Datasets:

ELRs

/

Ewondo_Bible

like 0

Follow

Ewondo Language Resources 1

Á mə̄tádí, ńdɔ Zambá á ngákom yób ai sí.

Sí é ngə́lə ezəzam ezəzam, díbī á yālá êndǎm yā yób á zigili, Ǹsísīm Zāmbá wákə wáyə̄lə á mə̄ndím ā yōb.

Zambá nyé nâ: « Engə́ngəŋ é bɔ̄g », ńdɔ é ngábɔ.

Ńdɔ Zambá á ngáyén naa engə́ngə́ŋ é nə m̀bəŋ, a kándī éngə́ngə́ŋ ai díbi.

Zambá á yolé éngə́ngə́ŋ naa «Amǒs », a lóé díbī nâ «Alú». Ngogé ē víní, kídí é lēndé: ámōs ósú nyúlū.

Zambá nyé nâ: “Ebá yób é bɔ̄g á zāŋ məndím, é kab mɔ́ á zāŋ.” Ńdɔ̄ á ngábɔ nálā

Zambá á komó ébā yób, a kabá mə̄ndím ngab ébɛ̄: émá ébā yób ā sī, émá mə̄vɔ̄g ébā yób ā yōb.

Ńdɔ Zambá á ngáyole ébā yób nâ “Yób”. Ngogé ē víní, kídí é lēndé: ámōs bɛ̄ɛ nyúlū.

Zambá nyé nâ: “Mə́ndím mə́ nə́ ébā yób ā sī, mə́ kóágán hóm m̀bɔ́g, é sí é nə̄ ńkód é yéné. “Ńdɔ̄ á ngábɔ nálā. ”

Ḿfág ó ngábə́ ńkód Zambá ā yolé wā nâ “Sí”: mə́ndím mə́ ngáman kóan a lóé mɔ̄ nâ “Máŋ”. Ńdɔ Zambá á ngáyén naa, nálā ó nə m̀bəŋ.

Zambá nyé nâ: “Sí é fáígi bibəbɛga, bílɔ́g byáfoe mvɔŋ, ai bílé byáwúm məkyaí mə́sə, bí foě fə mvɔŋ á sí. Ńdɔ̄ á ngábɔ nálā”.

Sí ē ngafái bibəbɛga, ai bílɔ́g byáfoe mvɔŋ məkyǎ mə́sə, ai bílé byáwúm bibumá məkyǎ mə́sə. Ńdɔ Zambá á ngāyén naa, nálā ó nə m̀bəŋ.

Ngogé ē víní, kídí é lēndé: ámōs lálā nyúlū.

Zambá nyé nâ: “Mim̀fifyɛ mí bɔ̄g á ébā yób, mí kándi amǒs ai alú; mí kadə bɔ̌ naa bə́ yəm məbǒg ai məlú míḿbú,

mí kadə fyɛ á ébā yób, mí vâ sí éngə̄ngə́ŋ.” Ńdɔ̄ á ngábɔ̄ nálā:

Zambá á komó bōd mim̀fyɛ bə́bɛ̄, ényú ó ngábə́ ánēn, nə́ ó kadə wulu ai amǒs ényú ó ngábə́ ábɔ̄d, nə́ ó kadə wulu ai alú, a komó fə atítie.

Ńdɔ Zambá á ngákəle dɔ́ ébā yób nə́ á kadə wulǔ ai amǒs ai alú,

á kándigi engə́ngə́ŋ ai díbi. Ńdɔ Zambá á ngāyén nə́ nálā ó nə m̀bəŋ.

Ngogé é vīní, kídí é lēndé: ámōs nyina nyúlū.

Ńdɔ̄ fɔ́ɔ́ Zāmbá á ngádzó nâ: « Məndím mə́ nyūgúdú ai batsída, yób á dzyé ai é byə́m bísə̄ byáyə́lə ébā yób ā sī.”

Ńdɔ Zambá á ngákom byə̂m bí tsíd bīnén, ai é byə́m bísə̄ byáfóŋan, á byányugudu á mə̄ndím, məkyaí mə́sə. Ńdɔ Zambá á ngáyén naa nálā ó nə m̀bəŋ.

Ńdɔ Zambá á ngákúb bɔ ǹtótōmaamaa, nyé nâ: Byéán, mǐ fui mvɔŋ, mǐ dzálá məndím mə́ máŋ; anɔ̌n dɔ̄ á fuí fə mvɔŋ á sí.

Ńdɔ ngogé é ngāvín, kídí é lēndé: ámōs tána nyúlū.

Zambá nyé nâ: “Sí é byéég məkyǎ mə́ tsíd mə́sə: biyə́m, ai atsítsíd ai tsíd məfan, məkyǎ məkyǎ. Ńdɔ á ngábɔ nálā:

Zambá á manə́ kom tsíd məfan məkyǎ məkyǎ, ai biyə́m, mə̄kyǎ məkyǎ, ai batsítsídī yā sí, məkyǎ məkyǎ. Ńdɔ Zambá á ngāyén naa nálā ó nə m̀bəŋ.

Zambá nyé nâ: “Ńkōmán mod, a vû bíā, a fulugan ai bíā: á dzóé kɔ̌s yā máŋ, ai anɔ̌n yā yób, ai tsíd məfan ésə, ai batsítsídī bə́sə̄ yā sí.

Ńdɔ Zambá á ngákom mod, a vû nyé; a komó nye a fulugan ai Zambá, a komó bɔ̄ fám ai miníngá.

Ńdɔ Zambá á ngākúb bɔ ǹtótōmaamaa; Zambá nyé ai bɔ́ nâ: “Byéán, mǐ fui mvɔŋ, mǐ dzálá sí, mǐ dzóē fə dzɔ̌; dzóégán kɔ̌s yā máŋ, ai anɔ̌n yā yób, ai batsídī bə́sə̄ yā sí.

Zambá nyé nâ: “Mavə́ mínā bítutuga bísə̄ byáfui mvɔŋ á sí, ai bílé bísə̄ byáwúm, bí fui mvɔŋ; bidí byáán bīlí.

Ḿfág yā tsíd məfan, ai anɔ̌n yā yób ai batsídā ásə yǎ sí, mavə́ bɔ é dzóm ésə é nə́ élɔ́g, nə́ bə́ di. Ńdɔ̄ fə á ngábɔ̄ nálā.

Ńdɔ Zambá á ngáyén naa é byə́m bísə a ngákom, bí ngábə́ éyə̄gǎn ḿbəŋ. Ngogé é vīní, kídí é lēndé: ámōs saməna nyúlū.

Éyə̄ hḿ Yób ai Sí bí ngákomban ná, ai étítíb byə́m bísə̄ yā étéde.

Ámōs saməna ńgɔ a ngámana esíé, ńdɔ a zu wɔi amǒs zamgbála.

Ńdɔ Zambá á ngāfúbu amǒs zamgbálā tē, amú ńgɔ a ngáwɔi.

Nâ, abonde yób ai sí dí éyɔŋ Ǹtondôbə Zambá a ngábonde byá.

Asú tē hḿ fám yāyi líg ésīá ai nyiá, e kə́ə́ lad ai ǹgál wōé, bə́ ńtɔ̄á nyɔ́l dzīdziá.

Bɔ́ bə́sə bə́bɛ̄, fám ai miníngá bə́ ngábə́ míńsɔ́, dá təge wóg ósɔ́n.

Nyóé ē ngábə́ mə̄kə́ŋ ai mvol e lodo é tsíd məfan ésə Ǹtondôbə Zambá á ngákom. Ńdɔ e ngádzó ai miníngá naa: « Yə á nə fɔ́ɔ́ bə́bə́lá naa Zambá á ngákili mínā nâ tə myádī bīlé yā áfūb ? »

Ńdɔ Miníngá á ngāyalan Nyóé naa: «Byǎdī fɔ́ɔ́ bibumá bīlé yā áfūb;

dá, ású bibumá bí élé yā é tə́lə́ á zāāŋ afúb, Zambá á ngákili bíā nâ: tə byádī, tə byánamba, bǐ zā wú. »

Nyóé nyé ai miníngá naa: « Təge, myǎyǐ kig wú !

Zambá a yəm nâ, ámōs myāyi dí élé tē, mís máán mâyi yâban, mǐ ńtɔ̄á anə́ bəzambá: mǐ yəmə m̀bəŋ, mǐ yəmə abé. »

Kə́ ńdɔ̄ hḿ mīníngá ā zu yén naa élé dzī é nə m̀bəŋ ádī, ai abəŋ á mís, é tɔ̄á fə̄ dzóm yā mod a yáŋán ai dzɔ́ nə́ á bi fəg. Ńdɔ̄ a ngáfád ébumá, a díí. A kalán ńnóm, nyé a díí fə.

Ńdɔ̄ hḿ mís mə́ ngáyâban bɔ́, bɔ́ bə́sə bə́bɛ̄, bə́ yə̄mə́ fɔ́ɔ́ fə̄ nâ bə́ nə miǹsɔ́; ńdɔ̄ bə́ ngáman tsíg míḿbɔ̄b, bə́ mān bɔ́d.

Éban ná, bə́ ngawóg kîŋ Zambá, yǎ ā zaa a tə́bə áfūb ai evúvoě ngógé. Ńdɔ̄ fám bân ńgál bə́ ngákə sɔbɔ Ńtondôbə, á bīlé yā áfūb.

Ńdɔ Ǹtondôbə Zambá á ngálóe mod, nyé nâ: “O nə vé ?”

Nyé nâ: “Mə wódán wa edǔŋ áfūb, mə̌ ngambáda amú mə nə ńsɔ́, ńdɔ mə kə́ sɔbɔ. »

Nyé ai nyé nâ: « Dzé é bɔ̄ naa ó yəm nâ o nə ǹsɔ́ ? O dí yǎ élé mə̄ ngákili wa nə́ tə wadí ngǎ ?”

Mod nyé nâ: “Kə́ é mīníngá ó ngávə́ mā nâ a nə eyɔŋ dzám, ńnye ǎ və́ mā elé a, ńdɔ maa mə dí.”

Ǹtondôbə Zambá nyé ai miníngá naa: “Dzé ō bɔ̄ nálā ?” Miníngá nyé nâ: “Nyóé ńdzɔ ě dūg mā, ńdɔ mə dí.”

Ǹtondôbə Zambá nyé ai nyóé nâ: “ Ḿból ō bɔ̄ nálā, amalá ai wa á zāāŋ biyə́m bísə ai tsíd ésə̄ yā məfan. O m̀báá fɔ́ɔ́ və wakə wadudu abum á sí, o dzâ mətsɔ́, á ńgúmā ńtíé ényiŋ wóe.

Mayi koman zíŋ á zāāŋ mína miníngá, á zāāŋ mvɔŋ bod dzié ai éńdzoe: a yi wa tság ńló, waa o lóbó nyē étīndi.”

Nyé ai miníngá naa: “Mayi wa bulǔ míńtyé mí ábyé, wayi byé bɔ́n á mīńtyé ā yōb, ǹnə́m ó ḿbáá fɔ́ɔ́ wa və ábə nyɔ ńnóm, ńdɔ̄ fə ǎ yi wa dzóe.”

Nyé ai mod nâ:“Ḿból ō vógóló ńkɔ́bɔ̄ nyɔ̄ ńgál, o díí ébúmá mə̄ ngákili wa nâ: tə wadí, amalá ai sí ndon ású dóe ! Wayi wú tūŋ ású yə̄ nə́ ó dí bidí yā sí á ńgúmā ńtíé ényiŋ.

Sí yayi wa fáí biyoá ai miǹsíníŋ, ńdɔ̄ fə wayi dí bīlɔ́g bíé.

Ngə́ wayi dí dzóm, və o tám wándī édudug, a kələ kwí ánə̄ ó ngādúgán á sí, ḿfág ó ngāsɔ́, amú o nə m̀búlúg, ńdɔ̄ fə wǎyi dúgān á ḿbūlúg. »

Ńdɔ mod a ngáyóle ǹgál dzwé naa Éva, amú nye a nə́ nyīá ébá bə́sə bə́ və̄ə̄.

Ńdɔ Ǹtondôbə Zambá á ngákom mod bân ǹgál bīwɔ́mǎn bikob bí tsíd, a manə́ bɔ bɔ́di.

Ǹtondôbə Zambá nyé nâ: « Mod á nyɔ̄ a ńtɔ̄á yǎ anə́ bíā, a yəmə m̀bəŋ, a yəmə abé ! Tə áfə nâ á bad sám wɔ́, á nāmba elé ényiŋ, á di, á bi ényiŋ é nə́ tə man. »

Ńdɔ Ǹtondôbə Zambá á ngátsídan nyé áfūb yā Éden, nâ a kə a syé sí, ḿfág á ngásɔ́.

A tsídán mod, a tə́lé bəkerúbim áfūb Éden ai m̀bɔ́ ńnōm, fa ndóan á mɔ́, e kiligan, nə́ bə́ kámán ai é zēn yakə á Élé Enyiŋ.

Ńdɔ̄ tə́ mod binama a ngáyəm ǹgál wōé. Éva[1], Éva a nɔŋɔ́ âbum, a byé Káin, nyé nâ: « Mə byé mān fám ai ngul Ǹtondôbə.»

Éva a dúgan fə byé, Ábɛl, ebədǎn Káin. Ábɛl a ńtɔ̄á ńtə́le biyə́m, Káin nyé a tɔá ńsīe məfúb.

Ńdɔ̄ hḿ lázu bɔ̌ naa, Káin a nɔŋɔ́ bīdí yā áfūb díé, a túní Ńtondôbə,

Ábɛl nyé a túní nye miǹtól biyə́m yā ńkunda bíyə́m wóé ai məvɔ́ŋ mə́sə. Ǹtondôbə a fudí Ábɛl mís á nyɔ́l ai mətúnuŋa móé.

Ḿfág yā ábə Káin ai mətúnuŋa móé, təge fɔ́ɔ́ kə̌ mís móé. Káin a ḿbə̄lə́ fɔ́ɔ́ ḿbə̂ olún, asú á víní nyē á kūlúd.

Ǹtondôbə nyé ai Káin nâ: “Ású dzé wāwóg ólún, ású dzé wātindi otad âsú ?

Ngə́ wabɔ é mam mányəb, kə́ wayian tɔbɔ̌ miǹtag a ? Ngə́ wābɔ á kig é mam mə́ nə́ ḿbəŋ, yəmə hḿ naa ǹsə́m ó bô wa á ḿbɛ́ sí anə́ ébibigan. Wǎmēn waa dzə́ŋə́ hḿ naa ó tə̄gə wá.”

Ńdɔ Káin ǎ dzó ai mǎnyāŋ Ábɛl nâ: “Ńkə̄lə́ byātə́bə.” Ǹnyie anə́ bə́ ngákwí áfūb, Káin a kǔ fɔ́ɔ́ mānyāŋ Ábɛl á yób, a manə́ wé.

Ǹtondôbə nyé ai Káin nâ: “Mǎnyɔ̄ŋ Ábɛl a nə hə́ ?” Káin nyé nâ: “Mǎyə̌m kig; yə mə nə ǹnɔ́ni mǎdzāŋ ?

“Ǹtondôbə nyé nâ: “Ǒ bɔ̄ yá ? Kíŋ məkǐ mə́ mānyɔ̄ŋ yayón e tíege á sí e zaa kwí ábə ma mú.

Ńdɔ̄ hḿ, amalá ai wa á sí, é sí ē yáí anyu díé, e nɔŋɔ́ məkǐ mə́ mānyɔ̄ŋ á mɔ́ móe.

Éyɔŋ wǎyi dzɔ syé, yǎngāwūm kig wǎ tɔ ebumá: wayi kə́ wandə́ŋədan ai sí ésə təge ai etɔbɔgɔ, wakə watúb. »

Káin nyé ai Ǹtondôbə nâ: Endə́gə́lə́ dzámā é lod yǎ ádǐd. »

Ǒ fə́bələ yǎ ma ai sí ésə, ńdɔ̄ fə mə bələ́ naa mə sɔbɔgɔ wǎ. Mayi fɔ́ɔ́ kə́ mandə́ŋədan nálā, makə matúb, abǒg tē hḿ ényɔ́ ósə a tóban ai ma nyé a wé mā.

Ǹtondôbə nyé ai nyé nâ: « Kǒkōá, sə̌ kig nálā. Ényɔ́, ósə ǎ yi wé Káin a yi bǐ éndə́gə́lə́ á táŋ biyɔŋ zamgbál. « Ńdɔ Ǹtondôbə a ngábán Káin ndəm, ḿból yə̄ nâ mod a tóban ai nyé, təge nyé wé.

Ńdɔ Káin a ngákódo Ǹtondôbə á mís, a kə́ lōŋ á sí Nôd, á mə̄kwí mə́ dzób yā Édēn.

Ńdɔ̄ Káin a ngáyəm ngál nyé a nɔŋɔ́ ábum a byé Hénok. Ńdɔ̄ Káin a ngálóŋ dzāl a yolé dzāl tē dzwé mɔ́n wōē Hénok.

Ńdɔ̄ Irâd a byálī ábə̄ Hénok, Irâd nyé a byé Mehuyáil; Mehuyáil a byé Metusaɛ̂l, Metusaɛ̂l a byé Lámɛk.

Lámɛk a ngánɔŋ biníngá bə́bɛ̄, m̀bɔ́g dzwé nâ Ada, ényɔ̄ m̀bɔ́g Tsila.

Ada a ngábyé Yabâl; énye a ngábɔ ésīá ébá bə́sə bányiŋ a bibɛ̌m bə́ bə̄lə́ fə biyə́m.

Mǎnyāŋ á ngābə́ dzwé nâ Yubâl, ésīá ébá bə́sə̄ bábom mvɛ́d bə́ lɔ́ŋɔ̄ fə miǹdiŋ.

Tsíla nyé a byé Tubâl Káin, ésīá ébá bə́sə̄ bə́ lwí bikie; kál Tubâl Káin dzɔɔ é tɔá dzwé nâ Naama.

Ńdɔ̄ Lámɛk a ngádzó ai biníngá bóé nâ: "Ǎda, mína Tsila, vógólān kíŋ dzáma, mína bəyál bə́ Lámɛk, bíégán é dzam madzó ! Mə mǎwé é mod ǎ bālí mā tɔ enânga ngə́ é bimi ma.

Ngə́ Káin a kunuban biyɔŋ zamgbál, Lámɛk nyé a kunuban biyɔŋ məwóm zamgbál ai zamgbál !"

Ńdɔ Ádam a ngábad yə̌m ńgál wōé a byé mān fám, a yolé nyē dzwé nâ Sɛ́d; nyé naa «Zambá ā dúgan ma və́ ékokoma efə́ á mənyian mə́ Ábɛl yǎ Káin a ngáwé.”

Ńdɔ̄ Sɛ́d nyé a ngábyé mɔ́n, a yolé nyē dzwé nâ Énosh. Énye a nə́ é mod osú nə́ a kái lóē dzwé Ńtondôbə. [1] Éva a tian nâ “ávə̄ enyiŋ”. Bod bəvɔ́g bálóē fə̄ nâ: Éfa nálā wâtian nâ: “efas” Ádam, amú Éva a nə efas Ádam .

Kálara mvɔŋ bod Ádam hḿ nyɔ̄: Ámōs Zāmbá á ngābonde bod, ńdɔ a ngákom nyé êfulán Zāmbá.

A ngábonde ǹnóm ai ǹgál a máá bɔ̄, a yolé fə̄ bɔ́ dzwé naa mod, ámōs bə́ ngábondeban.

Ádam a ngányiŋ mim̀bú ǹtɛd ai məwóm mə́lɛ́, ńdɔ ǎ zu byé mɔ́n á évəgələ ai á éfulán dzíé, a yolé nyē dzwé nâ Sɛ́d.

Válā Ádam a byé yǎ Sɛ́d, ńdɔ a ngábad nyǐŋ mīm̀bú miǹtɛd mwom, a byé bɔ́n bə́ fám ai bɔ́n bə́ bīníngá.

Məlú mə́ enyiŋ mə́ Ádam mə́sə̄ mə́ ngákwí mīm̀bú miǹtɛd ebǔl ai məwóm mə́lɛ́, ńdɔ ǎ zu wú.

Sɛ́d á ngānyiŋ mim̀bú ǹtɛd ai mim̀bú mítán, ńdɔ ǎ zu byé Énosh.

Á mvús abyálí Énosh, ńdɔ̄ Sɛ́d á ngābad nyǐŋ mīḿbú miǹtɛd mwom ai zamgbál, a byé bɔ́n bə́ fám ai ébá bə́ bīníngá.

Məlú mə́ enyiŋ mə́ Sɛ́d mə́sə̄ mə́ ngákwí mīḿbú miǹtɛd ebǔl ai mim̀bú áwôm ai míbɛ̄, ńdɔ ǎ zu wú.

Énosh a ngányiŋ mim̀bú mə̄wóm ébǔl, ńdɔ ǎ zu byé Kenân.

Á mvús abyálí Kenân, ńdɔ̄ Énosh a ngányiŋ mim̀bú miǹtɛd mwom ai awôm ai mítán, a byé bɔ́n bə́ fám a ébá bə́ bīníngá.

Məlú mə́ enyiŋ mə́ Énosh mə́ ngákwí mim̀bú miǹtɛd ebǔl ai mim̀bú mítán, ńdɔ ǎ zu wú.

Kenân a ngányiŋ mim̀bú mə̄wóm zamgbál, ńdɔ ǎ zu byé Mahalalêl.

Á mvús yə̄ nâ a byé yǎ Mahalalêl, ńdɔ Kenân a ngábad nyǐŋ mīm̀bú miǹtɛd mwom ai məwóm mə́nyi, a byé bɔ́n bə́ fám ai ébá bə́ bīníngá;