵎ ⴰⵢⵉ ⵎⴻⵎⵎⵉⵜⴽⵓⵎ ⴰⴷ ⴷⴰⴳⵙ ⵜⵜⵀⵍⵍⵉⵖ ". ⵓⴳⵉⵏ ⴷⴳ ⵓⵎⵣⵡⴰⵔⵓ, ⵎⴰⵛⴰ ⵉⵡⵛⴰ ⴰⵙⵏ ⵓⴱⵕⵕⴰⵏⵉ ⵓⵔⵖ, ⵏⵏⴰⵏ ⵢⵉⵊⵊ ⵉ ⵡⵏⵏⵉⴹⵏ: " ⴰⵍ ⵎⴰⵏⵉ ⴰⵔⴱⴰ ⵏⵏⵖ ⵉⵎⵎⴰⵔⵏⵉ ⴷ ⴰⵎⴰⵏⵏⴰⵣ, ⵎⴰⵏⴰ ⴰ ⴷ ⴰⵚⴱⵃⴰⵏ ⵉ ⵏⵜⵜⴰ ". ⵅⵙⵏ ⵎⵉⵏ ⴷⴰⵙⵏ ⵉⵜⵜⵔ ⵓⴳⵍⵍⵉⴷ ⵓⵛⴰ ⵡⵛⵉⵏ ⴰⵙ ⵎⴻⵎⵎⵉ ⵜⵙⵏ. ⵉⴳⴳⵉ ⵜ ⵓⴳⵍⵍⵉⴷ ⴷⴳ ⵢⵉⵛⵜ ⵏ ⵜⵔⴱⵉⵄⵜ. ⵉⵏⵢⴰ ⵅⴼ ⵓⵢⵉⵙ ⴰⵍ ⵎⴰⵏⵉ ⵢⵉⵡⴹ ⵖⵔ ⵜⵎⴰ ⵏ ⵢⵉⵊⵊ ⵏ ⵡⴰⵙⵉⴼ ⵢⵓⵍⵍⵖ, ⵓⵛⴰ ⵉⵏⴹⴰⵕ ⵉⵜ ⴷⵉⵏⵏⵉ. ⵉⵙⵡⵉⵏⴳⵎ ⵓⴳⵍⵍⵉⴷ ⴰⴷ ⵉⵡⵛ ⵉⵍⵍⵉⵙ ⵉ ⵢⵉⵊⵊ ⵏ ⵓⵔⴳⴰⵣ ⵓⵔ ⵉⵣⵎⵎⵔ ⴰⴷ ⵅⴰⴼⵙ ⵉⵜⵜⴼⵓⵍⵍⴰ. ⵎⴰⵛⴰ, ⵜⴰⵔⴱⵉⵄⵜ ⵏⵏⵉ, ⵓⵔ ⵜⵓⴷⵉⴼ ⵛⴰ ⴷⵉ ⵔⴰⵍⵍⴰⵖ, ⴽⵙⵉⵏ ⵜⵜ ⵡⴰⵎⴰⵏ ⵙ ⵏⵏⵊ ⴰⵎ ⵉⵛⵜ ⵏ ⵜⵖⵔⵔⴰⴱⵓⵜ ⵜⴰⵎⵥⵢⴰⵏⵜ, ⵓⵔ ⴷⴰⴳⵙ ⵜⵓⴷⴼ ⵓⵍⴰ ⴷ ⵜⴰⵏⵇⵇⵉⴹⵜ ⵏ ⵡⴰⵎⴰⵏ; ⵜⵓⴳⵓⵔ ⴰⴷ ⵜⵖⴰⵔⵜ ⵏ ⵜⵎⴰⵥⵓⵏⵜ, ⵜⴱⴷⴷ ⵣⴷⴰⵜ ⵉ ⵓⴳⵉⵏⴰⵏ ⵏ ⵜⵙⴰⵔⵜ. ⵜⵓⵖⴰ ⴷⵉⵏⵏ ⵢⵉⵊⵊ ⵏ ⵓⵔⴱⴰ ⵉⵅⴷⴷⵎ ⴷⵉ ⵜⵙⴰⵔⵜ ⵏⵏⵉ. ⵉⵇⵛⵄ ⵉⵜⵜ, ⵉⵙⵙⵓⴼⵖ ⵉⵜⵜ ⵉⴷ ⵙ ⵢⵉⵊⵊ ⵏ ⵓⴽⵛⵛⵓⴹ; ⵉⵕⵥⵎ ⵉⵜⵜ, ⵢⵓⴼⴰ ⴷⴰⴳⵙ ⴰⴱⴰⵢⵏⵓ ⴷ ⴰⵎⵇⵇⵔⴰⵏ, ⵉⵊⵊ ⵏ ⵓⵔⴱⴰ ⴷ ⴰⵚⴱⵃⴰⵏ ⴷ ⴰⵎⵥⵢⴰⵏ, ⵢⴰⵍⵍⴰⵀ ⵎⴰⵎⵛ ⵉⵎⵎⴰⵔⵏⵉ, ⵉⵎⵎⵔⵏ. ⵉⴽⵙⵉ ⵜ ⵖⵔ ⵜⵙⴰⵔⵜ. ⴱⴰⴱ ⵏ ⵜⵙⴰⵔⵜ ⵏⵏⵉ ⴷ ⵜⵎⵖⴰⵔⵜ ⵏⵏⵙ ⵜⵓⵖⴰ ⵓⵔ ⵖⴰⵔⵙⵏ ⵛⴰ ⵜⴰⵔⵡⴰ ⵏⵏⵙⵏ, ⵉⵎⵉⵥⵏ ⴰⵔⴱⴰ ⴰ ⴰⵎ ⵅⵎⵉ ⵕⴱⴱⵉ ⵉⵙⵙⴽⴽ ⴰⵙⵏ ⵜ ⵉⴷ. ⵜⵀⵍⵍⴰⵏ ⵎⵍⵉⵃ ⴷⴳ ⵓⵢⵓⵊⵉⵍ ⵏⵏⵉ ⵉ ⵉⵎⵖⴰⵔⵏ ⵉⵎⵃⴹ ⴷ ⴰⵎⴷⵓⵡⵙ. ⵉⵊⵊ ⵏ ⵡⴰⵙⵙ, ⴰⴳⵍⵍⵉⴷ, ⵉⵟⵟⴼ ⵉⵜ ⵓⵏⵥⴰⵕ. ⵢⵓⴷⴼ ⵖⵔ ⵜⵙⴰⵔⵜ, ⵉⵙⵙⵇⵙⴰ ⴱⴰⴱ ⵏⵏⵙ ⵎⴰ ⴰⵔⴱⴰ ⵏⵏⵉ ⴷ ⵎⴻⵎⵎⵉⵙ. ⵢⴰⵔⵔ ⴷ ⵅⴰⴼⵙ ⴱⴰⴱ ⵏ ⵜⵙⴰⵔⵜ ⵏⵏⵉ " ⵓⵀⵓ ⵙⵉⴷⵉ! ⴰⵔⴱⴰ ⴰ, ⵢⵓⴼ ⵉⵜ ⵓⴼⵔⵓⵅ ⵏⵏⵉ ⵖⴰⵔⵏⵖ ⵉⵅⴷⴷⵎⵏ, ⴷⴳ ⵡⴰⵎⴰⵏ ⴷⴳ ⵢⵉⵛⵜ ⵏ ⵜⵔⴱⵉⵄⵜ, ⵜⵏⵏⵓⵖ ⴷⴳ ⵓⴳⵉⵏⴰⵏ ⵏ ⵜⵙⴰⵔⵜ ⵏⵏⵖ, ⵔⵅⵅⵓ ⵛⴰ ⵏ ⴽⴽⵓⵥ ⵏ ⵉⵙⴳⴳⵯⵓⵙⴰ ⵣⴳ ⴰⵎⵉ ". ⵉⴽⵜⵉ ⵓⴳⵍⵍⵉⴷ ⴱⵍⵍⵉ ⴰⵔⴱⴰ ⵏⵏⵉ, ⴷ ⵡⵏⵏⵉ ⵉ ⵉⵎⵎⴰⵔⵏⵉⵏ ⴷ ⴰⵎⴰⵏⵏⴰⵣ. ⴷ ⵡⵏⵏⵉ ⵉ ⵉⵏⴹⴰⵕ ⴷⴳ ⵢⵉⵖⵣⵔ. ⵉⵏⵏⴰ ⵓⴳⵍⵍⵉⴷ ⵉ ⵓⵔⴳⴰⵣ ⵏⵏⵉ " ⴰⵔⴳⴰⵣ! ⵓⵔ ⵉⵣⵎⵎⵔ ⵎⴻⵎⵎⵉⴽ ⴰⴷ ⵉⵚⵚⵉⵡⴹ ⵜⴰⴱⵔⴰⵜ ⵉ ⵜⴳⵍⵍⵉⴷⵜ? ⴰⴷ ⴰⵙ ⵡⵛⵖ ⵜⵎⵏⵢⴰⵜ ⵏ ⵡⵓⵔⵖ ⵅⴼ ⵓⵙⵅⵅⴰⵕ ⴰ? ⵢⴰⵔⵔ ⴷ ⵅⴰⴼⵙ " ⵎⴰⵎⵛ ⵢⵓⵎⵕ ⴱⵓ ⵡⴰⴷⴷⵓⵔ ", ⵉⵏⵏⴰ ⴰⵙ ⵉ ⵓⵄⵔⵔⵉⵎ ⴰⴷ ⵉⵙⵙⵡⵊⴷ ⵉⵅⴼ ⵏⵏⵙ. ⵢⵓⵔⴰ ⵓⴳⵍⵍⵉⴷ ⵜⴰⴱⵔⴰⵜ ⵉ ⵜⴳⵍⵍⵉⴷⵜ ⵉⵜⵜⵔ ⴰⵙ ⴰⴷ ⵏⵖⵏ ⴰⵎⴰⵣⴰⵏ, ⵓⵛⴰ ⴰⴷ ⵜ ⵏⴹⵕⵏ, ⵉⵅⵚⵚⴰ ⴰⴷ ⵢⴰⴼ ⵎⴰⵏⴰ ⴰ ⵉⵜⵜⵡⴰⴳⴳ ⵅⵎⵉ ⵉ ⴷ ⵖⴰ ⵉⴷⵡⵍ. ⵢⵓⴳⵓⵔ ⵓⵔⴱⴰ ⵙ ⵜⴱⵔⴰⵜ ⵏⵏⵉ, ⵎⴰⵛⴰ ⵉⵡⴹⴹⵕ ⴰⵙ ⵓⴱⵔⵉⴷ. ⵢⵉⵡⴹ ⵖⵔ ⵢⵉⵛⵜ ⵏ ⵜⴰⴳⴰⵏⵜ ⵜⴰⵎⵇⵇⵔⴰⵏⵜ ⵙ ⵢⵉⴹ. ⵉⵥⵕⴰ ⴷⵉ ⵜⵉⵍⵍⴰⵙ, ⵖⵔ ⴰⴳⴳⵯⴰⵊ ⴷⵔⵓⵙⵜ ⵏ ⵜⴼⴰⵡⵜ, ⵉⴹⴼⵕ ⴰⴱⵔⵉⴷ ⵏⵏⵙ, ⵢⵉⵡⴹ ⵖⵔ ⵢⵉⵛⵜ ⵏ ⵜⴰⴷⴷⴰⵔⵜ ⵜⴰⵎⵥⵢⴰⵏⵜ. ⵢⵓⴼⴰ ⴷⴰⴳⵙ ⵉⵛⵜ ⵏ ⵜⵡⵙⵙⴰⵔⵜ ⵜⵇⵇⵉⵎ ⵣⴷⴰⵜ ⵉ ⵜⵎⵙⵙⵉ. ⵉⵟⵟⴼ ⵉⵜⵜ ⵓⵏⴱⵀⴹ ⵓⵎⵉ ⵜⵥⵕⴰ ⴰⵔⴱⴰ, ⵜⵏⵏⴰ ⴰⵙ: " ⵎⴰⵏ ⵉⵙ ⵜⵓⵙⵉ ⴷ, ⵎⵉⵏ ⵜⵔⵣⵣⵓⴷ? " - ⵓⵙⵉⵖ ⴷ ⵣⴳ ⵜⵙⴰⵔⵜ! ⵢⴰⵔⵔ ⴷ ⵅⴰⴼⵙ, ⴰⴷ ⵚⵚⵉⵡⴹⵖ ⵜⴰⴱⵔⴰⵜ ⵉ ⵜⴳⵍⵍⵉⴷⵜ; ⵉⵡⴹⴹⵕ ⴰⵢⵉ ⵓⴱⵔⵉⴷ, ⵅⵙⵖ ⴰⴷ ⵙⵙⵄⴷⵓⵖ ⵉⴹ ⴷⴰ. - ⴰ ⵃⵏⵉⵏⵉ ⵉⵏⵓ! ⵜⵏⵏⴰ ⴰⵙ ⵜⵎⵟⵟⵓⴹⵜ ⵏⵏⵉ, ⵜⵡⴹⵉⴷ ⴷⴳ ⵉⴼⴰⵙⵙⵏ ⵏ ⵉⵛⴼⴼⴰⵕⵏ, ⵎⴰⵍⴰ ⵓⴼⵉⵏ ⵛⴽⴽ, ⴰⴷ ⵛⴽⴽ ⵏⵖⵏ. ⵓⵔ ⴳⴳⵯⵉⴷⵖ ⵛⴰ, ⵕⴱⴱⵉ ⵉ ⵖⴰ ⵉⵍⵍⴰ ⴽⵓⵍⵛⵉ! ⵉⵏⵏⴰ ⴰⵙ ⵓⵔⴱⴰ, ⵄⴰⵡⴷ ⵓⵃⵍⵖ, ⵓⵔ ⵣⵎⵎⵔⵖ ⴰⴷ ⵓⴳⵓⵔⵖ ⵖⵔ ⴰⴳⴳⵯⴰⵊ. " ⵉⵟⵟⵚ ⵅⴼ ⵓⵙⵖⵉⵎ. ⴼⴼⵉⵔ ⵓⴷⴼⵏ ⴷ ⵉⵛⴼⴼⴰⵕⵏ, ⵙⵙⵇⵙⴰⵏ ⵙ ⵓⵊⵄⵊⵄ ⵎⵉⵏ ⴷⵉⵏ ⵉⵜⵜⴳⴳ ⵓⴱⵕⵕⴰⵏⵉ ⵏⵏⵉ. " ⴰⵀⵀⵀ! ⵜⴰⵔⵔ ⴷ ⵅⴰⴼⵙⵏ ⵜⵡⵙⵙⴰⵔⵜ: " ⵉⵡⴹⴹⵕ ⵓⵎⵏⵄⵉ ⴰ ⵏ ⵓⵔⴱⴰ ⴷⴳ ⵜⴰⴳⴰⵏⵜ! ⵙⵙⵉⴷⴼⵖ ⵜ ⵉⴷ ⵎⵉⵏⵣⵉ ⵉⵣⵣⵉⵍⵍⵣ ⴰⵢⵉ. ⴰⴷ ⵉⵚⵚⵉⵡⴹ ⵜⴰⴱⵔⴰⵜ ⵉ ⵜⴳⵍⵍⵉⴷⵜ ". ⵖⵔⵉⵏ ⵉⵛⴼⴼⴰⵕⵏ ⵏⵏⵉ ⵜⴰⴱⵔⴰⵜ, ⵓⴼⵉⵏ ⴱⵍⵍⵉ ⵅⵙⵏ ⴰⴷ ⵏⵖⵏ ⴰⵎⴰⵣⴰⵏ ⵏⵏⵉ. ⵡⴰⵅⵅⴰ ⵓⵍ ⵏⵏⵙⵏ ⵉⵇⵙⵃ, ⵉⵣⵣⵉⵍⵍⵣ ⴰⵙⵏ. ⵉⵛⵔⵔⴳ ⵓⵎⵇⵇⵔⴰⵏ ⵏ ⵉⵛⴼⴼⴰⵕⵏ ⵜⴰⴱⵔⴰⵜ ⵏⵏⵉ, ⵉⴳⴳⴰ ⴷⴳ ⵓⵎⴽⴰⵏ ⵏⵏⵙ ⵉⵛⵜ ⵏⵏⵉⴹⵏ, ⵢⵓⵔⴰ ⴷⴰⴳⵙ, ⵅⵎⵉ ⴷ ⵖⴰ ⵢⴰⵡⴹ ⵓⵔⴱⴰ ⴰ, ⴰⴷ ⵢⵓⵡⵍ ⵜⴰⴳⵍⴷⵓⵏⵜ. ⴼⴼⵉⵔ, ⵊⵊⵉⵏ ⵜ ⵉⵛⴼⴼⴰⵕⵏ ⴰⴷ ⵉⵟⵟⵚ ⵅⴼ ⵓⵙⵖⵉⵎ ⴰⵍ ⴰⵎⵉ ⴷ ⵜⵉⴼⴰⵡⵜ, ⵡⴰⵎⵉ ⴷ ⵉⴼⴰⵇ, ⵜⵡⵛⴰ ⴰⵙ ⵜⴰⴱⵔⴰⵜ, ⵜⵙⵙⴽⵏ ⴰⵙ ⴰⴱⵔⵉⴷ. ⴰⵍ ⵎⴰⵏⵉ ⵜⵟⵟⴼ ⵜⴳⵍⴷⵉⵜ ⵜⴰⴱⵔⴰⵜ, ⵜⵓⵎⵕ ⴰⴷ ⴳⴳⵏ ⵎⵉⵏ ⴷⴰⴳⵙ: ⴳⴳⵉⵏ ⵜⴰⵎⵖⵔⴰ, ⵜⵉⵡⵉ ⵜⴳⵍⴷⵓⵏⵜ ⴰⵔⴱⴰ ⵏⵏⵉ. ⴰⵍ ⵎⴰⵏⵉ ⵏⵜⵜⴰ ⴷ ⵉⵊⵊ ⵏ ⵓⵔⴱⴰ ⴷ ⴰⵚⴱⵃⴰⵏ, ⵉⵜⵜⴰⵡⵉ ⵜ ⵡⵓⵍ, ⵉⵙⵙⵓⵙⵎ ⵜⵜ ⵉ ⵜⴳⵍⴷⵓⵏⵜ ⵏⵏⵉ ⴰⴷ ⴽⵉⴷⵙ ⵜⵙⴰⵍⴰ ⵜⵓⴷⴰⵔⵜ ⵏⵏⵙ. ⴷⴰⵜ, ⵉⴷⵡⵍ ⴷ ⵓⴳⵍⵍⵉⴷ ⵖⵔ ⵜⴳⴰⴷⵉⵔⵜ, ⵢⵓⴼⴰ ⴰⵡⴰⵍ ⵉ ⵇⵇⴰⵔⵏ ⵉⵡⴷⴰⵏ ⵉⵎⵙⴰⵔ. ⵢⵓⵡⵍ ⵓⵔⴱⴰ ⵉ ⵉⵎⵎⴰⵔⵏⵉⵏ ⴷ ⴰⵎⴰⵏⵏⴰⵣ, ⵉⵍⵍⵉⵙ. " ⵎⴰⵎⵛ ⵜⵎⵙⴰⵔ? ⵙⵙⴽⴽⵖ ⴷ ⵉⵛⵜ ⵏ ⵜⴱⵔⴰⵜ ⵎⴰⵛⵉ ⴰⵎⵎⵓ ⵉ ⴷⴰⴳⵙ ⵏⵏⵉⵖ ". ⵜⵎⵔ ⴰⵙ ⵜⴳⵍⵍⵉⴷⵜ ⵜⴰⴱⵔⴰⵜ, ⵜⵏⵏⴰ ⴰⵙ ⵜⵣⵎⵎⵔⴷ ⴰⴷ ⵜⵥⵕⴷ ⵎⵉⵏ ⴷⴰⴳⵙ. ⵉⵖⵔⴰ ⵜⵜ, ⵢⵓⴼⴰ ⵙⵏⵏⴼⵍⵏ ⴰⵙ ⵜⵜ. ⵉⵙⵙⵇⵙⴰ ⴰⵔⴱⴰ, ⵉⵏⵏⴰ ⴰⵙ: " ⵎⴰⵏⵉ ⵜⴳⴳⵉⴷ ⵜⴰⴱⵔⴰⵜ ⵉ ⴷⴰⴽ ⵡⵛⵉⵖ? ⵎⴰⵢⵎⵎⵉ ⴷ ⵜⵉⵡⵉ ⴷ ⵉⵛⵜ ⵏⵏⵉⴹⵏ? " ⵢⴰⵔⵔ ⴷ ⵅⴰⴼⵙ ⵓⵔⴱⴰ: " ⵓⵔ ⵙⵙⵉⵏⵏⵖ, ⵡⴰⵇⵉⵍⴰ ⵜⵡⴰⵙⵏⵏⴼⵍ ⵉⴹ ⵉ ⴷⵉ ⵙⵙⵏⵙⵖ ⴷⵉ ⵜⴰⴳⴰⵏⵜ? " ⵓⵍⵢⵏ ⴰⵙ ⵉⴷⴰⵎⵎⵏ ⵉ ⵓⴳⵍⵍⵉⴷ, ⵉⵏⵏⴰ ⴰⵙ: " ⵎⴰⵏⴰ ⴰ ⵎⴰⵛⵉ ⴰⵎⵎⵓ ⵉ ⵖⴰ ⵉⵍⵉ! ⵡⵏⵏⵉ ⵉ ⵖⴰ ⵢⴰⵡⵉⵏ ⵉⵍⵍⵉ, ⵉⵅⵚⵚⴰ ⴰⵙ ⴰⴷ ⴰⵢⵉ ⴷ ⵢⴰⵡⵉ ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵡⵓⵔⵖ ⵣⴳ ⵢⵉⵅⴼ ⵏ ⵛⵛⵉⵟⴰⵏ. ⴰⵡⵉ ⴰⵢⵉ ⵜⵏ ⴷ, ⴰⴷ ⵜⵉⵍⵉ ⵢⵉⵍⵍⵉ ⵏⵏⴽ ". ⴰⴳⵍⵍⵉⴷ ⵉⵙⵙⵉⵜⵎ ⵓⵔ ⴷ ⵉⴷⴷⵉⴳⴳⵯⵉⵍ ⵣⴳ ⵓⵙⵖⵍⴼ ⵏⵏⵉ. ⵢⴰⵔⵔ ⴷ ⵅⴰⴼⵙ ⵓⵔⴱⴰ, ⵉⵏⵏⴰ ⴰⵙ: " ⵓⵔ ⵜ ⵜⵜⴳⴳⵯⴷⵖ ⵛⴰ ⵣⴳ ⵛⵛⵉⵟⴰⵏ! ⴰⴷ ⵕⴰⵃⵖ ⴰⴷ ⵓⵔⵣⵓⵖ ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵡⵓⵔⵖ. " ⵉⵜⵜⵔ ⴰⵙ ⵉ ⵓⴳⵍⵍⵉⴷ ⵜⵓⵔⴰⴳⵜ ⵓⵛⴰ ⵉⵟⵟⴼ ⴰⴱⵔⵉⴷ. ⵢⵉⵡⴹ ⵣⴷⴰⵜ ⵉ ⵢⵉⵛⵜ ⵏ ⵜⵎⴷⵉⵏⵜ ⵜⴰⵎⵇⵇⵔⴰⵏⵜ. ⵖⵔ ⵜⴰⴳⵓⵔⵜ ⵏⵏⵙ, ⵉⵙⵙⵇⵙⴰ ⵜ ⵓⵄⵙⵙⴰⵙ ⵅⴼ ⵜⴰⵡⵓⵔⵉ ⵏⵏⵙ ⴷ ⵎⵉⵏ ⵉⵙⵙⵏ: " ⵇⵇⴰⵄ! ⵢⴰⵔⵔ ⴷ ⵅⴰⴼⵙ. ⵡⴰⵅⵅⴰ! ⵉⵏⵉ ⴰⵢⵉ, ⵎⴰⵖⴰⵔ ⵜⴰⵍⴰ ⵏ ⵡⴰⴳⴰⴷⴰⵣ ⵏⵏⵖ, ⵉ ⵜⵓⵖⴰ ⴷⴰⵏⵖ ⵉⵜⵜⵉⵛⵛⵏ ⴰⵎⴰⵏ ⵉⵎⵉⵥⵉⴹⵏ, ⵜⵓⵣⵖ, ⵓⵔ ⴷ ⵜⵜⵉⵛ ⵓⵍⴰ ⴷ ⴰⵎⴰⵏ. ⵕⴰⵊⴰ, ⵢⴰⵔⵔ ⴷ ⵅⴰⴼⵙ, ⴰⴷ ⵅⴰⴼⴽ ⴷ ⴰⵔⵔⵖ ⵅⵎⵉ ⵉ ⴷ ⵖⴰ ⴷⵡⵍⵖ ". ⵖⵔ ⴰⴳⴳⵯⴰⵊ, ⵢⵉⵡⴹ ⵖⵔ ⵢⵉⵛⵜ ⵏ ⵜⵎⴷⵉⵏⵜ ⵏⵏⵉⴹⵏ. ⵖⵔ ⵜⴳⴳⵓⵔⵜ, ⵉⵙⵙⵇⵙⴰ ⵜ ⵓⵄⵙⵙⴰⵙ ⵅⴼ ⵜⵡⵓⵔⵉ ⵏⵏⵙ ⴷ ⵎⵉⵏ ⵉⵙⵙⵏ. " ⵙⵙⵏⵖ ⴽⵓⵍⵛⵉ! " ⵢⴰⵔⵔ ⴷ ⵅⴰⴼⵙ. ⵡⴰⵅⵅⴰ! ⴰⴷ ⴰⵢⵉ ⵜⵉⵏⵉⴷ ⵎⴰⵖⴰⵔ ⵜⴰⴷⴷⴰⴳⵜ ⵏⵏⵖ, ⵉ ⵜⵓⵖⴰ ⴷⴰⵏⵖ ⵉⵜⵜⵉⵛⵛⵏ ⵜⵉⴷⴼⴼⴰⵢⵉⵏ ⵏ ⵡⵓⵔⵖ, ⵓⵔ ⵖⴰⵔⵙ ⵔⵅⵅⵓ ⵓⵍⴰ ⴷ ⴰⴼⴰⵔ. ⵕⴰⵊⴰ! ⵢⴰⵔⵔ ⴷ ⵅⴰⴼⵙ, ⴰⴷ ⵅⴰⴼⴽ ⴷ ⴰⵔⵔⵖ ⵅⵎⵉ ⵉ ⴷ ⵖⴰ ⴷⵡⵍⵖ ". ⵖⵔ ⴰⴳⴳⵯⴰⵊ, ⵢⵉⵡⴹ ⵖⵔ ⵢⵉⵊⵊ ⵏ ⵢⵉⵖⵣⵔ ⴷ ⴰⵎⵇⵇⵔⴰⵏ, ⵉⵅⵙ ⴰⴷ ⵜ ⵉⵥⵡⴰ. ⵉⵙⵙⵇⵙⴰ ⵜ ⵓⵄⵙⵙⴰⵙ ⵅⴼ ⵜⵡⵓⵔⵉ ⵏⵏⵙ ⴷ ⵎⵉⵏ ⵉⵙⵙⵏ. " ⵙⵙⵏⵖ ⴽⵓⵍⵛⵉ! " ⵢⴰⵔⵔ ⴷ ⵅⴰⴼⵙ ". ⵡⴰⵅⵅⴰ! ⵉⵏⵏⴰ ⵓⵎⴰⵣⴰⵏ, ⵉⵏⵉ ⴰⵢⵉ ⵎⴰ ⴷⴰ ⵉ ⵖⴰ ⵇⵇⵉⵎⵖ ⵉ ⵍⴱⴷⴷⴰ ⵜⵜⴳⴳⵖ ⵜⴰⵡⵓⵔⵉ ⴰ, ⵓⵔ ⴷⵉⵏⵏⵉ ⵡⵉ ⵖⴰ ⵉⴷⵡⵍⵏ ⴷⴳ ⵓⵎⴽⴰⵏ ⵉⵏⵓ. -ⵕⴰⵊⴰ! ⵢⴰⵔⵔ ⴷ ⵅⴰⴼⵙ, ⴰⴷ ⴷ ⵅⴰⴼⴽ ⴰⵔⵔⵖ ⵅⵎⵉ ⴷ ⵖⴰ ⴷⵡⵍⵖ. " ⴷⴳ ⵓⵊⵎⵎⴰⴹ ⵏⵏⵉⴹⵏ ⵏ ⵡⴰⵎⴰⵏ, ⵢⵓⴼⴰ ⴰⵇⵎⵎⵓⵎ ⵏ ⵜⵎⵙⵙⵉ. ⵉⵔⴰ ⵓⵔ ⴷⵉⵏⵏ ⵉⵍⵍⵉ ⵛⵛⵉⵟⴰⵏ; ⵜⵓⵖⴰ ⴷⵉⵏⵏ ⵖⵉⵔ ⵜⴰⵎⵙⵏⵓⵊⵉⵜ. ⵜⵇⵇⵉⵎ ⵅⴼ ⵢⵉⵊⵊ ⵏ ⵓⵙⵖⵉⵎ ⵉⵎⵖⴰⵔ. " ⵎⵉⵏ ⵜⵅⵙⴷ? ⵜⵏⵏⴰ ⴰⵙ ⵙ ⵜⵎⵍⵍⴰ. - ⵅⵙⵖ ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵛⵛⵉⵟⴰⵏ, ⵎⴰⵍⴰ ⵓⵔ ⵜⵏ ⵓⴼⵉⵖ, ⵓⵔ ⴷ ⴰⵢⵉ ⵜⵜⵉⵛⵏ ⵛⴰ ⵜⴰⵎⵖⴰⵔⵜ ⵉⵏⵓ. - ⵎⴰⵏⴰ ⴰ, ⴷ ⴰⵟⵟⴰⵚ! ⵜⵏⵏⴰ ⴰⵙ. ⵎⴰⵍⴰ ⵢⵓⴼⴰ ⵛⴽⴽ ⴷⴰ ⵛⵛⵉⵟⴰⵏ, ⴰⴷ ⵜⵙⵙⵄⴷⵓⴷ ⵉⵊⵊ ⵏ ⴰⵕⴱⵄ ⵏ ⵜⵙⵔⴰⴳⵜ ⵜⴰⵄⴼⴼⴰⵏⵜ. ⵄⴰⵡⴷ, ⵛⴽⴽ ⵜⵛⵇⵉⴷ ⴰⵢⵉ, ⴰⴷ ⵛⴽⴽ ⴰⵡⵙⵖ ". ⵜⴰⵔⵔ ⵉⵜ ⴷ ⵜⵉⴽⴹⴼⵟ, ⵜⵏⵏⴰ ⴰⵙ: " ⴰⵍⵉ ⴷⴳ ⵓⴱⵃⵔⵓⵔ ⵉⵏⵓ, ⴰⴷ ⵜⵉⵍⵉⴷ ⴷⴳ ⵜⵏⴼⵔⵓⵜ. -ⵜⵇⴰⴷⵉⵖ ⵛⵎⵎ! ⵉⵏⵏⴰ ⴰⵙ, ⵀⴰⵇⵇⴰ ⵢⵉ, ⵎⴰⵛⴰ ⵅⵙⵖ ⴰⴷ ⵙⵙⵏⵖ ⴽⵕⴰⴹ ⵏ ⵉⵙⴽⴽⵉⵏⵏ: ⴰⵎⵣⵡⴰⵔⵓ, ⵎⴰⵢⵎⵎⵉ ⵜⴰⵍⴰ ⵉ ⵜⵓⵖⴰ ⴷ ⵉⵜⵜⵉⵛⵛⵏ ⴰⵎⴰⵏ ⵉⵎⵉⵥⵉⴹⵏ, ⵜⵓⵣⵖ, ⵡⵉⵙ ⵙⵉⵏ, ⵎⴰⵢⵎⵎⵉ ⵜⴰⴷⴰⴳⵜ ⵏ ⵜⴷⴼⴼⵓⵢⵜ ⵏ ⵡⵓⵔⵖ, ⵓⵔ ⵖⴰⵔⵙ ⵔⵅⵅⵓ ⵓⵍⴰ ⴷ ⴰⴼⴰⵔ, ⵡⵉⵙ ⴽⵕⴰⴹ, ⵎⴰ ⴰⴷ ⵉⵇⵇⵉⵎ ⵍⴱⴷⴷⴰ ⵓⵎⴰⵣⴰⵏ ⵉⵜⵜⴳⴳ ⵜⴰⵡⵓⵔⵉ ⵏⵏⵙ, ⵓⵔ ⴷⵉⵏⵏⵉ ⵡⵉ ⵖⴰ ⵉⴷⵡⵍⵏ ⴷⴳ ⵓⵎⴽⴰⵏ ⵏⵏⵙ. -ⵉⵏⴰ, ⴷ ⴽⵕⴰⴹ ⵏ ⵉⵙⵇⵙⵉⵢⵢⵏ ⴷ ⵉⵏⵎⵎⴰⵔⵓⵜⵏ, ⵜⵏⵏⴰ; ⵎⴰⵛⴰ ⵉⵍⵉ ⵜⵀⵏⵉⴷ, ⵙⵍ ⵎⵍⵉⵃ ⵉ ⵎⵉⵏ ⵖⴰ ⵉⵏⵉ ⵛⵛⵉⵟⴰⵏ, ⵅⵎⵉⵏⵏⵉ ⵉ ⴷⴰⵙ ⵖⴰ ⴽⴽⵙⵖ ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵡⵓⵔⵖ ". ⵙ ⵢⵉⴹ, ⵉⴷⵡⵍ ⴷ ⵛⵛⵉⵟⴰⵏ ⵖⵔ ⵜⴰⴷⴷⴰⵔⵜ ⵏⵏⵉ. ⵢⴰⵍⵍⴰⵀ ⵎⴰⵎⵛ ⵉ ⴷ ⵢⵓⴷⴼ, ⵉⴽⴹⵓ ⴷⵉⵏⵏⵉ ⴰⴱⵕⵕⴰⵏⵉ. " ⴷⴰ ⵛⴰ ⵏ ⵢⵉⵊⵊ. ⴽⵟⵟⵓⵖ ⴷⴰ ⴰⴼⴳⴰⵏ. " ⵉⴱⴷⴰ ⵉⵔⵣⵣⵓ ⴷⴳ ⵜⵖⵎⵎⵓⵔⴰ ⵎⴰⵕⵕⴰ, ⵎⴰⵛⴰ ⵓⵔ ⵢⵓⴼⵉ ⵡⴰⵍⵓ. ⵜⵏⵏⴰ ⴰⵙ ⵜⵎⵙⵏⵓⵊⵉⵜ, ⵜⵔⵣⵣⵓ ⴰⵙ ⵅⴼ ⵓⵎⵏⵖⵉ. " ⵢⴰⵍⵍⴰⵀ ⵎⴰⵎⵎⵛ ⴼⵕⴹⵖ, ⵅⵎⵍⵖ, ⵜⵓⵙⵉ ⴷ ⵜⵀⵀⴰⵕⵡⴹⴷ ⴰⵢⵉ ⴽⵓⵍⵛⵉ, ⵍⴱⴷⴷⴰ ⵉⵜⵜⴰⵡⵉ ⴰⴽⴷ ⵕⴱⴱⵉ ⵜⴽⵟⵟⵓⴷ ⴰⴽⵙⵓⵎ ⵏ ⵓⴼⴳⴰⵏ. ⵇⵇⵉⵎ ⴰⴷ ⵜⵙⵡⴷ ⵜⴰⵃⵔⴰⵜ ⵏⵏⴽ ". - ⴰⵍ ⵎⴰⵏⵉ ⵉⵙⵡⴰ ⵜⴰⵃⵔⴰⵜ, ⵢⵓⵃⵃⵍ, ⵉⵙⵔⵙ ⴰⵣⵍⵍⵉⴼ ⵏⵏⵙ ⵅⴼ ⵉⴼⴰⴷⴷⵏ ⵏ ⵜⵎⵙⵏⵓⵊⵉⵜ, ⵉⵜⵜⵔ ⵣⵣⴰⴳⵙ ⴰⴷ ⴰⵙ ⵜⵏⴱⵉ ⵜⵉⵛⵛⵉⵏ; ⵛⵡⴰⵢⵜ ⵓⵛⴰ ⵉⵟⵟⵚ. ⵉⴱⴷⴰ ⵉⵜⵜⵛⵓⵅⵕⵓⴹ. ⵜⴽⴽⵙ ⴰⵙ ⵜⵡⵙⵙⴰⵔⵜ ⵏⵏⵉ ⵉⵊⵊ ⵏ ⵓⵥⵓⵟⵟⵓ ⵏ ⵡⵓⵔⵖ, ⵜⵙⵔⵙ ⵉⵜ ⵜⵉⵡⴰ ⵏⵏⵙ. " ⴰⵀⵀⵀⵀ! ⵉⵙⵖⵓⵢ ⵛⵛⵉⵟⴰⵏ, ⵎⵉⵏ ⴷ ⴰⵢⵉ ⵜⴳⴳⵉⴷ? ⵥⵕⵉⵖ ⵉⵛⵜ ⵏ ⵜⵓⵕⵊⴰ ⵓⵔ ⵜⵃⵍⵉ, ⵜⵏⵏⴰ ⴰⵙ ⵜⵎⵙⵏⵓⵊⵉⵜ, ⵓⵛⴰ ⵟⵟⴼⵖ ⴰⴽ ⴷⴳ ⵓⵛⵡⵡⴰⴼ. ⵎⵉⵏ ⵜⵓⵕⵊⵉⴷ, ⵉⵙⵙⵇⵙⴰ ⵜⵜ ⵛⵛⵉⵟⴰⵏ. - ⵓⵕⵊⵉⵖ ⵜⴰⵍⴰ ⵏ ⵢⵉⵊⵊ ⵏ ⵡⴰⴳⴰⴷⴰⵣ, ⵉ ⵜⵓⵖⴰ ⴷⴰⵏⵖ ⵉⵜⵜⵉⵛⵛⵏ ⴰⵎⴰⵏ ⵉⵎⵉⵥⵉⴹⵏ, ⵜⵓⵣⵖ, ⵓⵔ ⴷ ⵜⵜⵉⵛ ⵓⵍⴰ ⴷ ⴰⵎⴰⵏ; ⵎⴰⵎⵛ ⵜⵎⵙⴰⵔ? - ⴰⵀⵀⵀ! ⵙⵙⵏⵖ ⵎⴰⵢⵎⵎⵉ! ⵢⴰⵔⵔ ⴷ ⵅⴰⴼⵙ ⵛⵛⵉⵟⴰⵏ: ⴷⵉⵏⵏⵉ ⵉⵊⵊ ⵏ ⵓⵇⴰⵇⵔⵉⵡ ⵙ ⴰⴷⵓ ⵏ ⵜⵚⴹⴰⵕⵜ ⴷⴳ ⵜⴰⵍⴰ; ⵉⵅⵚⵚⴰ ⴰⴷ ⵉⵜⵜⵡⴰⵏⵖ, ⵓⵛⴰ ⴰⴷ ⴱⴷⴰⵏ ⵡⴰⵎⴰⵏ ⵉⵎⵉⵥⵉⴹⵏ ⴰⴷ ⵜⵜⴼⴼⵖⵏ ". ⵜⴱⴷⴰ ⵜⵡⵙⵙⴰⵔⵜ ⵜⵔⵣⵣⵓ ⴰⵙ ⵅⴼ ⵜⵉⵛⵛⵉⵏ,, ⵓⵛⴰ ⵉⵟⵟⵚ ⵄⴰⵡⴷ, ⵉⴱⴷⴰ ⵉⵜⵜⵛⵓⵅⵕⵓⵜ, ⵉⵜⵜⵙⵏⵀⵣⵣⴰ ⵣⵣⴰⵊ. ⵜⴽⴽⵙ ⴰⵙ ⴰⵥⵓⵟⵟⵓ ⵏ ⵡⵓⵔⵖ ⵡⵉⵙ ⵙⵉⵏ. " ⴰⵀⵀⵀⵀ! ⵎⵉⵏ ⵜⴳⴳⴷ? ⵉⵙⵖⵓⵢ ⵛⵛⵉⵟⴰⵏ ⵉ ⵢⵓⵖⴰ ⵍⵃⴰⵍ ". ⵓⵔ ⵜⵜⵏⵀⵡⵉⵔ ⵛⴰ, ⵜⴰⵔⵔ ⴷ ⵅⴰⴼⵙ, ⵥⵕⵉⵖ ⵉⵛⵜ ⵏ ⵜⵓⵕⵊⴰ. ⵎⵉⵏ ⵜⵓⵕⵊⵉⴷ ⵄⴰⵡⴷ?, ⵉⵙⵙⵇⵙⴰ ⵜⵜ. - ⵓⵕⵊⵉⵖ ⴷⴳ ⵢⵉⵛⵜ ⵏ ⵜⵎⵓⵔⵜ ⴷⴰⴳⵙ ⵉⵛⵜ ⵏ ⵜⴰⴷⴰⴳⵜ ⵜⴻⵜⵜⴰⵔⵓ ⵜⵉⴷⴼⴼⴰⵢⵉⵏ ⵏ ⵡⵓⵔⵖ, ⵎⴰⵢⵎⵎⵉ ⵓⵔ ⵖⴰⵔⵙ ⵔⵅⵅⵓ ⵓⵍⴰ ⴷ ⴰⴼⴰⵔ? - ⴰⵀⵀⵀ! ⵙⵙⵏⵖ ⵎⴰⵖⴰⵔ! ⵢⴰⵔⵔ ⴷ ⵅⴰⴼⵙ ⵛⵛⵉⵟⴰⵏ: ⴷⵉⵏⵏⵉ ⵉⵛⵜ ⵏ ⵜⵖⵔⴷⴰⵢⵜ ⵜⴻⵜⵜ ⵉⵥⵓⵕⴰⵏ; ⵉⵅⵚⵚⴰ ⴰⴷ ⵜⵜ ⵏⵖⵏ. ⵃⵎⴰ ⴰⴷ ⵜⵡⵛ ⵜⵉⴷⴼⴼⴰⵢⵉⵏ, ⵎⴰⵍⴰ ⵓⵔ ⵜⵜ ⵏⵖⵉⵏ, ⵜⴰⴷⴷⴰⴳⵜ ⵏⵏⵉ ⴰⴷ ⵜⵎⵎⵜ. ⵔⵅⵅⵓ ⵊⵊ ⴰⵢⵉ ⴰⴷ ⵟⵟⵚⵖ, ⵊⵊ ⴰⵢⵉ ⵣⴳ ⵜⵓⵕⵊⴰ ⵏⵏⵎ. ⵎⴰⵍⴰ ⵜⵙⵙⴽⴽⵔⴷ ⴰⵢⵉ, ⴰⴷ ⵅⴰⴼⵎ ⵚⵓⴹⵖ ". ⵜⵙⵙⵉⵎⵏ ⵉⵜ ⵜⵎⵙⵏⵓⵊⵉⵜ, ⵜⵣⵣⵥⴳⴰ ⵜ, ⵜⴱⴷⴰ ⵜⵔⵣⵣⵓ ⴰⵙ ⵅⴼ ⵜⵉⵛⵛⵉⵏ ⴰⵍ ⵎⴰⵏⵉ ⵉⵟⵟⵚ, ⵉⴱⴷⴰ ⵉⵜⵜⵛⵓⵅⵕⵓⴹ. ⵜⴽⴽⵙ ⴰⵙ ⴰⵥⵓⵟⵟⵓ ⵏ ⵡⵓⵔⵖ ⵡⵉⵙ ⴽⵕⴰⴹ. ⵉⴽⴽⵔ ⵛⵛⵉⵟⴰⵏ, ⵉⵙⵖⵓⵢ ⵄⴰⵡⴷ, ⵉⵔⵣⵣⵓ ⴰⴷ ⵜⵜ ⵉⵡⵡⵜ; ⵜⵣⵣⵥⴳⴰ ⵜ ⵜⵏⵏⴰ ⴰⵙ ⵄⴰⵡⴷ: " ⵡⵉ ⵉⵣⵎⵎⵔⵏ ⴰⴷ ⵉⵙⵏⵓⴼⴼⵔ ⵉⵛⵜ ⵏ ⵜⵓⵕⵊⴰ ⵓⵔ ⵜⵃⵍⵉ? - ⵎⵉⵏ ⵜⵓⵕⵊⵉⴷ ⵄⴰⵡⴷ?, ⵉⵙⵙⵇⵙⴰ ⵜⵜ ⵛⵛⵉⵟⴰⵏ ⴰⴼⴹⵓⵍⵉ. - ⵓⵕⵊⵉⵖ ⵉⵊⵊ ⵏ ⵓⵎⴰⵣⴰⵏ ⵉⵙⵙⵛⵜⴰ ⴰⵍ ⴰⵎⵉ ⵍⴱⴷⴷⴰ ⴰⵇⵇⴰⵜ ⵉⵙⵄⴷⴷⵓ ⴰⴽⵓⴷ ⴷⴳ ⵡⴰⵎⴰⵏ ⴰⴽⴷ ⵜⵖⵕⵕⴰⴱⵓⵜ ⵏⵏⵙ, ⴱⵍⴰ ⵎⴰ ⵉⴷⵡⵍ ⵓⵍⴰ ⴷ ⵉⵊⵊ ⴷⴳ ⵓⵎⴽⴰⵏ ⵏⵏⵙ. - ⴰⵀⵀⵀ! ⴰⵎⵖⵏⴷⴼ! ⵢⴰⵔⵔ ⴷ ⵅⴰⴼⵙ ⵛⵛⵉⵟⴰⵏ: ⴰⵎⵣⵡⴰⵔⵓ ⵉ ⴷ ⵖⴰ ⵢⴰⵙⵏ ⴰⴷ ⵉⵥⵡⴰ ⵉⵖⵣⵔ, ⴰⴷ ⴰⵙ ⵉⴳⴳ ⵜⵉⴳⵓⵍⴰ ⴷⴳ ⵉⴼⴰⵙⵙⵏ, ⵓⵛⴰ ⴰⴷ ⵉⴷⵡⵍ ⴷⴳ ⵓⵎⴽⴰⵏ ⵏⵏⵙ ". ⴰⵍ ⵎⴰⵏⵉ ⵉ ⴷⴰⵙ ⵉⵡⵛⴰ ⵜⴰⵎⵔⴰⵔⵓⵜ ⵏⵏⵙ ⵅⴼ ⵉⵙⵇⵇⵉⵏⵏ ⵏⵏⵉ, ⵜⵊⵊ ⵉⵜ ⴰⴷ ⵉⵙⴳⵏⴼⴰ, ⵉⵟⵟⵚ ⴰⵍ ⴰⵎⵉ ⴷ ⵜⵉⴼⴰⵡⵜ. ⴰⵍ ⴰⵎⵉ ⵉⴼⴼⵖ, ⵜⴽⵙⵉ ⵜⵎⵙⵏⵓⵊⵉⵜ ⵜⵉⴽⴹⴼⵟ ⵣⴳ ⵓⴱⵃⵔⵓⵔ ⵏⵏⵙ, ⵜⴰⵔⵔⵉ ⵜ ⵎⴰⵎⵛ ⵜ ⵜⵓⵖⴰ ⴷ ⴰⴼⴳⴰⵏ. " ⴰⵇⵇⴰ ⴽⵕⴰⴹ ⵏ ⵉⵥⵓⵟⵟⴰⵏ, ⵜⵏⵏⴰ ⴰⵙ, ⵜⵙⵍⵉⴷ ⵎⵍⵉⵃ ⵉ ⵜⵎⵔⴰⵔⵓⵜ ⵏ ⵛⵛⵉⵟⴰⵏ ⵅⴼ ⵉⵙⵇⵙⵉⵜⵏ ⵏⵏⴽ? - ⵙⵍⵉⵖ ⵎⵍⵉⵃ, ⴽⵜⵉⵖ ⵅⴰⴼⵙⵏ, ⵢⴰⵔⵔ ⴷ ⵅⴰⴼⵙ. - ⴰⵇⵇⴰ ⵛⴽⴽ ⵔⵅⵅⵓ ⴱⵕⵕⴰ ⵉ ⵓⵎⵉⵣⵉ, ⵜⵣⵎⵎⵔⴷ ⴰⴷ ⵜⵟⵟⴼⴷ ⴰⴱⵔⵉⴷ ". ⵉⵇⴰⴷⴰ ⵜⴰⵡⵙⵙⴰⵔⵜ ⵏⵏⵉ ⵉⵜⵜ ⵢⴰⵡⵙⵏ, ⵓⵛⴰ ⵉⴼⴼⵖ ⵣⴳ ⵜⵎⵙⵙⵉ, ⵉⵎⵎⵔⵏ ⴰⵍ ⵎⴰⵏⵉ ⵉⵎⵓⵔⵙ. ⴰⵍ ⵎⴰⵏⵉ ⵢⵉⵡⴹ ⵖⵔ ⵓⵎⴰⵣⴰⵏ, ⴷⴰⵜ ⵉ ⵖⴰ ⴷⴰⵙ ⵉⵡⵛ ⵜⴰⵎⵔⴰⵔⵓⵜ, ⵉⵙⵙⵥⵡⴰ ⵜ ⵉⵖⵣⵔ, ⴰⵍ ⵎⴰⵏⵉ ⵉⴹⵕⴰ, ⵉⵏⵏⴰ ⴰⵙ: " ⵡⵏⵏⵉ ⵉ ⴷ ⵖⴰ ⵢⴰⵙⵏ ⴷ ⴰⵎⵣⵡⴰⵔⵓ ⴰⴷ ⵉⵥⵡⴰ ⵉⵖⵣⵔ, ⵡⵛⴰ ⴰⵙ ⵜⵉⴳⵓⵍⴰ ". ⵢⵉⵡⴹ ⵖⵔ ⵜⵎⴷⵉⵏⵜ ⵎⴰⵏⵉ ⵜⵍⵍⴰ ⵜⴰⴷⴷⴰⴳⵜ ⵉ ⵢⵓⵣⵖⵏ; ⵜⵓⵖⴰ ⵉⵜⵜⵕⴰⵊⴰ ⵓⵄⵙⵙⴰⵙ ⵓⵍⴰ ⴷ ⵏⵜⵜⴰ ⵜⴰⵎⵔⴰⵔⵓⵜ: ⵏⵖⵎ ⴰⵖⵔⴷⴰⵢ ⵉ ⵜⴻⵜⵜⵏ ⵉⵥⵓⵕⴰⵏ " ⵉⵏⵏⴰ ⴰⵙ, - " ⴰⴷ ⵜⵜ ⵜⴷⵡⵍ ⵜⴰⴷⴼⴼⵓⵢⵜ ⵏ ⵡⵓⵔⵖ ". ⵃⵎⴰ ⴰⴷ ⵜ ⵉⵇⴰⴷⴰ ⵓⵄⵙⵙⴰⵙ ⵏⵏⵉ, ⵉⵡⵛⴰ ⴰⵙ ⵙⵉⵏ ⵏ ⵉⵖⵢⴰⵍ ⵛⵛⵓⵕⵏ ⵙ ⵡⵓⵔⵖ. ⵢⵉⵡⴹ ⵖⵔ ⵜⵎⴷⵉⵏⵜ ⵎⴰⵏⵉ ⵜⵍⵍⴰ ⵜⴰⵍⴰ ⵉ ⵢⵓⵣⵖⵏ. ⵉⵏⵏⴰ ⴰⵙ ⵉ ⵓⵄⵙⵙⴰⵙ: " ⴷⵉⵏⵏⵉ ⴰⵇⴰⵇⵔⵉⵡ, ⴰⴼⵎ ⵜ, ⵏⵖⵎ ⵜ, ⴰⴷ ⴼⴼⵖⵏ ⵡⴰⵎⴰⵏ ⵉⵎⵉⵥⵉⴹⵏ ". ⵉⵇⴰⴷⴰ ⵜ ⵓⵄⵙⵙⴰⵙ ⵏⵏⵉ, ⵉⵡⵛⴰ ⴰⵙ ⵙⵉⵏ ⵏ ⵉⵖⵢⴰⵍ ⵛⵛⵓⵕⵏ ⵙ ⵡⵓⵔⵖ. ⵉⴷⵡⵍ ⴷ ⵓⵔⴱⴰ ⵉⵎⵎⴰⵔⵏⵢⵏ ⴷ ⴰⵎⴰⵏⵏⴰⵣ ⵖⵔ ⵜⵎⵖⴰⵔⵜ ⵏⵏⵙ ⵉ ⵉⵎⵎⵔⵏ ⴰⵍ ⵎⴰⵏⵉ ⵉⵜ ⵜⵥⵕⴰ ⵉⵄⵇⴱ ⴷ, ⴰⵍ ⵎⴰⵏⵉ ⴽⵓⵍⵛⵉ ⵉⵄⴷⴰ ⵎⵍⵉⵃ. ⵉⵡⵛⴰ ⴰⵙ ⵉ ⵓⴳⵍⵍⵉⴷ ⴽⵕⴰⴹ ⵏ ⵉⵥⵓⵟⵟⴰⵏ ⵏ ⵛⵛⵉⵟⴰⵏ. ⴰⵍ ⵎⴰⵏⵉ ⵉⵥⵕⴰ ⵓⴳⵍⵍⵉⴷ ⴽⴽⵓⵥ ⵏ ⵉⵖⵢⴰⵍ ⵛⵛⵓⵕⵏ ⵙ ⵡⵓⵔⵖ, ⵉⵎⵎⵔ, ⵓⵛⴰ ⵉⵏⵏⴰ ⴰⵙ: " ⵔⵅⵅⵓ ⵜⵙⴰⵍⵉⴷ ⵜⴰⴼⴰⴷⴰ, ⵉⵍⵍⵉ ⴰⵇⵇⴰⵜⵜ ⵏⵏⴽ! ⵎⴰⵛⴰ ⵉⵏⵉ ⴰⵢⵉ ⴰ ⵎⴻⵎⵎⵉ ⵉⵄⵉⵣⵣⵏ, ⵎⴰⵏⵉ ⵜⵓⴼⵉⴷ ⵓⵔⵖ ⴰ, ⵎⴰⵏⴰ ⴰ, ⴷ ⴰⴱⴰⵢⵏⵓ ⴷ ⴰⵎⵇⵇⵔⴰⵏ ⵉ ⴷⴰⵢⵉ ⴷ ⵜⵉⵡⵉⴷ? - ⵉⵡⵉⵖ ⵜ ⵉⴷ ⵣⴳ ⵓⵊⵎⵎⴰⴹ ⵉⵏⵏ ⵏ ⵢⵉⵖⵣⵔ, ⵉ ⵥⵡⵉⵖ. - ⵣⵎⵎⵔⵖ ⴰⴷ ⵜ ⵉⴷ ⴰⵡⵉⵖ ⵓⵍⴰ ⵏⵏⵛ? ⵉⵙⵙⵇⵙⴰ ⵜ ⵓⴳⵍⵍⵉⴷ ⴰⴹⵎⵎⴰⵄ. - ⵎⵍⵎⵉ ⵎⵎⴰ ⵜⵅⵙⴷ! ⵢⴰⵔⵔ ⴷ ⵅⴰⴼⵙ. ⴰⴷ ⴷⵉⵏ ⵜⴰⴼⴷ ⵉⵊⵊ ⵏ ⵓⵎⴰⵣⴰⵏ; ⵉⵏⵉ ⴰⵙ, ⴰⴷ ⵛⴽⴽ ⵉⵙⵙⵥⵡⴰ ⵉⵖⵣⵔ, ⵓⵛⴰ ⴰⴷ ⵜⵛⵛⵓⵕⴷ ⴰⵇⵔⴰⴱ ⵏⵏⴽ. " ⵉⵟⵟⴼ ⵓⴳⵍⵍⵉⴷ ⴰⴹⵎⵎⴰⵄ ⴰⴱⵔⵉⴷ ⴷⵖⵢⴰ, ⴰⵍ ⴰⵎⵉ ⵢⵉⵡⴹ ⵖⵔ ⵜⵎⴰ ⵏ ⵡⴰⵎⴰⵏ, ⵉⵛⵢⵢⴰⵔ ⴰⵙ ⵉ ⵓⵎⴰⵣⴰⵏ ⴰⴷ ⴰⵙ ⴷ ⴰⵡⵉ ⵜⴰⵖⵔⵔⴰⴱⵓⵜ ⵏⵏⵙ. ⵉⵙⵙⵉⴷⴼ ⵉⵜ ⵓⵎⴰⵣⴰⵏ, ⴰⵍ ⵎⴰⵏⵉ ⵢⵉⵡⴹ ⵖⵔ ⵓⵊⵎⵎⴰⴹ ⵏⵏⵉⴹⵏ, ⵉⵡⵛⴰ ⴰⵙ ⵜⵉⴳⵓⵍⴰ ⵓⵛⴰ ⵉⵏⴹⵓ ⴱⵕⵕⴰ. ⵉⴷⵡⵍ ⵓⴳⵍⵍⵉⴷ ⴷ ⴰⵎⴰⵣⴰⵏ ⴰⵍ ⵎⴰⵏⵉ ⵉⴳⴳⴰ ⴰⴱⴽⴽⴰⴹ. 8