આવો મારા મીઠડા બોલા માવ...
વ્હાલમ વ્હાલા લાગો છો સુંદર શ્યામ... આવો મારા...
વ્હાલમ્ મુજને વ્હાલા લાગો બહુ, નટવર સુંદર નાવ...
હેત કરી હૈયા પર રાખું, રસિયા જાદવરાવ... આવો મારા...
પલંગ ઉપર પધરાવું પ્યારા, દૂધડે પખાળું પાવ...
ભૂધર ભેટું પ્રેમ કરી મારે, ઘણા દિવસનો ભાવ... આવો મારા...
કેસર ચંદન ચર્ચી કરું હું તો, ફૂલડામાં ગરકાવ...
આંખલડીથી અળગા ન મેલું, શોભાના દરિયાવ... આવો મારા...
જેમ રાજી રહો તેમ કરું હરિ, ના જોઉં ન્યાય-અન્યાય...
પ્રેમાનંદના નાથજી તમ પર, પ્રાણ કરું ન્યોછાવ... આવો મારા...